Dies ist eine mit page4 erstellte kostenlose Webseite. Gestalte deine Eigene auf www.page4.com06.12.2014
"An den Amd iss olles fir uns reservierd", hot'er gebrohld, "es gibd a exglusievs Essn mit Gansbrussd, Zanderfilet a la Scheff, Wildhosn-Keule und Rinderschmorbrodn - do ko jeder auswähln, woss'na am bessdn schmeggd". Der Rudi hot bei seiner Einloodung sogoa durchbliggn, lossn, dass evenduell nuch a Combo kimmd und zum Danz aufschbilld.
Ka Wunner, dass fir so an schenn Amd olla Eigeloodna zugsochd hamm - so woa dess Lokal zum Rudi seiner Feier brechndn vull. In seiner Begrißungsred hot sich der Rudi iber den reichn Besuch bsondersch gfreid - und hot ollna "Gudn Abbedidd, vill Darschd - und dudd eich kan Zwang o" gewinschd. Dess hamm sich die die Gässdn nat zwamoll soong lossn, und dess feina Essn, der Wein, dess Bier und die Schnäbbsla hamm ihna dichdich gschmeggd. Wie obber nooch drei Schdundn die erschdn hamm ganga sänn, woa die Iberraschung gruß: Vom Kellner hamm neemlich die Gässd erfohrn, dass der Rudi bloß fir jedn zwa Gedränke ibernimmd - olles annera, einschließlich na Essn, mussd jeder selber zohln. Do hamm die eigloodna Freind gschaud wie die Aachhernla - und die Schdimmung iss sofodd aufn Nullbungd gsunkn. "So ein Aufzwerner", hot der Franz zu seiner Fraa gsochd, "obber wadd ner ab - den gib ich scho!"
Mit Wuud im Bauch hot der Franz - außer seiner erschdn zwa Bierla und von der Oldn zwa "Pina Colada" - sei deira Zech samsd Gansbrussd, franzeesischn Rodwein und drei dobblda Obsdler bezohld und iss grimmich min Daxi hamm gfohrn. Obber dann wolld der Franz na Jubilar Rudi nuch aans auswischn. Dessweecher hot'er gleich dess Lokal ogerufn und na Scheff verlangd. "Hier ist die Polizei-Inspektion Hof", hot'er sich gemeld, "Ihr Lokal ist wahrscheinlich einem Betrüger aufgesessen´."
"Wieso?", hot der Mo am annern End verdadderd gfrochd. Draaf der Franz ols vermeindlicher Bollizisd: "Bei mir steht der Anzeige-Erstatter und behauptet, er sei in Ihrem Restaurant zu einem 50. Geburtstag eingeladen gewesen und musste bis auf zwei Getränke die Zeche selber bezahlen, obwohl er nur fünf Euro einstecken hatte. Ich frage Sie: Ist die betrügerische Person noch anwesend?"
"Ja", hot der Scheff gsochd - und der Franz hot san lezdn Drumbf ausgschbilld: "Wir sind in zehn Minuten bei Ihnen und nehmen den Mann fest!" Dann hot der Franz na Heerer aufgeleechd und endschbannd gelächld. Ob der "Betrüger" anschließnd dess Lokal im Dauerlauf verlossn hot, iss ollerdings net bekannd... Gerch
13.12.2014
Letzda Wochn sänn na Werner seina Schwiecherleit fir a boor Dooch auf Bsuch kumma. Obber net bloß dess olda Eheboor iss in Hof aufgedauchd, sondern die hamm aa ihrn Hund dabei k'habt. Der Werner iss ziemlich derschroggn, wie er seina Schwiecherleit vor na Haus am Audo begrießd hot. Hindn aufm Riggsitz woa neemlich der "Bello" geleeng - a kullschwarzer, zoddlicher Neifundländer, gruß wie a Kalb. Der "Bello" wäa fassd net durch die Audodiir raus kumma, so riesich woa dess Viech. Obber wie'er endlich hausn woa, hot'er gleich dreiherzich in der neia Umgebung rum gschniffld und na Werner sofodd moll freindschafddich die Händ abgschleggd.
Dann sänn der Werner und die Schwiecherleit samsd Keffer, Daschn und Hund ins Haus nei ganga und hamm dess Gebägg die Drebbn nauf in driddn Schdogg gschlaafd. Im Wohnzimmer hamm'sa sich anschließnd vill zern derzelln k'habt, wall'sa sich ja sooo lang nimmer gsehng hattn. Karz vor na Amdessn hot dann die Schwiechermudder gsochd: "Etzerd muss unner 'Bello' moll Gassi geh". Obber Dunnerwedder! Der Hund iss draußn vor der Wohnungsdiir im Drebbnhaus schdeh gebliem und hot ka Schriddla mehr gemachd. Die Schwiechermudder hot gleich an Verdachd k'habt, warum der "Bello" beweechungslos vor der Drebbn gschdandn iss und bloß aweng bleed schaud hot. "Mir hamm doch dahamm an Bungaloff, do iss olles eem und es gibd kana Schdeffala", hot'sa gsochd, "der Hund mussd nuch nie a Drebbn nunder geh." Dess woa zwoa a richdicha Erglärung, obber die hot nix genitzd: Erchetzwie mussd ja der vierbaanerda Goliath fir san Zisch die Drebbn nunder gebrachd werrn. Und wall olles guda Zuredn erfolglos woa, hamm der Werner und sei Schwiechervadder den riesndrumm Hund von hindn gschoom und gschoom, so dass'er auf der Drebbn langsam aa Schdeffl nooch der annern nunder gerudschd iss. Am zweidn Halbschdogg hot sich obber der "Bello" dermooßn gewehrd, dass die Männer sogoa ihra Weiwer hulln mussdn, dann hamm'sa den 50 Kilo schwern Hund hoch k'hoom und auf die Arm nunder ins Baderr gedroong. Nooch san Gschäfdla drundn im Bark iss der "Bello" allaans die Drebbn widder nauf - dess woa ka Broblem. Obber runderwärrds iss fei der "Bello" drei Dooch lang ums Verreggn net selber ganga - jedsmoll mussdn die vier Männer und Weiwer ihrn Liebling auf die Arm ins Baderr nunder droong. Gfluuchd hamm'sa jedsmoll wie die Kuddscher, wall's zuganga iss wie bei die dibedischn Scherpa, die wossn immer schwern Lassdn aufn Himalaya nauf schlaafn - bloß in umgekehrda Richdung: in Hof hamm die vier Leit net naufwärrds gekeichd, sondern nunderwärrds. Na "Bello" hot die Rumdroocherei inzwischn sichdlich Schbooß gemachd - ganz im Geengsatz zum Werner, der woss sowieso immer aweng Ärcher mit seina Lendnwerbl hot. Wie jednfolls die Schwiecherleit nooch drei Dooch widder abgereisd sänn, hot der Werner drei Greizla gemachd. "Ich mooch ja deina Elldern", hot'er zer seina Fraa gsochd, "obber etzerd bi'ich fei froh, dass'sa forrd sänn, sinsd hätt'ich mir nuch an Bandscheim-Vorfall eigfangd..."
20.12.2014
Denn der wohra Charaggder von uns Männer, sochd mei Martha, zeichd sich, wenn a Mo aweng an Schnubfn hot. "Dreimoll niesn - und scho leechder eich ins Bedd nei und lossd eich bfleeng wie a Schwergranker", hot'sa vorgessdern behaubd - und iss dann fei direggd aweng berseenlich worrn. "Schau dich doch selber o: Letzda Wochn hossd dich aufs Soffa geleechd, bloß wallsd aweng haaßa Händ k'habt hossd. Dann hossd sofodd in unnern Doggder-Buch rum gelesn, woss dess fir a gfährlicha Grankerd iss, die woss dich derwischd hot - und jeda holba Schdund mussd ich bei dir Fieber messn."
Do siggsd amoll, wie mer nuch verhehnd werrd, wenn ann a Virus niederschdreggd! Ich gib ja zu, dass ich nooch meiner Infeggzion jedn Berichd iber die asiaddischa Gribbn ganz genau gelesn hob - aus reiner Vorsichd. "Olda", hob ich zer meiner Martha gsochd, "ich hob wohrscheins den Virus, an den woss vor drei Dooch in Rumänien a Mo gschdorm iss." Obber wie reagierd in derra ernsdn Looch mei Olda?! Gekicherd hot'sa! "Jammer net rum", hot'sa gsochd, "ihr Mannsbilder sädd doch aaner wie der annera! Erschd liechder wehleidich rum und lassd eich eireim und bedaddschln wie a glans Kind - und wenn's auf Freidoochamd zugedd, wo sich der Schdammdisch widder driffd, nocherd setzd a wundersomer Heilprozess ei. Aferamoll kennder widder allaans aufschdeh, die Schdimm werrd fessd und sogoa dess Fieber iss verschwundn."
Do frooch ich etzerd meina Leidnsgenossn: Muss'mer sich sedda Beleidigunga gfolln lossn? Ich woa jednfolls letzdn Freidooch ganz schee sauer auf mei Olda. Schdadds dass'sa froh woa, dass ich mich vom Granknbedd widder erheem konnd, hot'sa mich ols Lamendierer hii gschdelld. "Ich brauch etzerd dringend aweng frischa Lufd", hob ich dessweecher zur Martha gsochd und bin zer Fuß ausn Haus ganga. Dass mich der Weech aferamoll direggd am Werrdshaus verbei gfiehrd hot, woa reiner Zufoll - und durch die frischa Lufd hob ich mich inzwischn widder so gud gfiehld, dass ich gleich aweng an Eikehrschwung gemachd hob. So konnd ich wengsdns meina Schdammdisch-Briider vor den Virus warna, der woss mich ums Hoor weggeraffd hädd...
24.12.2014
Der Hermann, sei Fraa und die zwa Kinner loodn neemlich zur Bescherung immer die näggsdn Verwandtn ei, damit'sa sich olla mitnanner am Haalinga Amd awengla zamm sezn und woss derzelln. So sänn na Hermann seina zwa Briider mit ihra Weiwer und Kinner kumma, außerdem der Schwoocher samsd Fraa, drei Gunga und der Schwiechermudder. Der Schwoocher hot sogoa san grußn Hund mitgebrachd. "Man Nero", hot'er erglärd, "man Nero muss ich immer mitnehma, sunst beißd'er mir dahamm aus Wuud, wall'er allaans in der Wohnung iss, widder dess Kannabee zamm". Und dann wolld der Schwoocher gleich moll a glaana Vorfiehrung geem. "Blaaaz!!", hot'er gebläägd, obber der riesicha schwarza Hund hot bloß aweng min Schwanz gewedld und na Herrla am Zwiggl rum gschniffld. "Der Hundsgribbl horchd widder moll net", hot der Schwoocher iber san missgliggdn Dressur-Aggd vor sich hie gebrammld.
Um Bunngd siema wor dann wie jeds Johr die gemeinsoma Bescherung. Samsd der ganzn Verwandtschafd mit Kinner und Schwiechermudder woan'sa dessmoll zer sechzehnd im Vorsool gschdandn und hamm draaf gewadd, dass'sa der Hermann endlich zur Bescherung nei in die guda Schdumm lässd. Der Hermann hot dawaal drinna im Wohnzimmer olla Bäggla undern Chrissbaam geleechd - do hot's fei gleich ausgschaud wie bei der Bossd.
Nocherd hot'er miteran Gleggla gebimmld.
"Ezerd iss soweid", hot draußn aner gsochd, und dann sänn'sa olla zamm darch die Diir ins Wohnzimmer nei gewerchdd. Am schnellsdn woa der "Nero" - der hot sich gleich miteran Schbrung middn zwischn die Bäggla undern Chrissbaam k'hoggd, genau vor dess Schdoff-Säggla, wo ols Gschenk von der Mudder fir ihrn Hermann a Ring ungarischa Salami drinna woa. Der Hund hot ollerdings gedachd, dass dess Chrisskindla die Salami fir ihn mitgebrachd hot - und wenn der "Nero" a Warschd riechd, verschdedd'er kan Schbooß mehr!
Auf jedn Foll hot der Hund undern Chrissbaam jedsmoll gedoo wie a wilda Sau, wenn aner mit der Händ noocheran Bäggla langa wolld, wall doch der Nero gedachd hot, die wolln'na sei Salami wegnehma. So woa die ganza Verwandtschafd um den Chrissbaam rum gschdandn, und olla hamm'sa sehnsichdich auf die Gschenk-Bäggla gschaud, obber der "Nero" hot kan noo gelossn.
"Dess hot ezerd kan Zwegg", hot der Schwoocher schließlich gsochd, "do miss'mer waddn, bis dass mei Nero amoll Gassi geh muss." Und der Hermann hot sei Olda aufgfordert, dass'sa dawaal die Brodwärschd mit Graud machn soll. "Ich hob außerdem a 15-Lidder-Fässla im Keller schdeh", hot'er na weidern Ablauf vom Haalinga Amd gschilderd, "dess hull'ich rauf, und dann werrd oge
zabfd".
Also hot der Hermann dess Bierfass ausn Keller rauf gschlaafd und im Wohnzimmer aferan Schduhl nauf gschdelld. "Den Zabfhohna drigg'ich mit der blangn Händ nei", hot der Hermann aweng angeberisch ogekindichd, "do brauch ich kan Hoomer."
Die ganza Verwandtschafd hot dann zugschaud - und sogoa der "Nero" hot untern Chrissbaam neigierich vorgeluurd, wie der Hermann na Messing-Hohna mit der Händ ins Schbundloch nei gedriggd hot.
Obber Dunnerwedder! Erchez woss hot net gebassd - und aferamoll iss dess Bier wie a Fondääna raus gschbrizd, dass in zwa Sekundn rundrum olla eigsaud woa.
"Ach Goodla, mei scheena Dabbeedn", hot die Mudder gejammerd.
"Ach Goodla, dess scheena Bier!!!", hamm die Männer gebläägd und na Hermann ols Reddung heggdisch die bewährda Meddoodn vorgschloong: "Drigg na Dauma aufs Schbundloch nauf!"
Im Wohnzimmer iss dess reina Chaos ausgebrochn.
Ausn Fässla iss dess Bier droz na Hermann san Dauma raus gezischd, der "Nero" hot undern Chrissbaam gebelld und die Zeh gfleddschd, die Mudder hot weecher der voll gschbrizdn Dabbeedn Rodz zer Wasser gegrinna - und obwohl'sa olla immer nuch ohne Gschenk mit leern Händn do gschdandn sänn, woa dess ezerd fei a scheena Bescherung...
Dies ist eine mit page4 erstellte kostenlose Webseite. Gestalte deine Eigene auf www.page4.com