Karz vor ihrn 50. Gebartsdooch hot sich die Gisela scheidn lossn - und seitdem hot'sa aweng Baanigg, dass'sa widder an Mo derwischt. Damit'sa ihra Schangsn aufm "Heiratsmarkt" verbessert, macht die Gisela aa Hungerkur nooch der annern, kaaft sich karza Reggla und Schtegglaschuh, hängt sich na Hols, die Arm und die Fußgelenker mit Modeschmugg vull - und vor an vertl Johr hot'sa sich sogor die Hoor blond färm lossn. Wall obber die Mannsbilder immer nuch net recht auf die Gisela o'gschprunga sänn, hot'sa sich zern Atomschlooch entschlossn: Sie iss fir fimf Wochn nooch Ungarn gfohrn und hot sich in ana Schpeziol-Klinigg rund-erneiern lossn. Erscht hamm die Scheenheits-Schirurgn in der Gisela ihrn Gsicht den grußn Zinkn inera butzichs, glans Neesla verwandlt, dann hamm'sa ihr die Aangdeggl widder gericht, damit'sa net gor so ro'hänga, anschließnd sänn die dinna Libbm aweng aufgschbritzt worrn - und schließlich hamm"sa der Gisela zwa gewoldicha Sillikon-Brist ei'gepflanzt, wo'sa hinterher vor na Schpiegl selber ganz iberrascht festgschtellt hot: "Dunnerkaal, sänn dess Drimmer Dinger!!" Af zerletzt hot die Gisela nuch ihra obern vier Schneidezeh richtn lossn, obber mit derra Zohnbehandlung wor'sa net sehr zerfriedn, wall'sa neemlich seitdem aweng lisblt.

Nooch denner fimf Folter-Wochn in Ungarn wollt die nei geborna Gisela ihr Danda Hanna besuung, die woss vor 35 Johr aus Hof fortgezoong iss und seitdem in Israel lebbt. Obber wie die Gisela min Fliecher in Tel Aviv o'kumma iss, gab"s gleich am Flughafn Ärcher! Bei der Basskondrolln hot der Bollizist, der woss weecher denner Selbstmord-Derroristn jedn Ausländer bei der Einreise genauestens iberbrieft, aa die Gisela scharf ins Visier genumma. Do hot'er gschtutzt und immer widder der Gisela ihr Gsicht mit den oldn Foddo im Reisebass verglichn - und dann wor fir ihn glosklor: Die Urlaubera, die woss do vor ihn schtand, und die Fraa im Reisebass worn zwa verschiedna Bersona! Der Bollizist hot in san Käfterla sofodd nooch Verschtärkung dellefoniert, dann sänn drei Uniformierta erschiena, hamm die Gisela festgenumma und weecher Bombm-Verdacht zern Verheer abgfiehrt.

Fimf Schtundn hot dess Verheer gedauert, bis sich dess Missverschtändnis endlich aufgeglärt hot. Fast wärsch fei nuch zu ana Kaddaschtrofn kumma, wall der Gisela ihr Danda Hanna ganz verwerrt wor, wie'sa ihr Hofer Nichte vor der Bollizei idendifiziern sollt. Die Hanna hot neemlich die Gisela ganz annerscht in Erinnerung k'habt und hot zer die Beamtn gsocht, dass'sa die fremma Fraa, die woss vor ihr schtedd, nuch nie im Leem gsehng hot. In ihrer Verzweiflung hot dann die Gisela zern letztn Schtrohhalm gegriffn: Sie hot vor versammlter Mannschaft ihr Reggla hintn nauf g'schoom und na Schlipfer aweng runter gezoong, dass der blanka Hintern zer Vorschein kumma iss, und etzert konnt die Danda Hanna ihr Gisela einwandfrei widder erkenna - neemlich an den grußn Muddermol am linkn Oaschbaggn . . . Gerch

Der Heinz hot weecher seiner schneidichn Autofohrerei inzwischen im Flensburcher Sindnregister na achtn Bunkt gricht. Etzert derf'er sich nix mehr leistn, sinst werrd na sei Babberdeggl amoll fir a boor Wochn ei'kassiert. Obber der Heinz iss ja a kreadiver Mensch. "Wenn ich demnäggst widder in ana Radarfolln geblitzt werr", hot'er zer san Freind Willi gsocht, "dann sorch ich dafir, dass'mer mich aufm Foddo net erkennt!"

Er hot a'weng mit die Aang gezwingert und na Willi sei geniola Idee verroodn: "Ich hob mir an Bloon ausgedacht, wie mir die Bollizei nix mehr beweisn ko: Jedsmoll wenn ich mich etzert ins Auto nei hogg, bich ich mir sofodd dess schwarza Schnärrla vom letztn Vereinsfasching unter die Nosn und setz mir a roda Berriggn auf, bevor ich los fohr - dann ko ich geecher na Bußgeld-Bescheid Einschbruch ei'leeng. Ich sooch neemlich, dass do a fremmer Mo mit man Auto unterwegs gewesn saa muss".

Na Willi wor vor lauter Schtauna iber na Heinz san Erfindergeist die Guschn offn gschtandn. Obber seit letzta Wochn schaut's fei aus, wie wenn na Heinz sei Maskeradn a Schlooch ins Wasser iss. Die Bollizei hot neemlich voricha Wochn in Lichtnfels ihr neis Blitzgereed "Modell ES 3.0" vorgschtellt, wo mer nimmer driggsn ko, wall olles so genau aufm Foddo draaf iss, dass mer jedn Zwernsfoodn sicht. Sogor darch a dunkla Sonnabrilln ko mer na Fohrer seina Bubilln erkenna und dann raus finna, wer der geheimnisvulla Unbekannta mit den schwarzn Schnärrla und denner feierrodn Hoor werglich wor - und dann kheert aa unner schlaua Heinz der Katz, wenn'er dess Määrla mit den fremma Fohrer derzellt, der woss angeblich mit san Auto a Schbritzduur gemacht hot. Nadirlich hot olles Schlechta immer aa woss Guuds.

Die Schnellfohrer kenna sich jednfolls iber dess neia "ES 3.0" fei a'weng freia. Wenn'sa neemlich in Zukumpft widder geblitzt werrn, nochert grieng'sa von der Bollizei nimmer sedda verwagglta Schwarz-Weiß-Foddos ols Beweis zu'gschiggt, sondern gschtochn scharfa Farb-Bildla, wo'mer sinst immer ban Foddografn an Haufm Geld zohln missn, wemmer fir na Urlaub an neia Reisebass braucht... Gerch