Dies ist eine mit page4 erstellte kostenlose Webseite. Gestalte deine Eigene auf www.page4.com03.02.2007
Kaum iss der Winter do, gibt's scho widder Ärcher mit die Auto! Na Hans sei Kistn wor jednfolls ban erschtn Schnee gleich vor na Haus dermooßn ei'gschneit, dass'er ums Verreggn net aus der Barkliggn raus'kumma iss. Die Reeder hamm sich im Schnee leer darchgedreht, obber dess Auto selber hot sich kan Zentimeter beweecht.
Wemmer obber a moderns Auto hot und aweng schlau iss, nochert ko'mer sich gleich selber helfn – hot jednfolls der Hans gedacht. Messerscharf hot sich der Hans san Plon zerrecht geleecht: Zindschliss rum'dreha und na Modoor o'lossn, dann na erschtn Gang ei'leeng, damit sich auf der Hinterachs die Reeder im Schnee dreha, dann ausschteing und selber schiem – und wenn sich dann dess Auto aweng beweecht, schnell widder von der Tir nei, ans Lenkrod gsetzt und weider'fohrn.
Gedacht, gemacht!
Der Hans hot also dess Auto min Zindschlissl o'gelossn, hot na erschtn Gang nei, hintn hamm sich gleich widder die zwa Raafn im Schnee gedreht – und dann iss unner Hans schnell ausgschtieng, hot die Tir zugeknollt und hot hintn am Kofferraum zern Schiem o'gfangt. Woss'er ollerdings net bedacht hot: Wenn der Modoor lefft, nochert schnabbn bei san moderna Auto nooch a boor Sekundn automatisch an olla vier Tirn die Schlesser zu, damit von außn ka Verbrecher mehr aufmachn ko. So schtand also der Hans neber san Auto, die hintern Reeder hamm sich gedreht – und aferamoll sänn olla Schlesser miteran Schnabber zu'ganga – der Hans hot gschaut wie a Aachhernla und konnt nimmer aufschperrn, wall ja der Zindschlissl gschteggt wor. Etzert konnt fei jedn Moment bassiern, dass die Reeder im Schnee greifn und dess Auto fährt ohne Fohrer aus der Barkliggn raus.
In seiner Not hot der Hans a boor Fußgänger zamm'gedrommlt. "Ihr misst vorn an der Modoor-Haum schteh und dageecher schiem, folls mei Auto los'fährt", hot'er sei verdutzta Hilfs-Drubbm informiert – und während die fimf Fußgänger dess Auto festk'holtn hamm, iss der Hans im Dauerlaaf ins Haus nei'gewercht und hot aus seiner Wohnung na Ersatz-Autoschlissl k'hullt.
So konnt'er druntn endlich widder die Tir aufschperrn und sich selber ans Schteier hoggn.
Dann hamm die fimf Fußgänger die Seitn gewechslt, sänn ninter zern Kofferraum ganga und hamm na Hans samst Auto aus derra Barkliggn raus'gschoom. Siggst moll widder: Fimf altmodischa Schieber sänn fir a Auto oft merra wert wie die ganza moderna Dechnigg... GERCH
17.02.2007
Etzert hamm'sa in der Zeidung gschriem, dass immer merra Weiwer ihra Männer schwaddn. Vor allm wenn die Mannsbilder zer oft aufn Fußbollblatz sänn oder wenn'sa fremd gänga, werrd a Fraa angeblich ganz schnell gewoltdeedich.
Dann muss der Olt schaua, dass'er die Kurvn gratzt, wall neemlich in sedda Fäll – so haaßt's in ana wissnschaftlichn Untersuchung – "die Täterinnen kratzen, beißen, Hemden zerreißen, mit Aschenbechern schmeißen oder Ohrfeigen austeilen, sodass die malträtierten Männer im Halsbereich, an den Ohren oder im Gesicht verletzt werden".
In derra Aufzehlung hob'ich ollerdings a urolts Hausmiddl vermisst, woss die Weiwer seit Johrhunnertn in der rechtn Händ holtn, wenn der Olt nooch Middernacht storzbsuffn hamm kimmt: dess Nudlholz!
Wer wass, warum dess bewährta Folter-Inschtrument verschwundn iss – wohrscheins hot die moderna Fraa gor ka Nudlholz mehr dahamm. Sie braucht gor kanns mehr, wall'sa dess Essn inzwischn fix und fertich ausn Dr. Oetker seina Bäggla in der Miggrowelln macht.
Auf jedn Foll siggst es moll widder: Nooch die Flidderwochn verwandlt sich manchsmoll die lieblicha "Mausi" ineran bengalischer Diecher mit scharfa Gralln und eiskolta Aang!
Ka Wunner, dass die Psycholoong etzert fir die Ehemänner, die won dahamm reglmeeßich ihra Schelln grieng, a Schutzzona fordern, wo'sa vor der Oltn sicher sänn, neemlich a "Männerhaus".
Host scho richtich gelesn: a Männerhaus!!!
A sedda Forderung iss obber ziemlich weltfremd. Mei schwindsichticher Nachber Heinrich, der woss mit seina 48 Kilo sowieso ka Schangsn geecher san zwa Zentner schwern "Schatzibutzi" hot, ergreift fei scho seit 20 Johr jeda Wochn die Flucht ins Männerhaus – wechslweis hoggt'er dann im Kreis von a boor Gleichgesinntn im "Griena Baam", im "Mozart" oder in der "Meinel's Bas" und schildert seiner Selbsthilfe-Grubbm, also den Schtammdisch-Briedern, woher widder sei blaus Aach schtammt.
Männerhaiser mit Bierausschank sänn a wichticha soziola Erfindung.
Do kenna sich die gequältn Mannsbilder bei a boor Seidla Bier und an schenn Schoofkopf widder erholn, wenn dahamm Feier aufm Dach iss – und wenn'st miich ehrlich freggst: Eingtlich missert der Aufentholt im Männerhaus von der Grangnkassa finanziert werrn... GERCH
Dies ist eine mit page4 erstellte kostenlose Webseite. Gestalte deine Eigene auf www.page4.com