Die Blamaasch min verwechsltn Rammler

Der Helm iss a erfolgreicher Hosnzichter. Fir seina schwarzn "Kleinsilber" hot'er scho an Haufm Urkundn gricht, wall bei seina Hosn die Hoorschpitzn immer gor so schee silbrich glänzn. Außerdem schmeggt dess Fleisch von derra Rass bsondersch guud. "Letzta Weihnachtn hob'ich man Rammler gschlacht - Kerl, do hamm'sa dahamm olla gschmatzt, wie'mer na gessn hamm", hot der Helm kerzlich zu san Freind Ludwich gsocht, der woss im Nachberdorf selber aweng a "Kleinsilber"-Zucht hot.

Vorgestern iss der Helm mit seiner schennstn Häsin bei san Freind aufgedaucht. "Ludwich", hot'er zer san Kumpl gsocht, "ich glaab, die Häsa iss heit hitzich - derf ich sa zer dein Rammler in Schtoll nei do, damit'er sa deggn ko?"

"Ka Broblem", hot der Zichter-Kamerod Ludwich vuller Verschtändnis gsocht. Also hamm'sa dess Hosn-Weibla zern Rammler nei - und hamm die zwa Viecher darchs Gidder beobacht. Obber Dunnerkaal: Der Rammler hot und hot net dergleing gedoo! Die zwa Hosn hamm sich bloß beschnubbert, sänn dauernd im Kreis rum k"hupft und hamm friedlich mitnanner gschbillt. "Der iss fei sonst ziemlich aktiv", hot der Ludwich san Rammler verdeidicht, "ich wass aa net, warum sich der heit so bleed o'schtellt und net nauf schbringt!"

Nooch ana Schtund hamm die zwa Männer dess gscheiterta Exberiment abgebrochn. "Do lefft heit nix", hot der Ludwich fachmännisch festgschtellt. Er hot dess entdaischta "Kleinsilber"-Weibla widder ausn Schtoll raus k'hullt und aweng gschtreichlt - und do iss'na aferamoll der Saafnsieder aufganga. "Menschnskind, Helm", hot'er gegrinst, "dess iss doch gor ka Häsin, sondern selber a Rammler!"

Dann hot sich dess Missgschigg schnell aufgeglärt. "Ach Goooodla", hot der Helm gejammert und hot sich mit der flachn Händ auf sei Schtern nauf k'haut, "do hob ich Debb an Weihnachtn na folschn Hosn gschlacht!" Firn Ludwich san mehrfach mit "Gold" brämiertn Rammler wor die Ehr widder hergschtellt und der Helm iss mit seiner "entlarvtn" Häsin hamm ganga, und zwor um zwa Erfohrunga reicher: Schwarza "Kleinsilber"-Hosn schaua sich olla zern Verwechsln ehnlich - und Zichter sänn holt aa bloß Menschn... Gerch