Wenns um die Scheenheit gett, nochert machn sogor die schporsamstn Weiwer ihrn Geldbeitl weit auf. Die Helga jednfolls hot letzta Wochn ban Friseer widder dichdich zugschloong, damit'sa amds im Deooder aweng woss gleich sicht. Fir 95 Eiro hot'sa im Salon na ,,großn Kundndienst'' machn lossn: Waschn, Schneidn, Föhna, Welln, Kur - und zwa Schträhnla, vorn rod und hintn gelb.

Nooch fast drei Schtund iss die Helga frisch rausgebutzt nuch schnell in Subbermarkt zern Eikaafn nei. Und do hot'sa im Angebot an Dampf-Reinicher entdeegt - so a Ding wollt'sa sich scha längst moll kaafn. Und etzert wor a Dampf-Reinicher ols ,,Schnäbbla'' vor ihr gschtandn - fir lächerlicha 129 Eiro. Die Helga hot dess guda Schtigg gleich mitgenumma.

Dahamm hot'sa ihrn Dampf- Reinicher sofort ausbrowiert - und zwor im Gästeklo. So a Zaubergereet beschtett - ehnlich wie a Schtaubsaucher - auseran klan Weecherla, an Schlauch - und vorn dro dess Rohr, wo der Dampf raus bleest. Etzert wor ollerdings dess Gästeklo so kla, dass dess Weecherla net nei'gebasst hot. ,,Macht nix'', hot sich die Helga gedacht, ,,loss ich holt na Woong draußn und geh ich bloß min Schlauch und min Rohr nei''. Sie hot also am Weecherla na Knopf ,,Start'' gedriggt - und wie der Dampf-Reinicher langsam auf Duurn kumma iss, hot'sa dess Rohr mit den haaßn Dampf in die Kloschissl nei k'holtn.

Es wor die reinsta Freid, wie olles gezischt und gedampft hot. Im Nu wor die ganza Kloschissl so sauber, dass'mer ka Schbritzerla mehr gsehng hot. Obber wall ja dess Weecherla draußn vor der Tir schtand, konnt die Helga etzert ihrn Dampf-Reinicher nimmer ausscholtn - ihra Arm worn zer karz.

Und der neia Abbarad hot gedoo wie a Loggomoddiv: im Gästeklo wor scha die reinsta Dampfsauna - und middn drinna die Helga mit ausgebradda Arm: in der linkn Händ dess Dampfrohr - und mit der rechtn Händ hot'sa vergeblich versucht, draußn vor der Tir na ,,Aus''-Scholter zer derwischn.

Die Helga hot im haaßn Nebl gor nix mehr gsehng - und wie im oldn Geede san ,,Zauberlehrling'' hot'sa die Herrschaft iber ihr neia Dechnigg ganz und gor verloren. Erscht wie sa dess zischnda Dampfrohr ins Klor nei gschteggt hot und aus ihrer klan Heimsauna naus gewercht iss, um draußn die Maschina auszerschaltn, iss widder Ruh in dess Inferno eigekehrt.

Do schtand dann die Helga in ihra klitschnassn Glamoddn - und die Hoor worn ihr aufn Kopf gebicht. Die scheena neia Dauerwelln - olles ban Deifl. Dess Deooder amds hot die Helga gleich moll gschtrichn, wall'sa mit ihra Zuudln nimmer unter die Leit geh konnt. Etzert wär holt der ,,Barbier von Sevilla'' recht gewesn... Gerch

 

Etzert hot doch a ,,Mikrometeorologe'' brofezeit, dass in 20 Johrna in Warmaschtanach, in Fichtberch und in Bischofsgrin ka Schnee mehr fällt, wall dess Glima fortner wärmer werrd. Ich wass holt net, ob'mer den akademischn Wedderfrosch olles glaam derf. Die bränga doch kaum a orntlicha Vorhersooch fir die näggstn zwa Dooch zer Schtand - wie wolln'sa dä do 20 Johr voraus woss wissen! Letzta Wochn hamm'sa im Fernsehng Schnee gemeld't - und ich Daaber bi in banischer Angst in die Werkschtatt gewercht und mit etlicha Euro Drinkgeld schnell meina Sommerraafn wechsln lossn. Und woss wor? Am näggstn Frieh gab's an Wärmeeinbruch, dass ich gedacht hob, im Gaddn schloong nuch amoll die Nazissn aus...

Trotzdem muss'mer sich af die Glimaveränderung im Fichtlgeberch awengla ei'schtelln, zumol scha vor an holbn Johr a Wissnschaftler in Hof gsocht hot, dass in Zukumpft aufn Ochnskopf Banana wachsn. Dann iss nadirlich Schluss min Schifohrn - und zern Langlaafn derfst die Bredder aufs Auto schnolln und in die Frankfurter Innaschtadt fohrn. Im Fichtlgeberch siggst dann bloß nuch Leit, die woss mit die Schischteggn in die Händ ,,Nordic Walking'' in Turnschuh machn, dass ihna in der trobischn Hitz der Schwaaß von der Bern dropft. Ich iberleech scha, ob ich meina neia Langlaaf-Schi net gleich auf drei Daal zamm'seech und im Gmiesgaddn ols Schneggnzaun aufschtell, dann wärn'sa wengstns gscheit im Einsatz.

Wer wass, woss aus unnern schenn Fichtlgeberch und ausn Frangnwold nuch werrd! Do werrn dann die Urlauber aufm Kornberch im Safari-Lugg zwischn die Balma rum'wandern - und ols ,,Event'' schwinga'sa sich wie der Tarzan mit Liana darchn Waldschtaa. Wo frieher Fichtn schtandn, wächst dann der Bambus, und in die Äst hoggn massnhaft die Babbagei und schreia, dass'd Ohrnschtepsl brauchst, sunst blatzt'der dess Drummlfell. Wanderer missn dann aufbassn, dass'sa net von der schwarzn Mamba ogegriffn werrn, die woss gern in die dampfinga Bisch auf Nohrung lauert.

Wenn dess Glima haaß werrd, dann iss boll aa der ganza Wold vuller Affn. Obber an die Affnblooch kenna'ma uns scha lang vorher aweng gewehna. Affn konnst neemlich heit scha manchsmoll auf der Kösseina, am Schneeberch oder im Hellndool rumlaafn sehng - in bunta Drillobal-Anziech oder in Schtegglaschuh, mastns mit ana Zigereddn im Maul...die Vorbotn vom Glimawechsl sänn scha unter uns! GERCH

 

Etzert muss'mer jedn Dooch damit rechna, dass der Schnee kimmt - und es iss heggsta Zeid, dass'me-r am Auto die Winterraafn nauf dutt. Dess hot sich aa der Vorschtand voneran großn Hofer Schportverein gedacht. ,,Am kommendn Wochnend iss die Jugnd widder mit unnern Vereinsbus unterwegs'', hot der Hans verantwortungsbewusst gsocht, ,,do werr'mer gleich moll die Raafn wechsln, damit denner Gunga nix bassiert''. Und wall der Hans net bloß a weidbliggender Vorschtand iss, sondern aa die Pfäng im Verein eisern zamm'hält, wollt'er den Raafnwechsl an den neinsitzinga Bus gleich selber machn. Der Hans iss neemlich aweng a Hobby-Bastler - er hot kerzlich erscht heggstberseenlich a IKEA-Schränkla aufgebaut, wo hinterher bloß ner zwa Breddla und vier Schraum ibrich gebliem sänn. ,,Den Raafnwechsl an unnern Bussla mach ich dahamm selber'', hot'er in der Vorschtandssitzung gsocht.

Also hot unner Hans die hintera Tir von den klan Bus aufgeglabbt, hot die vier Winterraafn eigeloodn, die won scha auf Felgn aufgezoong worn, und iss hamm gfohrn.

Etzert muss'mer wissn, dass na Hans sei Haisla draußn am Schtadtrand anera abschissinga Schtraßn schtett, ziemlich weid drom aufm Berch. Der Hans iss also mit san Vereinsbus von untn dess Berchla nauf'gfohrn und hot na Bus genau vor san Haus abgschtellt. Aus seiner Karaaschn hot'er Schraumschlissl und an Woongheber k'hullt, dann hot'er die hintera Tir vom Bus aufgmacht und wollt die vier Raafn raus'schtelln, obber Dunnerwedder! Kaum hot'er die Tir aufgemacht, sänn'na aus den hängendn Bussla scha zwa Raafn entgeeng gschprunga, sänn an ihn verbei auf die Schtraßn k'hupft - und neberernanner und immer schneller na Berch nunter raus'gerollt.

Der Hans wor ja frieher selber a guder Schportler, obber dess iss lang her. Trotzdem iss'er sofort denner zwa Raafn hinterher gerennt - und nooch fuchzer Meter hot'er na linkn Raafn mit der Händ an Schubbserer geem, dass'er die Richtung geändert hot und ineran Vorgaddn nei'gerollt iss. Obber der zweita Raafn iss kerzagrod wieder auf die Kreizung zugerollt, gligglicherweis iss unner Hans zentimeterweis neher kumma. Und karz vor der Kreizung - wer wass, woss sunst bassiert wär - hot der Hans mit letzter Kraft an Hechter gemacht und hot sich wie frieher, wenn a gegnerischer Schtirmer am Torraum zern Wurf o'gsetzt hot, auf den Raafn nauf'gschmissn. Do wor der Schpuk aferan Schlooch verbei: der Raafn und der Hans worn neberernanner aufn Gehschteich geleeng.

In der näggstn Vorschtandsitzung iss der Hans aufgedaucht wie a Kriegsveteran: dess rechta Baa hot'er aweng noochgezoong, der rechta Arm wor inera Schlinga und iber die Schtern wor a braads Pflaster gebicht. Ibrigens: die Winterraafn sänn inzwischn in der Werkschtatt gewechslt worrn, damit der Jugnd bei der Auswärtsfohrt nix bassiert - im Geegnsatz zern Vorschtand... GERCH