Dies ist eine mit page4 erstellte kostenlose Webseite. Gestalte deine Eigene auf www.page4.com03.10.2014
Allaans ban Gedankn an sedda kulinarischa Leggerbissn leffd na neemlich scho dess Wasser in der Guschn zamm - und er ko sich ums Verreggn net vorschdelln, dass sich mancha Leit ersazweis von Tofu-Wärschd, Soja-Fleisch, "Wiener Weizenschnitzel" oder "Veggie-Hack" ernährn. Firn Willi iss a "Grünkern-Brätling" die gressda Bedrohung fir Leib und Seele. "Lieber iss ich goa nix", hot'er kerzlich zer san aggademischn Schwiechersohn Sven-Detlev gsochd, der woss'na die gsundheidlichn Vordaaler von ana fleischlosn Ernährung erglärn wolld. "Aber du bist und bleibst halt ein sturer Omnivore", hot der Sven-Detlev aweng resignierd fesdgschdelld - und der Willi, der woss kaner Fliech woss zer Leid dudd, iss fei zornich worrn, wall'er gedachd hot, dass "Omnivore" a laddeinisch Schimbfworrd iss. Dessweecher hot der Sven-Dieter san Schwiechervadder sofodd aufgeglärd, dass dess bloß "Allesfresser" haaßd - und do woa der Willi widder beruichd.
Obber am lezdn Middwoch hot der Willi zerrigg gschloong. Do woa doch der "Welt-Vegetarier-Tag" - und der Willi hot fir sei Gesinnung Flagge gezeichd: Zum Friehschdigg hot'er Riehreier mit Schbegg gessn, middooch hot'er zwa Cörry-Wärschd mit Bommes nei gedrimmerd - und amds iss'er zur Brodessd-Veranschdaldung geecher die Veggedarier und Veganer ganga, neemlich ins Dorfwerrdshaus, wo sich im grußn Sool 120 "Omnivorer" zum Schlachdschissl-Essn gedroffn hamm. Bei Fassbier und Blosmusigg iss die friedlicha Demonsdrazion geecher na "Fleisch- und Wurst-Boykott" in bessder Schdimmung abgeloffn - bloß am näggsdn Dooch iss under die Daalnehmer angeblich aweng a Gichd-Ebbidemie ausgebrochn ...
11.10.2014
Ob Erdbeern oder Kohlrabi, Radiesla oder Garkn, Ebfl, Kerschn, Bern oder Kerbis - ban Hermann hot dess Obsd und Gemies jeds Johr a Greß erreichd wie ausn Bilderbuch! Neidischa Leit hamm na Hermann immer verdächdichd, dass seina Bflanzn bloß dessweecher so gigandisch wachsn, wall'er angeblich im ganzn Gaddn dauernd a selber zammgebrauda ultra-subber Geheimflissichkeid schbrizd, wo außer na Hermann kaner genau wass, woss drinna iss.
Vor zwa Johr iss der Hermann mit seiner Familie nooch Berlin gezoong, wall'er do droom a scheena Ärberd grichd hot. Middn in ana Gaddn-Kolonie an der Spree hot'er gleich a Schreber-Gärrdla gebachd - und feierd inzwischen in Berlin wie sellmoll in Hof ann Zuchd-Erfolch nooch na annern. Seina neia Berliner Schbeezl sänn fei aa scho missdrauisch und beobachdn na Hermann sei Baradies sogoa min Fernglos, wall'sa endlich wissn wolln, warum ban Hermann olles exblodierd. Obber der grinsd bloß aweng iber die Neigier - und hot seina Gaddnfreind lezda Wochn goa ganz ausn Haisla gebrachd. Er hot neemlich nachds an san Ebflbaam middn zwischn die Haufm "Golden Dilicious" heimlich nuch 15 Bern no k'hängd - die schenn gelb-griina "Williams Christ"-Bern ausn Subbermarkd hot'er mit dinna Nylon-Feedn an die Ässd fessdgebundn. Der wagglerda Balance-Aggd auf der Ladder woa net ungfährlich, obber er hot sich verlohnd: Den Berliner Kolonie-Exberrdn hot's jednfolls die Aang ganz schee raus gedriggd, wie'sa zer frie im Hermann san Schreber-Gaddn am gemischdn Ebfl-Bern-Baam dess "Hofer Wunner" gsehng hamm ...
18.10.2014
Unner Nachbera iss zwoa bloß 1,53 Meeder groß, obber sie wiechd 89 Kilo. Dessweecher hot'sa lezda Wochn beschlossn, dass'sa dringend abnehma muss. "Und dir schadd's fei aa nix", hot'sa gleich zu ihrn Oldn gsochd - und hot nuch ann draaf gsezd: "Du bissd neemlich inzwischn aa a ganz scheener Schbegger worrn!" Und dann hot'sa ihrn Edwin erglärd, woss kimbfdich dahamm aufn Disch kimmd: Soja-Wärschd, links drehender Joggurd, Gnäggebrod,
Griinkern-Brädling, Margarina, Pfefferminz-Dee, Limo! "Aus die Maus mit derra feddreichn Ernährung", hot'sa verkindichd. Na Edwin iss bei derra Bedrohung gleich aweng dess Bluud ausn Gsichd gewichn, obber er schdedd hold under der Fuchdl von seiner Gudrun - so iss'na nix annersch ibrich gebliem, wie dass'er sich in sei Schiggsol gfiichd hot. Am Schdammdisch bedauern'sa zwoa ihrn Freind, obber sie soong, dass'er an den Ungligg selber schuld iss, wall'er seiner Oldn nie richdich Zunder gibd.
Anfang der Wochn hob'ich na Edwin am Gaddnzaun gedroffn. "Und?", hob'ich na wie immer gfrochd. Obber er hot bloß abgewunkn. "Olles Scheisse", hot'er ganz madd gsochd. Do hot mich der Edwin dermooßn derbarmd, dass ich na gleich zern Grilln eigeloodn hob. "Kimmsd hold nocherd mit deiner Fraa riiber zer uns - ich leech an den wohrscheinlich lezdn warma Dooch im Herbsd aweng woss Scheens auf", hob ich den arma Deifl verschbrochn.
Um fimfa hot dann der Edwin mit seiner Oldn an unnerer Hausdir geglingld. Die Gudrun hot a Kiehldaschn in der Händ k'habt. "Du wassd doch, dass mir bloß feddarm essen", hot'sa gsochd, "dessweecher hob ich firn Edwin und mich zern Grilln a boor Soja-Wärschdla und zwa Flaschn Ziddrona-Limo mitgebrachd." Erschd wolld ich mich ja weigern, sedds vegedarisch Zeich aufn Grill zer leeng, obber dess hädd bloß Schdreid geem - so hob'ich die Soja-Wärschdla neber meina feddn Wamma gegrilld. Ban Essn hob ich gemerkd, dass der Erwin ewich auf denner moochern Soja-Wärschd rum kaid - und dass'er mich foddner beobachd, wie mir von der Wamma dess Fedd an die Libbn ro geloffn iss. Do hob'ich zer ihn gsochd, dass'er mit mir amoll a Schdiggla ninder zum Gmies-Gaddn geh soll, wall ich ihn amoll unnera Radiesla zeing will - und hindn am Treibhaus hob'ich na Edwin a Wamma geem, die woss ich undern Hemm verschdeggd hob. Kerl, hot der Edwin gschmazd! Und wie'mer widder zer die zwa Weiwer zerrigg kumma sänn, hot'er gligglich gelächld. Nooch zehn Minuddn hob'ich na Edwin dann nuch amoll die Dommaadn gezeichd - dessmoll hob ich außer der Wamma nuch a Fläschla Bier dabei k'habt. Der Edwin hot fei vor Dankborkeid feichda Aang grichd. Und wie'mer dann widder bei unnera Weiwer auf der Derrassn gsessn woan, hot der Edwin gschdrohld wie a Bfannakuung. "Do siggsd amoll", hot sich sei Gudrun gfreid, "dass unner feddarma Kossd man Mo werglich guud dudd ..."
25.10.2014
Wall der Robert von san Fach werglich woss verschdedd und außerdem ban Eirenkn vom Greiz die berihmdn "goldna Händla" hot, brauchd'er sich um Kundn kana Sorng machn - sei Waddezimmer iss immer vull.
Der Robert ärberd fleißich - und nooch Feieramd fiehrd'er a beschaulichs Leem. Ums Haus rum hot'er neemlich an wunderboan Gaddn ogeleechd - mit Bischla und Baamer, mit Heilkraiter und an glann Deich. In den Baradies fiehld sich der Robert mit seiner Fraa und mit der Hindin "Lora", an Randschdaa-Mischling mit siem verschiedna Erzeuger aus der Nachberschafd, sauwohl.
Obber letzda Wochn iss dess Gligg zwa Dooch lang ziemlich gschdeerd worrn.
Ogfangd hot's dodermit, dass am Mondooch zer Frieh in der Braxis olles ganz ruich woa. Ka aanzicher Bazient iss aufgedauchd, obwohl der Robert in san Derminkalenner olla 40 Minuddn jemand rei beschdelld hot.
Der Robert hot sich weecher den leern Waddezimmer seina Gedankn gemachd. "Hoffndlich hob'ich net an Grankn folsch behannld - und der hot's iberolln rum derzelld", hot der Robert seina Fähichkeidn scho selber aweng ogezweifld. Aa am Nochmiddooch widder desselba: Ka aanzicher Mensch iss zur Behandlung erschiena.
Amds hot der Robert ausfiehrlich mit seiner Fraa geredd, woss do woll dahinder schdeggn ko. Die zwa Leitla hamm scho gedachd, dass'sa demnäggsd auswandern missn, wenn dess so weider gedd. Obber am Diensdooch hot der Robert raus gfunna, warum die ganza Zeid ka Mensch in sei Braxis kumma iss. Wie'er neemlich zer Middooch nooch na Zwelferlaitn sei "Lora" in Gaddn naus lossn wolld, hot sei Fraa sofodd broddesdierd. "Na Hund derfsd auf kan Foll frei laafn lossn", hot'sa gewarnd, "unner 'Lora' iss doch laifich - draußn vor der Hausdiir lauern die Rüdn ausn ganzn Dorf und wolln nauf schbringa".
Do iss na Robert der Saafnsieder aufganga. "Die Hind hoggn doch scho seid zwa Dooch dauernd vor unnera Gaddndiir", iss na darchn Kobf gschossn, "do draud sich freilich ka Mensch mehr zer uns rei". Mitera boor Dellefonaadn hot sich der Robert bei seina Bazientn, die woss'er vergeblich fir gessdern rei beschdelld hot, erkundichd - und olla hamm werglich gsochd, dass'sa aus Angsd gleich widder Kehrd gemachd hamm, wall vor der Hausdiir so vill grußa und gfährlicha Hund rum gegleffd hamm. Bevor sa sich beißn lossn, hamm'sa zern Robert am Dellefon gsochd, sänn'sa lieber widder hamm ganga. A Liebestrieb bei Viechern ko fei manchsmoll aa dess menschlicha Leem ziemlich durchnanner bränga...
Dies ist eine mit page4 erstellte kostenlose Webseite. Gestalte deine Eigene auf www.page4.com