Dies ist eine mit page4 erstellte kostenlose Webseite. Gestalte deine Eigene auf www.page4.com01.11.2014
Eingdlich iss der Erwin a friedlicher Mensch, der woss sich so schnell net aus der Ruh bränga lässd. Obber letzda Wochn hot'er ineran Werrdshaus im Franknwold die Beherrschung verlorn. Der Erwin hot sich neemlich scho doochlang auf a Schlachd- schissl gfreid - und hot nix Bees geahnd, wie ins gerammld vulla Werrdshaus a Mo rei kumma iss und freindlich gfrochd hot: "Darf ich mich mit zu Ihnen setzen?"
"Bidde", hot der Erwin gsochd - und dodermit wor die Underholdung erschd amoll zer End. Dass der fremma Herr a Veganer aus Berlin woa, konnd ja der Erwin net wissn. Wie sich dann der Mo an griina Salood und a Flaschn Schbratzlwasser beschdelld hot, hot hold der Erwin gedachd, dass dess beschdimmd so a arma Deifl iss, der woss in Bad Schdeem a Kur machn muss, wall'er zer hoha Bluudrugg und zer vill Kollesterin hot. Obber lang konnd'er iber die Grankerd von san Nachber net noochdenkn, wall die Bedienung die Schlachdschissl gebrachd hot: Wellfleisch, Bluud- und Leberwärschd mit Graud und Glees, aweng Leber und Nierla und a Schdiggla Rissl. Na Erwin hamm die Aang geglänzd, er hot an diefn Zuuch aus san Bierglos genumma - und wolld grod zern Essn ofanga, do hot sich der Veganer zer Worrd gemeld. "Sie wissen schon", hot'er zern Erwin gsochd, "dass dieses fette Essen Ihrer Gesundheit schadet - an das Elend der Schweine gar nicht zu denken."
Der Erwin hot ka Andworrd geem, sondern hot sich auf sei baradiesischa Schlachdschissl konzendrierd. Obber der Kurgassd hot net logger gelossn. "Diese Würste und das fette Fleisch sind das Schlimmste, was Sie Ihrem Körper antun können", hot'er widder ogfangd und hot auf san Salood gezeichd. "Wenig Kalorien, viele Vitamine - Salate sind die beste Ernährung, um gesund zu bleiben", hot'er erglärd, während na Erwin in der Vorfreid scho dess Wasser in der Guschn zamm geloffn iss. Wall obber der Veganer mit san Gewaaf ums Verreggn net aufk'heerd hot, iss der Erwin auf die Idee kumma, dass'er net lang rum schdreidn will, sondern gleich zum Geengangriff ibergedd. Er woa neemlich frieher ols "Richtschütze" bei der Bundeswehr - und woss'er bei der Addellerie gelernd hot, konnd'er etzerd
geecher die Nervnseech an san Disch guud eisetzn. "Der Richtschütze richtet das Geschütz durch horizontale und vertikale Bewegungen des Rohrs zur Zielbekämpfung aus", hamm'sa na sellmoll immer eik'hämmerd - und dess gleicha Brinziib hot'er etzerd auf san Deller befolchd: Er hot die bralla Leberwarschd in die richdicha Nahkambf-Bosizion gedrehd und dann mit der Goobl von oom ineran 45-Grod-Winkl nei gschdochn - raus gschbritzd iss a dinner, haaßer Schdrohl, der woss ols Volldreffer zielgenau aufm weißn Hemm vom Berliner Veganer eigschloong
hot. Der Erwin hot sich scheinhaalich endschuldichd, hot aweng gegrinsd - und hot sich dann
sei Schlachdschissl schmeggn lossn ... Gerch
08.11.2014
Obber letzda Wochn hot der Franz auf san ruichn Balkon a Erlebnis k'habt, dess woss'er so schnell net vergissd.
Der Franz woa amds mit seiner Gunda aufm 50. Gebardsdooch voneran Ärberdskolleeng. Die Schdimmung woa subber! Erschd hamm'sa Bier auseran Käggi gsuffn, dann siißn rumänischn Rodwein - und dazwischn immer moll an dobbldn Obsdler. Geecher Middernachd hot der Franz an kernichn Zinder k'habt, und auf der Hammfohrd im Daxi hot sei Gunda sogoa Schdernla gsehng, obwohls fei ziemlich gerengd hot. Dahamm sänn'sa olla zwa in die Wohnung nei gschwankd - und der Franz hot gleich zer seiner Oldn genuschld: "Mir iss ganz schlechd - ich geh vorsichdsholber gleich moll aufn Abberd". Die Gunda hot verschdändnisvull geniggd und iss dann mit waacha Gnie zern Abschminkn ins Boodzimmer nei gewaggld. Dawaal woa der bsuffna Franz vor der Gloschissl gegnied und hot forrdner gedachd, dass'er schbeia muss, obber dess woa a Fehlalarm. Dessweecher hot'er sich endschlossn, dass'er lieber naus aufn Balkon gedd und aweng frischa Lufd schnabbd, bevor'er sich ins Bedd nei leechd. So iss'er in Underhusn und Hemm naus aufn Balkon ganga, hot sich im Finsdern in san Korbsessl nei folln lossn und iss in san Rausch sofodd eigeratzd. Er hot goa nimmer bemerkd, dass sei Gunda nuch schnell die offna Balkon-Diir zugschberrd hot, bevor'sa selber wie Blei ins Bedd gsunkn iss. Die Gunda hot neemlich gedachd, dass sich ihr Mo immer nuch aufn Glo erleichderd.
Geecher dreia in der Frieh iss der Franz miteran Grunzer aufn Balkon aufgewachd - er hot vor Källd geglabberd und fimf Atü Drugg auf der Blosn k'habt. Obber Dunnerwedder, die Balkon-Diir woa zu! Der Franz hot an die Glosscheim gedrommld und laud nooch seiner Gunda gschriea, obber dess Schloofzimmer woa ja hindn naus auf der ruichn Seidn geleeng - und die Fraa iss weecher den rumänischn Rodwein selber wie nei genoogld im Bedd drinna geleeng. Die Gunda hot jednfolls nix k'heerd - ganz im Geengsatz zeran Nachber an Schdogg diefer. Der iss darchn Franz sei Gschraa aufgewachd und hot ausn Fensder zum Balkon nauf gebläägd: "Gebbd endlich a Ruh und lossd die annern Leit schloofn, ihr Gschwärrdl!"
Do hot der Franz mit schwera Zunga vom Balkon ro den Mo drundn mitgedaald, in wellera Noodlooch er woa - und dass'er sofodd geredded werrn muss. So iss also middn in der Nachd der zornicha Nachbar in Underhusn nauf in driddn Schdogg ganga. hot mit der Fausd an die Diir k'hämmerd und Schdurm geglingld, bis endlich, endlich wie a weißer Geisd die Gunda im Nachdhemm erschiena iss. Jeder von denner zwa hot gedachd, dass a Gschbensd vor ihn schdedd - und dess dridda woa ja holb derfrorn draußn aufm Balkon gschdandn und hot vor Drugg fassd in die Husn gsaachd. Dann hot sich olles aufgeglärd - bloß die Gunda mit ihrn leichdn Seier hot sich zwischn die zwa Männer in Underhusn aweng gewunnerd, warum immer nuch Geisderschdund iss, obwohl doch Middernachd scho lang verbei woa...
15.11.2014
Und wall im Lehrraum von der Feierwehr die Lufd ziemlich droggn iss, werrd zwischndurch aa immer aweng a Broseggo, a Riesling oder a Obsdler gezwidscherd. Zum Schluss missn die Bassdl-Damen jednfolls aufbassn, dass'sa mit ihra Schdrigg-Noodln iberhabst nuch die Maschn dreffn.
Lezda Wochn hamm'sa obber net gschdriggd, sondern woss ganz woss Neis ausbrowierd: Sie hamm "Duschgel" selber gemachd. Die Herschdellung von "Naturkosmetik" iss ja im Trend - und die Bassdl-Damen woan begeisderd, wie die Helga kerzlich vor-
gschloong hot: "Dess mach'mer aa amoll - und zwoa fanga'ma miteran Duschgel o!"
Beim näggsdn Dreffn hot die Helga sämmdlicha Zudaadn firsch Duschgel mitgebrachd - und gleich auseran schlaua Biichla woss vorgelesn: "Duschgel selber machen ist kein Hexenwerk - im Gegenteil: Es ist kinderleicht und macht Spaß, das Rezept nach eigenen Wünschen zu mixen." Nooch derra Verheißung sänn die 12 Weiwer aferan grußn Disch ans Werk ganga. Dess Rezebbd woa im Biichla genau beschriem: Mit Rosmarinwasser und Olivenöl, mit Hamamelis-Extrakt und Betain, mit Xanathan und Myrrhe, mit Pfefferminzblädder und Weihrauch hamm'sa ihr berseenlichs Duschgel zamm gemischd. Obber wie sa in die waabricha Massn am Schluss nuch an gräfdinga Schbruuz blaua Leemsmiddl-Farb nei gschidd hamm, woan sa vom Broseggo und von die Schnäbbsla offnboa selber aa scho aweng blau. Jednfolls hot die Helga am näggsdn Dooch ihrn achd Johr oldn
Buum dahamm in die Bodwanna gsetzd, hot na min neia Duschgel die Hoor gewaschn - aferamoll glingld dess Dellefon. Die Helga iss ins Wohnzimmer gewerchd und hot zehn Minuddn lang mit ihrer Schwiechermudder geredd. Dann iss'sa zerrig zu ihrn Buum ganga - und do hätt'sa fassd der Schlooch gedroffn: Der Gunger woa kitzblau in der Wanna k'hoggd, middn im blaua Wasser - dess neia Duschgel hot'na von Kobf bis Fuß eigfärbd k'habt. Net amoll mit der Warzlberschdn iss die Farb abganga. Es hot drei Dooch mit fimfmoll Duschn gedauerd, bis der Buu langsam widder sauber worrn iss. Blau saa iss hold immer gfährlich - egol, ob a Iberdosis Leemsmiddl-Farb dro schuld iss oder a Iberdosis Broseggo...
22.11.2014
Do hoggn die Aggademigger na ganzn Dooch beinanner und zerbrechn sich die Kebf iber die Ohrn von der Schbitzmaus oder iber "Holzpflanzen mit sekundärem Dickenwachstum", iber "nacht-aktive Lurche" und denner ihr " Imponierverhalten wie das Aufblähen des Körpers oder das Aufreißen des Maules" - und amds an der Hodell-Bor erholn'sa sich von denner Schdrabaazn und lossns bei Bier und dobblda Obsdler grachn, dass'a am näggsdn Frieh selber reif sänn fir a medizinischa Undersuchung iber Exblosiona im Kobf.
Bei den kerzlichn Kongress in der Schweiz hot sich ollerdings a ganz seldna Grubbm von Wissnschafdlern zamm gfunna - do hob'ich fei goa net gewissd, dass sedda Indelligenz-Bolzn iberhabsd exisdiern: dess woan neemlich "Humorforscher". Und die hamm bei ihra mehrjährichn Undersuchunga endeggd, dass die Menschn vill zer weng lachn. Vor 50 Johr, so hamm die Humorforscher raus gfunna, hot der normola Deitscha jedn Dooch 18 Minuddn gelachd - und heit bloß nuch sechsa. Mir sänn neemlich inzwischn, soong die Brofessorn, "eine depressive und unzufriedene Gesellschaft" worrn.
Etzerd wiss'mer endlich, warum so vill Leit zern Lachn nunder in Keller gänga: Wall ihr Konndo auf der Bank leer iss oder wall die Männer von ihrer Fraa rund gemachd werrn, wenn'sa widder so schbeed vom Werrdshaus hamm kumma, obwohl'sa dadd fei a Schdund vorher nuch ganz frehlich am Schdammdisch k'hoggd woan. Vielleichd ko'mer obber den gfährlichn Humorschwund abbremsn, wemmer sich auf Weihnachdn vom Chrisskindla an Lachsagg schenkn lässd, den woss'mer ban näggsdn Gschbräch min Scheff iber a Gehaldserhehung karz moll eischold. Oder mer schaud ineran Hofer Barkhaus aweng na Weiwern zu, wenn'sa riggwärrds inera Bark-Liggn nei fohrn wolln - so ko'mer die derzeid sechs Minuddn Lachn bro Dooch am bessdn widder schdeigern. Obber wenn mei Martha dess min Eibarkn heit in der Zeidung liesd, dann gud Nachd, scheena Baiera - do hob'ich fei in der näggsdn Wochn dahamm selber nix zern Lachn... Gerch
29.11.2014
Wenn a Eheboor nooch 60 Johr "Diamantene Hochzeit" feiern ko, dann werrd so a selldns Ereignis immer gruß gfeierd. Es kumma net bloß die Kinner und Enkl und Urenkl zern Gradderliern, sondern aa der Berchermassder oder sogoa der Herr Landrod erscheina miteran Foddografn und iberreichn na Jubl-Boor im Blitzlichd-Gewidder die "Nahkampf-Medaille in Gold", an schenn Blummer-Dobf oder an Fresskorb vuller Bresssagg, Salami, Bauernbrod, Nudl-Bäggla, Eelsardina-Konservn und Erdbeer-Mammalada. Aferan Dorf im Landkreis wäa kerzlich die Ehrung fir a "diamantene Hochzeit" obber ums Hoor schief geloffn.
Eingdlich wolld der Landrod Bär den zwa oldn Leitna selber zur Diamannd-Hochzich gradderliern, obber ihn iss woss dazwischn kumma, dessweecher solld sei Schdellverdreeder die Ehrung ibernehma, neemlich der Naalicher Berchermassder Stumpf. Der iss also gleich zer Frieh in dess Dorf zu die zwa Jubilare gfohrn und hot an der Hausdiir geglingld.
A olda Mo hot aufgemachd. "Griiß Godd", hot der Berchermassder freindlich gsochd, "ich bin der Vertreter vom ...." - merra konnd'er goa net erglärn, wall na der Jubilar gleich underbrochn hot. "Mir braung kan Verdreeder, wall mir kaafn nix", hot'er abgewehrd und die Diir zugschloong.
Der Stumpf woa zwoa aweng verdadderd, hot obber gleich nuch amoll geglingld, um dess Missverschdändnis aufzuglärn. "Mich schiggd der Dr. Bär", hot'er schnell gsochd, wie der Mo widder die Diir aufgemachd hot. "Mir braung aa kan Doggder, wall mir olla gsund sänn", hot'na der old Mo unwirsch underbrochn - und die Hausdiir sofodd widder zugschmissn. Obber der Naalicher Berchermassder kennd nadirlich die Volksweisheid "Aller guten Dinge sind drei" - also hot'er zern driddn Moll geglingld und gleich san Fuß in die Diir gschdelld, wie der Mo nuch amoll aufgemachd hot. Wie a Schnell-Schbrecher im Radio hot der Stumpf dann under der Diir a boa aufglärenda Sätzla ro gschbuuld, dann durfd'er mit ins Haus nei - und es iss nuch a scheena Ehrung worrn. Franknwäldler sänn hold erschdmoll missdrauischa Leit.
Ohne Voranmeldung werrd kaner ins Haus rei gelossn - weder a vermeindlicha Verdreeder, der ann wer-wass-woss verkaafn will, nuch a gewissa Doggder Bär, solang dahamm olla gsund sänn...
Dies ist eine mit page4 erstellte kostenlose Webseite. Gestalte deine Eigene auf www.page4.com