Dies ist eine mit page4 erstellte kostenlose Webseite. Gestalte deine Eigene auf www.page4.com01.03.2014
In die lezdn Faschingsdooch gedds fei nuch amoll rund! Mei Martha und ich iberleeng uns scho die ganza Wochn, woss'mer am Rosnmondooch aufn "Schützen-Ball" oziehng. Mer muss ja inzwischn vorsichdich saa weecher derra Disgrimminiering, sinst bissd neemlich gleich im Gfängnis drinna. Frieher sänn die Martha und ich gern ols Neecher-Bäärla aufgedreedn: Mit Schuhgreem hammer uns die Gsichder gschwärzd, die Martha hot sich a karz Reggla aus Schdroh und Banana gemachd - und ich bin mit ana oldn Drommbeedn in der Händ ols Louis Armstrong ganga. Obber a sedda Massgn ko'mer sich heid nimmer draua, wall'sd dann sofodd weecher "Ausländerfeindlichkeit" ogezeichd werrschd.
Mei Freind Alfons woa lezda Wochn ols Chinees aufm Fasching vom Fußbollverein - Kerl, woa dess beinlich! Do sänn neemlich aa zwa echda Chinesn aufgedauchd, die wossn ineran China-Restaurang ärbern. Zern Gligg hamm sich die zwa Männer aus Hongkong mit Ledderhusn ols oberbayerischa Trachtler maskierd, sodass wengsdns kan rassisdischn Dummult geem hot. Obber der Alfons mit san gelbn Seidnmänterla und san schwarzn Hoor-Zobf hot jedsmoll a schlechds Gewissn k'habt, wenn'er im Sool an die zwa originol chinesischn Schuhbladdler verbei gedanzd iss oder wenn'er'sa in der "Sekt-Bar" gedroffn hot.
Frieher sämmer aa manchsmoll ols Indianer aufn Fasching ganga, obber dess konnsd fei aa vergessn: Die Indianer k'heern ja inzwischn zer die bedrohdn Velker! Do derfsd fei net ols bsuffner Winneduu auf der Danzflächn rum schderzn, sinsd werrsd gleich von der Ausländer-Behörde skalbierd, wallsd die schdolzn Ureinwohner ausn Wildn Wessdn effndlich verunglimbfsd. Um jedn Ärcher zer vermeidn, geh ich heier wohrscheins ols Gärrdner aufn Rosnmondoochs-Ball - do bi'ich rassisdisch ausn Schneider! Bloß die Old nergld scho widder aweng an mir rum. "Die griina Scherzn, die Gaddnhändschich, der Rechn und der Schdroh-Huud schaua sowieso aus wie nei, wallsd du dich immer vor der Ärberd driggsd", hot'sa gessdern aweng bissich gsochd.
Obber lieber loss ich mich dahamm von der Fraa beleidinga, bevor dass ich vor Gerichd an Brozess griech und eigschberrd werr - bloß wall ich aufm Fasching ols Scheich, ols Sidding Bull oder ols Urwold-Haiptling aweng an Foxdrodd gedanzd hob. . . Gerch
08.03.2014
Ka Wunner, dass in derra schenn Nadduur gern aa die Schbaziergänger mit ihra Hund rum laafn - und dess hot lezda Wochn in der Generolversammlung vom Schborrdverein aweng a Broblem gemachd.
Zwa Schdundn lang iss die "Tagesordnung" friedlich abgeärberd worrn: die Begriiißung, dann die "Jahresberichte" von die Juniorn bis zu die "Oldn Herrn", anschließnd hot der Kassier iiber die guudn Finanzn geredd, die kombledda Vorschdandschafd hot einschdimmich Endlassdung grichd - und die Neiwohln sänn in bessder Harmonie iber die Biehna ganga. Zern Schluss woan bloß nuch "Sonstiges" und "Ehrungen" aufm Brogramm, obber do hamm a boa Mitglieder erschd moll a dringenda "Rauch- und Pinkelpause" gfordert. Die Männer hamm doch scho eddlicha Waazn gsuffn k'habt, sodass in der Bloosn der Drugg auf 5 Atü gschdieng iss - und bei die Raucher woa der Niggodiin-Schbiigl gfährlich dief in roodn Bereich abgeruddschd.
Also iss die Versammlung underbrochn worrn, und die Männer sänn sofodd aufs Klo gewerchd. Wall dadd obber der Andrang goa so gruß woa, sänn die massdn gleich naus in die freia Nadduur ganga und hamm ihr Gschäfdla im Finsdern zwischn die Bischla erledichd.
Nooch ana Verrdlschdund iss dann drinna im Sool mit die "Ehrungen" weider ganga. Der Vorschdand hot sich in die Middn vom Sool gschdelld und die Jubilare aanzln zu sich vor gerufn - und hot in seiner "Laudatio" iber jedn aweng woss Scheens derzelld. Obber aferamoll iss a grußa Unruh endschdandn. Die Männer hamm sich min Ärml die Noosn zuk'holdn und die Weiwer hamm vor ihrn Gsichd mit ihra Daschndieechla geweedld, wall's im ganzn Sool gschdunkn hot wie aufm Missdhaufm.
"Wo kimmt dä der Gschdank her?", hot der Vorschdand in die Rundn nei gfrochd, obber dess Räädsl woa gleich geleesd: Die Ursach fir dess elenda Gerichla iss an seina einga Schuh dro k'hängd! Draußn ban Binkln iss der Herr Vorschdand neemlich inneran Hundshaufm nei geloodschd - und hot den Dregg an seina Sulln selber nei na Sool gschlaafd. Aus der Kichn hamm'sa jednfolls gleich an Aamer mit haaßn Wasser und a Babbier-Rolln k'hulld - und die ganza Sauerei am Vorschdand seina Schuh widder beseidichd. Anschließnd hamm'sa olla Fensder aufgerissn und fimf Minuddn lang geliffd, dann sänn die Ehrunga foddgsezd worrn - wie immer vuller Harmonie und ohne weidern Fehldridd vom Vorschdand...
15.03.2014
Dessweecher hamm'na seina Kinner nooch langa Zuredn dazu gebrachd, dass'er sich endlich a Heer-Gereed kaafd - und seitdem grichd'er rundrum widder olles mit.
Dass der Fritz droz san hoha Older so guud beinanner iss, verdankd'er wohrscheins aa seina villn Kaniggl. Ols erfolgreicher Hosn-Zichder hot sich der Fritz neemlich scho immer um die Viecher im Schdall gekimmerd, dessweecher iss'er geisdich beweechlich gebliem - es gibd hold dauernd aweng woss zern Ärbern und zern Noochdenkn. Vor jeder Kreiskaniggl-Schau hot der Fritz seina Rammler immer exdra schee hergerichd, damit'sa an Breis gewinna. Sogoa selber zamm gebrauda Drobfn hot'er ihna vorher immer mit ins Fudder nei gemischd, damit ihna bei der Brämierung die Aang leichdn und dess Fell schee glänzd.
Lezda Wochn hot sich der Fritz dahamm nooch na Essn aweng aufs Kannabee geleechd - und damit bei san Niggerla am Ohr nix driggd, hot'er vorher sei glaans Heer-Gereed raus und in die linka Husndaschn gschdeggd. Geecher Amd iss'er dann zern Fiddern in san Kaniggl-Schdall naus ganga - und hot goa net gemerkd, dass na dord ban Buggn aferamoll sei Heer-Gereed aus der Husn rausgerudschd iss, wall die linka Husndaschn a Loch k'habt hot. Der Fritz hot im Schdall aweng mit seina Hosn geredd, hot ihna Fudder geem - und ganz am Schluss hot'er wie immer na Ressd vom Fudder am Bodn zamm gekehrd, afera glaana Schaufl aufgeloodn und olles in dess Näbfla vom gressdn und schennsdn Rammler neigschidd. Dass'er bei derra Ärberd aus Versehng aa san rogfollna Heer-Abbarad mit derwischd hot, der woss zwischn die Breggerla aufn Bodn geleeng woa, iss'na Fritz goa net aufgfolln. Schbeeder hot's nadirlich im ganzn Haus a grußa Such-Aggzion nooch den verschwundna Heer-Gereed geem. Die Fraa und die Kinner hamm olles aufm Kobf gschdelld, obber dess Malefiz-Ding woa ums Verreggn nerchez zer finna.
Am näggsdn Dooch hot na Opa sei Enkl ban gemeinsoma Amdessn von ana indressandn Beobachdung derzelld. "Draußn im Schdall", hot der Gunga gsochd, "do hoggd na Opa sei gscheggerda Rammler hintern Gidder und bfeifd."
"A Hos ko doch net bfeifn", hamm'sa am Disch olla gelachd - und der Vadder hot miteran Grinsn nuch ergänzd: "Es ko heggsdns saa, dass der Rammler zer seina Weiwer niiber pfeifd, die wossn neemdro im Schdall hoggn - wer was, woss'er von denner will?!" Obber der Enkl hot net noochgeem, bis dass die ganza Familie zum Schdall naus ganga iss - und Daadsach: Ausn gscheggerdn Rammler san Verschlooch hot's raus gebfiffn. Erschd hamm'sa werglich gedachd, dass der Rammler weecher die Kaniggl-Weiwer neemdro vor Wollussd keichd und pfeifd. Obber wie'sa dann in der Fudderschissl na Opa sei Heer-Gereed endeggd hamm, woa dess Räädsl auf ganz und goa unerodischa Weis geleesd... Gerch
22.03.2014
Dauernd werrd ihr haaß und kold, und seid zwa Johr iss'sa auf der Such nooch na Sinn vom Leem: Sie werchd zwamoll die Wochn in ihr Frauengrubbn, wo'sa Feng Shui machn, Raicher-Schdeebla ozindn und iber ihra Männer herziehng. Obber der Heiner sichd die Grisn von seiner Oldn ziemlich realisdisch: "Die schbinnd hold aweng - dess vergedd scho widder!" Ollerdings muss'er immer aufbassn, sunsd werrd'er von seiner Gunda in dess esoderischa Zeich mit nei gezoong. Bsondersch gfährlich iss fir na Heiner jeds Johr die Fassdnzeid, wall do sei Gunda dauernd neia Ideen hot. "Heier flieng'mer a Wochn nooch Kreta und machn a besinnlicha Fassdn-Wanderung", hot'sa kerzlich zer ihrn Mo gsochd.
Der Heiner hot gleich seina Ohrn schbizd. "A Fassdn-Wanderung? Woss iss'n dess?"
"Do wandern'mer mitera ganzn Grubbn von Gleichgesinnda auf derra schenn Insl rum - und drinkn a Wochn lang bloß Bfefferminzdee", hot sei Fraa gsochd. Der Heiner hot sofodd broddesdierd: Auf goa kan Foll machd'er an seddn Bleedsinn mit, hot'er gsochd, dess iss doch nausgschmissns Geld. "Erschd der deira Flug nooch Kreta", hot der Heiner gschimbfd, "und dann zohlsd fir den lächerlichn Pfefferminz-Dee und die haddn Beddn nuch 500 Euro die Wochn, nix do!!!
Es woa a ziemlicher Schdreid, obber af zerlezd hamm'sa sich geeinichd: A Fassdn-Wanderung im Franknwold iss beschlossn worrn - mit vier Weiwer aus der Frauengrubbn und denner ihra Männer. Obber der Gunda ihr Idee hot ziemlich gfährlich geglunga - wassd scho: na ganzn Dooch nix essn und im Ruggsagg bloß Hagebuddn-Dee ohne Zugger - kan Schoggo-Riegl, ka Brod mit Rindfleischwarschd, kana Wienerla, ka Bier. Der Heiner hot weecher denna schlechdn Aussichdn gleich gforderd: "Obber mir wandern bloß an aanzichn Dooch lang - und na Weech such iiiich aus."
So sänn die fimf Bäärla lezdn Sonndooch zer frieh vom Hofer Bohnhof nooch Naala gfohrn. Darch die schenn Wälder sänn'sa dann gemiidlich in Richdung Froschbach-Dool ganga - die Weiwer woan von derra Naduur ganz begeisderd. Aferamoll woan'sa direggd vor der ,,Fränza" gschtandn. "So a Gligg", hot der Heiner gsochd und aweng mit die Aang gezwingerd - und dess Werrdshaus woa fei zufällich sogoa offn, also sänn'sa olla nei! Die Weiwer hamm an Frichdedee nei gschlabberd und boll aweng neidisch zer die Männer gschaud, die wossn ihrn schdechendn Darschd mit zwa Seidla Fassdn-Bier geleschd hamm - und dazu aweng a gemischda Brodzeid, damit sich, wie die Heilige Hildegard von Bingen immer embfohln hot, "die Seele in ihrem Leib wohl fühlt".
Nooch derra daals geisdlichn, daals grobschdofflichn Säddichung ging's dann aufn Heiner san Weech weider ibern Spitzberg nooch Bobngriin, wo'sa rein zufällich scho widder vor an Werrdshaisla gschdandn sänn - der Heiner kennt sich hold aus im Franknwold! Die Weiwer widder aweng Fassdndee, die Männer dessmoll zum Bier an Bauernkees auf Budderbrod - und zwa Schdund schbeeder iss die Wandergrubbn in Bad Schteem okumma. Do hamm die Frauen in der Drinkhalln so an gsundn Säuerling aus der Schnobldassn nei gschlirfd - und die Männer hausn a Boggbier wie frieher die Mönch.
Lezda Wander-Einkehr woa dann die "Adelskammer" in Carlsgriin. In den oldn Werrdshaus hamm die Männer die Fassdn-Wanderung mit rodn und weißn Bressagg, an Waazn und zwa dobblda Obsdler abgschlossn, während die Weiwer boll aweng graffdlos in ihrn Hagebuddndee nei gschaud hamm. Schließlich hamm sich olla von ihra Kinner min Audo abhulln lossn.
"Dess woa a scheena Fassdn-Wanderung", hamm die Männer gsochd - und der Heiner hot aweng gegrinsd: "Do brauchsd fei net nooch Kreta nunder ..." Gerch
29.03.2014
Ich hob ihr ja an Weihnachdn exdra scheena Gaddngerääde undern Chrissbaam geleechd, damit'sa bessdns ausgerissd iss, wenn'sa los leechd: an braadn Leddergurrd zern Umschnalln, wo'mer in die Daschn dess ganza Handwerkszeich nei dudd, außerdem a eiserna Dreh-Goobl, damit'sa sich ban Umschdechn net goa so arch bloong muss, und schließlich a kombledds Sorrdimend an Häggla, Messer, Schern und Rechn - daalweis sogoa mit ergonomischa Holzgriff, damit'sa kana koldn Finger grichd. Glanzschdigg bei derra Ausrissdung iss a Schdroh-Huud mit ana riesinga Grembn - geecher an Sonnaschdich bei allzu grußa Hiz.
Ollerdings muss ich fei aufbassn, sunsd blabbd die Gaddnärberd an mir selber hänga. Die Martha hot neemlich lezda Wochn am Zaun zu unnera Nachbera a boor Bemerkunga gemachd - Freindla, do glingln bei mir die Alarmgloggn! "Ols Erschds muss mei Mo amoll do hindn am Zaun die ganza Erdn umschdechn", hot'sa der Nachbera erglärd und dabei min Finger auf unner Gemiise-Beed gezeichd, "und zwoa mit derra neia Gaddngoobl. Do iss fir ihn die Ärberd nimmer so schwer wie frieher mit den glan Schbaadn, wo'ner hinderher ollawaal dess Greiz so weh gedoo hot, dass'er sich weecher seina Bandscheim zwa Dooch ins Schdufn-Bedd nei leeng mussd."
Aha, hob'ich mir gedachd, die Martha will mich widder im Gaddn eischbanna!
Vorsichtsholber hob'ich mir gessdern vom Doggder gleich moll dess rechda Handgelenk aweng eibandaschiern lossn. "Ich wass net, woss dess iss", hob'ich zern Doggder und dahamm zur Martha gsochd, "obber ich ko fei kaum nuch a Seidla Bier hoch heem. Am Schtammdisch maana'sa, dess ko a Sehnascheidn-Enzindung saa, wo'mer vorsichdich saa muss, sunsd werrds chronisch."
Mer muss fei immer aufbassn wie a Hefldlamacher, dass'mer net mit Ärberd eigedeggd werrd, wenns draußn im Gaddn los gedd! Dess ewicha Gebobbl in der Erdn iss neemlich nix fir mich. Ich setz mich lieber hindern Haus aufs Bänkla und schau freindlich in die Geengd. Und in Griffweidn neber mir schdedd mei Seidla Bier - auf der linkn Seidn nadirlich, wall ich doch aus gewissn Grindn mit der rechdn Händ nix heem derf... Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com