Schwiericher Bollizei-Einsatz geecher an Erbresser

Die Bollizei iss ja immer "dein Freund und Helfer" - außer du werrscht nachts auf der Hammfohrt vom Wertshaus kondrolliert und hossd ann in der Krona hänga, dann iss aus mit der Freindschaft und du musst dein Babberdeggl abgeem. Obber sinst konnst fei iber unner Bollizei net kloong - die machn scho ihr Zeich! Manchsmoll missn'sa sogor unter erschwertn Bedingunga ärbern wie sellmoll druntn an der Hofer Siemer-Kerng, wo'sa an Erbresser auf frischer Daad verhaft hamm. Der Malefiz hot neemlich a Wochn vorher karz vor Middernacht ausn Klofenster raus gschaut und gsehng, dass im Hinterhof sei Friseer aweng a Dechtlmechtl mit ana Nachbera k'habt hot - olla zwa nadirlich verheiert, obber net mitnanner! Der heimlicha Beobachter, der woss sellmoll unter chronischn Geldmangl geliddn hot, iss sofodd auf die Idee kumma, dass'er etzert endlich a Goldmina gfunna hot, um san schtechendn Bierdarscht dauerhaft leschn zer kenna. Er hot also gleich am näggstn Dooch mit verschtellter Schtimm na Friseer o'gerufn und 500 Euro Schweigegeld verlangt. "Sinst", hot der Erbresser ins Händy nei'gflistert, "derzelle ich der Fraa Gemahlin, dass Sie es mit derra rothoorigen Nachbera ausm erschten Schtogg treiben! Das Geld kennen Sie mir unauffällich in einem Kuveer iberreichen - und zwor morgen um sieben Uhr früh an der Kreizung Sigmundsgroom/Ludwichschtraßn, also do drunten an der Siemer-Kerng".

Na Friseer sänn nooch derra Drohung erscht die Hoor zer Berch gschtandn, dann iss na der Oasch auf Grundeis ganga - er hot seiner Oldn olles gebeicht und anschließnd die Bollzei verschtändicht. Die Beamtn hamm dann in der Morgendämmerung dess Gelände an der Siemer-Kerng in Zivil umschtellt und aufn Erbresser gelauert. Die zentrola Leitung von derra Akzion hot a Bollizist in Uniform k'habt, der woss sich mit san Funkgereed ineran grußn Gnaggerla-Busch vor der Kerng verschteggt hot, wall'er do olles guud überschaua konnt. Obber karz vor siema hot die Verbrecher-Jochd a dramaddischa Wendung gricht: Aferamoll iss neemlich genau an den Busch, wo der Einsatzleiter drinna k'hoggt wor, a riesicher schwarzer Hund aufgedaucht, hot sei hintersch Baa k'hoom und an langa Schtrohl darch die Blädder nei gschbritzt - direggt nauf auf den unsichtborn Bollizistn. Der wollt den fremma Hundsfregger zwor mehrfach mit den bewährtn Kommando "gschd-gschd" widder vom Busch verjoong, obber leider ohne Erfolch - im Geengdaal: Wie der Hund mit seiner Saacherei endlich ferrdich wor, iss'er sitzn gebliem und hot sofodd geknurrt und die Zeh gfledscht, wenn sich der Bollizist ner bloß an Millimeder beweecht hot. Und während der Einsatzleiter schdarr und bei dodaaler Funkschtille im Busch Bluud und Wasser gschwitzt hot, hamm seina Kolleeng den Erbresser längst festgenumma und abgfiehrt. Unner Bollizei iss holt aa bei schwierigstn Einsätzn erfolgreich... Gerch