Der Siecher und der Reiner sänn olta Freind. Im Sandkastn hamm'sa scha mitnanner gschpillt, in der Schul worn'sa neberernanner k'hoggt, sogor ban Barras in Bareith worn'sa zamm - und vor 24 Johr hamm'sa im Abschtand von vier Wochna k'heiert. Inzwischn hot jeder zwa erwachsna Kinner, und wenn die Weiwer dahamm amoll an Schtreit o'fanga wolln, gett jeder gleich ausn Weech, neemlich der Siecher zern Reiner und der Reiner zern Siecher. So verlefft ihr Leem ziemlich normol - bis auf Weihnachtn. Karz vor na Haalinga Amd entwiggln die zwa Männer a gewissa griminella Energie, die woss sich langsam schteigert - und af zerletzt bricht aus denner zwa harmlosn Kamerodn der blanka Verbrecher raus, wenn der Siecher die entscheidnda Frooch schtellt: ,,In wellern Wäldla klaua'mer dä heier unnera Chrissbaamer?''

In derra Wochn worsch widder soweid.

,,Heier gäng'mer moll hinter die Ullitz'', hot der Siecher gsocht, ,,do hob'ich im Sommer ban Schwammersuung a Blätzla entdeggt, wo die schennstn Danna und Fichtn und Blaufichtn schtänga''.

Der Reiner hot gegrinst: ,,...und olla umsunst!''

Letztn Sonndooch nooch na Friehschobbn sänn die zwa Schlawiner auf der B 173 hinter der Ullitz in dess Wäldla nei ganga und hamm sich aweng umgschaut.

Dann hamm'sa zwa scheena middlera Danna gfunna - und hamm gleich oom um na Querl a Babbierdaschndiechla gebundn, damit'sa die Baamer drei Dooch schpeter in der Finsternis gleich widder finna, wenn'sa die Brachtschtiggla hulln.

Am Middwoch amd, wie's scha aweng finster wor, sänn die zwa Chrissbaam-Klauer miteran klan Hänger hintn am Auto widder an die Ullitz naus gfohrn. Es wor awengla Reif geleeng - und ihra Baamer hamm'sa sofort gsehng. Mit der Bieglseech hamm'sa die schenn Danna abgseecht und iber die leichta Schneedeggn zer ihrn Hänger gschlaaft - und ab ging die Bossd. Woss unnera zwa Schbezialistn untern Schnee net sehng konntn: sie hamm sich fir ihr Klau-Aktion ausgerechnt an Flegg ausgsucht, wo die Autofohrer immer o'holtn und ihra Gschäftla verrichtn, wall ka orntlicha Doaleddn in der Neh iss. Und genau iber den efftnlichn Abbort hamm'sa ihra Chrissbaamer gezerrt.

Dahamm hamm der Siecher und der Reiner dann na Anhänger samst die zwa Baamer gleich in die kolta Karaaschn gschtellt, damit olles schee frisch blabbt bis zern Haalinga Amd.
Obber dann kam die Kaddaschdrofn! ,,Die Baamer schtinkn wie Sori'', hot der Reiner gsocht und hot aweng an die Ästla gschnubbert. ,,Do hamm die Bauern wohrscheins am Waldrand ihr Sori naus'gfohrn''. Und der Siecher hot fachmännisch festgschtellt: ,,Die kenna'mer auf kan Foll aufschtelln - die miss'mer erscht abwaschn und min Feen droggna''.
So hamm'sa also die Chrissbaamer miteran Dampfschtrohler sauber gemacht und anschließnd gfeent. Hinterher wor der Gschtank weg, obber leider aa die mastn Danna-Noodln.

Etzert missn der Siecher und der Reiner doch nuch aufn Chrissbaam-Markt geh und zwa Fichtn kaafn. ,,Und näggstes Johr'', hot der Siecher gsocht, ,,miss'mer nuch genauer aufbassn, wemmer unnera Baamer hulln'' - es iss zer vermutn, dass die zwa Mannsbilder dann wie die Schnifflhund vom Zoll ihra Nosn in die Danna und Fichtn schteggn, bevor sa ihra weißn Daschndiechla um die Schpitzn rum bindn... GERCH

 

Der Manfred hot wie die mastn Männer von seiner Fraa auf Weihnachtn mastns Schlips oder Soggn gschenkt gricht. ,,Woss solln'mer uns dä sunst schenkn'', hot sei Gunda immer gsocht, ,,mir hamm doch olles - und Soggn und Schlips sänn woss Braktischs, dess missert'mer fir dich sowieso kaafn''.

Der Manfred hätt nadirlich gern aweng woss Schennersch gricht wie Soggn und Schlips, obber so wor holt dess Leem. Wall obber der Manfred net auf die Bern gfolln iss, hot'er sich letzta Weihnachtn woss ganz Originells ausgedacht: Er hot neemlich seiner Gunda an Wunschzeddl gschriem - wie die Kinner. Ganz oom draf schtand a neia Loggomoddiv fir sei Modell-Eisnbohn, drunter a Daschnmesserla und an der drittn Schtell dess Witzbuch ,,Da lacht der Ingenieur'', wall doch der Manfred selber aner wor.

Den Wunschzeddl hot der Manfred ganz oom nauf aferan Schtapl Beleeche fir die Schteiererglärung geleecht, die woss sei Gunda firsch Finanzamt gsammlt hot. Die Fraa wollt neemlich in die neggstn Dooch die Schteiererglärung machn - und do hätt'sa sofort na Manfred san Wunschzeddl ans Chrisskindla entdeggt.

Der Manfred wor von seiner Idee ganz begeistert und hot sich scha gfreit, dass'er endlich kana Schlips und Soggn mehr gschenkt gricht.

Neigierich hot'er dann am Haalinga Amd seine zwa Bäggla aufgerissn - drinna worn Wollsoggn und zwa Grawaddn. Der Manfred hot nix gsocht, obber der Kamm iss'na scha aweng gschtieng, wall sei Olta net aweng feinfiehlicher wor. Der ganza Hausseeng wor iber die Feierdooch schief k'hängt.

A holbs Johr schpeter hot der Manfred weecher ana Rebberadur am Fernseher die olta Rechnung gsucht - und dessweecher musst'er sich die ganzn Beleeche vom Finanzamt widder hulln, wo sämtlicha Unterloong fir die Schteiererglärung abgeem worrn sänn. Dahamm hot der Manfred dess Bäggla aufgemacht - und woss wor ganz oom draf geleeng? Sei Wunschzeddl vom letztn Johr!

Der Finanzbeamta hot neemlich ganz scheena Aang gemacht, wie er sellmoll na Manfred seina Sonderwinsch gelesn hot! ,,Die Leit werrn fortner dreister'', hot'er zer san Kolleng im Amt gsocht, ,,die sänn net amoll mehr zerfriedn, dass'sa a Schteier-Riggzohlung grieng - etzert fordern'sa von ihrn Sachbearbeiter sogor nuch Weihnachtsgschenker o...'' GERCH

 

Der Haalicha Amd und die zwa Feierdooch sänn ja fir a großa Familie immer a ganz scheena Belastung. Seit Bethlehem gibt's in unnerer Verwandtschaft an oltn Brauch, dass sich neemlich am erschtn Feierdooch olla Verwandtn bis zern drittn Grod, also einschließlich Kusäng und Kusina, treffn - und zwor jeds Johr bei an annern. Heier worn mei Martha und ich dro.

Eingtlich soll dess ja a scheens Treffn werrn, obber wasst scha: amds schleecht jeder drei Kreizla, wenn die ganza bugglerta Verwandtschaft widder draußn iss vom Templ! Fortner die Schtolln-Fresserei, die Blätzla, der Haufm Kaffee und Gliehwein, dazwischn immer moll a Bier und a Kraiterlikeer - und dann der Lärm von die Kinner, die won mastns mit ihra Gschenker wie die Närrischn rum'werng! Die Onkl und Tantn, die Schweecher und Enkerla sänn fei a großa Briefung fir die christlicha Doleranz, wenn'sa olla in der gudn Schtumm hoggn und kana Anschtänd machn, dass'sa widder hamm gänga.

Wie am Haalinga Amd aferamoll in der Hofer Geengd der Eisreng kumma iss, hob'ich nuch zer meiner Martha gsocht: ,,Dess Chrisskindla werrd uns doch den Eisreng net af Weihnachtn schenkn, dass die ganza Bloosn morng net zu uns kimmt!'' Und wie ich am erschtn Feierdooch zer Frieh gleich moll vom Fenster naus gschaut hob und die digga Eisschicht aufn Hausblatz, aufm Gehschteich und auf der Schtraßn gsehng hob, dacht ich, dass dodermit der Verwandtnbsuch ausfällt. Obber do hob'ich mich getaischt: karz nooch zwa sänn die Minchberger ols erschta in ihra schwarzn Mäntl langsam dess Bergla zer unnern Haus rauf kumma: gschwankt sänn'sa, gschterzt sänn'sa, obber sie hamm sich af derra Eisflächn widder aufgerafft - so sänn'sa immer neher kumma. Jaja, unner Verwandtschaft: die hamm holt guda Erbanloong und lossn sich net so leicht fernholtn - wenn's erchetz wo woss umsunst gibt, do geem'sa net nooch. Zach und unbeirrt trotzn'sa na schlimmstn Wedder.

Und wie dann bei uns dess Kaffekränzla aufs End zu ging, kam die Kaddaschtrofn: weecher na Gladdeis wollt kaner hamm geh! Aferamoll worsch ihna zer gfährlich, walls draußn so gladd wor!. Und so sänn'sa fei zwelf Mann hoch die ganza Nacht bei uns gebliem. Na Wein, dess Bier und na Kraiterlikeer hamm'sa leer gsuffn, dann hamm'sa sich ibersch ganza Haus zern Schloofn verdaalt. Auf jedn Soffa worn zwa geleeng, im Fernsehsessl wor der Obba drinna k'hängt, viera worn im Gästezimmer, firn Onkl Herbert musst sei Schwoocher im Vollrausch nuch a Luftmadratzn aufbloosn, und es hot'ner die Aang raus gedriggt, dass'mer dachtn, der macht gleich selber Schluss - und erscht weid nooch Middernacht wor endlich Ruh im Haus, wall'sa dann olla geratzt hamm. Obber nooch ana Schtund ging's widder los, wall'sa fortner olla aufs Klo musstn - unner aanzicha Doaleddn wor einfach zer weng fir die bsuffna Verwandtschaft.

Zer Frieh in der Kerng hot mei Martha zwelf Kerzn ogezundn, damit und dess Schiggsol so boll nimmer derwischt... GERCH

Wenn's schtimmt, woss unnera Verwandtn und Freind ollawaal behauptn, nochert k'heern Video-Filme ausn Urlaub mit zer die schennstn Dinger af der Welt. Dessweecher frong die Schweecher und Dandn, die Kamerodn vom Schitznverein und von die Fußboller jedsmoll, wenn'sa zer uns af Bsuch kumma, ob'sa ihr Urlaubs-Video mitbränga solln. Obber ich hob mir extra nuch kan Videorecorder kaaft, damit ich mir dess Zeich net fort oschaua muss.

Obber heier hot untern Chrissbaam die Bombn ei'gschloong! Mei Martha hot'mer a Video-Gereet gschenkt: a Sonderangebot mit klana Laggscheedn - und scha aweng a älters Modell, obber unheimlich ginstich im Breis. ,,Host du dir olles gud iberleecht'', hob'ich nuch am Haalinga Amd zer meiner Oltn gsocht, ,,wall etzert kenna'ma uns geecher die Urlaubsfilme fei nimmer wehrn...''. Und wie wenns die ganza Verwandtschaft mitgricht hätt, sänn'sa am zweitn Feierdooch mit ihra selber gedrehtn Vido zern Kaffee kumma: die Minchbercher hattn an Schtraafn aus Gran Canaria dabei, der Onkl Franz hot vor zwelf an Film ibersch Wandern in Sidtirol gedreht, die Schweechera wor auf ana Einkaufsfohrt min Bus in der Tschechei fir siem Eiro fuchzich und hot gfilmt, wie'sa a Schoofwolldeggn kaaft hamm - und der Kusäng hot an 30-Minuddn-Film iber san Hausbau mitgebracht.

Wie'sa olla bei uns versammlt worn und die Filme noocherernanner oschaua wolltn, hob ich gsocht, dass dess net gett, wall ich mei neis Video-Gereet nuch net inschtalliert hob. Obber dess hot na Ehrgeiz von derra Blosn erscht recht o'gschtachlt. ,,Sei froh, dass'mer olla do sänn'', hot der Schwoocher gleich gsocht und seina Aang hamm geleicht, ,,den Videorecorder schließ'mer olla mitnanner o'' - und dann sänn'sa zer fimft in Aktion getretn. Wie hungricha Welf hamm'sa na Karton aufgerissn, dass die Schtyrobor-Kiecherla in der ganzn Wohnschtumm rum'gekullert sänn, Kabl und Schtegger, die Fernbedienung, dess Gereet und a 72-seiticha Gebrauchsanweisung - olles wor aferamoll kreiz und quer in der Schtumm rumgeleeng. Jeder von denner fimf Mannsbilder hot olles besser gewusst wie der annera, sie hamm sich die elektrischn Drehtla wechslweis aus die Händ gerissn. Zwamoll hot's die Sicherung darch k'haut - und af zerletzt, wo vorn aufn Fernseher bloß ner a Flimmern wor, sänn die fimf Exbertn so ineran Schtrei gerootn, dass ich gedacht hob, etzert schwaddn'sa sich gleich.

Nooch zwa Schtund wor dann olles o'gschlossn - und die Minchbercher hamm ihrn Urlaubs-Video vom Playa Inglese eigeleecht. ,,Obber derschreggt fei net, wenn gleich am Anfang mei Gunda oom ohne rum'lefft'', hot der Herbert gsocht - und ich hob mir gedacht, dass an manchsmoll werglich nix erschport blabbt. Obber dann hot sich dess Bladd bletzlich nuch'amoll gedreht: mei Fernseher ging neemlich nimmer, do hamm'sa bei derra Video- Anschließerei wohrscheins innerlich woss ruiniert. Jednfolls hot's aufn Bildscherm bloß nuch gschneit, obwohl gor kana weißn Weihnachtn worn - und dann hot's gerochn, wie wenn's brennt. Der Fernseher hot san Geist aufgeem! Gligg muß'mer holt hoom, wenn's amoll griddisch werrd... GERCH