Dess Haus schdedd middn in Hof und hot vier Schtoggwerk. Im Erdgschoss ärbert a Zahnorzt, im erschtn und im zweidn Schtogg gibts jeweils a Braxis voneran Fachorzt, und untern Dachjuchheh werrd dess Gsundheits-Zendrum durch a "Massage-Praxis" kombleddiert, wo die mollicha Swetlana ols "Scharfe Russin vom Ural" ineran feina Gewerberaum samst Sauna, Whirl-Buul und Dobblbedd ihra männlichn Kundn von Verschbannunga befreit.

Kerzlich hot der Dokter im zweitn Schtogg sei Braxis aneran auswärtinga Kolleng verkaaft - und der hot gleich moll iber die oldn Schildla außn an der Hauswänd und drinna im Lift mit Deesa a Bladd Babbier nauf gebicht, wo sei Noma draaf gschtandn woa. Die Bazientn solltn holt wissen, dass etzert a annera Dokter do iss. Obber Dunnerkaal! Im Aufzuuch hamm erchetz welcha Gribbl fortner dess Babbier vom Schild ro gerissn. Zwelfmoll hot der neia Dokter dess Bladd immer widder frisch ibersch Schild gebicht, obber dann iss na der Unfug zer bleed worrn - und er hot den Frevl bei der Bollizei ogezeigt. Auf die Idee, dass'er einfach a neis Schildla machn lässt, iss der Weißkiddl in seiner Wuud einfach net kumma.

So iss also die Anzeich bei an Schdaatsanwolt geland - und der hot entschiedn: In den Lift werrd sofodd a Kamera inschdalliert, damit der frecha Gauner ban Runterreißn vom Babbier auf frischer Daad derwischt werrd. Leider gibt's obber etzert neia Ärcher! Die Kamera im Lift iss neemlich fir der Swetlana ihr horizondals Gewerbe a schwera Gschäftsschädichung, wall doch ihra Kundn lieber anonym bleim und net gfilmt werrn wolln, wenn sa zur "Scharfen Russin vom Ural" in vertn Schtogg nauf fohrn. Die Swetlana hot jednfolls weecher ihrn schwern Umsatzverlust an Rechtsanwolt eigscholtn - und der fordert, dass die Kamera im Lift sofodd widder abgebaut werrn muss.

Die Anzeich bei der Bollizei, dess langa Brodokoll, die Ärbert bei Gericht, der aufwändicha Einbau von der Kamera im Lift, der Umsatzschwund bei der Swetlana, ihr deira Advokaad und demnäggst widder der Abbau von derra Iberwachungs-Kamera - in ana Demmogradie herrscht holt Ordnung, aa wenn der Kampf ums Recht hunnert moll so deier iss wie schnell a neis Schild fir 50 Euro...

Die Ingrid lebbt nuch bei ihra Eltern in der Marienschdraßn in Hof. Seit zwa Wochn issa widder moll frisch verlibbt - und in Gedankn an ihrn neia Freind vergisst sa rundrum olles. Vorgestern wollt sa mit ihrn 13 Johr oldn Mazda zer frieh in die Ärbert fohrn, obber wie sa grod na Audoschlissl ins Zindschloss gschdeggt hot, hot ihr Freind aufm Händy ogerufn. Die Ingrid iss also widder ausgschtieng und hot ewich mit ihrn Schätzla dellefoniert. Dabei hot'sa aweng an den Gnopf inna an der offna Autodier rum gedriggt - und wie der Deifl sei Gschbill hot: Aferamoll iss aus Versehng die Dier zugfolln. Etzert wor dess olda Auto kombledd verrieglt - und drinna wor der Zindschlissl gschteggt. Die Ingrid musst zer Fuß in die Ärbert laafn und hot ibersch Händy ihrn Vadder iber dess Missgschigg informiert. "Du bissd doch a older Bastler", hot'sa ihrn Vadder bezirzt, "schau moll, obst dess Auto widder aufbrängst - mei weißer Mazda schdedd vor unnern Haus in der Marienschtraßn".

"Hao", hot der Vadder zu seiner Ingrid gsocht, "der Babba kimmert sich scho drum". Also iss der Vadder in san Hobby-Keller nunter und hot auseran Schub an langa Schwaaßdroht raus gfingert. Mit der Zanga hot'er dess End vom Droht zu ana Schlinga gedreht, dann iss'er nauf zu der Dochter ihrn Mazda ganga und hot sei Gligg browiert. Zwischn Fenster und Dier-Rahma wollt der Vadder den Droht vorsichdich ins Auto nei schiem, damit'er inna den klan Gnopf mit der Schlinga derwischt und nauf zicht, dann wär die Dier widder entrieglt.

Der Vadder iss zwor a gschiggter Heimwerker und hot sogor scho'moll der Oma ihr gebrochns Gebiss miteran "Alleskleber" widder rebbariern kenna, obber etzert hot na dess Gfiesl mit den Droht fei na Schwaaß auf die Schtern gedriem.

Aferamol glopft na middn in derra schwierichn Ärbert jemand von hintn auf die Schulder. "Woss machn Sie dä an man Auto?", hot a fremma Mo na Vadder zur Red gschdellt und wollt den vermeindlichn Autodieb, den woss'er auf frischer Daad erdabbt hot, gleich in Schwitzkastn nehma. Es wor a ziemlichs Gerangl, bis sich dess Missverschtändnis aufgeglärt hot - der Ingrid ihr Mazda wor neemlich 20 Meder weider vorn gebarkt. Ums Hoor wär bei derra Verwechslung der Vadder, der woss sei Leem lang a friedlicher und braver Mensch woa, min Einbrecher-Werkzeich in der Händ ols Autoklauer verhaft worrn...

Der Erich iss zwor erscht 53 Johr old, obber ols Außndienstler, ols Vadder von zwa Maadla in der Bubberdeed und ols Vergniegungsvorschtand im Schitznverein iss'er dermooßn gfordert, dass'er jedn Frieh vier Dableddn nehma muss - a klana weißa geecher zu hoha Bluuddrugg, a gelba weechern Cholesterin, a griena firsch Herz und a blaua fir die allgemeina Energie. "Meiden Sie jede Aufregung", hot kerzlich erscht widder der Dokter zern Erich gsocht, "sonst müssen Sie mit dem Schlimmsten rechnen!"

Drotz derra Warnung iss der Erich letztn Sonndooch mit seiner Fraa und die zwa Maadla aferan Weihnachtsmarkt ins Erzgebirch gfohrn. Wall der Erich a schlauer Mo iss, sänn'sa erscht schbeed am Nochmiddooch los gemacht. "Dann kumma'ma wengstns net ins gressda Gewerch nei", hot der Erich gsocht, obber dess hot sich leider ols a Fehleinschätzung erwiesn. Auf den Weihnachtsmarkt woa neemlich na ganzn Dooch der Deifl los - und nadirlich sänn sämtlicha Barkblätz besetzt gewesn. Im Auto hamm die Fraa und die Kinnder min Vadder gschdriddn, wall'er dauernd durch olla Schträssla gezugglt iss und ewich ka Liggn gfunna hot. Bei derra Such iss der Vadder auf zerletzt in a Sackgassn nei geroodn, wo olles vuller Auto gschtandn woa. Die Old hot ihrn Mo dess Rindviech nauf und nunter k'haaßn, und ban Riggwärtsfohrn iss der Vadder dann aweng aufn Randschtaa nauf gerumblt - do hots an laudn Buscher geem und der hintera rechta Raafn woa geblatzt! Aa dess nuch - a Bladdn!

Der Erich hot zwor scho 180 Bluuddrugg k'habt, obber etzert ging dess Deoder fei erscht richtich los: Raafn-Wechsl middn in derra enga Gassn - der arma Erich! Goddseidank hot'er im Handschuhfach die "Betriebsanleitung" gfunna, wall allaans wär'er verroodn und verratzt gewesn. So hot'er sich langsam durch die schriftlinga Anweisunga geärbert: Ersatzrod unter Kofferraum raus, Werkzeich ausbaggn, Woongheber eisetzn, Auto aufboggn, dess kabudda Rod abschraum - obber do wär der Erich fast verriggt worrn, wall die grußn Schraum weechern Rost an der Felgn ziemlich festgfressn woan. Die Mudder hot etzert werglich Angst gricht, dass na Erich bei den Gewerch gleich der Schlooch drifft, obber der hot net aufgeem. Inzwischn woasch scho finster - und wie der Erich vier Minuddn vor sechsa mit seiner Mondaasch endlich ferrdich woa, hamm rundrum die Zuschauer Beifoll geglatscht.

Ollerdings hot der Weihnachtsmarkt um sechsa zugemacht. Der Erich hot an Ort und Schdell nuch gschwind zwa Bluuddrugg-Dableddn gschluggt, dann sänn sa olla widder hamm gfohrn. Fir die ganza Familie woa der Weihnachtsmarkt im Erzgebirch drotzdem a Erlebnis, woss sa so schnell net vergessn...

Im vergangana Johr hot's dahamm ban Werner am Haalinga Amd ziemlichn Zoff weechern Chrissbaam geem, obber heier soll olles besser werrn.

Fir na Baam iss scho immer der Werner verantwortlich. Er kaaft na jeds Johr oder klaut na ausn Wold, schperrt sich am Haalinga Amd karz vor der Dämmerung dahamm ins Wohnzimmer ei und schmiggt dess Baamla mit weißa Wadda und Lamedda, mit bunta Gloskugln und Kerzn. Dann hängt'er an die Äst der Mudder ihra Blätzla no und setzt zern Schluss oom a silberna Schpitzn nauf. Anschließnd leecht der Vadder sämtlicha Gschenker unter na Baam, ladd miteran Gleggla - und schberrt die Wohnzimmerdir auf, damit die Bescherung ofanga ko.

Vorigs Johr iss leider olles daneem ganga!

Vor lauter Schdress hot der Werner san Chrissbaam erscht am Haalinga Vormiddooch kaafn kenna, wo's aufm Markt bloß nuch elenda Schtaudn gibt. Er hot werglich an jämmerlichn Schterzl derwischt - obber besser so a zerzausta Fichtn wie gor nix, hot sich der Werner gedacht. Er hot die grumma Äst miteran Schnirla zammgewigglt und den Baam untern Arm geglemmt. Weecher seina Wuud, wall'er nix Schenners derwischt hot, iss der Werner aufm Hammweech in sei Schtammwertshaus eigekehrt - er hot auf den Frust dringend an Schnabbs gebraucht. Na Baam hot'er draußn im Gang nebern Klo an die Wänd gelahnt - und drinna hot'er sich mit ziemlich finstera Miena an Schdammdisch no k'hoggt. Er wollt san Ärcher eingtlich bloß miteran aanzinga Obstler nunter kibbn, obber es sänn am End drei dobblta "Willi" und fimf Seidla Bier worrn.

Karz nooch na Zwelfer-Laitn iss dann der Werner miteran schwern Zinder und min grumma Chrissbaam dahamm ins Haus nei gschwankt. Die Old hot gedacht, sie sicht net richtich - und hot ihrn bsuffna Mo sofodd rund gemacht. Obber der Werner hot von derra Moralbreedicht nimmer vill mitgricht, wall'er sich gleich aufs Kannabee nauf leeng musst - so hot's na gedreht. Und während der Werner im Wohnzimmer gschnarcht hot, iss der Mudder nix annersch iebrich gebliem, wie dass'sa die grumma Schdaudn selber gschmiggt hot. Erscht zur Bescherung iss der Werner widder aus san Blädderer aufgewacht - jednfolls woa am Haalinga Amd und an die Feierdooch der Hausseeng schief k'hängt.

"Wehe, dess gibt heier widder so a Deooder wie letzts Johr", hot die Hermine ihrn Werner gewarnt, "dann loss ich mich scheidn!" Der Werner nimmt die Drohung ernst. Scho am Middwoch hot'er a herrlicha Nordtanna kaaft - und um sei Wertshaus macht er jedn Dooch an grußn Boong . . .

Vorigs Johr woa in der Silvesternacht die ganza Familie aus drei Generaziona um na Disch rum k'hoggt: der Opa und die Oma, Vadder und Mudder und die zwa erwachsna Kinner. Bunkt zwelfa hamm'sa auf dess neia Johr 2011 miteran Gleesla Broseggo ogschtoßn - und dann sänn sa sich olla um na Hols gfolln und hamm sich wechslweis abgschmatzt. Nooch den gemeinsoma Gfiehlsausbruch hamm'sa sich widder gsetzt - und dann hot die Mudder wie jeds Johr rund rum gfrocht, wie's dä mit die gudn Vorsätz firsch neia Johr ausschaut.

Ols erschtn hamm olla na Vadder ins Visier genumma - und der hot gleich aweng verscheemt in sei Glos nei gschaut. "Ich wor heit frieh auf der Wooch", hot'er dann gsocht, "und bin fei selber derschroggn: 107 Kilo - mei Leems-Heggstgewicht! Ich muss heier auf jedn Foll aweng abschgpeggn".

"Dess kimmt vom Bier", hot die Mudder gleich erglärt.

" ...und vom Bressagg", hot der Opa fachkundich ergänzt.

" ...und von die Erdnissla ban Fernsehng", hot der Gunga die Listn vollschtändich gmacht.

Der Vadder hot dief gschnauft. "Wennst miech freggst: Ich glaab, dess kimmt aweng von olln dreia", hot'er in seiner ganzheitlinga Betrachtung vor sich hie fillosofiert - und dann hot'er san eiserna Vorsatz bekannt geem: "Im neia Johr iss endgildich Schluss mit die zwa Seidla Bier zern Amd-
essn".

" ...und min Bressagg!!", hot der Opa gleich san Sempft dazu geem.

" ...und mit die Nissla", hot der Gunga die Abmoocherungskur vom Vadder widder kombleddiert.

Der Vadder wor mit olln eiverschtandn. Er hot sich vorhin sowieso mit Broodwärscht, Graut und Blätzla ziemlich iberfressn k'habt und wor in san Sessl drinna k'hängt wie a gebrellter Frosch. Mit vulln Bauch lässt sich dann bekanndlich a Diäd bsondersch leicht beschließn. Der Vadder mit seiner aufgebloosna Drumml woa sich jednfolls ganz sicher, dass'er die Hungerkur werglich darchhält. "Dess mach ich hunnertbrozendich", hot'er verschbrochn.

Desselba hot der Vadder ollerdings scho in der Silvesternacht vor zwa Johr gsocht. Sellmoll hot'er aa ogekindicht, dass er sei Esserei radikol eischränkn werrd, obber am Neijohrsdooch iss'er gleich widder schwach worrn. Wie damols die Mudder zer frieh um neina in der Kichn aufgedaucht iss, woa neemlich der Vadder im Nachthemm scho vor na offna Kiehlschrank gschdandn und hot mit madda Aang nei gschpecht, ob er do drinna aweng woss Guuds entdeggt. Ban Anbligg von drei Rollmebbs iss dann na Vadder sei Vorsatz auf Null-komma-nix zammgebrochn. Mit denner Rollmebbs und an frischn Seidla Bier hot der Vadder sofodd san schdechendn Darscht und san Hunger bekämpft - und der haalicha Schwur in der Silvesternacht hot sich gleich widder in Luft aufgeleest. Moll schaua, ob der Vadder san oldn Schwur endlich im neia Johr 2012 eihält... Gerch