Dies ist eine mit page4 erstellte kostenlose Webseite. Gestalte deine Eigene auf www.page4.com05.04.2014
Hossd du den neia "Klimabericht" gelesn? Mein lieber Herr Gesangverein - do kenna'mer uns fei auf ollerhand gfassd machn! Aa in unnerer Region soll sich ja demnäggsd des Klima ändern, hamm die Wissnschafdler gsochd - es werrd neemlich vill wärmer! Dess hätt nadirlich den Vordaal, dass's uns im Winnder nimmer vor Kält beidld, mir schboan bei der Heizung an Haufm Eel, missn fir die diggn Glamoddn ka Geld mehr ausgeem - und du hossd gleich a boa Euro merra in der Daschn, wenn'sd im Werrdshaus aweng woss geecher dan droggna Hols dussd.
Unner Ruf, dass mir dess "Bayerische Sibirien" sänn, gild jednfolls nimmer lang. Dann laafn die Leit in Hof im Safari-Hemm und mit Bermuda-Husn rum, wenn sa karz vor Weihnachdn ihra Gschenker eikaafn. Und im Roodhaus hoggn die Schdaddrääd im bundn Hawaii-Hemm und miteran Droobn-Helm aufn Kobf im Sizungs-Sool drinna, wall'sas sunsd in derra Briiglhiz net ausholdn. Driim im "Theresienstein" wachsn die Palma und draußn in Ossegg erndn die Bauern schdadds Erbfl demnäggsd Banana, Daddln und Abflsina.
Obber der Klimawechsl brängd nuch a ganz annera Veränderung mit sich. Es werrd net lang dauern, nocherd hammer draußn am Untreusee die erschdn Groggodiler und Nilbfeer.
Die Forscher hamm sogoa gewarnd, dass kimbfdich in derra Wärm am Wasser die Malaria ausbrichd - do derfsd fei amds nimmer am Ufer vom Untreusee oder an der Sool schbaziern geh! So a Verdauuungsgang nooch na Amdessn iss dann leemsgfährlich. Und dahamm konnsd dich geecher die Malaria bloß schizn, wenn'sd ibern Bedd a Moskiddo-Nez aufschbannsd. Mir grausd's fei scho, wenn ich bloß dro denk: Ich muss doch noocheran Schofkobf-Amd im Werrdshaus nachds a boa Moll aufs Klo - Kerl, im Finsdern verfängsd dich doch in so an Moskiddo-Nez wie in ana riesichn Schbinnaweem, wenn'sd miteran Blädderer ausn Bedd raus grabblsd. Nooch den Klima-Wandl leem mir zwoa wie in Hawai, obber sehna uns wohrschscheins widder zerrigg in dess guuda olda "Bayerische Sibirien"... Gerch
12.04.2014
Jeda Zeid, soong die Wissnschafdler, hot ihra schbezielln Grankerdn. Frieher hamm die Menschn unter der Bessd, unter Boggn und Sifillis geliddn - und heit machd der Schdress die Leit kabudd. Am schlimmsdn iss ja angeblich dess "Multitasking". Erschd lezda Wochn hamm'sa am Franz san Schdammdisch driiber gschimbfd - und der Werrd hot gleich aus der Zeidung vorgelesn, wie gfährlich dess iss. "Wer ständig versucht, mehrere Aufgaben zugleich zu erledigen, riskiert seine Gesundheit", hot der Werrd aus san Zeidungsberichd ziddierd - und weider: "Die Mehrfachbelastung kann zu Kopfschmerzen, Nervosität, Bluthochdruck, Magen-Darm-Beschwerden, Depressionen oder Schlafstörungen führen. Außerdem erhöht permanentes Multitasking die Fehlerrate bei der Arbeit."
Der ganza Schdammdisch woa bei derra Schreggnsmeldung unter Schogg gschdandn - und die Männer hamm zur Beruichung sofodd a Rundn Schnabbs beschdelld. Dann iss a heffdicha Diskussion los ganga, dass'mer in der Ärberd auf goa kan Foll zwawoss oder dreiwoss zur selm Zeid machn derf, wall dess der Mensch im Kobf net aushäld. Bloß der Franz hot sich net aufgereechd. "Iich hob fei ka Broblem, wenn ich verschiedns Zeich gleichzeidich mach", hot'er gsochd - und er hot mit derra Behaubdung net amoll geloong. Dahamm fleezd'er sich neemlich jedn Amd in san Sessl nei, scholt na Fernseher ei - und beweisd in die näggsdn drei Schdundn, dass'er "Multitasking" beherrschd, ohne dabei nervees zer werrn: Er schaud an komblizierdn Grimmi o, wo'mer genau mitdenkn muss - und gleichzeidich drinkd'er von san Bierglos und bobbld wechslweis aus vier verschiedna Schisserla moll Erdnissla, moll Dschibbs, moll mexikanischa Daggos, moll Gummibäärla aanzln raus. Der Franz beherrschd also sechs unterschiedlicha Däädichkeidn, ohne dass'er durchnanner kimmd oder die Leidn grichd, die angeblich darch "Multitasking" im Kobf, im Bluud oder im Darm endschdänga. Und "Schlafstörungen" kennd der Franz sowieso net ! "Wenn ich nooch man Fernseh-Ambd, nooch meina drei Seidla Bier und nooch die Nissla, Dschibbs, Daggos und Gummibäärla ins Bedd geh, schloof ich wie a Ratz", sochd'er - und widerleechd mit san langjährichn Selbsdversuch dahamm im Wohnzimmer olla Warnunga vor "Multitasking"... Gerch
26.04.2014
Umso wichdicher sänn dessweecher die Haufm Hobby-Handwerger, die wossn nooch Feieramd drundn im Keller in ihrer glann Wergschdadd rum bobbln.
Mit Zanga, Seech und Hammer helfn'sa, wenn erchezwo im Haus a Wasserhahn drobfd, a Loch in die Wänd gebohrd werrn muss oder wenn a Diir quiedschd. Bei an seddn Helfer in der Nood derf'mer hold die Qualideeds-Anschbrich net ganz so hoch nauf schraum - wie lezda Wochn widder moll a Vorfall in Trogen gezeichd hot.
Do wolld neemlich a Eheboa nooch 37 Johr endlich amoll a neia Kichn kaafn. Obber wall in den oldn Haus olla Wänd grumm und schief woan, hot's a Broblem geem: Wie solln dä die schenn neia Einbau-Meebl, der Gscherr-Schrank, der Herd und dess annera Zeich grood schdeh, wenn dahinter olles schief iss?!
In derra Nood hot der Schwiechersohn Hans, a Freizeid-Handwerger mit johrelanger Baumarkd-Erfohrung, sofodd seina Diensde ogeboodn. "Ich bau eich vor denner grumma Wänd Rigips-Bladdn auf, dann iss olles schee grood - und mir kenna die neia Kichn so aufschdelln, dass olles bassd", hot'er gsochd.
Olla woan vom Hans san Vorschlooch begeisderd - und drei Dooch schbeeder hot'mer dess Ergebnis bewunnern kenna: Vor die nooglneia Rigips-Wänd hamm die moderna Kichnmeebl werglich subber ausgschaud. Olla hamm'sa gschdrohld und na Hans ibern Schelln-Keenich gelobbd.
Obber aferamoll hot in der neia Kichn woss gediggd, und kaner hot gewussd, wo dess gfährlicha Geraisch her kimmd. "Dess heerd sich fei oo wie a Bombm", hot die Mudder gejammerd, "do werrd doch net a Dallibaan a Handgranaadn in der Brood-Rehrn von unnern neia Herd verschdeggd hamm - denner Derrorissdn iss doch olles zuzerdraua!" Die arma Fraa hot fei Angst k'habt, dass ihr die neia Kichn gleich exblodierd und dass ihr des ganza Zeich um die Ohrn fliechd.
Obber dann iss ihr aufgfolln, dass die old Kichn-Uhr verschwundn woa - und so hot sich dess Räädsl ganz friedlich geleesd: Der Hobby-Handwerger Hans hot neemlich ban Aufbau von denna Rigips-Wänd in san Eifer die olda Wanduhr ibersehng - und die diggd seitdem hinter die Rigips-Bladdn weider vor sich hii, unerreichboa fir jedn Handwerger. Ezerd waddn olla sehnsichdich draaf, dass die Badderie in der Uhr langsam ihrn Geisd aufgibd, damit in derra schenn neia Kichn endlich Ruh eikehrd... Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com