Dies ist eine mit page4 erstellte kostenlose Webseite. Gestalte deine Eigene auf www.page4.com04.01.2014
"Do mach'mer heid amd erschdmoll dess Gansjung", hot die Fraa am Haalinga Amd gsochd, "min Groong, mit die Fliigl und der ganzn Innerei samsd Herz, Nierla und Moong." Dess "Gansjung" woa amds werglich a Gedichd, woss Bessersch häddn der Werner und sei Fraa vor der Bescherung net essn kenna! Nooch na Aufwasch hamm'sa dann mitnanner die Gans firn erschdn Feierdooch gewerzd, hamm die Fillung nei na Bauch gschdobfd und anschließnd dess Drumm Ding ineran Brääder nei gezwängd, woss ollerdings goa net so einfach woa, wall hiem und driem dauernd die Schengl nuch raus gschdandn sänn. Obber af zerlezd hamm'sa den schwern Deggl doch zumachn kenna - und die Sieglinde hot die Gans ins Rohr gschoom. "Ich brood'sa heid scho aweng oo, damit'mer'sa morng vormiddooch net goa so lang im Ufn drinna lossn missn. Mir hamm doch die Oma und die Danda Elli eigeloodn, do miss'mer bingdlich um zwelfa min Essn ofanga - und ich hob genuuch Gewerch mit die Glees und min Blaugraud", hot die Sieglinde gsochd.
In der näggsdn Schdund hot's in der ganzn Wohnung herrlich nooch derra Gans gerochn. Karz vor der Bescherung hot dann die Fraa den Brääder widder aus der Rehrn raus und wolld'na iber Nachd in Kiehlschrank nei schdelln. Obber wie'sa den eiserna Brääder aa gedrehd und gewend hot: Er woa fir die Kiehlschrank-Fächer einfach zer gruß! "Machd nix", hot der Werner gsochd, "draußn sänn heid Nachd zwa Grad iber null - do schdelln'mer den Brääder einfach auf die Derrassn. Bei den schwern Eisndeggl ko ja nix bassiern."
Am erschdn Feierdooch in oller Herrgoddsfrieh iss die Sieglinde auf die Derrassn naus ganga - und do hot'sa fassd der Schlooch gedroffn: Der Deggl woa neber na leern Brääder geleeng - und die Gans woa weg!! Wohrscheins hot a Hund oder a Fuchs oder a ganza Marder-Familie na schennsdn Haalinga Amd im ganzn Leem k'habd - miteran Fessd-Essn, wo'sa nuch bis Silvesder vor Freid mit ihra Schwänzla gewedld hamm.
Zern Gligg hot die Sieglinde in der Kiehl-Druha nuch zwelf Boor eigfrorna Brodwärschd gfunna. Die hot's auf Middooch dann mit Brod und Sembfd ols Ersaz fir na verschwundna Gansbrodn geem. Die Oma und die Danda Elli hamm fir dess schborsama Weihnachds-Essn vill Ver-schdändnis gezeichd. "Ich muss aa jedn Bfäng dreimoll umdreha", hot die Oma gsochd, "und die Gäns sänn ja inzwischn werglich sindhafd deier worrn..." Gerch
11.01.2014
Vuller Freid schbringd'er mit seina dreggerdn Bfoodn jedn Fremma o und schleggd'na zur Begriißung gleich moll mit der Zunga ibersch ganza Gsichd, sei Freiheid ban Rumrenna iss na merra weerd wie mei Bfiff, dass'er ezerd sofodd zer mir her kumma soll - und fir a "Wienerla" machd'er sogoa ohne Kommando gleich mehrfach dess kombledda Erziehungs-Brogramm mit "Sitz" und "Platz" und "Bfeedla geem".
Obber so a indelligennder Hund gibd an fei manchsmoll aa Rädsl auf. Ich konnd mir zern Beischbill nie an Reim draaf machn, warum mei "Bello", wenn'er draußn im Gaddn in die Hoggn gedd und an Haufm absezd oder sei Baa hebbd und a Schbrizerla machd, sich jedsmoll so drehd, dass'er min Kobf zum Kornberg niiber schaud. Bis lezda Wochn hob ich immer gedachd, dass'er bei san Gschäfdla einfach gern na Durm vom Kornberg sichd - wer wass dä scho, woss fir an Hund bei seiner grobschdofflichn Erleichderung hilfreich iss?!
Obber ezerd iss dess Rädsl geleesd - ich hob neemlich in der Zeidung gelesn: "Nachdem ein deutsch-tschechisches Forscher-Team 70 Hunde insgesamt 1893 Mal beim Stuhlgang und 5582 Mal beim Urinieren vermessen hatte, war klar: Wenn Hunde ihre Notdurft verrichten, dann orientieren sie sich am Magnetfeld der Erde - und stellen sich in eine Nord-Süd-Richtung."
Do ko ich bloß soong: Dunnerkaal, woss iss mei "Bello" fir a sensibler Hund! Ich Daaber hob mit man Schboozn-Hirn immer gedachd, dass der "Bello" bei san Gschäfdla gern aweng a scheens Banorama genießd, dawaal drehd na bloß sei Inschdingd aufn Millimeder genau in die Nord-Siid-Achsn. Der Kornberg iss also net sei innera Sehnsuchd wie fir an Bergschdeicher des Madderhorn, sondern so woss ehnlichs wie dess Navi im Audo. Obber dess iss mein "Bello" wohrscheins warschd - Haubdsach, er grichd immer moll a "Wienerla"..
18.01.2014
In der Großmudder ihrn schenn Haus woan drei Generaziona drinna gewohnd: in Badderr die Oma selber, im erschdn Schdogg ihr Sohn Max mit seiner Fraa und in der Eddaaschn driiber die frisch verheierda Enkldochder mit ihrn Mo.
Karz vor Weihnachdn iss die Oma gschdorm, dessweecher woan der Haalicha Amd und die zwa Feierdooch ziemlich draurich. Zwischn Weihnachdn und Silvesder hot dann der Max a Firma beschdelld, dass'sa der Großmudder ihrn Haushold aufleesn. "Vor alln der Dachbodn und der Keller sänn vull mit lauder oldn Grembl", hot der Max die Firma gleich gewarnd.
Zer frieh um siema sänn dann zwa Männer miteran grußn Lkw kumma. Bloß der Max woa nuch im Haus, olla annern sänn scho vor ana Schdund in die Ärberd gfohrn. "Raamd olles schee aus", hot der Max zer die zwa Männer gsochd, "der Oma ihr Wohnung iss in Badderr, ihr Dachkammer iss droom aufm Boodn hindn links - und ihr Keller iss drundn gleich die erschda Diir rechds, wemmer nei kimmd. Wennder min Ausraama ferrdich sädd, schberrder bidde die Hausdiir zu und schmeissd na Schlissl nei na Briefkassdn." Nooch derra Anweisung iss aa der Max zerfriedn in die Ärberd ganga.
Woss anschließnd ban Ausraama bassierd iss, hot sich hinterher nimmer genau aufglärn lossn - auf jedn Foll hamm die zwa Männer scheinboa "droom hindn links" und "drundn gleich rechds" aweng verwechsld, woss nadirlich zer ana Kaddasdroofn gfiehrd hot. Ordnungsgemeeß hamm die zwa Mannsbilder jednfolls erschd aus der Oma ihrer Wohnung im Erdgschoss die Meebl raus gschlaafd - und dann hamm'sa droom im driddn Schdogg die folscha Dachkammer ausgeraamd. Gschwizd hamm'sa wie die Sai, wall'sa jeds Drumm aanzln iber die schdaala Bodn-Drebbm nunder bugsiern mussdn: 14 Kaddong mit verblichna Zeidunga, zwa Schränk mit Sommerglamoddn, sechs Koffer vuller Gscherr, eiserna Schdehlampm, Biicher, Gardina-Schdanga und a Haufm Zeich, wo scho die Schbinnaweem dro woan.
Karz vor na Zwelfer-Laiddn hamm sich die zwa schwizndn Männer dann na Keller vorgenumma. "Ach Gooooodla!", hot der ana Mo gejammerd, wie er drundn die folscha Kellerdiir aufgemachd und drinna dess Chaos gsehng hot. Vor alln die schwera Diefkiehl-Druha hot'na an Schreggn eigejoochd, dass'er im Gsichd gleich keesweiß worrn iss. "Wemmer die droom hamm", hot'er zer san Kumbl gsochd, "dann mach ich drei Greizla!"
Nochmiddooch um viera sänn die zwa vellich erschebfdn Männer endlich mit ihrer schwern Ärberd ferrdich gewesn - und min vull beloodna Lassder verschwundn. Obber kaum dass'sa in ihrer Firma eigedroffn sänn, hot scho dess Dellefon geglingld. Der Max woa dro und hot aufgereechd in san Heerer nei gebläägd: "Ihr Schnarchzabfm sädd doch verriggd!! Ihr habt die folscha Bodnkammer und na folschn Keller ausgeraamd! Sofodd zerrigg marsch-marsch und olles widder ausloodn - und schee sordierd nauf aufm Bodn und nunder in Keller bränga! Anschließnd werrd dess richdicha Zeich abdransboddierd!"
Die zwa Meeblbagger hamm geglozd wie die Aachhernla, wenn's donnerd. Der Riggdransborrd von den ganzn Geraffl werrd ollerdings nuch aweng dauern - die zwa eigewerrdn Meeblbagger hamm neemlich inzwischn die frissdlosa Kindichung eigereichd...
25.01.2014
Der Rolf hot mit seiner Fraa 37 Johr lang ineran Reihahaus am Hofer Schdadtrand gewohnd, obber lezda Wochn sänn'sa umgezoong - middn nei ins Zendrum. So a Umzuuch brängd nadirlich an Haufm Ärberd mit sich: Meebl ausraama, die olda Wohnung schdreing und schee sauber machn, olln meeglichn Grembl rum schlaafn, in der neia Wohnung olles widder aufschdelln - der Rolf woa jednfolls nooch drei Dooch fix und ferrdich. "Ich muss mich von denner Schdrabaazn aweng erholn", hot'er zer seiner Fraa gsochd, "dessweecher geh ich heid amd in mei Werrdshaus und schbill a boa Rundn Schofkobf ". Und werglich: ban Kaddn mit die Schdammdisch-Briider iss na Rolf gleich widder besser ganga, und nooch fimf Seidla Bier und vier dobblda Ribidu woa des ganza Gewerch vergessn. Im Rolf san Kobf woa karz vor Middernachd der ganza Umzuuch verschwundn - wie wenn'er dahamm am PC auf die Dassdn "Löschen" gedriggd hätt. Obber leider hot der Lösch-Vorgang aa zu an schwern Missverschdändnis gfiehrd: Der Rolf hot sich neemlich in san Zinder min Daxi net zu seiner neia Wohnung hamm fohrn lossn, sondern wie immer zu seiner oldn Adress. Dadd iss'er in der Finsdernis mit wagglerda Baa ausn Daxi raus und zum Haus gschwankd. Obber dessmoll hot der Rolf an der Hausdiir na Schlissl ums Verreggn net ins Schloss nei gebrachd - dass sei neier Schlissl am oldn Haus net bassn ko, iss na Rolf in san Rausch net in Sinn kumma. Aferamoll hot'er droz seina zwakommadrei Bromill an Geisdesbliz k'habt. Ihn iss neemlich eigfolln, dass'er durchs Kellerfensder aa ins Haus nei kimmd. So hot'er also neemdro am Kellerschachd min Fuß dess Fensder nei k'haud, dass olles geglirrd hot - und iss in san Vollrausch durch dess enga Loch gegrochn und geruddschd, bis'er im Keller drinna woa. Woss der Rolf ollerdings net wissn konnd: Der neia Hausherr iss von denner Geraischer ausn Schloof aufgewachd, hot ausn Kinnerzimmer na Gunger sei Schbillzeich-Maschinagewehr k'hullt und iss in Keller nunder gschlichn, um na vermeindlichn Einbrecher mit der Waffn in die Händ zu schdelln. Im erschdn Raum, wo die Waschmaschina drinna schdedd, hot'er sei Kobf-Lampn eigscholdn - und im Lichdkegl schdedd mit waacha Knie...der doddal bsuffna Rolf. Die zwa Mannsbilder hamm sich gleich erkannd und ziemlich bleed aus der Wäsch gschaud. Und dann hot sich olles friedlich aufgegläärd. Ganz erleichderd sänn die zwa Mannsbilder anschließnd mitnanner nauf ins Wohnzimmer ganga und hamm jeder an Konjagg gsuffn: der Hausherr, wall'er froh woa, dass der Rolf ka Raubmerder gewesn iss - und der Rolf, wall'er scho widder an droggna Hols k'habt hot...
Dies ist eine mit page4 erstellte kostenlose Webseite. Gestalte deine Eigene auf www.page4.com