Frieher hot sich dess Millidär vor seina Feind gschitzt, indem dass aneran Wachbossdn kaner verbei kumma iss, wenn"er dess Erkennungsworrd net gsocht hot.

"Parole?", hot der Wachmann in der finstern Nacht den Fremma min gschwärztn Gsicht gfrocht.

Der hot die Haggn zamm k"haut und salludiert. "Die Sonne geht im Osten auf", hot"er gsocht - dann erscht durft'er weider geh.

Walls in unnera moderna Welt leider immer merra Schbitzbuum gibt, sehna sich die Menschn nooch sedda zuverlässicha Wachbossdn, obber die konnst ja net derzohln. Dessweecher missn sich die Leit annerscht schitzn - mit eiserna Dreifach-Riegl an der Hausdir und Pfefferschbree im Handdäschla, mit der Alarm-Anlooch im Auto und mit Geheimzohln am Geldautomaadn, mit der berseenlichn Kundnnummer bei Ebay und ana fimfschtellinga Zohln-Kombinazion am Händy.

Mastns hulln sich die Leit Schutz und Sicherheit darch die Ellegdronigg. Die verhindert, dass erchetz a Verbrecher dei Konndo am Geldautomaadn ausraabert oder dass a verlibbter Goggl dei Händy ei'scholt und auf deina Kossdn schtundnlang mit seiner Freindin in Brasilien dellefoniert. Heit haaßn die moderna Wachbossdn "Passwort" und "Geheimzahl". Und dess schennsta iss: Du brauchst dich net amoll auferan aanzinga Wächter verlossn, sondern konnst selber a ganza Armee aufschtelln. Wenn'st dann deina Bass-Werrdla net durchnanner brängst, iss olles hunnertbrozendich sicher und du konnst nachts ruich schloofn.

Obber wehe, du verwechslst woss - dann k"heerst der Katz!!

Mei Freind Heiner hot zerletzt 37 verschiedna Bass-Werrder und Geheimzohln benutzt - fir Kredidd-Kaddn und fir die Iberweisunga ban "Electronic bänking", fir seina Haufm Brogramme am BeCee und fir na Geldautomaadn, fir seina Beschtellunga im Internedd und wass-der-Deifl fir woss olles! Eingtlich hot"er bloß nuch seina "Wienerla" ban Wärschtlamo in bor bezohlt - und dann iss letzta Wochn ban Heiner der absoluuda Subber-Gau bassiert: Er hot neemlich den Zeddl verlorn, wo'er sich olla Geheimnummern und Bass-Werrdla aufgschriem hot, damit"er nix vergisst.

Der Heiner wor fix und ferrdich. "Am bestn iss, ich häng mich auf", hot"er gejammert. Obber mir hamm"na olla gud zugered't und widder aufgebaut. "A boor wichticha Nummern werrscht doch nuch im Kopf hoom", hob"ich zern Heiner gsocht - und do hot'er widder frischn Muud gricht.

A Schtund schbeeder wollt sich der Heiner aneran Geldautomaadn 200 Euro hulln. Er hot dess Kärrdla nei'gschteggt und die Geheimnummer ei'geem, die woss'er im Kopf k'habt hot. Leider hot der Kastn ka Geld raus geruggt, sondern die Kaddn nooch na driddn Versuch ei'gezoong - der Heiner hot neemlich aus Versehng jedsmoll die Nummer vom Zohlnschloss an san Fohrreedla ei'gedibbt.

Und dess hot'er vorhin dahamm mit der Beißzanga aufgebrochn, wall'ersch mit der Geheimnummer von der Geldkaddn ums Verreggn net aufgebracht hot... Gerch

Briefdreecher sänn freindlicha Menschn. Mer freit sich, wenn'sa die Zeidung, an Brief oder a Bäggla bränga - heggstns die Bossd vom Finanzamt oder a Schtroofzeddl von der Bollizei versaua ann die guda Launa, obber dess iss goddseidank seltn. Wenn der Briefdreecher aufdaucht, wedlt sogor der Hund vor Freid min Schwänzla, wall'er von den Mo jedsmoll a Leggerla gricht.

Ollerdings gedds net immer so friedlich zu - in Deitschland werrn angeblich jedn Dooch 2000 Briefdreecher voneran Hund gebissn! Aa na Hermann, der woss seit Johrzehntn draußn am Schtdtrand die Bossd ausdreecht, hamm scho eddlicha Daggl ins Husnbaa nei'gezwiggt - nix Schlimms! Obber seit vier Wochn gibt's ineran Haus an neia, kullschwarzn Riesnhund - und etzert gedd na Hermann die Muffn, wall sich fir ihn der klana Vorgaddn am Haus voneran Baradies in a wohra Hell verwandlt hot! Wenn'er neemlich klinglt, kimmt jedsmoll der Hund raus gewercht, kläfft und schtellt die Hoor auf, knurrt und fletscht sei Gebiss. Mit 180 Buls macht dann der Hermann genau dess, woss in seina Vorschriftn schtedd: "Stehen bleiben, Kontakt zum Hund aufnehmen, ihn ansprechen, auf eine entspannte Körperhaltung achten, sich seitlich drehen und am Hund vorbeischauen. Nie wegrennen!"

So schtedd also da Briefdreecher regungslos wie a Denkmol do: in der linkn Händ dess Leggerla, rechts a Dosn mit Pfeffer-Schbree - und ei'geglubbt zwischn Kinn und Hols a boor Briefla. Eingtlich missert sich der Hund etzert widder beruing, wenn... ja wenn's na Angstschwaaß net gebert. Der bricht nadirlich aus olla Boorn raus - und macht na Hund, der woss sofodd olles riecht, gor närrisch, wall'er wass: Vor ihn schtedd ka gfährlicher Gegner, sondern a Angsthoos mit waacha Gnie! Vorgestern wollt sich der Hermann in derra Looch am libbstn im Vorgaddn aufn Bodn niederwerfm und duud schtelln - dess hamm'sa neemlich im Fernsehng empfohln, wemmer amoll aferan Bärn drifft. Obber do hätt der Hermann widder Ärcher min Nachber gricht, der woss sich sowieso dauend bei der Bossd beschwert. Wohrscheins hätt der mirrischa Mo gleich na Hermann san Scheff gemeld't, dass der Briefdreecher im Groos liecht und miteran Hund schbillt - schtatts dass'er pflichtgemeeß die Bossd zuschtellt!

Um dess Broblem zer leesn, hot sich der Hermann etzert an annern Bloon zerrecht geleecht. Wenn der Hund widder dudd wie a Sau, nochert zeicht'na der Hermann scho, werr dess Alfa-Männla iss: Er haut den frechn Hund einfach na schwern Quelle-Kaddalog a boor Moll links und rechts um die Ohrn, bis'er na Schwanz ei'zicht. Gerch

Die Marder werrn fir Autofohrer a echta Blooch! Bremsleitunga, Zindkabl, Kunstschdoff-Andenna: nix iss vor denner klan Raaber mehr sicher - die zerbeißn die Schlaichla genauso gierich wie mei Freind Hans, wenner am erschtn Feierdooch dahamm sei Gans abzaust. Leider gibt's nuch ka Middl, um die gefräßinga Marder von ihrn Festmohl abzubränga. Die ann bichn a boor Hundshoor zwischn na Moddoor nei, annera leeng an Maschndroht unter die Reeder und mancha kaafn fir vill Geld an klan Sender, der woss zwischn die Zylinder und eleggdrischn Kabl Ultraschall-Welln ausschtrohlt, damit der Marder sofodd an Heerschturz gricht und sich nie widder bliggn lässt - obber olla guud gemaantn Dibbs sänn fir die Katz: a boor Dooch schbeeder schbringt dess Auto scho widder net o, die Brems funkzioniert net, die klana Dach-Andenna iss o'gegnabbert.

Im Wertshaus am Schtammdisch hamm'sa man Nachber kerzlich a radikols Hausmiddl empfohln. "Du machst einfach am Auto die Moddoor-Haum auf und saachst nei", hot aner gsocht, "dann bist na Marder fir immer los!"

Am letztn Mondooch karz vor Middernacht iss der Nachber mit ziemlich voller Blosn ausn Wertshaus hamm gedorglt. Im Carboord hot'er dann vorn an san Auto na Deggl aufgeglabbt, iss mit die Fieß auf an umgedrehtn Bierkastn nauf gschtieng, hot sei Husndiirla aufgegnepft - und hot zur Marderabwehr vorschriftsmeeßich vier Seidla Bilsner und zwa dobblta Obstler greiz-die-quer ibern ganzn Moddoor verdaalt. Leider hot der Fronndal-Angriff net na erwinschtn Erfolch k'habt, wall zwa Dooch schbeeder die Benzinleitung durchgfressn wor.

In seiner grußn Entdaischung hot sich der Nachber vorgestern zum Atomschlooch entschlossn - den Dibb hot'er in der Ärbert voneran Azubi gricht. "Wenn a Marder Häffi-Meddl-Musigg heert, dann haut'er sofodd ab", hot der Schtift gsocht. Seit vorgestern schtedd aufm Nachbern san Balkon a Radio und duudlt die ganza Nacht auf ana Schpeziolfrequenz dess Häffi-Meddl-Zeich. Und werglich: Der Marder iss schburlos verschwundn, obber etzert wälzt sich der Nachber mit offna Aang im Bedd rum und ko weecher derra scharfn Musigg die ganza Nacht net ei'schloofn... Gerch