Drei Pärla ausn Hofer Landkreis hamm ibersch Wochnend an karzn Schi-Urlaub in Kaprun gemacht. In der ,,Pension Klara'' hamm'sa sich ei'gemidd - und gleich am erschtn Dooch sänn'sa zern ,,Apres-Ski'' in die Hiddn ei'gekehrt. Der haaßa Jagerdee wor nooch derra Schifohrerei genau dess richticha - und die sechs junga Leit hamm kernich a boor ninter. Es wor scha längst finster, do sänn die drei Weiwer ols erschta hamm ganga. Obber ihra Männer hattn nuch lang net genuch. ,,Mir zwitschern nuch a boor'', hot der Rainer zer seina zwa Freind gsocht, ,,so jung kumma'mer nimmer zamm''. Und so hamm'sa nooch ihra Jagerdee nuch a boor Schobbn Wein nei - und wie'sa geecher zehna nachts auf ,,a boor Schlussbierla'' umschteing wolltn, hot der Rainer na Kopf gschittlt. ,,Ohne mich'', hot'er mit schwera Zunga gsocht, ,,mich dreht's etzert scha wie an Danzbärn'' - und er hot sich allaans aufn Weech in sei Pension gemacht. Obwohl ja Kaprun net greßer iss wie Regnitzlosa hot unner bsuffner Rainer na Weech nimmer gfunna - kreiz und quer iss'er in der Finsternis in Kaprun rum'gedabbt. Aferamoll schtand a Taxi vor ihn. Der Rainer hot sich riggwärts nei'folln lossn. ,,Bension Klara'', hot'er genuschlt - und des Taxi iss um zwa Eggn rum gfohrn. Fimf Euro musst der Rainer berabbn, und dess hot'na trotz san Sauser ziemlich gschtunkn, obber er wor froh dass'er endlich dahamm wor.

Die Pension wor obber scha zu - und unner Rainer hot leider kan Schlissl dabei k'habt. Dessweecher hot'er dann mit Schneebäll an dess Fenster im zweitn Schtogg nauf gschmissn, wo er gedacht hot, dass'na sei Fraa heert und aufschperrt. Nooch na zwelftn Schneebolln iss endlich dess Fenster aufganga - und a fremma Fraa hot ro'gebläkt und den nächtlinga Schteerer zer Sau gemacht. Der Rainer hot sich schnell hinter a Gebisch gschmissn, dass'na die Fraa net erkennt. Ähnlich ging's na Rainer dann nuch mit zwa weitera Fenster: jedsmoll hot a folscha Fraa raus gebläkt - bis dann endlich, endlich ban vertn Fenster sei gelibbda Hanne erschiena iss. Und die hot ihrn Oltn aa erscht moll rund gemacht, bevor'sa ihrn inzwischn ausgfrorna Irrläufer rei gelossn hot... GERCH

 

So a Grachkält hammer fei scha lang nimmer k'habt! Olla jammern'sa iber die Glima-Kaddaschtrofn: an die Auto sänn die Badderien ei'gfrorn, die Hausbsitzer kumma min Sandschtreia nimmer nooch, dess Heizeel werrd fort deirer - und die Schifohrer greina, wall ka Schnee fällt.

Dess Wedder hammer uns selber versaut, soong die Wissnschaftler, wall'mer mit unnern Dregg dess Ozonloch nei na Himml gerissn hamm. Etzert grieng'mer holt die Quiddung: eiskolta Winter ohna Schnee, Iberschwemmunga - und im Sommer a Brieglhitz, dass'der die Brieh ro'lefft, wenn'st bloß ner mit die Aang rollst.

Obber olles hot aa woss Guuds!

Mei Martha hot mir af Weihnachtn dess Buch ,,Denke positiv`` gschenkt. Do schtett drinna, dass olles bloß holb so schlimm iss, wie's sicht. Seitdem ko ich sogor derra Kält aweng woss abgewinna. Zern Beischbill benzt mich die Olt net dauernd, dass ich mit ihr an Schbaziergang machn soll - bei minus sechzer Grod Celsius draut'sa sich so an Vorschlooch net zer machn! Und a scheena Dopf Gliehwein werrd etzert zeran Hausmiddl geecher Erkältung, obwohl frieher mei Martha ollawaal gschpreißlt hot, wenn ich mer in der Schtadt amoll zwa, dreia kaaft hob. Mei Nachber, der woss gern amoll a Schnäpsla kibbt, hot bei derra Kält sowieso griens Licht. ,,Brrrr``, socht'er dauernd dahamm zer seiner Fraa und schittlt sich, dass'na seina Schbeggbaggn hie- und her flieng, ,,bei denner Demberaduurn hilft bloß a Konjagg!`` - und dann leicht'er in die Flaschn nei, dass'er amds kaum nuch auf die Baa schteh ko vor lauter Vorbeigung geecher die Gribbm. Und dass der Glimawechsl kan Schnee mehr brängt, ko ich bloß begrießn: do muss ich nimmer Schneeschorn - Freindla, dess hott ich fei immer gfressn!

Mer muss holt bossidiv denkn!

Obber a olta Volksweisheit socht: ,,Der nächsta Sommer kommt bestimmt`` - dann iss verbei mit derra bossidivn Denkerei. Mei Martha hot neemlich gestern gsocht, dass'mer firn näggstn Winter außer unnern Kanona-Ofn nuch an Schwedn- Ofn firn erschtn Schtogg braung, damit's iberolln schee warm iss. Dess haaßt im Sommer fir mich: Holzhaggn, Holzhaggn, Holzhaggn - morng verbrenn'ich dess Biechla ,,Denke positiv``... GERCH

Letzta Wochn hob'ich ziemlichn Ärcher gricht weecher man Weihnachtsgschenk von der Schweechera Marga. Die Marga hot sich neemlich in die letztn boor Johr esoterisch weider entwigglt - und in ihrer Frauengrubbn hot'sa nuch na letztn Schliff gricht.

Seitdem kaaft'sa ols Weihnachtsgschenker kana Soggn, Schlips und Rasierwasser mehr, sondern lauter orginells Zeich. Mir hot'sa vor zwa Johr Schuh-Einloong untern Chrissbaam geleecht, wo inna a Gel drinna iss, damit'mer so waach lefft wie auf Moos. Obber leider iss mir im Sommer in meina Wanderschuh die linka Sulln karz vor na Kösseine-Gipfl geblatzt und dess griena Gel iss wie Kiwi-Sirubb im Schuh rumgeloffn.

Letztes Johr hot mir die Marga an ,,Schnarch-Stopper'' gschenkt, wall ihr mei Martha immer vorgejammert hot, dass mei Schnarcherei nimmer zern ausholtn iss - und do sollt ich mir an klan Blastigg-Ring in die Nosn schteggn, wenn'ich amds ins Bedd geh. Obber der Ring hot mir so arch an der Nosn gedriggt, dass ich vor Schmerzn ka Aach mehr zugemacht hob - do wor zwor mei Schnarchn weg, obber ich wär langfristich weecher Schlooflosichkeit draaf ganga.

Heier hot'mer mei esoterischa Schweechera an Kuglschreiber gschenkt, den wossn angeblich die Ami und die Russn sogor im Weltraum dabei hamm, wenn'sa mit der ,,Apollo''-Kapsl oder mit derra Sojus unterwegs sänn.

,,Den Kuglschreiber hot fei die NASA entwigglt'', hot die Marga gsocht, ,,do musst amoll die Gebrauchsanweisung lesn, damit'st wasst, woss der olles ko''. Und werglich - woss auf den Zeddl schtand, ko'mer fast net glaam: ,,Er schreibt unter Wasser, über glänzende Oberflächen, über Fett und Fingerabdrücke, bei glühender Hitze bis zu 200 Grad Celsius und eisiger Kälte (bis minus 50 Grad) und sogar in der Schwerelosigkeit''.

Ehrlich gsocht: ich hob dess Gfiehl, der Kuglschreiber iberfordert mich, wall ich doch heggstens amoll a boor Nodizn aufn Rand von der Zeidung nauf schreib - a Dellefonnummer oder woss ich fir mei Martha ausn Subbermarkt mit hamm bränga muss oder die Loddozohln. Mei ganz Leem hob'ich nuch net a haaßa Broodpfanna ols Unterlooch firan Zeddl gebraucht oder aufn Nordbol an Brief an mei Martha gschriem. Und af die Idee unter Wasser bi'ich iberhabst nuch net kumma - auf woss sollstn do iberhabst nauf schreim, dess Babbier waacht doch sofort zamm?! Wennst im Hofer Hallbod mit den neia Kuglschreiber untersch Wasser abdauchst und erchetz woss aferan Zeddl schreim willst, zerrt dich doch der Bodmaster sofort raus und liefert dich in die Bezirksklinik ei! Trotzdem hätt's mich scha intressiert, ob mei Kuglschreiber werglich unter Wasser funktioniert. Und wie'mer in derra Wochn sowieso bei der Schweechera an Bsuch gemacht hamm, wollt ich man neia Kuglschreiber gleich bei ihr ausbrowiern. Die hamm neemlich a scheens groß Aquarium - und do hob'ich moll mit man ,,Space-Pen'' zwischn die Gubbi und Seglflosser und Schleierfisch ins Aquarium neigelangt und wollt von inna an die Gloswänd schreim: ,,Danke, liebe Marga''. Obber ich hatt kaum na Schtift o'gsetzt, do hot die Schweechera man Versuch entdeggt und hot gebläkt wie a gschtochns Schweinla - und etzert wass ich immer nuch net, ob olles schtimmt, woss iber man deiern Kuglschreiber in derra Gebrauchsanweisung gschriem schtett. Eingtlich sehn'ich mich fei widder zerrigg nooch Soggn, Schlips und Rasierwasser untern Chrissbaam... GERCH

In Deitschland gibt's ja zerzeid ka annersch Dema wie die deitsch-franzeesischa Freindschaft. Sogor dahaam, in
unnerer Nachberschaft, hot aferamoll a jeder erchetz
a Beziehung zer diea Franzosn:

Die ann machn jeds zweita Johr Urlaub an derra ,,Cot- azür``, die Deengkolb saufm Schampagner ausn Aldi, der Fischers Heiner wor letztn Sommer mit seiner zwa Gunger in derra Miggi-Maus-Welt bei Paris, mei Nachber Hans hot sich vor 32 Johrna droom aufn Eiffldurm ineran Gfiehlsausbruch mit seiner Freindin Marga verlobbd (woss'er hinterher schwer
bareit hot!) - und in meim Wertshaus schenkn'sa neierdings ols franzeesischn Landwein an ,,Schaddoo-Migrän`` aus, dass'd am näggstn
Frieh maanst, du bist min Kopf inera Mischmaschina nei'geroodn.

Bevor unner Adenauer mit na Degool Freindschaft gschlossn hot, wor ,,fran- zeesisch'' bei uns fei immer awengla anrichich.

Wie mei Freind Werner vor 25 Johr amoll Ärcher mit
seiner Oltn k'habt hot, hamm'sa'na am Schtammdisch empfohln, dass'er sei gfährdeta Ehe aweng ,,franzeesisch`` bereichern soll,
obber der guda Werner wass bis heit nuch net, woss'er
do machn sollt! Und schtell'der bloß amoll vor, der ameriganischa Bräsident Kennedy seelich hätt sellmoll wie in Berlin gsocht: ,,Ick bin ein Pariser`` - do hätt doch ganz Deitschland vor Lachn gebeegt.

Mei aanzicher Beitrooch zur deitsch-franzeesischn Freindschaft liecht scha verzich
Johr zerrigg. Sellmoll iss a Kusäng von mir bei ana Bus-Reis min Viol nooch Paris gfohrn. Und wall'er die franzeesischa Schprooch net konnt, hob ich vorher aweng ausk'holfn. ,,Wennst a scheens Maadla driffst``, hob'ich
zer ihn gsocht, ,,nochert frochst'sa: ,Wulle wu kuschee avek moa?` Dess hot'er sich gemerkt, obber wie er dess Schprichla ineran Pariser
Cafè gsocht hot, hot'na die Fraa links und rechts a Schelln geem - und der Kusäng wass heit nuch net, warum.

Iich selber kenn bloß an aanzinga Franzosn - und der liecht in mann Werkzeichkastn und iss ziemlich kombliziert.

Vill Leit meeng Frankreich holt net so sehr und hamm zu annera Länder oft a engersch Verhältnis - zern Beischbill zu Italien, scha weecher der Pizza. Die hammer ins Herz gschlossn - aa ohne Schtaatsvertrooch... GERCH