A Gemeinderood hot fei a schwers Leem. Dauernd wolln die Leit a neia Schtraßn oder an Zuschuss - und dabei iss in der Kassa von der Gmaa nix drinna. Ka Wunner, dass die Gemeindereed nachts schlecht schloofn und im Draam von wilda Monster verfolcht werrn!

Wie wenn'sa net scho gschtrooft genuuch wärn, sänn draußn in Konnerschraath fimf Gemeindereed von der CSU letzta Wochn extra nuch in Angst und Schreggn versetzt worrn. Sie hamm sich neemlich amds um siema im Rodhaus zu ana Fraggzions-Sitzung gedroffn - und zwa Schtundn lang mit drauricha Gsichter iber Godd und die Konnerschraather Welt debaddiert und iber ihrn chronischn Geldmangl gejammert. Dann iss die Krisn-Sitzung endlich miteran erfreilichn Ausbligg abgschlossn worrn. "Etzert gänga'ma ins Wertshaus und drinkn nuch aans!", hot der Scheff gsocht - do hamm denner Gemeindereed endlich die Aang widder aweng gschtrohlt, obber leider net lang. Wie neemlich die Fimfa am Ausgang vom Rodhaus gschtandn sänn, iss die Schriftfiehrera keesweiß im Gsicht worrn: "Ach Goodla - ich hob na Generolschlissl droom im Zimmer aufn Disch lieng lossn und die Diir zugemacht!"

Mer muss neemlich wissn: Dank der moderna Dechnigg kimmt'mer zwor im Rodhaus aus jedn Zimmer raus, obber ohne Schlissl nimmer nei! Und nachts um zehna wor nadirlich aa jeds Birroo vorschriftsmeeßich zu, und olla Fenster worn verrieglt - weecher die Einbrecher, folls werglich amoll a Verriggter nachts die leera Kassa aufbrechn will.

Jednfolls wor etzert dess Konnerschraather Rodhaus a echta Festung - mit ana extra Sicherung fir olla Ausgäng, die woss'mer ohne Generolschlissl net aufschberrn konnt, weder von inna nuch von außn!

Die fimf Gmaareed hamm sofodd ihra sämtlichn Daschn nooch Händys darchgsucht fir a SOS-Dellefonaad an die Außnwelt, obber kana hot a aanzichs Händy dabei k'habt.

In ihrer Verzweiflung hamm'sa dann nuch amoll an Rundgang darchs ganza Rodhaus gemacht, um an Schlupf nooch draußn zer finna, obber nix worsch! Sie hamm bloß im Keller an Kastn Bier und drei Fläschla Wein entdeggt, die woss der Berchermaster do druntn ols eiserna Reserv fir Ehrunga verschteggt hot, wenn droom die Gäst widder merra gsuffn hamm wie ei'geplont.

"Wengstns miss'mer net verdarschtn", hot etzert der Thomas erleichtert festgschtellt - und dann hamm'sa sich in ihrn Elend gleich amoll aweng Schtärk fir die langa Nacht o'gedrunkn.

Obber in der Bolidigg heert'mer ja immer widder moll von ana bletzlichn Wende, wo aferamoll olles annerscht iss wie vorher - so worsch aa bei derra Gfangaschaft im Rodhaus. Bletzlich hot neemlich der "schwarza Gerhard" aus san Saggo doch nuch a Händy raus gfingert - und sofodd ban Kämmerer o'gerufn, der woss dahamm grod ins Bedd geh wollt. Der Verwolter von die leern Kassn hot erscht gedacht, dass'na a Witzbold am Dellefon aweng verorschn will, obber schließlich iss'er doch min zweitn Generolschlissl im Rodhaus erschiena und hot die ei'gschberrta Banda befreit.

So sänn die gebeitltn Gemeindereed nooch ihrn Schlissl-Erlebnis doch nuch karz vor Middernacht ins Wertshaus aufgedaucht und hamm auf ihr gligglicha Erleesung o'gschtoßn - middn drinna der Kämmerer, der woss sich in derra wundersoma Konnerschraather Nacht vom arma Geldknecht zum Redder und Messias verwandlt hot... Gerch

"Am mastn reecht mich auf, wenn die Männer min Auto auf der Landschtraßn schteh bleim und unschinniert in die Bischla nei'binkln", hot die Anna letzta Wochn ban Kaffeegränzla zwischn zwaa Schtiggla Erdbeer-Doddn gsocht - und gleich ihrn Oldn gelobbt: "Goddseidank iss mei Markus a anschtändicher Mo und macht ka sedda Sauerei, wenn'er min Auto unterwegs iss!"

Zern Gligg hamm der Anna ihra Freindinnen net erfohrn, woss zwa Dooch schbeeder na Markus bassiert iss. Der iss neemlich am Vormiddooch mit san Daggl "Waldi" aweng ninter in Frankwold gfohrn und do hintn friedlich in die Wälder rum'geloffn. Wall's dann zern renga o'gfangt hot, iss der Markus min Daggl scho nooch ana dreivertl Schtund widder ins Auto ei'gschtieng.

Auf der Hammfohrt hot der Markus aferamoll an Drugg in der Blosn gschbiert. Die drei Dässla Kaffee ban Friehschtigg hamm'na etzert zer schaffn gemacht - und do hintn bei Wacholderbusch hot'ersch dann nimmer ausk'holtn. Er iss am Schtraßnrand schteh gebliem, im Reng ausn Auto raus und hot sich am näggstn Bischla erleichdert.

Wall obber die Brozedur weecher na Markus seiner Brossdadda ziemlich lang gedauert hot, iss im Auto drinna der Daggl von der hintern Bänk vor aufm Fohrersitz gegleddert, hot sich mit die Vorderpfoodn am Lenkrood und am Ammadurn-Bredd aufgschtitzt und vuller Neigier vom Fenster naus gschaut, woss dess Herrla do draußn so lang macht. Dabei iss der Hund mit ana Pfoodn erchetzwie aferan Gnopf nauf kumma - und sofodd worn olla vier Diirn am Auto elleggdronisch verrieglt.

Wie der Markus jednfolls nooch san Gschäftla widder ei'schteing wollt, worn olla Diirn zu! Der Markus schtand batschernass draußn im Reng - und drinna iss der "Waldi" vor Freid auf die Sitz rum'gschprunga, wall sei Herrla am Fenster gor so lusticha Grimassn gemacht hot und wie wild mit Händ und Fieß rum'gfuchtlt hot.

Fast a ganza Schtund hot dess Deooder an derra verlossna Schtraßn gedauert, bis endlich a Auto kumma iss und k'holtn hot. Der fremma Fohrer hot erscht gedacht, dass do nebern Auto a Mo middn im Reng am Woldrand an oldn frängischn Riddual-Danz auffiehrt, obber dann iss'er doch schteh gebliem - und hot na Markus erleest. Iber na Redder sei Händy hot der Markus dahamm die Anna o'gerufn, dass'sa sofodd min Reserve-Schlissl kumma soll, wall'er nimmer ins Auto nei'kimmt.

Es hot nuch amoll a holba Schtund gedauert, bis endlich die Anna bei ihrn darchgewaachtn Markus aufgedaucht iss. Und wie dann der Mo beichtn musst, woss bassiert wor, iss fei im sonst so ruichn Wold der Deifl los gewesn! Sogor die Veegl hamm vor Schregg zern zwitschtern aufk'heert, wie die Anna mit ihrer Fistlschtimm na arma Markus rund gemacht hot - und na Markus iss klor worrn, dass a olda Volksweisheid werglich recht hot: die klan Sindn beschdrooft der Herrgodd sofodd . . . Gerch

Bei die 50 Feierwehrmänner in Oberkotza hot letztn Samsdooch um 13 Uhr 40 der eleggdronischa Funkwegger, den woss jeder fir an Ernstfoll bei sich dreecht, wie verriggt zern biebsn o'gfangt und Alarm geem: "Kleintier-Rettung"! Sofodd sänn 20 Uniformierta am Schbritznhaus ei'gedroffn - und wie dann klor wor, woss bassiert iss, sänn'sa zer Zehnt mit zwa Fohrzeich ausgeruggt. Ziel wor der KiK-Markt am Ortseingang. In den grußn Gschäft sänn obber goddseidank net die Jaggn und Hemmer und Unterhusn in Flamma gschtandn, sondern es ging umeran seltna Luft-Angriff. Wall neemlich dess Wedder umgschloong hot, iss weecher der bletzlichn Wärm an klan Schpatzn offnbor sei Hirn aweng waach worrn, und er iss im Schturzfluuch kerzagrod darch die offna Diir ins Gschäft nei'gfloong.

Drinna iss denner Verkaiferinna boll dess Herz schteh gebliem, wall der Schpatz die-greiz-die-quer iber die Glamoddn rum gfladdert iss - und olla hamm gedacht, dass'er vor lauder Angst etzert gleich a ganza Salvn Voglschiss unter sich folln lässt. Obber die drohenda Verunreinichung von die schenn Klaader und Hemmer wor fei net dess Schlimmsta. "Wemmer den Vogl net derwischn", hot a Verkaifera fachkundich ihrer Kundin erglärt, "nochert schbillt am Wochnend unner Alarm-Anlooch verriggt - und meld olla fimf Minuddn an Einbruch, wall doch der Schpatz dauernd vor na Beweechungs-Melder rum'schwirrt".

Um also zer verhindern, dass am Wochnend die Bollizei dauernd mit Blaulicht und Maddins-Horn darch Oberkotza dunnert, hamm die Feierwehrmänner unter die neigieringa Aang von Verkaiferinna und Kundn dess gemacht, woss in ihra Vorschriftn ols "Innenangriff" bekannt isst - dessmoll holt net min Wasserschlauch geecher die Flamma, sondern miteran Fangnetz geecher den frechn Schpatzn! So an Käscher braucht neemlich die Feierwehr, wenn'sa beieran Einsatz am Deich an Fisch oder sinst woss ausn Wasser ziehng missn. Im KiK-Markt sänn also die Feierwehrmänner mit ihrn Käscher zwischn die Klamoddn den Veecherla hinterher gewercht - a ahnungsloser Rentner am Bullover-Rechool hot gedacht, do sänn Schmedderling-Jeecher mit ihrn Fang-Netz am Werk, wall'er sowoss scho'moll ineran Tarzan-Film im Fernsehng o'gschaut hot.

Zwamoll hamm dann die Feiwehrleit dess aufghereechta Veecherla scho in ihrn Netz drinna k'habt, obber der schlaua Schpatz iss jedsmoll widder entwischt. Erscht nooch ana halm Schtund hot sich dess arma Viechla erschepft fanga lossn - und draußn an der frischn Luft hamm'sas widder in die Freiheit entlossn. Ban Abfluuch hot sich dann obber gezeicht, dass dess beriehmta "Spatzenhirn" werglich ka reina Erfindung iss: Schtatts dass neemlich unner Schpatz dennner freindlichn Feierwehrmännern, die woss'na dess Leem geredd hamm, aus Dankborkeit nuch schnell a Liedla drällert, hot'er aus drei Meder Heh auf die Windschutz-Scheim vom Lösch-Auto an ziemlich grußn Pflatschn falln lossn... Gerch