Dies ist eine mit page4 erstellte kostenlose Webseite. Gestalte deine Eigene auf www.page4.com03.05.2014
Heier hot's im Franz san Dorf achd Konfermandn geem. Mit fimf von denner achd Familien iss der Franz guud kondennd - und woss dess bedadd, wassd ja: Jeder von denner fimf Konfirmandn hot vom Franz a Kuveer grichd, wo net bloß a chrisdlicher Gliggwunsch drinna woa, sondern zusäzlich a scheener Geldschein - und im Geengzuch hot der Franz von jedn a Bäggla Kuhng grichd. Ezerd muss'mer wissn, dass der Franz zwoa a grußer Freind von Kuhng und Doddn iss, obber heier hamm'na die fimf gleichzeidinga Konfermaziona fei fassd hii gerichd.
Losganga iss dess Drama am Mondooch zer frieh. Do hot dess Maadla vom rechdn Nachbern a Bäggla mit Schdreisla-Kuhng, Kees-Kuhng und Koggos-Kuhng gebrachd - und der Franz hot vuller Freid gleich ban Friehschdigg dichdich nei k'haud. Amds iss dann der Gunger vom Kusäng verbei kumma und hot a Kerbla mit verschiedna Blechkuhng abgeem, am Diensdooch kam dess Millersch-Maadla - und am Middwoch sänn karz hinderernanner nuch zwa Bäggla mit Mohn-Kuhng, mit Schdreisla- und Abbrikosn-Kuhng und a "Oster-Kranz" mit Mandlschplidder abgelieferd worrn. Ban Franz aufn Kichndisch hot's ausgschaud wie in ana middlern Bäggerei - und er selber hot scho aweng a Unhaal auf sich zukomma gsehng. "Hoffndlich schaff ich dess olles", hot der Franz ganz besorchd zer seiner Anna gsochd - und er hot recht k'habt mit seina Bedenkn.
Die ganza Wochn hot der Franz ban Friehschdigg, nooch na Middoochessn, ban Kaffe am Nochmiddooch und nuch amoll amds nooch na Essn sysdemaddisch den riesinga Berg mit Konfermazions-Kuhng weg gebuzd. Am zweidn Dooch sänn scho die erschdn Beschwerdn aufgedauchd: Der Franz hot Sodbrenna grichd, woss'er sofodd mit zwa Moongbidder und aweng "Klosterfrau-Melissngeist" bekämbfd hot. Obber dann iss sei Zuschtand richdich griddisch worrn: Der sießa Kuhng hot'na die Därmer rum gedrehd, und er hot an Blähbauch grichd, dass'er gedachd hot, ihn hamm'sa innerlich ausbeddonnierd. Der arma Franz woa mit ogezoonga Baa aufm Kannabee geleeng, die Anna hot'na Kimml-Dee verabreichd und feichd-warma Wiggl aufn Bauch geleechd, damit'er sich wengsdns hindn naus aweng erleichdern konnd - und zwischnzeidlich hot'er sich dabfer immer widder durch den Haufm Kuhng gekämbfd, wall doch der net ausdroggna durfd, dann schmeggd'er neemlich nimmer guud. Nachds woa dann der Franz mit schwern Herzglobfn im Bedd geleeng und konnd net schloofn - schuld woa die dauernda Kaffee-Sauferei, obber ohne Kaffee wäa hold der Kuhng net gerudschd. Wie dann drei Verrdl vom Kuhng weg woan, hot der Franz a Verschdobfung grichd, dass'er gedachd hot, es iss a Darmverschluss. Jednfolls hot'er dess Gfiehl k'habt, dass sich der Kuhng im Bauch in Fichdlgebirgs-Granidd verwandld hot. Um also sei Verdauung widder in Gang zer bränga, hot der Franz die holba "Schwedenkräuter"-Flaschn ausgsuffn und zusätzlich a dreifacha Dosis Abfiehr-Dableddn gschluggd - und die Wirkung woa dermooßn erfolgreich, dass der Franz von der Kloschissl goa nimmer ro kumma iss. Die Konfirmazion iss ja a haalicher Brauch, obber manchsmoll werrn fei die Neemwirkunga zu ana schwern grobschdofflichn Belassdung. Gerch
10.05.2014
Bloß wall morng Mudderdooch iss, hob'ich mich zamm gerissn, obber ich sooch's wie's iss: Am libbsdn hätt'ich die Schaufl und die Goobl, na Rechn und na Sauzohn hie gschmissn, wäa ins Werrdshaus ganga und hätt man Ärcher am Schdammdisch miteran Waazn und an dobbldn Obsdler nunder gschbiild.
Während der ganzn Wochn hob'ich jedn Frieh der Oldn ihra Domaadn-Bflänzla und die Garkn-Schdengl aanzln ins Gwächshaus naus gschlaafd, damit'sa in der Wärm schee wachsn - und amds dann den ganzn Grembl marsch-marsch widder zerigg ins Haus, weecher der drohendn Källd. "Du wassd doch, Gerch", hot die Martha gsochd, "die Eishaalinga schdänga vor der Diir".
Gessdern hammer dann die Sallood-Kebf und die Kollerabi, die Radiesla und die Reddich draußn in die Beeder nei gebflanzd - und ezerd wass nadirlich jeder Gaddnfreind, woss die Schdund gschloong hot: Die alljährlicha Invasion von die Schneggn fängd widder o, vor alln die fedda "Spanische Nacktschnecke" hot scho sehnsichdich auf unnera biologisch-öggologischn Delikadessn gewadd!
Im lezdn Johr hot mei Fraa Bierfolln aufgschdelld, wall unner Nachber gschwärmd hot, dass do olla Schneggn gierich nei grabbln und im Bier dersaufm. Dess iss fir die Viecher sogoa a humaner Dood, wall'sa im Dilirium wohrscheins net so leidn missn, wie wenn'sa von die zornichn Gärrdner mit der Scher in der Middn ausnanner gschniddn werrn. Drozdem sänn nadirlich die Bierfolln a Beweis, dass der ibermäßicha Genuss von Alkohol sogoa im Dier-Reich gfährlich iss!
Obber leider hamm sellmoll die Bierfolln rund um unnera Beeder net richdich fungzionierd. Dass'mer mit den billinga Bier ausn Subbermarkd die Schneggn net iberlissdn ko, hot mich net iberraschd. Ich hob neemlich vorher ineran Selbstversuch a sedds Seidla amoll brobierd - mich hot's fei gschiddld! Wenn ich a Schneggn wäa, gingerd ich an so a Labber-Zeich aa net no. Obber es woa a Riesnfehler, dass ich dess meiner Oldn derzelld hob - wall ezerd gedd's mir selber an Groong: Die Martha nimmd neemlich fir ihra Bierfalln draußn im Gaddn mei eings Bilsner ausn Keller. "Woss dir schmeggd, schmeggd na Schneggn aa", hot'sa in ihrer Weiwer-Logigg gsochd - und ezerd muss ich man Hausdrunk mit denner schleimichn Viecher daaln.
Es iss fei a schwera Endscheidung: Entweder du griggsd vill Sallood ausn einga Gaddn, obber aweng wenger Bier oder du ruggsd dei Bier net raus, obber dann fressn draußn die Schneggn olles zamm - und du mussd dess gschbrizda Zeich aus Holland oder wer-wass-woher im Subbermarkd kaafn. Hobby-Gärrdner hamm fei a schwers Leem... Gerch
17.05.2014
Bei die Gschenker firn Mudderdooch sänn die Männer und Kinner immer bsondersch einfollsreich! Massdns grichd die Mudder an Guudschein, wo draaf schdedd: "Drei Mal Geschirr abtrocknen" - originell, nä?! Sedda außergewehnlicha Gschenker draud sich die Mudder fassd net ozernehma. "Machd eich ner net so vill Ärberd", sochd'sa immer zer ihra Gunger und lächld aweng iber ihra Babbmheimer.
Obber heier wolldn der Vadder und die zwa Buum der Mudder amoll woss exdra Scheens kaafn. Desssweecher hamm'sa scho vor zwa Wochn ins Internet nei gschaud, wall do immer so indressanda Ideen drinna sänn. Sie hamm in die Suchmaschina "Geschenke zum Muttertag" eigeem, und sofodd sänn aufm Bildschirm massnweis Vorschleech erschiena, wie'mer der Mudder a Freid machn ko - zern Beischbill miteran Angebood aus an Nermberger Dessous-Loodn: "Modell Eva, zweiteilig - eng anliegend, bauchfrei, Slip mit sexy ausgeschnittener Front -
88 % Polyester, 12 % Elasthan".
"Dess werrd kaafd", hot der Vadder gleich gsochd, obber die Gunger hamm sei Begeisderung widder gebremsd. "Du bist doch verriggd", hamm'sa erglärd, "unner Mudder brauchd doch erra aweng woss Braggdischs" - und dessweecher hamm'sa mit der Maus gleich an Gligg afera "Luftsprudel-Fußmassage-Bad mit Heizung" gemachd, wall dess fir 39,99 Euro sogoa 45 Brozent Rabadd k'habt hot. Obber während die zwa Gunger nuch hie und her iberleechd hamm, iss der Vadder am PC auf a "Mama-verwöhn-Paket" fir 16 Euro gschdooßn, wo drei Schdiggla Saafn, a Duschgel, zwa Dosn Gsichdscrem und a Schaumbad drinna woan. "Dess kennerd fei die ganza Familie benuzn", hot der Vadder iberleechd, obber die Buum hamm widder ihra Kebf gschiddld - genauso wie anschließnd bei a boa annern Gschenkideen: a Flaschn mit Herzmiddl, an Fimfer-Blogg Eindriddskaddn fir a Fiddness-Schdudio in Hamburch, a Blutdrugg-Messgereed - und a Wellness-Reise nooch Mallorca. "So a Bleedsinn - woss will dä die Mudder ohne mich allaans in Mallorca?", hot der Vadder die Gunger zerrechd gewiesn, obber die hamm bloß aweng gegrinsd.
Schließlich hamm'sa unter der Rubrigg "Gartenwerkzeug" fir die Mudder a neia Schaufl und Gaddnhändschich aus waachn Ledder beschdelld. "Do werrd sa sich freia", woan sich olla dreia einich, "und dess Gschenk kimmd grod zur richdinga Zeid, wall ezerd die Gaddnärberd richdich ofängd."
Die Mudder woa von den Gschenk ollerdings net sehr begeisderd. "Am Vadderdooch schlooch ich zerrigg", hot'sa zu ihrer Freindin gsochd, "do schenk ich man Oldn zwa Aamer Farb und an neia Bensl, wall unner Schubfn dringend gschdrichn werrn muss ..." Gerch
24.05.2014
Kerzlich woa obber die Anna aweng unbässlich - und ihr Doggder hot gsochd, dass'sa sich amoll ineran Hofer Ärzte-Zentrum ganz genau undersuung lossn muss. Der Franz iss sofodd nooch Hof gfohrn und hot in den Ärztehaus an der Michaelis-Briggn fir sei Olda an Dermin ausgemacht. Die junga Fraa an der Rezebzion hot in ihrn PC aweng rum gsuchd - und gleich woss gfunna. "Ihre Frau soll nächsten Dienstag um elf Uhr zu uns kommen, dann wird sie durchgecheckt", hot'sa zern Franz gsochd. Dahamm hot die Anna dess Daddum und die Uhrzeid in ihrn Kalenner eigedroong - und ibersch ganza Gsichd gschdrohld. "Mensch Franz", hot'sa zer ihrn Oldn gsochd, "dess iss fei unner Hochzichs-Dooch - do sämmer doch jeds Johr immer schee mitnanner essn ganga." Der Franz hot den Wink min Zaunbfohl sofodd verschdandn. "Dess mach'mer näggsda Wochn aa", hot'er erglärd, "dei Undersuchung in Hof fängd um elfa o - do bissd logger bis zern Zwelfer-Laitn ferrdich. Anschließnd gäng'mer neemdro in dess idalienischa Resdaurant. Ezerd iss doch Schbargl-Zeid - do lossn'mer uns zer unnern Hochzichs-Dooch a scheens Schbargl-Essn schmeggn."
Am Diensdooch um bungd elfa hot der Franz sei Anna in Hof in dess Waddezimmer vom Ärzte-Haus nei gfiehrd - und iss gleich derschroggn, wall do do drinna olles gerammld vuller Leit woa. "Ich geh drozdem scho'moll schnell in die Bizzeria und reservier auf zwelfa an Disch", hot der Franz gsochd, iss die boa Schriddla niiber zu den Resdaurant ganga und hot hausn neber der Eingangs-Diir gleich moll die Schbeisekaddnsch aweng schdudierd. Dann wolld'er nei geh und an Disch reserviern, obber Dunnerkaal - die Diir woa zu, die Bizzeria hot neemlich Ruhedooch k'habt. "Naja", hot der Franz vor sich hii gebrammld, "es gibt ja nuch annera Resdaurants, wo'mer zer Middooch a fessdlichs Schbargl-Essn grichd." Obber leider, leider - der Dooch woa wie verhexd. Die Undersuchung von seiner Anna woa jednfolls net um zwelfa verbei - erschd um zwa iss die Anna widder im Waddezimmer erschiena, wo na Franz scho die ganza Zeid der Moong laud gegnurrd hot. Ezerd woa fir die hungrichn Eheleit nadirlich ka Werrdshaus mehr offn. So iss ihna nix weider ibrich gebliem, wie dass'sa gleich nebern Ärzte-Haus ihrn Hunger schdadds beieran fessdlichn Schbargl-Essn mit ana Körry-Warschd gschdilld hamm - in ana Budn min Noma "Katastrophen-Imbiss", woss an den missgliggdn Hochzichs-Dooch werglich subber dazu gebassd hot... Gerch
31.05.2014
Do woa nadirlich die Freid gruß, wall doch der Wilhelm a schdrenger Chrisd iss und die zehn Geboode eisern befolchd. Bei der Keuschheid iss'er sogoa boll aweng a Fundamendalisd: Wenn na, woss zwa oder drei Moll im Johr bassierd, die Wollusd baggd, nocherd hängd'er im Schloofzimmer immer erschd a Gscherr-Diichla ibersch Kruzifix driiber, bevor'er anschließnd fir die ehelichn Bflichdn zer seiner Oldn ins Bedd nei hubfd.
Jednfolls iss der Wilhelm a dief glaibicher Mo. Er gedd jedn Sonndooch in die Kerng, fiehrd a anschdändichs Leem und hot Ehrfurchd vor der Schebfung. Firn Wilhelm iss die Welld vuller Weisheid, olles hot san Sinn - sogoa die Viecher sänn fir ihn wie Briider und Schwessdern . Obber manchsmoll werrd der Wilhelm mit derra Näggsdnliebe fei auf a hadda Broob gschdelld - wie zern Beischbill an san Gebardsdooch. Do iss'er dahamm aufs Klo ganga und hot gleich moll die neia Bibl mitgenumma, wall'er bei seiner Sizung aweng drinna rum bläddern wolld - der Wilhelm iss neemlich a Klo-Leser. Und wie er grod bei der Bergpredigt die schenn Gedankn iber Dolleranz und Barmherzichkeid gelesn hot, und dass'mer kan Lebewesn a Leid zufiing derf - hot der Deifl ogegriffn: durchs offna Fensder iss neemlich a Webbs rei gfloong und hot sich immer merra na Wilhelm san naggerdn Hintern genäherd. Ezerd woa der Wilhelm in ana schbiriduelln Zwiggmiehl drinna. "Die Webbs", hot'er sich gedachd, "iss genauso a Gschebf Goddes wie ich selber, also muss ich sa reschbeggdiern - sie iss wohrscheins zu mir gschiggd worrn, um mei Dolleranz auf die Broob zer schdelln". Obber so a Geduldbroob hot nadirlich aa ihra Grenzn. Drei Minuddn lang iss die Webbs um na Wilhelm san Hintern rum gegraasld, und er hot sich erschd goa net beweechd, obber dann woa sei Geduld am End. Der Wilhelm hot mit der Bibl rum gfuchdld und wolld na Feind friedlich verdreim, obber olles woa fir die Kaz, die Webbs hot ums Verreggn net noochgeem . So iss na Diirfreind Wilhelm im Sizn nix weider ibrich gebliem, wie dass'er mit den schenn "Buch der Weisheit" zugschloong hot - und scho woa die Webbs zerquedschd neber der Klo-Berschdn untn an der Wänd gebichd. Dass der erschda Einsaz von derra schenn Bibl gleich a Sind geechers 5.Gebood "Du sollst nicht töten" woa, hot na Wilhelm fei schwera Gewissnsbiss gemachd. Obber jeda Dolleranz hot hold ihra Grenzn - aa na Wilhelm sei "Schwessder Webbs" derf sich net olles erlaum...
Dies ist eine mit page4 erstellte kostenlose Webseite. Gestalte deine Eigene auf www.page4.com