Dies ist eine mit page4 erstellte kostenlose Webseite. Gestalte deine Eigene auf www.page4.com09.08.2014
Obber so a Däddowierung iss nadirlich ka neia Erfindung, damit die Weiwer heizerdooch auf ihrer Balz na Männern die Aang verdreha, sondern hot's scho immer geem. Der Franz, der woss lezda Wochn 82 worrn iss, woa jednfolls seiner Zeid weid voraus: Er hot sich neemlich scho an san 21. Gebardsdooch däddowiern lossn - und zwoa ineran Neemzimmer von an Schdribb-dis-Lokal auf der Reeperbohn in St. Pauli. Aus Freid, dass'er erwachsn worrn iss, hot sich sellmoll der Franz selber a Wochnend in Hamburg gschenkd und iss do droom weecher der dauerndn Bier- und Schnabbs-Sauferei ziemlich eigewerrd gewesn. Er wass bis heit nuch net, woss in derra Nachd olles bassierd iss. Auf jedn Foll iss'er am näggsdn Frieh miteran Brummschedl in san Hodell aufgewachd und hot ban Bligg in Schbiegl auf seiner Brussd an riesinga Dreimassder mit feierroda Segl gsehng - und zusäzlich am rechdn Underarm an blaua Anker, daneem na Noma "Betty". Er konnd sich damols bloß erinnern, dass aa die Bardame "Betty" k'haaßn hot, die woss'na dauernd so an griina "Zauber-Drink aus der Karibik" eigschenkd hot. "Dann sänn bei mir sämdlicha Lichder ausganga", sinnierd der Franz heit nuch iber dess mysterjeesa End von san Gebardsdooch und iber seina zwa geheimnisvulln Dädduu. Seid 60 Johr leffd der Franz ineran Underhemm mit langa Ärml rum - sogoa im Freibod verschdeggd'er dess roda Seglschiff, na Anker und die "Betty" untern Hemm, wall'na sinsd die Leit froong, woss dess olles bedeidn soll. Es iss hold a grußer Underschied zwischn an feina Kunsdwerk auf der Schullder voneran schenn Maadla - und na Franz san Vollrausch-Dädduu von der Reeperbohn ... Gerch
16.08.2014
"Eier Kaz iss voneran Audo iberfohrn worrn", hot'er die drauricha Noochrichd iberbrachd, "die liechd draußn am Schdraßnrand und iss dood!" Der Rainer iss sofodd naus ganga - und werglich: die grau-braun gediecherda "Milli" woa zerzausd do geleeng und hot kan Muggser mehr gemachd. Der Rainer hot dess dooda Käzla in san Gaddn nei gedroong. "Mir schaufln aweng a Groob aus", hot'er zu seiner Fraa und seina zwa Maadla gsochd, "und begroom'sa." Die "Milli" woa a buzichs Käzla und hot johrlang zur Familie k'heerd - ka Wunner, dass die Kinner iber na Dood von ihrn Schbillkamerodn Roz zer Wasser gegrinna hamm. Der Vadder hot dann die dooda Kaz in die ausgschauflda Gruum nei geleechd, die zwa Kinner hamm nuch gebedd, dass die "Milli" auf jedn Foll nei na Kaznhimml kumma soll - und dann hamm'sa dess Groob mit Erdn zugschidd. Obber middn in derra Kazn-Beerdichung hot'mer aferamoll k'heerd, dass neemdro aus die Johannisbeer-Bischla woss miaud - und a Sekundn schbeeder schdreggd wohrhafdich die "Milli" ihrn Kobf zwischn die Blädder raus und schaud neigierich wie immer, woss do im Gaddn vor sich gedd. Erschd hamm olla gedachd, dass a Wunner bassierd iss und dass die "Milli" weecher die inschdändinga Gebeede von die Kinner widder lebendich worrn iss wie sellmoll der Lazarus in der Bibl, obber dann hot sich gleich raus gschdelld: die dooda Kaz, woss'sa grod beerdichd hamm, woa goa net die "Milli", sondern die grau-braun gediecherda Kaz von die iber-iber-näggsdn Nachbern. Kerl, woa dess aferamoll a Freid iber die "Wiedergeburt" - und gleichzeidich hold aa vill Mitgfiehl fir die Nachbern, obber so iss dess Leem...
23.08.2014
Die erschda Kaddasdroofn iss vorichs Johr nooch der Silberhochzich bassierd: Ban Händwaschn hot die Gunda ganz erschroggn endeggd, dass ihr goldna Ehering nimmer am Finger dro woa. Die Fraa hot sellmoll dess ganza Haus aufm Kobf gschdelld - vom Keller bis nauf zern Dachbodn hot'sa olles abgsuchd, obber der scheena Ring woa verschwundn! So iss der Gunda nix annersch ibrich gebliem, wie dass'sa ihrn Oldn dess Ungligg gebeichd hot und anschließnd in Hof zeran Juwelier ganga iss - sie hot sich neemlich an Ersaz-Ring machn lossn, der woss genauso ausgschaud hot wie dess verlorna Orichinol. Der Wolfgang hot damols ganz schee gschbreißld, obber dess hot ja nix genizd. A boa Dooch lang woa der Haus-Seeng aweng schief k'hängd, dann iss der Friedn widder eigekehrd.
Obber vor siem Wochn fei desselba Deooder: Ezerd woa der Gunda ihr Ersaz-Ring aa weg! Sie hot sellmoll endgeisderd auf ihrn naggerdn rechdn Ringfinger gschaud - und der Wolfgang woa außer sich. Der iss neemlich selber a exdrem orndlicher Mensch und verlierd oder verleechd nie woss. Dass gleich zwamoll hinderernanner der Ehering schburlos verschwind, konnd'er einfach net verschdeh. "Die zwa Ringla hob'ich beschdimmd verlorn, wall meina Finger inzwischn aweng schmoler sänn wie frieher", hot sich die Hanna verdeidichd, "do sämmer wohrscheins die Ring einfach runder gerudschd, ohne dass ich woss gemerkd hob". An driddn Ehering wolld sich die Gunda ezerd obber nimmer kaafn - dess iss ihr selber scho langsam zer deier worrn. Dessweecher hot'sa an ihrn Finger den oldn Ring mit die drei glann Brillandn no gschdeggd, den woss ihr der Wolfgang nooch der Gebuurd vom erschdn Kind gschenkd hot. Sicherheidsholber hot'sa obber den Brilland-Ring gleich aweng enger machn lossn, damit'er net aa gleich widder verlorn gedd.
Lezda Wochn iss die Gunda 50 worrn - und ols Gebardsdoochs-Gschenk hot ihr der Wolfgang ban Friehschdigg zwa glana viereggerda Bäggla in die Händ gedriggd. "Do werschd schaua", hot'er gschdrohld - und die Hanna hot werglich ihrn Aang net gedraud, wie'sa die Gschenker ausgebaggd hot: Im erschdn Bäggla woa der Orichinol-Ehering drinna, den woss ihr der Wolfgang vor 26 Johr in der Michaelis-Kerng ibern Finger gschdraafd hot - und im zweidn Schächderla looch der verschwundna Ersaz-Ring. Die Gunda hot gschaud wie a Aachhernla, wenn's blizd. Und der Wolfgang hot seiner verdadderdn Fraa dess Geheimnis von denner zwa widder aufgedauchdn Ringla verroodn. Er hot neemlich vor zwa Wochn fir die Ehebeddn im Schloofzimmer na oldn Laddnrossd ausgewechsld - und in den Gfiesl hot'er under der Gunda ihrer Maddrazn in ana Rizn die zwa Ring gfunna. Die sänn wohrscheins der Gunda, die woss immer aweng an unruichn Schloof hot und sich dauernd rum wälzd, middn in der Nachd vom Finger ro gerudschd und in die Rizn nei gerollerd. Auf jedn Foll hot die Gunda zum Gebardsdooch von ihrn Oldn nuch nie so scheena Gschenker grichd wie ezerd zern Fuchziggsdn... Gerch
30.08.2014
Er liesd in der Zeidung sogoa hin und widder die "Kontakt-Anzeigen", und zwoa die harmlosn fir a gemeinsoma Ausfohrd min Reedla genauso wie die ausn horizondaln Gewerbe. Obber bei denner schreechn Weiwer iss'er immer exdra vorsichdich, wenn a 190er-Dellefonnummer ogeem iss. "Wall dess iss deier", wass'er aus einga Erfohrung, "do werrschd scho ban Dellefoniern abkassierd und ausgebressd wie a Ziddrona."
Lezda Wochn hot der Roland von san Freind Hans an indressandn Dibb grichd. Der Hans hot neemlich aus der Zeidung a glans Inserad raus gerissn und na Roland aufn Kichndisch hii geblädderd. "Dess mussd amoll lesn", hot'er aweng geheimnisvull gsochd, "du kennsd dich doch mit exodischa Weiwer aweng aus - wäa dess net woss fir dich?!" Der Roland hot sei Brilln aufgsezd und die Anzeich ogschaud. "Handzahme Venezuela-Amazone - mit Käfig und Blätterbaum", hot's in den Inseraad k'haaßn - und daneem a Händy-Nummer. "Dess iss beschdimmd a Fraa aus Sidameriga", hot der Roland fachkundich erglärd, "wohrscheins hot'sa ums Bedd rum an Keefich aufgschdelld, um simbolisch auszerdriggn, dass'sa ziemlich wild iss." Woss ollerdings mit "Blätterbaum" gemaand woa, iss fir na Roland a Räädsl gewesn. "Vielleichd iss dess erchez a erodischa Dechnigg", hot'er zer san Freind Hans gsochd, "in den Milljöh erfinna'sa doch dauernd woss Neis!" Und wie die zwa Mannsbilder nuch aweng hii und her iberleechd hamm, iss na Roland eigfolln: "Vor zwa Johr woa ich amoll driim in Eecher in ana Bor, do hot a Brasilianera bediend - die hot mir sellmoll gsochd, dass'sa aa vom Amazonas her schdammd. Die hot fei schdramm ausgschaud - so a ehnlicha Fraa werrd wohrscheins aa die Venezuela-Amazone in den Inseraad saa."
In seiner Neigier hot der Roland sofodd die Händy-Nummer ogerufn - und hot sich dann vor Lachn auf die Schenkl nauf k'haud. "Die Venezuela-Amazone", hot'er gegluggsd, "dess iss fei ka flodda Biena, "sondern a glana Babbagei ausn sidameriganischn Urwold - und der iss scho verkaafd." Dann hot sich raus gschdelld: Na Roland sei Freind hot in der Zeidung die Rubrigg verwechsld. Dess Inseraad mit derra "handzahmen Venezuela-Amazone" schdand neemlich net bei "Kontakte", sondern neemdro ban "Tiermarkt" - dass oom driiber a Bauer "Ferkel mit Beißnippel" gsuchd hot, hot na Roland san Freind wohrscheins auf a vellich folscha Schbuur gebrachd...
Dies ist eine mit page4 erstellte kostenlose Webseite. Gestalte deine Eigene auf www.page4.com