Dies ist eine mit page4 erstellte kostenlose Webseite. Gestalte deine Eigene auf www.page4.com07.06.2014
Der Hans woa scho frieher ols Berchermassder im ganzn Landkreis bekannd ols a bsonders schlaua Mo - und aa im Ruheschdand hot'er foddner neia, manchsmoll sogoa revoluzionära Ideen. Wie hell der Hans im Kobf iss, beweisd zern Beischbill sei subber Erfindung geecher die Wildschwein-Blooch. Der Hans iss neemlich Jeecher, obber er will nachds net dauernd aufm Hochsiz hoggn und auf die Wildsai waddn. Dessweecher hot'er sich ols scharfsinnicher Hobby-Bassdler a Konschdrugzion ausgedachd, wo'er die schlaua Wildsai iberlissdn ko. Er hot kerzlich am Woldrand a glana Muldn gegroom, wo er jedn Amd Mais nei schmeißd, um die Wildsai her zer loggn. Dess iss a bewährder Drigg von die Jeecher, die wossn dann geduldich auf ihrn Hochsiz mit der Flintn waddn, bis die Sau am Fudderblaz erscheind - und päng!!!
Obber der Hans iss a Schlidzohr und verblemberd sei Zeid net mit derra ewinga Wadderei. Er hot neber san Fudderblaz im Gebisch an Bewegungsmelder samsd Kamera verschdeggd - und dess ganza eleggdronischa Nezwerk mit san Händy verbundn. Wenn also am Fudderblaz a Sau aufdauchd, glingld sofodd ban Hans dess Händy, und aufm Disblee ko'mer sehng, wie sich der Schwarzkiddl im Finsdern ibersch Fudder hermachd. In so an Foll sezd sich der Hans sofodd ins Audo und kimmd min Gewehr. Es iss a genioler Schach-Zuuch: Die Sau werrd vom Fudder ogeloggd - und wenn'sa erscheind, rufd sa gewissermooßn selber na Hans aufm Händy o, dass'er mit der Flintn kumma soll. Geecher na Hans sei Erfindung iss fei der Nobel-Breis a Dregg dageecher!
Lezda Wochn ban Kameradschafds-Amd im Feierwehrhaus hot middn in der Red vom Kommandandn na Hans sei Händy geglingld: a Wildsau hot sich gemeld. Der Hans iss a heeflicher Mensch, dessweecher iss'er ruich sizn gebliem, um die Versammlung net zer schdeern. Obber die Sau hot net noochgeem und in die näggsdn Minuddn nuch dreimoll ogerufn - es woa gewissermooßn a dringender Aufforderung, dass der Hans gefälligsd sofodd kumma soll. Also iss der Hans ausn Feierwehrhaus naus gewerchd, hot sich ins Audo k'hoggd und iss mit Vollgas losgfohrn. Obber wie der Deifl sei Schbill hot: Aufm Weech zum Wold iss der Hans weecher iberhehder Gschwindichkeid inera Radar-Kondrolln nei geroodn - mit der rodn Kelln hamm'sa na gschdobbd. Es iss ollerdings net bekannd, ob der Hans zum Bollizisdn wohrheidsgemeeß gsochd hot, dass'er bloß deshalb so schnell unterwegs woa, wall sich ausn Wold a Wildsau aufn Händy gemeld hot. Auf jedn Foll wass der Hans ezerd: Aa wenn a Sau orufd, derf'mer drozdem net fohrn wie a Sau ...
14.06.2014
Obber inzwischn iss unner Welld komblizierd worrn - und dess merksd aa an die Husn.
Mei Freind Heinz hot sich fir san Urlaub in Antalya exdra a neia "Cargo-Freizeithose" kaafd. "Rood amoll, wie vill Daschn die hot", hot'er mich zwa Dooch vor san Abfluuch gfrochd. Wenn der Heinz so frochd, nocherd wass ich, dass ich mit meiner Schäzung hoch nauf muss. "Fimfa", hob'ich die Zohl von denner Daschn daxierd, obber do konnd der Heinz bloß lachn. "Du lebbsd hold aweng hindern Mond", hot'er mich korrigierd und hot sofodd schdolz verkindichd: "Mei neia Cargo-Husn hot vom Bund bis nunder zer die Gnie 14 grußa, middlera und glaana Daschn - a boa sänn sogoa mit Gnebf oder Reißverschluss gsicherd!" Mit san neia Husn-Wunner, hot'er erglärd, schboord'er sich sogoa san glann Ruggsagg, wenn'er in Antalya aweng am Schdrand rum flanierd. "In die 14 Daschn an derra Cargo-Husn brängd'mer olles nei, woss wichdich iss", hot'er gschrohld. Ollerdings iss na Heinz sei Begeisderung aufm Riggflug ausn Urlaub ziemlich verschwundn. Wall'er bei der Ankumbfd in Nermberch in seiner Cargo-Husn aweng ausgschaud hot wie a Hibbi, hammm'sa na ban Zoll gleich amoll gfilzd - wohrscheins auf der Such nooch Hasch oder annera Drogn. Und do mussd der Heinz vor die schdrenga Aang voneran Beamtn jeda von seina 14 Daschn aanzln nooch außn umgrembln, ob woss Verdächdichs drinna iss. In die ganz glann Däschla iss der Heinz mit seina diggn Warschdfinger selber kaum nei kumma. Er hot gschwizd wie a Sau und woa haalfroh, wie nooch ana Dreiverrdlschdund die Kondroll endlich verbei woa. Ols anschdändicher Mensch hot'er in seina Husndaschn sowieso ka verboodns Schmuggl-Zeich drinna k'habt. Obber mit derra moderna Cargo-Husn fährd'er nie widder in Urlaub. . .
21.06.2014
Amds um sechsa hamm doch die deidschn Fußboller geecher Portugal gschbilld, und damit der Hans dess Mäddsch net allaans am Fernseher oschaua mussd, hot er zwa Nachbern, an Ärberdskolleeng und san Schwoocher Fritz, scho am Nochmiddooch zer sich eigeloodn. "Ich hob a Fässla Bier besorchd", hot der Hans ogekindichd, "und mir grilln vorher aufm Balkon Brodwärschd."
Die Freind woan begeisderd. Zwa Schdund vor na Anbfiff in Brasilien woan'sa olla viera am Hans seiner Wohnungsdiir gschdandn - in schwarz-rood-goldna Hemmer, die deidscha Fohna in der Händ, sogoa auf die Baggn hamm'sa sich die Nazionol-Farbm nauf gemoold. Die Männer hamm sich auf die Brodwärschd, auf dess Bier und auf na erhoffdn deidschn Siech gfreid, obber leider woa der Amd verhexd!
Dess Malläär iss scho los ganga, wie der Hans die Brodwärschd aus der Kichn k'hulld hot. "Die rieng fei aweng komisch", hot na Hans sei Fraa gsochd und hot mit ihrer Nosn an die Wärschd rum gschniffld. Der Hans hot dann aa san Gimbl no k'holdn - und werglich: "Die woan zer lang in derra Hiz im Audo geleeng", hot der Hans fachmännisch ergläärd, "die miss'mer wegschmeißn!" So iss ausn Grilln zwoa nix worrn, obber der Hans hot ja nuch a annera originella Iberraschung im Kiehlschrank drinna k'habt: a Flaschn "Rotwein aus der Portugieser-Traube", die woss'er exdra firsch Schbill geecher Portugal fir 2,99 Euro im Subbermarkd kaafd hot. "Die werrd karz vor na Anbfiff gekebfd, dann schdooß'mer erschd moll auf an deidschn Siech oo", hot der Hans gschdrohld. Um fimf Minuddn vor sechsa, karz bevor in Salvador de Bahia und dahamm im Wohnzimmer die Nazionol-Hymne gsunga worrn iss, hot der Hans na Korknzieher in die Portugieser-Weinflaschn nei gedrehd. Dann hot'er gezoong, obber Dunnerwedder: der Korkn hot kan Rugger gemachd, er woa in den Flaschnhols drinna gschdeggd wie nei bedonnierd. Der Hans hot gezerrd und gezerrd, dass'na die Adern an die Schleefn raus gschwolln sänn wie die C-Schlaich von der Feierwehr, obber der Korkn hot sich kan Millimeeder geriehrd. "Dich griech ich scho nuch", hot der Hans gekeichd, hot dess Fläschla zwischn seine zwa Gnie geglubbd und min Korknzieher gezoong, gezoong, gezoong - aferamoll a Schraa, und der Hans iss middn in seiner Bewechung erschdarrd: "Mei Greiz, mei Greiz!!!", hot gebläägd. A Hexnschuss - und dodermit woa der Amd geloffn. Vorsichdich hamm die Kamerodn ihrn verlezdn Freind aufs Soffa geleechd und dess Kannabee direggd vor na Fernseher gschoom, damit der Hans in san Unhaal wengsdns nuch dess Schbill oschaua konnd. Und karz noocheran Faul am Hummels, woss driim in der brasilianischn Arena der Dr. Müller-Wohlfahrt sofodd an der Seidnlinie behannld hot, iss im Hans seiner Wohnung der Nood-Arzd eigedroffn und hot na Hans geecher die Schmerzn im Greiz a Schbrizn geem. Ezerd ko'mer bloß hoffn, dass olla zwa Verlezda, der Hummels driim in Brasilien und der Hans dahamm in Hof, heit Amd geecher Ghana widder einsazfähich sänn...
28.06.2014
Moll rembld 'mer zufällich na Kellner o und der verschidd drei Gleeser Rodwein auf die weißa Blusn vonera Fraa, moll loodschd 'mer an der Kassa im Subbermarkd aus Versehng an Mo auf seina Gichd-Zeha nauf oder du schbrizd dan Nachber mit haaßn Fedd vull, wennsd im Werrdshaus mit der Goobl in die bralla Leberwarschd nei schdichsd. Obber dess iss olles holb so schlimm, wemmer sich heeflich endschuldichd. "Ich bitte Sie herzlich um Verzeihung", embfield der "Knigge" ineran seddn Momend. Der Idaliener sochd sofodd "scusi", folls'er in der Bizzeria amoll niesn muss und sich nooch derra Exblosion die Drebfla wie a Nebl iber die Schbageddi-Deller von die annern Leit am Disch nieder senkn. "Sorry", gnurrd a Engländer, wenn'er ban Riggwärdsfohrn aus der Bargliggn dess hintera Audo aweng schdraafd, und mit "pardon" endschuldichd sich der Franzos ban Rilbsn, wall na der Schambannjer widder so sehr aufgeblosn hot. Ganz annerschd der Wiener, der woss kerzlich in Grinzing am Zebra-Schdraafn ums Hoor an Fußgänger iberfohrn hätt - er hot ausn ro gekurbldn Audofensder raus gebläägd: "...hossd mi net kumma sehn, du Oasch!" In jedm Land herrschn hold annera Siddn, wemmer sich fir sei Ungschigglichkeid endschuldichd.
In Frangn hot sich in die lezdn 50 Johr a schbeziella Form von Endschuldichung endwiggld, die woss unnern Charaggder werglich sehr guud widergibd. Denn der Frange iss a worrdkarger Mensch, obber immer offn, freindlich und ohne Rumgegoggl. Wenn an Hofer amoll a Missgschigg bassierd, nocherd werrd net lang rum gschwaafld, sondern er schdedd zu san Malläär - und driggd sei Bedauern miteran aanzinga Worrd aus: "Hobberla!!"
Auf ana Dorf-Kärwa im Frangnwold hot lezda Wochn na Werrd sei Schwiechersohn, der woss sinsd ols Bauer im Schdoll und auf die Fellder ärberd, widder a eindruggsvulls Beischbill fir den aufrichdinga Charaggder voneran echdn Frangn geem. Der Mo hot neemlich am Kärwa-Sonndooch in der Werrds-Schdumm beim Bediena aweng ausk'holfn, woss sich ollerdings ols ka bsonders guda Idee erwiesn hot. Wie er neemlich an Gassd an Deller mit Schweinsbrodn, Sauergraud, Glees und Sooß von hindn iber die Schulder aufn Disch schdelln wolld, iss aweng a Ungligg bassierd: Bei den ziemlich schwierichn Balangs-Aggd iss aferamoll den erschroggna Gassd von hindn die dunklbrauna Sooß wie der Niagara-Wasserfoll ibersch Schagedd, ibersch weißa Hemm und iber die hellblaua Grawaddn gschwabbd. "Hobberla", hot der Schwiechersohn gsochd - sunsd nix. Dann sänn aa scho drei Weiwer mit ana Schissl haaßn Wasser aus der Kichn rei gewerchd kumma und hamm den arma Mo, der woss ausgschaud hot wie a Wildsau, in die Mangl genumma. In Frangn werrd hold nooch so an Missgschiggg net lang rum gewaafd und die Zeid mit an Haufm Endschuldigunga verblemberd. "Hobberla" langd - und dann fängd sofodd dess oo, woss'mer "Schadensbeseitigung" haaßd...
Dies ist eine mit page4 erstellte kostenlose Webseite. Gestalte deine Eigene auf www.page4.com