Dies ist eine mit page4 erstellte kostenlose Webseite. Gestalte deine Eigene auf www.page4.com05.07.2014
"In unnern Haus schdinkd's in jedn Zimmer bessdialisch nooch dein Raach", hamm die Mudder und ihra zwa Kinner gejammerd, "heer hold endlich auf mit denner Zigereddn". Zur Underschdizung von ihrer Forderung hamm'sa na Vadder immer Schogg-Bilder von Raacher-Lunga gezeichd und aus der Zeidung Berichde iber Lungakrebs vorgelesn. Af zerlezd hot die Mudder sogoa min Atomschlooch gedrohd: "Wennsd mit der Raacherei net Schluss machsd, loss ich mich scheidn!"
Der Max hot zwoa ziemlich lang driiber noochgedachd, woss fir ihn besser iss, dann hot'er sich endschiedn: "Ich heer auf!" Und werglich - er hot dahamm und im Birroo san kombleddn Zigereddn-Vorrad bis aufn lezdn Glimmschdengl nuch genossn - und dann "Aus, Ebfl, Amen"! Sei Olda und die zwa Maadla hamm na Vadder ibern Schellnkeenich gelobd, wall'er so einsichdich woa. Und der Max hot san Endschluss konsequend umgsezd: Mit "Nikotinpflaster" und Schbezial-Kaugummi, mit Hybnose und "E-Zigaretten", sogoa inera "Nichtraucher-Seminar" von der Granknkassa iss'er nei ganga - hold dess ganza Brogramm!
Der Generolf-Angriff aufn Max sei Raacherei hot sich ols Volldreffer erwiesn, obber leider mit erheblicha Neemwirkunga. Der Max hot zwoa ka Zigereddn mehr oglangd, obber die Endwehnungs-Kur hot den frieher immer friedlichn und freindlichn Mo inera Monsder verwandld. Olles hot'na aferamoll aufgereechd! Er hot ibersch Essn gemeggerd, hot die Maadla zur Weißgluud gebrachd und sei Olda weecher jedn Dreggla rund gemachd. 22 Johr lang hot na Max net gschdeerd, dass sei Fraa auf die Zohnbassda-Duum jedsmoll in der Middn nauf driggd, obber seid er nimmer raachd, dudd'er wie a Sau. Der ganza Hausfriedn woa ban Deifl, wall'mersch min Max einfach nimmer ausholdn konnd. Obber ezerd hold dich fessd, woss bassierd iss: Seid voricha Wochn beddln die Fraa und die zwa Maadla na Max, dass'er bidde-bidde widder raang soll, damit dahamm die schlechda Schdimmung aufheerd und widder Ruh und Harmonie eikehrn. Die Old bedrohd ihrn Mo sogoa widder mit ihrn bewährdn Dunnerschlooch - dessmoll ollerdings in umgedrehda Richdung. "Wennsd du net sofodd widder min Raang ofängsd, loss ich mich scheidn", hot'sa ezerd ogekindichd - und der eiserna Max schaud aweng bleed aus der Wäsch, wall'er die Welld nimmer verschdedd... Gerch
12.07.2014
Dessweecher hot'er an seina Freind a schrifdlicha Einlodung verschiggd, wo drinna schdand: "Herzlich willkommen auf meiner neue Terrasse - mit Grillen und einem 40-köpfigen Orchester, das ein Live-Konzert gibt."
Na Roland seina Freind samsd ihra Weiwer woan ganz neigierich und sänn an den schenn Sommer-Amd bingdlich auf der neia Derrassn eigedroffn. Der Roland hot a frängischa Brodzeid servierd: mit rodn und weißn Bressagg, mit Rindfleischwarschd und Radiesla, mit Geddinger, Gnagger und Garkn. Die Gässd hamm dichdich nei k'haud, und dess frischa Bier ausn Roland san Fässla hot an den schwiiln Amd sowieso gschmeggd. An "Grillen und ein Live-Konzert mit 40 Orchestermusikern", wie der Roland in der Einlodung gschriem hot, hamm die ziemlich vullgfressna Leit fei goa nimmer gedachd. Sie woan do k'hoggd und hamm gewaafd - die Weiwer ibern neia schbanischn Keenich und die Männer iber die Fußboll-WM. Obber karz bevors finsder worrn iss, hot der Roland doch nuch sei verschbrochna Iberraschung bräsendierd. "Mir kumma ezerd zum Hehebungd vom Amd", hot'er aweng geheimnisvull ogekindichd, "sädd amoll karz muggs-maisla-schdill und horchd, woss eich meina 40 Musigger fir a Konzerd geem."
Olla hamm'sa gelauschd - und werglich: Rund um die Derrassn hot's aus sämdlicha Bischla gezirbd und gezirbd - 40 Grilln hamm a Konzerd geem. An seddn Musigg-Amd middn in der Nadduur hamm na Roland seina Freind nuch nie derlebbd. Olla woan'sa begeisderd auf der Derrassn gsessn, hamm ihra Ohrn gschbizd - und hamm sich gfiehld wie auf ana griechischn Insl. Auf zerlezd hot der Roland dess Konzerd-Rädsl geleesd. "Ich hob heid frieh im Garten-Center fir 2,99 Euro 40 Futtergrillen kaafd", hot'er erglärd, "obber ich hob'sa nadirlich net an die Fisch im Aquarium oder an
Freschla und Eidechsn verfidderd, sondern rund um mei neia Derrassn aanzln widder ausgsezd, damit'mer heit amd aweng a Urlaubs-Schdimmung grieng." Und dess iss na Roland mit san 40-kebfinga Orchesder werglich gelunga... Gerch
19.07.2014
Der Friedrich woa sei Leem lang a elends Gribberla: in der Ärberd immer aweng a Faulenzer, im Werrdshaus hot'er ban Schofkobfn gern beschissn, er woa a Geizgroong - und seiner Oldn hot' er dess Leem schwer gemachd, wall'er na ganzn Dooch iber olles bloß rum gemoserd hot. Lezda Wochn iss der Friedrich gschdorm. "Es woa a Erleesung", hot der Bfarrer bei der Beerdichung gsochd, und zwoa im dobbldn Sinn: firn Friedrich, wall'er net lang leidn mussd - und fir die Fraa, die Verwandtschafd, die Ärberdskolleeng und die Freind, wall'er ihna ezerd nimmer aufn Wegger gedd. Ban Leichnschmaus hot der Bfarrer der Widdwe nuch amoll sei berseenlichs Beileid ausgschbrochn. "Jetzt wird ihr Mann von oben zuschauen und sich freuen, dass wir an ihn denken", hot'er die Widdfraa dreesdn wolln. Obber die hot abgewunkn. "Dess glaam'Sa doch selber net, dass der droom im Himml iss", hot'sa gsochd, "der schaud hunnerdbrozendich net von oom runder, sondern heggsdns von undn rauf." Der Hochwürdn iss ganz derschroggn - und na Friedrich sei Olda hot gleich nuch aans draaf gsezd. "Wer in san Leem a Schlawiner woa und die annern Leit bloß geärcherd und ibersch Ohr k'haua hot - so aner kimmd doch net in Himml nei, sondern in die Hell", hot'sa na Bfarrer ibersch ewicha Leem aus ihrer Sichd aufgeglärd, "dess sänn doch Liing, wemmer dann sochd, dass der von oom ro schaud!"
In den filosofischn Dialog hot sich gleich die ganza Drauergemeinde eigscholdn und heffdich diskudierd, wer von die gschdorma Verwandtn woll auf ana Wolkn sizd und ro schaud auf die Hinderbliema, und wer weecher san schlechdn Leemswandl wohrscheins am Eingang zum Himml widder umkehrn mussd und ezerd drundn in der Hell schwizd. Vor der Wohred driggn die Leit hold gern amoll a Aach zu. Wenn der glaa Kevin am erschdn Schuldooch mit seiner Drumm Diidn foddografierd werrd, kimmd doch die Mudder nie auf die Idee, dass'sa sochd: "Do werrd sich fei der Obba freia, wenner ezerd von untn zu uns rauf schaud..."
26.07.2014
Im Internet hot'er jednfolls a Schnäbbla endeggd, dess woss fir sei schwindsichdigs Konndo grod nuch erschwinglich woa: fir 2900 Euro an BMW 320i, Baujohr 1990, mit beachdlicha 241 000 km aufm Dacho und 129 PS - rod laggierd, echda Leddersiz. Firn Kevin iss a Draam in Erfillung ganga, vor alln wall'er mit den floddn Cabrio bei die junga Maadla brilliern ko und sich bessera Schangsn ausrechnd wie frieher min Fohrreeedla.
Dass dess Leem miteran Cabrio ollerdings net ganz einfach iss, hot der Kevin inzwischn schmerzvull am einga Leib erfohrn. Er woa am lezdn Wochnend bei derra Briiglhiz im Hofer Freibod und iss mit seina Quargmusgln dauernd aweng vor die floddn Maadla rum schdolzierd - und mit der Judda aus Neihof hot'er dann ogebändld. Damit'er bei ihr an gudn Eindrugg machd, hot'er gleich sei Cabrio ins Gschbreech gebrachd. "Draußn aufm Barkblaz schdedd mei Cabrio", hot'er ogeem, "wennsd Lussd hossd afera glana Schbrizduur, kenna'ma fei amoll a Rundn dreha. Woss maansd, wie angenehm bei 30 Grod im Schaddn der Fohrdwind iss, wemmer im offna Audo sizd."
Die Judda woa sofodd begeisderd und iss min Kevin naus zum Barkblaz ganga. Wie sa olla zwa vor na Cabrio gschdandn sänn, wolld der Kevin, der woss gern aweng aufzwernd, in seiner karzn Bodhusn der Judda gleich moll beweisn, woss'er fir a Kerl iss. Er iss also miteran Schbrung iber die Audodiir ins offna Cabrio nei k'hubfd - direggd nauf aufn Leddersiz. Obber leider, leider hot's von der Judda fir dess Kunsdschdigg kan Beifoll geem - im Geengdaal: In den Momend, wo der Kevin mit seina naggerdn Baa aufm Leddersiz geland iss, hot'er an Blääger gemachd, dass'mersch bis nauf an die Johannis-Kerng k'heerd hot. Dann hot'er die Diir aufgerissn und iss wie von der Darranndl gschdochn vom Siz ro gschbrunga. Dess Cabrio woa neemlich scho drei Schdund lang in der gliehendn Sunna gschdandn - auf die haaßn Leddersiz hässd Schbiegleier broodn kenna. Nooch derra schmerzhafdn Vorfiehrung hamm zwoa ban Kevin die Oberschenkl und der Hintern farblich ganz gud zum rodn Cabrio gebassd, obber seina Schangsn bei der Judda sänn drozdem net gschdieng... Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com