Dies ist eine mit page4 erstellte kostenlose Webseite. Gestalte deine Eigene auf www.page4.com06.09.2014
Es woan werglich friedlicha Feriengässd, sogoa die zwa Hund sänn immer schee brav gewesn - net amoll der dauernda Schnirla-Reng hot den Menschn und Viechern die Freid verderm kenna. Obber wie sa am vorlezdn Urlaubsdooch olla mitnanner mit der Eisnbohn an Ausfluuch nooch Dresden gemachd hamm, hot der Herrgodd denner fromma Scheefla fei a echda Briifung auferleechd. Wie sa neemlich am Fohrkaddn-Audomaadn endlich, endlich olles ausgedeichsld hattn, woa zum Schluss bloß nuch die Frooch offn: Woss fir Fohrkaddn braung dä die zwa Hund? Aaner aus der Grubbm hot dessweecher an san Smartphone sofodd die "Deutsche Bahn" ogegliggd und erfohrn, dass a Hund dieselba Kaddn brauchd wie a Kind - also hamm'sa fir na "Waldi" und na "Bello" am Audomaadn nuch zwa Kinner-Fohrkaddn fir je 5,40 Euro raus gelossn.
Bei der "Fahrkartenkontrolle" im Zuuch hot dann der Bliz eigschloong. Die Schaffnera hot neemlich erglärd, dass die zwa Hund leider die folschn Kaddn hamm. Ezerd hot nadirlich a grußa Debaddn eigsezd - und in derra sinsd immer so samfdn Chrissd-Grubbm sänn'sa langsam haaß worrn. "Wir sind nicht die Deutsche Bahn, sondern der Verkehrsverbund", hot die Kondrolläära gsochd, "bei uns gelten Hunde als Fahrräder - sie brauchen also zwei Fahrrad-Tickets!" Es ging minuddnlang hii und her, dann hamm die goddesfirchdinga Urlauber noochgeem - in Ehrfurchd vor na Haalinga Bürokratius hamm'sa nuch amoll fir zwa Kaddn sechs Euro bezohld. Und wie sa dann olla zamm in Dresden ausgschdieng sänn, iss am Bohnhof a Wunner bassierd wie sellmoll in Lourdes: Zern erschdn Moll in der Welld hamm zwa Fohrreedla gebelld und min Schwanz gewaggld...
13.09.2014
Lezda Wochn woasch widder moll so weid: Nooch den langa Schlechdwedder hot'er grußa Lussd aufera Ausfohrd k'habt. Der Heiner hot sich also in sei Ledder-Gluffd nei gezwängd, die woss im Lauf der Zeid weecher san chronischn Hang zu Bressag, Schlachdschissl und Fassbier ziemlich eng worrn iss. Er hot sich na Helm aufgsezd, der hot aa scho aweng schbannd - dann iss'er darchn Gaddn naus gschdiefld zur Garaaschn, hot sei Maschina raus gschoom und wolld'sa schdarrdn. Obber Dunnerkaal: Der Moddoor iss ums Verreggn net ogschbrunga! Ols erfohrner Exberrde hot der Heiner sofodd erkannd, dass die Badderie ihrn Geisd aufgeem hot.
Also hot'er zeran bewährdn Drigg gegriffn: Er hot die olda DKW miteran Rugg auf ihrn Dobblschdänder gschdelld und die Maschina aweng nooch vorn gekibbd, damit dess hindera Rod in der Luffd woa und sich frei dreha konnd. Dann hot'er a "Überbrückungskabel" ogschlossn, aufn Anlosser gedriggd - und scho hot die Maschina gebrummd. Der Heiner hot na erschdn Gang eigeleechd - und sofodd hot sich dess Hinderrod frei gedrehd. Nooch den gegliggdn Maneever hot der Heiner dichdich Gas geem, dass dess hindera Andriebs-Rod in der Luffd rodierd hot wie bei 80 auf der Landschdraßn. Obber wie dann der Heiner bei laufendn Modoor dess Kabl widder von der Badderie raus gezoong hot, iss dess Drama bassierd: Die DKW iss neemlich aweng nooch hindn gekippd, sodass dess wild drehenda Rod aferamoll Bodn-Kondaggd grichd hot - und scho iss die Maschina miteran Saz nooch vorn gschossn.
Der Heiner wolld dess rasenda Ungediim mit seina Händ nuch am Lenker aufholdn, obber do woa nix zer machn: die DKW iss samsd Heiner nooch fimf Meder miteran Bfladdscher in den glann Gaddn-Deich nei gschderzd, dass die drei Goldfisch vor Schregg fassd der Schlooch gedroffn hätt.
Dess Modoorod-Gschbann hot in den Momend jednfolls die ungewollda Abkiehlung dringend gebrauchd - der Heiner, um san vill zer hoha Bluudrugg aweng zer senkn, und die DKW, damit der Modoor net haaß leffd...
20.09.2014
Sei Audo, an weinroodn Volvo, hot'er vorher aufm obern Bark-Degg am Mediamarkd abgschdelld, dann iss'er a Schdund lang die greiz-die-quer zwischn die Schilder rum geloffn und hot am End erleichderd fesdgschdelld, dass in san Leemswerk nix kabudd woa. Miteran gligglichn Lächln im Gsichd iss'er also ausn Schilderwold widder raus ganga - und niiber zu san Audo aufm Bark-Degg.
Obber scho aus 30 Meeder Endfernung hot'er in der Dämmerung gsehng, dass sich an san roodn Volvo zwa unbekannda Männer zer schaffn machn: der ana woa an der offna Beifohrer-Diir gelahnd, der annera hot hindn an mordsdrumm Kardong durch die braada Hegg-Glabbn ins Audo nei gschoom. Na Klaus Beer iss fassd dess Herz schdeh gebliem, und ihn woa sofodd gloa: Do sänn Audo-Gnagger am Werk - wohrscheins werrd sei scheener Volvo scho am näggsdn Dooch in Poln verkaafd. Obber goddseidank iss na Beer in seiner Nood der Arnold Schwarzenegger alias "Terminator" eigfolln - von den seina grußn Händ hot'er neemlich amoll an Abdrugg fir sei Brommi-Sammlung gemachd. Und ezerd hot na Beer die Erinnerung an sei Idol innerlich Graffd geem. Er hot mit der rechdn Händ in sei Husndasch nei gfingerd und san Schlisslbund wie an Schloochring umglammerd. Dann iss'er - mit waacha Knie, obber zu olln endschlossn - aufs Audo zuganga. Mit 220 Buls iss'er vor die zwa Verbrecher schdeh gebliem. "Was machen Sie da an meinem Auto", hot'er gezischld - obber in der näggsdn Sekundn woa scho Endwarnung, wall der Beer aferamoll hinder den roodn Volvo nuch an zweidn rodn Volvo gsehng hot, neemlich san einga, der woss bloß aweng verdeggd woa.
Die zwa Männer, die wossn zufällich na gleichn Pkw k'habt hamm wie der Beer, sänn fei orndlich derschroggn. Wall so bleed hot'sa nuch kaner ogeredd, bloß wall'sa ihrn neia Fernseher eiloodn wolldn...
27.09.2014
Fir die Weiwer gab's Kaffee und Kuhng, und die Männer hamm ihrn schdechendn Darschd, wall doch im Bus so a droggna Lufd woa, gleich mitera boa Seidla Bier geleschd. Dann iss die Fohrd ziemlich lussdich zeran Weinfessd nooch Volkach am Main weider ganga, wo der Vergniechungswarrd scho lang vorher im grußn Zelld vier Disch reservierd hot.
Kerl, woa do a Schdimmung! Bei den siffinga "Volkacher Silvaner" woan die Seniorn-Fußboller fei gleich vill lebendicher wie dahamm, wenn'sa mit ihra Quark-Mussgln na Bolln hinderher keichn. Auf der Biehna hot die Musigg gschbilld, gsunga und gschunkld iss worrn - und karz vor Middernachd woa kaner mehr nichdern. So iss die ziemlich beneeblda Schporrdler-Drubbn samsd Frauen mit schwera Baa aus den Weinzelld raus gewaggld - zern Bus, der woss scho gewadd hot, wall'sa ja nuch drei Schdundn lang auf der Audobohn widder hamm fohrn mussdn.
Karz vor na Barkblaz hot aferamoll der linka Verdeidicher nebern Weech a Endeggung gemachd. "Schaud ner her", hot'er aweng gelalld, "do liechd fei a Mo im Gebisch drinna." Und werglich: Do woa a Bsuffner geleeng und hot san Rausch ausgschloofn! Die Fußboller hamm derra Algohol-Leich aweng auf die Baggn gedädschld und hamm'na geriddld, obber der Mo woa schderzbesuffn und hot sich net geriehrd. Dann hamm'sa in seiner Briefdaschn san Ausweis gfunna. "Der iss fei aus Hof", hot der linka Verdeidicher iberraschd fessdgschdelld, "und wohnd in der Keenichschdraßn."
Ezerd hamm'sa olla hii und her gerädsld, woss'sa mit den Bsuffna machn solln - und schließlich hot der Vergniichungswarrd an Verdachd k'habt: "Der Mo woa beschdimmd aa miteran Verein aufm Weinfessd und hot in san Suff na Bus fir die Hammfohrd versaamd. Den nehma mir mit hamm nooch Hof und geem'na in der Keenichschdraßn ab - mir kenna ja sei Adress." Also hamm'sa die Rauschkugl in ihrn Bus nei gezerrd und hindn auf der lezdn Bänk quer hii geleechd.
Zer frieh um dreia iss dann der Bus erschd moll in Hof in die Keenichschdraßn gfohrn, um den Bsuffna abzerliefern. An der Hausdiir hamm'sa geglingld und geglingld, obber ka Mensch hot aufgemachd - bis endlich im zweidn Schdogg a Fensder aufganga iss und a Fraa im Nachdhemm ihrn Kobf raus gschdreggd hot. "Bei denner iss kaner dahamm", hot die Fraa zer die Fußboller ro gebläägd, "die sänn im Urlaub in Mainfrankn und kumma erschd näggsda Wochn widder." Die Fußboller hamm gschaud wie die Aachhernla, wenn's blizd. Dann hamm'sa ihrn immer nuch schnarchendn Fohrgassd vor der Hausdiir abgeleechd und sänn weider gfohrn. Wohrscheins werrd der Zecher zer frieh ziemlich bleed aus der Wäsch gschaud hamm. Wie soll'er sich bloß dess Wunner erglärn, dass'er nachds in Volkach ineran Gebisch eischleefd und zer frieh dahamm in Hof vor der Hausdiir aufwachd...
Dies ist eine mit page4 erstellte kostenlose Webseite. Gestalte deine Eigene auf www.page4.com