Dies ist eine mit page4 erstellte kostenlose Webseite. Gestalte deine Eigene auf www.page4.com01.02.2014
Obber denner arma Deifl ko fei ezerd k'holfn werrn - und zwoa mit ana ganz neia Medoodn vom Psychiader: "Konfrontations-Therapie" haaßd dess Zauberworrd. Do missn die Angsdhosn, die wossn medizinisch "Phobiker" haaßn, ungfähr 20 Moll ineran Schbeziol-Kurs nei geh - und wenn am End die Gehirn-Wäsch erfolgreich woa, gschichd dess Wunner: Der "Phobiker", der woss sunsd immer die Husn gschdrichn vull hot, freid sich ezerd auf san näggsdn Zohnorzd-Bsuch und hoggd sich miteran Lächln und ohne Schwizfleggn under die Arm ganz endschbannd auf den beriehmdn Schduhl nauf.
Frieher woa fei a sedda "Konfrontations-Therapie" vill einfacher und billicher. Do iss'mer vorher selber doochlang zer Fuß in 100 Meder Abschdand um die Zohnorzd-Braxis rum gschlichn - immer a bissla neher no. Nooch na fimfdn Selbsd-Versuch hot'mer dann schichdern an der Braxis geglingld und gfrochd, ob'mer sich amoll brobeholber auf den Follder-Schduhl nauf sezn derf, obber ohne Doggder und ohne Geraisch vom Bohrer - der durfd erschd beieran schbeedern Bsuch dazu gscholdn werrn. Wemmer den ganzn Schdress ausk'holdn hot und wenn endlich - wie die Psycholoong soong - "keine Fluchtsymptome" aufgedrehdn sänn, woa der Mensch reif fir a "Zahnstein-Reinigung" under Vollnarkosn. Wobei nadirlich der echda "Phobiker" vor Behandlungsbeginn nuch den bedrohlichn Anbligg ausholdn mussd, dass sich der Zohnorzd mit ana Maskn vor na Gsichd vermummd hot, damit'mer na schbeeder bei ana bollizeilichn Geengiberschdellung net idendifiziern ko - und weecher seina Gummihändschich hinderlässd'er ja sowieso kana Fingerabdrigg am Obfer.
Obber so an psychologischn Kurs gibd's fei net bloß fir die "Phobiker", sondern aa fir die Zohnärzd selber. Die kenna neemlich ineran Seminar lerna, wie'sa ihra Husnscheißer mit ana sanfdn Endschpannungs-Dechnigg und scheena Redn iberlissdn. Obber wenn'sa dann ihrn "Phobiker" endlich so weid hamm, dass'er schreech im Schduhl liechd und lächld - und sie schmeißn ihrn Turbina-Bohrer o, dann iss massdns aferan Schlooch leider olles widder fir die Katz... Gerch
08.02.2014
Karz nooch san 50. Gebardsdooch hot sich der Franz von san Doggder amoll grindlich undersuung lossn - und do hot sich raus gschdelld, dass der Franz a Obfer von seiner frängischn Ernährung iss: Ibergewichd, zer hoha Bluuddrugg, Gichd - und vill zer vill Kollesderin. Aus der Abbodeegn hot dann der Franz an Haufm Dableddn und Drobfn hamm gebrachd. Obber sei Fraa, die woss sich mit ihra Freindinna ban Kaffegränzla manchsmoll aa iber die moderna Ernährung ausdauschd, hot gleich abgewungn. "Die Billn mit denner scheedlichn Neemwirgunga brauchsd fei net schluggn", hot die Hilde gsochd, "do gibd's doch ezerd ganz neia Leemsmiddl, die woss genauso gsund machn wie Medikamente".
Am näggsdn Dooch hot'sa fir ihrn Franz gleich moll a glaans Sorrdiment ausn Reformhaus k'hulld: zwa Lidder Diäd-Milch, zwelf Becherla linksdrehendn Joggurd und a Diäd-Margarina. Auf jeder Verbaggung woa deidlich draaf gschdandn, woss drinna iss: "Functional food" aus Ameriga, also Leemsmiddl mit ganz gsunda Zusaz-Schdoffe.
"Dess ,Functional food' machd dich sofodd widder gsund", hot die Hilde gschdrohld, "do sänn neemlich "Phytosterole" drinna, hot die fachkundicha Verkaifera im Reformhaus gsochd". Und ihrn vill zer diggn Mo hot'sa Muud gemachd: "Do brauchsd dir fei um dei Kollesderin kana Gedankn mehr machn, und sogoa geecher Durchfoll iss dess Zeich guud. Mit denner heilendn Leemsmiddl werrschd 100 Johr old". Der Franz woa sich ollerdings net sicher, ob sich beiera seddn moochern Ernährung so a langs Leem iberhabsd verlohnd. Er hot sich neemlich dro erinnerd, wie sei Hilde vor drei Johr scho moll die ganza Ernährung ändern wolld. Sellmoll hot'sa schdadds die schenn feddn Haggfleisch-Gleesla an biologischn Griinkern-Bräädling servierd, am Sonndooch hot's Mangold-Rulladn geem, die won mit Dinkl und Ziengkees gfilld woan - und schdadds Leberwarschd woa a Tofu-Aufschdrich aufm Brood draaf. Nooch zwa Wochn wolld sich damols der Franz scheidn lossn, obber dann iss die Hilde einsichdich worrn und hot widder auf Schweinsbrodn mit Glees und Graud umgschdelld. Seitdem iss die Ehe widder schdabiil.
"Wenn deina ,Phytosterole' werglich so gsund sänn", hot der Franz sei Olda missdrauisch gfrochd, "warum werrn'sa dann bloß in Joggurd und Margarina nei gemischd - und net in Bressagg, ins Wellfleisch und in die Bluud- und Leberwärschd?"
Dess wussd die Fraa aa net. Sie iss obber gleich ins Reformhaus ganga und hot die Frooch: "Gibd's dä aa Bluudwärschd oder Bressagg ols "Functional food"?" Erschd hot die Verkaifera gedachd, die Kundin will'sa veroaschn, obber gleich am näggsdn Dooch hot'sa an Brief an die Herschdeller-Firma von denner "probiotischen Produkten" gschriem - und ezerd iss'sa selber gschbannd, ob'sa firn Franz a guuda Noochrichd zerrig grichd. Obber so lang will der Franz net waddn! Der schluggd dawaal geechersch Kollesderin und geecher die Gichd jedsmoll erschd seina Dableddn, bevor er sich iber die Schlachdschissl her machd... Gerch
15.02.2014
Die Erna iss 86 Johr old und lebbd inera schenn Altbauwohnung am Dorfrand - und wall'sa so rissdich iss, sorchd'sa immer nuch fir sich selber. Ollerdings hot ihr lezda Wochn dess Wedder aweng zer schaffn gemachd, und sie hot sich a Erkäldung eigfangd. Weecher so an Dreggla rennd obber die Erna net gleich zeran Doggder, sondern gedd an ihr glana Haus-Abbodeegn, wo a Haufm selber gemachda Nadduur-Heilmiddl drinna lieng: Schwedn-Kraiter, selber gemachder Holler-Safd, gedroggnda Bfefferminz-Blädder und Lindn-Bliidn fir an Dee und Kamilln zum Inhaliern. An ganzn Dooch lang hot sich die Erna mit den Zeich selber behannld, und dann hot'sa sich nuch die näggsdn zwa Dooch ins Bedd geleechd. Damit'sa bei ihrn Gsundheids-Schloof net gschdeerd werrd, hot'sa sich Waddebaischla in die Ohrn nei gschdeggd und dess Dellefon ausk'hängd.
Ausgerechnd zur gleichn Zeid wolld der Hausbesizer bei der Erna orufn und ihr soong, dass näggsda Wochn die Handwerker kumma und na Wasserhohna in der Kichn rebbariern, wall der dauernd aweng gedropfd hot. Obber leider woa der Erna ihr Dellefon immer besezd. Der guuda Mo hot's zwoa jeda holba Schdund prowierd, obber immer iss dess Besezd-Zeing kumma. "Villeichd hot die Erna an Herzanfoll oder a Kreislaufschwächn grichd, iss bewussdlos zer Bodn gschderzd - und liechd seid zwa Dooch hilflos in ihrer Wohnung", hot der firsorglicha Mo zu seiner Fraa gsochd, "hoffndlich lebbd'sa nuch." In seiner Angst um die old Fraa hot'er jednfolls die Bollizei verschdändichd - und scho 20 Minuddn schbeeder woa a siemkebfigs Hilfskommando vor der Erna ihrer Wohnungsdiir im zweidn Schdogg gschdandn: zwa Bollizisdn, zwa Männer vom Schlissldiensd mit ihra Werkzeich-Kässdn, a Nood-Oazd mit san Kefferla, der Hausbesizer selber und sei Hausmassder.
Die besorchdn Männer hamm an der Diir geglobfd und Schdurm gelait, der Doggder hot sogoa amoll darchs Schlisslloch geluurd, obber der Mo vom Schlissldiensd hot gsochd, dass do nix zern machn iss. "Die Diir iss zugschberrd und der Schlissl schdeggd von inna", hot'er fessdgschdelld. Goddseidank woa in derra oldn Vorsool-Diir nuch a Milchglos-Scheim drinna. "Mir missn die Scheim nei schloong, dass'mer von inna aufmachn kenna", hot der ana Bollizisd gsochd - und die zwa Handwerker vom Schlissldiensd hamm den Befehl sofodd ausgfiehrd. Mit laudn Geglirr hamm'sa die Scheim zerdebbferd. Dess wiederum hot die Erna im Bedd droz ihra zwa Waddebaischla in die Ohrn k'heerd - und wie die siem Männer grood im Vorsool drinna woan, iss die Erna im Nachdhemm aufgedauchd. Nadirlich hot'sa sich gfreid, dass im Ernsdfoll a Reddung so guud funkzionierd, obber fir sie woa ezerd ganz woss annersch vill wichdicher. "Wer zohlt dä die kabudda Scheim?"
"Dess ibernimm iich", hot der Hausbesitzer gsochd - so woa also olles in Budder. Und die Erna hot, wie die siem Noodhelfer widder draußn woan, drei Greizla gemachd und sich dann an Eierlikeer eigschenkd.
22.02.2014
Helfn dudd in so an Fall bloß nuch der Bauer - der machd derra Kuh dann na "Pansen-Stich".
Doderzu hulld der Bauer san Trokar raus - a dinns, silberns Rehrla, dess woss ausschaud wie a langa Schdrigg-Noodl, iss obber inna hohl. Dodermit schdichd'er seiner Kuh nei na Bauch - und sofodd zischt der Iberdrugg ausn Bauch raus. Die Kuh iss a boa Sekundn schbeeder wie derleesd - und der ganza "Pansen-Stich" dudd den arma Viech net merra weh wie a Schbrizn ban Imbfn.
Woss der Kuh hilfd, wäa manchsmoll aa fir uns Menschn net schlechd.
Wennsd ineran Dorfwerrdshaus a scheena Schlachdschissl nei gewerchd hossd - mit feddn Wellfleisch, mit Bluud- und Leberwärschd, mit Sauergraud und vill Sooß, mit drei Glees und zwa Seidla Bier, nochert ärberd's in dein Bauch genauso wie in der Kuh ihrn Pansn, wenn'sa nassn Glee gfressn hot. Do blääds dir fei aa na Ranzn auf 5 Atü auf - und es brängd bloß voriibergehend aweng Linderung, wennsd na Gerrdl um zwa Lecher weider aufmachsd.
So hoggsd also mit Schwaaß auf der Schdern auf na Werrdshaus-Schduhl - und im Bauch rumoord's, dass neemdro a Daggl scho seina Hoor aufschdelld, wall'er maand, a fremmer Hund knurrd in der Neh. Zer olln Ungligg hossd dir vorhin sogoa scho ols Noochschbeis an "Eisbecher Hawaii" beschdelld - wo soll dä der nuch hii, do bassd doch nix mehr nei?!
Dess iss ezerd der Momend, wo eingdlich a guda Werrd miteran Trokar an dein Disch kumma misserd - wie im Kuhschdoll der Bauer. Mer zichd dann dess Hemm aweng aus der Husn raus und machd na Bauch frei, und dann sezd der Werrd san vullgfressna Gassd na "Pansen-Stich".
Ach Goodla, die Erleichderung!
Do zischd die Luft darch den Trokar raus und die Wambn schnarrd zamm wie a Lufdballon. Den glann Einschdich am Bauch ko der Werrd anschließnd miteran Obsdler aweng desinfiziern, dann kimmd a Bflasder nauf - und nocherd, nocherd derf der "Eisbecher Hawaii" servierd werrn... Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com