Der Hans und sei Frieda hamm sich za ihrer Silberhochzich selber a Gschenk gemacht: 14 Dooch Urlaub in Rhoddos. Ollerdings wor dess merra die Idee von der Frieda, wall der Hans lieber dahamm gebliem wär. ,,Woss wolln dä mir in derra Bullnhitz do druntn'', hot'er fortner rum geknäärt, obber sei Frieda hot'na scha geem! So sänn'sa schließlich ab Nernberch min Fliecher nunter gemacht auf Rhoddos - inera Hodell direkt am Schtrand. Ols Entschpannung hot die Frieda an holbn Koffer vuller Kreizworträtsl mitgenumma - und der Hans hot vorsichtsholber zwa Bäggla Schpillkaddn ei'gschteggt, folls'er am Schtrand nuch drei Mann fir an Schofkopf find. Obber leider hot sich sei Draam vom Kaddn net erfillt - und so iss der Hans jedn Dooch mirrischer worrn.

Der griechischa Sallood, dess Zaziggi, dess Sufflaggi und der Gyros sänn unnern Hans scha nooch drei Dooch ausn Hols raus k'hängt. ,,Und am schlimmstn iss der Hauswein'', hot'er gschimpft, ,,do griech ich Sodbrenna draaf - und am näggstn Frieh brauch ich drei Aspirin, bis ich holbwegs widder klor im Kopf bi''.

Nooch ana Wochn hot der Hans a ernsta Krisn gricht. Sei Olta hot widder moll von ihra ,Rhoddos-Bladdn' gschwärmt, die woss'sa jedn Amd in ana annern Taverna nei'gschlicht hot. ,,Dess iss holt a dibbischa Kost von der Insl'', hot'sa gsocht, obber na Hans iss der Kamm gschtieng. ,,Ich pfeif auf die Insl- Kost'', hot'er gereizt gsocht, ,,ich brauch a Schnitzl mit Erpflsallood''. Dess hot'er sich dann amds in der ,Taverna Dyonisos' beschtellt - samst an einheimischn Bier mit den schenn Noma ,Mythos'. Obber leider iss sei Schtimmung net besser worrn, wie dess Schnitzl und dess Bier aufn Disch schtandn. ,,Dess Schnitzl iss zach wie Ledder, vom Erpflssallood will ich gor net redn - und dess lauwarma Bier schmeggt wie ei'gschloofna Fieß'', hot'er sofort fachmännisch festgschtellt. ,,Wär'mer bloß dahamm gebliem! Iberolln sänn etzert dahamm die schenn Gaddnfestla mit Brodwärscht vom Grill, mit Fischbreedla und Bier vom Fass - und mir zwa Daabn hoggn do huntn in derra Hitz und missn uns mit so an verhunztn Schnitzl rum ärchern...''

Firn Hans wor der Urlaub geloffn!

Bloß am Uzo hot der Hans nix auszersetzn k'habt. ,,Do kennt ich mich dro gwehna'', hot'er immer gsocht, wenn der Taverna-Wert am Schluss jedsmoll fir ihn und sei Frieda zwa Graddis-Gleesla aufn Disch gschtellt hot - die hot'er olla zwa gleich nei'gekibbt. Und der Sirtaggi hot na Hans aa gfolln - am vorletztn Amd jednfolls hot'er nooch anaholb Flaschn Retsina und vier Uzo mit ana Reisegrubbn aus Bochum nachts an der Hodellbor so närrisch gedanzt und die Baa gschwunga, dass am Schluss olla acht Männer riggwärts in die Urlaubsgäst nei'gschterzt sänn.

Widder dahamm in Hof, hot jeder aweng a annersch Mitbringsl aus Rhoddos mitgebracht: die Frieda scheena Erinnerunga an die Insl, an Lidder Olivneel, a Glos echtn Honich und an gelbn Schwamm fir die Bodwanna - und der Hans an Sonnabrand, nuch aweng a Schtechn im Kopf und am Hintern drei blaua Fleggn vom Sirtaggi-Danz... GERCH

,,Bayernweit - Bayernlight'' haaßt der Schtädte-Weddbewerb, wo aa die Hofer mitmachn - und wo a ganza Haufm Leit freiwillich wenger Fedd essn, damit'sa abnehma. Ob's werglich funktioniert, kenna'sa zwischndarch immer in der Abbodeekn kontrolliern: mit ana ameriganischn Meddoodn werrd am Oberarm iber Ultraschall gemessn, um wievill der Feddgeholt gsunkn iss. Am Oberarm!! Do host doch sowieso nix dro - am Bauch missn'sa messn, obber dann gänga die Werte so schtaal nauf, dass die Leit vor lauter Enttaischung min Fastn gleich widder aufheern...

Unner Nachbera iss bei den Weddbewerb aa dabei, die macht neemlich olles mit, woss nix kost. ,,Und dir schadd's aa nix'', hot'sa gleich zu ihrn Oltn gsocht und hot sofort nuch ann draaf gsetzt, ,,du Schbegger!'' Der Edwin wollt eingtlich mit derra feddarma Kost nix zer do hamm, obber er schtett holt ziemlich unter der Fuchtl von seiner Gudrun - und so iss'na nix annersch ibrich gebliem, wie mitzermachn.

Mich dauert'er ja, der Edwin, obber do iss'er selber schuld, wenn'er seiner Oltn net Kontra gibbd.

Anfang der Wochn hob'ich na Edwin am Zaun gedroffn. ,,Und sunst?'', hob'ich na gfrocht. Obber er hot bloß abgewunkn.

,,Olles Scheisse'', hot'er matt gsocht. Do hot mich der Edwin so derbarmt, dass ich na gleich zern Grilln ei'geloodn hob.

,,Kimmst mit deiner Fraa amds verbei - ich leech aweng woss auf...''

Zer Amd hot der Edwin mit seiner Oltn an unnerer Hausdir geklinglt. Die Gunda hot a Kiehldaschn in der Händ k'habt.

,,Du wasst doch, dass mir bloß feddarm essen'', hot'sa erglärt, ,,dessweecher hob ich fir uns zwa zern Grilln a boor Soja- Wärschtla und zwa Flaschn Ziddrona-Limo mitgebracht''.

Erscht wollt ich mich ja weigern, sedds vegedarisch Zeich aufn Grill zer leeng, obber dess hädd bloß Schtreit geem - und so hob'ich die Soja-Wärschtla neber meina feddn Wamma gebroodn. Ban Essn hob ich gemerkt, dass der Erwin ewich lang auf san moochern Soja rum'gekait hot - und dass'er mich fortner beobacht, wie mir von derra Wamma dess Fedd an die Libbn ro'geloffn iss.

Do hob'ich zer ihn gsocht, dass'er mit mir amoll ninter na Gaddn geh soll, wall ich ihn unnera Radiesla zeich - und hintn am Treibhaisla hob'ich na Edwin gschwind a Wamma geem, die woss ich vorher schnell vom Grill runter k'hullt und unter man Hemm verschteggt hob. Kerl, hot der Edwin gschmatzt! Und wie'mer dann widder zer die zwa Weiwer zerrigg kumma sänn, hot'er ganz gligglich gelächlt.

Nooch zehn Minuddn hob'ich na Edwin dann nuch amoll hintn im Gaddn die Schtachlbeern gezeicht - und dessmoll hatt ich hintern Riggn a Seidla Bier dabei. Der Edwin hot an Zuuch gemacht wie a japanischer Wunderschwamm, dann hammer uns widder zer die Frauen gsetzt - und der Edwin hot iber olla Baggn gschtrohlt, dass'mer gedacht hot, die feddarma Kur dutt'na rundrum gud... GERCH

Der Fritz iss fast scha in Rentn, obber trotzdem indressiert'na olles, woss die neia Dechnigg ko. In der Firma ärbert'er am Kombjuter, er gedd dahamm ins Internet nei - und von san neia Händy iss'er ganz begeistert, wall der klana Abberood net bloß dellefoniern ko, sondern aa rechna, foddografiern, Verkehrsmeldunga darchgeem, Aktien kaafn und wass der Deifl nuch woss olles!

Und jeder Anruf werrd gschpeichert, sodass der Fritz hinterher immer genau wass, an wellern Dooch um welcher Zeid er mit wem gered't hot oder wer na selber o'gerufn hot - aufn Händy ko'mer schwarz auf weiß olles ablesn.

Obber letzta Wochn iss na Fritz die Begeisterung verganga!

Er hot neemlich dess Händy samst Gebrauchsanweisung seiner Fraa geem, damit'sa aa endlich dess Delefoniern lernt. Und wie'er amds hamm kumma iss, wor die Erika in der Kichn k'hoggt und hot Rotz zer Wasser gegrinna.

,,Du host mich mit fremmer Weiwer betroong``, hot'sa gschluchzt. ,,Mir host letztn Middwoch gsocht, dass'd amds mit drei Ärbertskolleeng ineran Werthaus draußn in Oberprex aweng Schoofkopf schpillst - und dabei worscht driem in der Tschechei!``

,,Du schpinnst woll``, hot der Fritz gsocht, ,,mir worn im Wertshaus und hamm von sechsa bis karz nooch zehna gekadd.``

,,Du Liengbeitl``, hot'sa gschriea, ,,net amoll etzert host na Mumm, dass'd dan Seitnschprung ei'gschtesst. Ich hob im Schpeicher von dan Händy olles entdeggt.``

,,Woss host dä entdeggt?``, hot der Fritz scha boll aweng unleidich gfrocht - und dann iss die Erika mit ihrn Beweis raus geruggt.

,,Wie ich heit an dan Händy aweng rum gedriggt hob, wor aferamoll a Onzeich zer sehng, mit wem du dellefoniert host. Und genau am Middwoch amd, wo'st angeblich im Wertshaus in Oberprex Kaddn gschpillt host, sänn drei Anrufe im Händy gschpeichert - und olla drei Dellefonate host aus der Tschechei raus g'fiehrt. Dess sicht'mer an die Nummern... du worscht bei denner Schnalln in Eecher driem. Ich loss mich scheidn.``

Der Fritz hot san Kopf gschiddlt. ,,Ich wor ban Kaddn, net in der Tschechei.``

,,Bei denner Nuddn bist gewesn, die won an der Schtraßn schtänga oder in so an Buff - wie'st dich ner net scheemst!! Die tschechischn Dellefonnummern hamm dich verrootn``, hot die Erika gegrinna. ,,Um 22 Uhr 13 host sogor mich dahamm aus der Tschechei o'gerufn, dass ich dir nuch an Warschtsallood hie'schtelln soll, wall'st in ana dreivertl Schtund vom Kaddn hamm kimmst und nuch aweng Hunger host - und ich Daaba hob dess aa nuch zamm'gericht!!``

Es hot lang gedauert, bis der Schtreit zer End wor. Im Dreiländer-Egg empfängt'mer neemlich mit san Händy oft scha dess tschechischa Dellefon- Netz, wall die Grenz so nah iss. So hot unner Fritz am Kadd- Disch in Oberprex werglich drei vermeintlicha Dellefonate aus der Tschechei nooch Hof gfiehrt, genau registriert im Schpeicher Händy.

,,Scheiss-Dechnigg``, hot der Fritz nuch gebrammlt und hot sei Erika firn näggstn Dooch sofort ins Oberprexer Wertshaus ei'geloodn, damit'sa von dart aus ihr Danda Marri in Minchberch o'ruft - und aufn Händy konnt'sa selber ablesn, dass dess ols Auslandsgschpreech registriert wor.

Ziemlich kombliziert - obber wengstns hängt na Fritz sei Hausseeng etz nimmer schief... GERCH

 

Der Manfred und sei Erna hamm driem in Ameriga ihra Verwandtn besucht, die wossn in Colorado leem. Und drei Dooch vor der Riggreise nooch Deitschland wor die ganza Familie am Disch k'hoggt und hot iberleecht, woss die zwa Hofer am End von ihrn Urlaub nuch aweng unternehma kenna. ,,Ihr misst unbedingt nuch zern Gränd Cänyon fohrn'', hot der Erna ihr Schwester empfohln, ,,wall so a Naturschauschpill siggst auf der ganzn Welt nimmer. Links und rechts von derra Schlucht schteing die Felsn 1000 Meter fast senkrecht nauf - und do ko'mer miteran Esl aferan schmaln Pfad in Serpentina bis oom nauf reitn''.

Der Manfred hot ka großa Lust aferan seddn Ausfluch
k'habt, wall'er net schwindlfrei iss und net amoll vom fimftn Schtogg ausn Fenster naus schaua ko, obber die Erna hot net logger gelossn. ,,Dess werrd gemacht'', hot'sa energisch gsocht, ,,und basta!'' Wie die zwa obber dann am Gränd Cänyon untn in der Schlucht gschtandn worn und kerzagrod die Felsn nauf'gschaut hamm, iss aa der Erna aweng mulmich worrn. Obber schließlich hamm'sa sich von derra einheimischn Duristn-Firma iberzeing lossn, dass bei so an Ritt aufn Esl nuch nie woss bassiert iss, wenn'sa schee langsam unter der Fiehrung voneran erfohrna Indianer auf denner Serpentina zern Gipfl nauf machn. So sänn der Manfred und die Erna mit zwelf weiterer Duristn jeder aferan Esl aufgschtieng und hinterernanner los gedrabbt.

Erscht worsch a großa Gaudi und olla hamm'sa gelacht, aweng rum gebleedlt und ihra Schpäßla gemacht. Obber je hecher dass der schmola Pfad nauf ging, um so ruicher sänn die Eslreiter worrn. Jeder wor mit keesweißn Gsicht auf san Esl k'hoggt und hot sich mit weißa Fingerneegl am Ledderziegl fest geklammert. Der Manfred hot auf holber Heh längst Blut und Wasser gschwitzt: links wor die schtaala Felsnwänd - und nooch rechts hot sich der Manfred gor nimmer schaua traua, wall's a boor hunnert Meter kerzagrod nunter in die Schlucht ging.

Der Manfred wor in die letztn zehn Johr bloß a aanzichs Moll bei der Konfirmation von san Enkerla in der Kerng, obber etzert wor'er auf san klan Esl gsessn und hot gebet't. ,,Lieber Godd'', hot'er gemurmlt, ,,loss ner den Ritt guud zer Ende geh und hilf man Esl, dass'er net schtolpert, sunst schterz ich 500 Meter in die Schlucht nunter''.

Obber erscht hot der Herr san arma Sinder nuch afera großa Prob gschtellt!

Vorn hot neemlich der Indianer aferamoll die rechta Händ k'hoom und iss zern Entsetzn von die dreizer Duristn middn af den enga Pfad schteh gebliem. ,,Zigereddn-Bause'', hot'er af Englisch gsocht. Sämtlicha Esl sänn aa sofort schteh gebliem - und dann iss woss bassiert, wo na Manfred fast der Schlooch gedroffn hätt. Sei Esl hot neemlich die Rast dazu benutzt, dass'er sich aweng quer gedreht hot und mit san Kopf untn am Pfad a boor Grosbischla abgfressn hot.

Der Esl musst sich dief schtreggn, damit'er mit san Maul grod nuch an die Groshalm no'kumma iss. Der Manfred wor auf san Esl wie afera Schprungschanzn draf gsessn - unter sich die Schlucht. Er hot sich am Ziegl fest k'holtn, hot sich ganz nooch hintn gelahnt und seina Aang zugemacht, wall'er gedacht hot, dass sei letztes Schtindla gschloong hot - außerdem wär'er ban Bligg nooch druntn sowieso gleich bewusstlos worrn. Etzert hot der Manfred so laut gebet't, dass sogor sei Erna fimf Meter vor ihn olles verschtandn hot. Obber sie hot aa ka Witzla mehr gerissn, wall ihr selber vor Angst der Schwaaß hintn die Färra nunter geloffn iss.

Nooch ungfähr drei Minuddn - na Manfred iss vorkumma wie drei Johr - hot der Herr im Himml na Manfred seina inbrinstinga Gebete erheert: der Indianer-Haiptling hot san Glimmschtengl in die Schlucht nunter gschnibbd und die Karawana iss weider gezoong.

Na Gränd Cänyon, haaßt's in der Werbung, werrd ka Mensch je vergessn. Dem ko der Manfred hunnertbrozentich zuschtimma - fir ihn worsch aa dess Gressta, woss'er je derlebbd hot... GERCH