Dies ist eine mit page4 erstellte kostenlose Webseite. Gestalte deine Eigene auf www.page4.com01.06.2002
A Urlaub ko fei ganz schee gfährlich werrn!
Mei Freind Wolfgang wor kerzlich af derra griechischn Insl Korfu. Nooch ana Wochn iss'er braun gebrennt widder im Flughafn gewesn und hot afn Riggfluch gewart. Middn zwischn die Haufm Leit iss aferamoll a Mo aufn Wolfgang zuganga. ,,Wir fliegen gleich zurück nach Düsseldorf'', hot der Mo ganz freindlich zern Wolfgang gsocht, ,,würden Sie bitte von mir und meiner Frau ein Erinnerungsfoto machen?''
,,Fraalich mach ich a Foddo vo eich'', hot der Wolfgang hilfsbereit gsocht - und der Dissldorfer Urlauber hot'na sei Kamera in die Händ gedriggt. ,,Alles vollautomatisch'', hot der Mo erglärt, ,,Sie brauchen nur da oben rechts auf den Knopf drücken''. - Der Wolfgang wor froh, dass der Abbarad so einfach zer bediena wor, wall'er selber von Dechnik nix verschtett - er hot dahamm sei Videogereed nuch nie zern Laafn gebracht.
Der Wolfgang hot also darch die Linsn geluhrt - und drei Meter vor ihn hot der fremma Dissldorfer sei Olta in Arm genumma und in die Kamera nei'gschtrohlt. Unner Wolfgang hot aufn Ausleeser vom Foddoabbarad gedriggt, obber nix hot sich geriehrt: ka Gliggn, ka Blitz - nix. Der Dissldorfer iss scha aweng ungeduldich worrn. ,,Jetzt drücken Sie halt ab'', hot'er gsocht, ,,ich kann doch nicht ewig lachen!''
Der Wolfgang hot gedriggt und gedriggt, obber nix iss bassiert. Dann kam die rheinischa Frohnatur aufn Wolfgang zu, hot die Kamera inschpiziert und hot na Wolfgang von der Seitn o'gschaut. ,,Sie haben meinen Fotoapparat kaputt gemacht. Den Schaden müssen Sie mir ersetzen - Sie haben ja sicher eine Haftpflichtversicherung...''
Seitdem lefft der Schoodnsbrozess, wall der Dissldorfer Urlauber vom Wolfgang a neia Kamera hamm will - und der langt sich bloß an san Kopf. ,,Die sänn doch närrisch, die Dissldorfer'', hot der Wolfgang den Foll dahamm san Freind Hans derzellt. Und wie der Deifl sei Gschpill hot: Letzta Wochn wor der Hans selber in Urlaub - und aufm Riggfluch von Rhodos schtand aferamoll im Warteraum vom Flughafn a Fraa mit ihrer Kamera vor ihn. ,,Würden Sie mich und meine Freundin schnell mal fotografieren?''
Na Hans iss gleich die Gschicht von san Freind in Kopf gschossn. ,,Naa, guuda Fraa'', hot'er gsocht, ,,mit mir net! Ich nimm ka fremma Kamera in die Händ - ich bi doch net verriggt. Hinterher hob'ich an Brozess am Hols''. Die fremma Fraa hot gedacht, dass'sa do aneran Geistesgrankn no'geroodn iss, obber unner Hans wusst scha, woss'er dutt. ,,Ich mach heggstns dann a Foddo von eich zwa, wenn'Sa mir vorher an Wisch unterschreim, dass ich kan Schoodnsersatz zohln muss, folls woss kabudd gett''.
Die Fraa iss zer ihrer Freindin zerrigg ganga und hot ewich lang mit ihr geduschlt. Sie wor sich sicher, dass der merkwirdicha Mo in Rhodos an Sonnaschtich derwischt hot. Obber unner Hans wor in der Bern scha in Ordnung - im Geengdaal: er hot sofort erkannt, wo die Gfohr lauert. ,,Mir macht kaner woss weis'', hot'er gsocht, ,,ich jednfolls foddografier ohne Unterschrift in man ganzn Leem kan Fremma mehr''. - Die Hofer sänn holt schlau... GERCH
08.06.2002
Olla worn'sa begeistert. Mit vier Daxi iss die lusticha Drubbn nochert nieber ins ,,Vertl`` gfohrn - und nuch amoll ineran Wertshaus ei'gekehrt. Do gab's zwor ka Schlabbnbier, obber dess normola Bilsner hot derra aufgegratztn Bloosn fei aa dichdich gschmeggt. Schließlich hot der Wert heggstberseenlich derra Feier a End gemacht, wall zwa Mann scha am Disch ei'gschloofn sänn. ,,Bollizei- schtund``, hot'er zer frieh um aans gsocht, ,,Leit, ihr misst etzert hamm geh!``
In derra kriddischn Minuddn sänn der Bert und sei Elli af die glorreicha Idee kumma: ,,Wall's heit so schee iss: mir loodn eich olla nuch zer uns dahamm ei - do werrd nuch aans gezwitschert.`` Am Disch wor a Begeisterungsschturm - sogor die zwa Benner hamm ihra Aang widder aufgerissn.
Der Bert und die Elli wohna draußn am Schtadtrand ineran klan Haisla - und sie hamm den annern Zechbriedern genau erglärt, wo dess iss. Dann sänn'sa sofort min'n Daxi losgfohrn, damit olles aweng vorgericht iss, wenn die annern zwelfa erscheina.
Dahamm hot sich obber der Bert gleich nauf na erschtn Schtogg verzoong. ,,Fraa``, hot'er zer seiner Elli gsocht, ,,ich bi bsuffn und mied wie a Hund, ich leech mich gleich nei's Bedd.``
Die Elli hot gedacht, sie heert net richtich. Sie hot ganz schee gschpreißlt, wall'sa doch werglich ka Lust k'habt hot, allaans mit derra fremma Bloosn weider zer feiern. ,,Ich loss kann rei, wenn die annern ei'dreffn``, hot'sa sich entschlossn - und hot sofort olla Lichter im Haus ausgemacht.
Hintern Vorhang im erschtn Schtogg hot'sa dann olles beobacht, woss druntn vor der Hausdir im Finstern bassiert iss. Nooch und nooch sänn drei Daxi o'kumma. Die Zechbrieder hamm an der Hausdir geklinglt, obber kaner hot aufgemacht. Druntn vor na Haus wor a ziemlicha Debaddn im Gang, obber af zerletzt hamm'sa olla gedacht, dass'sa sich wohrscheins die folscha Adress gemerkt hattn - und dann sänn'sa olla widder mit die Daxi abgerauscht.
Der Elli hot ganz schee dess Herz geglopft, bis endlich widder Ruh' wor. Und ihrn Oltn hot'sa ban Friehschtigg rund gemacht. ,,Sowoss wenn'st'mer nuch amoll o'zeddlst: Leit ei'loodn - und dann verschwindn wie's Wärschtla vom Graut!!`` - Sie hot sich vorgenumma, dass'sa näggstes Johr ban Schlabbn- dooch mit a boor Freimooßn olles widder guud macht, wenn'sa die Leit nuch amoll im ,,Schießhaisla`` drifft... GERCH
15.06.2002
Letzta Wochn hot die Bossd a neia Briefmarkn rausgebracht, wo so a Flussperlmuschl draaf iss - do worn fei die Naturfreind und die Briefmarknsammler kaum nuch zer bremsn: in Prex hot die Bossd nebern Feierwehrhaus ineran Bauwoong sogor a Sonderbossdamt aufgebaut und die neia Briefmarkn verkaaft - Kerl, do wor fei a Andrang, wie wenn'sa Freibier ausschenkn.
Etzert iss die Frooch: Warum worn so an Haufm Leit in Prex? Sänn die werglich bloß weecher derra neia Briefmarkn kumma oder wolltn'sa - wie's im Vorbericht o'gekindicht wor - aus lauter Neigier amoll dess ,,Briefmarken-Erlebnisteam der Deutschen Post`` sehng, also die boor Hanserla, die wossn die Sondermarkn verkaaft hamm - einschließlich der ,,vereidigten Stemplerin``.
Mei Freind Ludwich hot gleich an Verdacht k'habt: ,,Woss haaßt do ,Briefmarken- Erlebnisteam' - die Bossd hot woll kana Beamtn mehr?! Etzert verkaafn'sa ihra Briefmarkn wie a Zirkusnummer!!`` Obber do dutt fei der Ludwich der Bossd unrecht - schließlich hamm die Bossderer in der Marketing-Zentroln monatlang nochgedacht, bis dass'sa endlich fir die Schalterbeamtn den neia Noma gfunna hamm: ,,Briefmarken-Erlebnisteam!``
Hoffntlich hamm'sa mit derra Noochdenkerei widder aufk'heert. Net dass'sa aa die Brieftreecher in ihr neis Konzept ei'beziehng. Unner Brieftreecher iss seit zwanzich Johrna der Willi - a freindlicher Mo, wo ich mich jedsmoll frei, wenn'er kimmt und mit die Briefla in der Händ scha vo weitn winkt: ,,Die Bossd iss do.`` Wehe, wenn der umgschult werrd - und ann kimpftich entgeeng schtrohlt: ,,Der Willi vom ,Briefträger- Erlebnisteam` iss do...`` GERCH
22.06.2002
Dass'mer obber fir Essn und Drinkn aa an Gedenkdooch macht, iss erra seltn. Do fällt an heggstns der ,,Tag der Milch'' ei - und bei die Chinesn gibt's an ,,Tag des Hühnersuppengottes'' samst Denkmol.
Um so schenner, dass in unnerer Region a wichtigs Nahrungsmiddl endlich aa gewirdicht werrd: bis morng lefft nuch die ,,Woche der Bratwurst'', wo die Wertshaiser und die Griller extra nuch amoll Gas geem. Die Broodwärscht sänn ja fir uns Frangn scha immer a Wohrzeichn gewesn im unerbiddlichn Kampf geecher die bayerischn Weißwärscht. Dass unnera Metzger die Broodwärscht inzwischn aa mit Pizza-, Kees-, Zwiebl- oder Knoblauchgschmagg erweitern, iss ihna verzieha - die Menschheit iss in ihra langa Gschicht holt immer widder aa Errweech ganga.
Die ,,Broodwarscht- Wochn'' iss die besta Erfindung, seit die Broodwärscht im Johr 1200 zern erschtn Moll urkundlich erwähnt worrn sänn. Leider iss die Gedenkwochn morng scha widder zer End, obber do braucht sich ja kaner dro holtn. Ich jednfolls hob jeds Johr 52 ,,Broodwarscht-Gedenkwochn'' - und zwor immer wechslweis mit Breedla und Sempft oder mit Breedla und Graut. Dessweecher fohrn mei Martha und ich a nie länger wie zwa Wochn in Urlaub, wall'mer dann zu sehr unter Entzuuch leidn. Wenn mir dann nooch verzer Dooch aus Caddolica widder hamm kumma, schterz'mer uns sofort auf die näggsta Warschtbudn und schlichtn nei, dass die Leit maana, mir kumma aus Zentrolaffriga und hamm doochlang nix zern Beißn gricht.
Am schlimmstn sänn nadirlich die ausgewandertn Hofer dro, die won driem in Ameriga leem - und auf Dauerentzuuch sänn. Wenn die etzert woss heern von unnera ,,Woche der Bratwurst'', leichtn ihna die Aang und dess Wasser lefft ihna im Maul zamm. Obber schtatts ihra gelibbdn Broodwärscht grieng'sa Unterzugger - und Sehnsucht nooch dahamm. Broodwärscht hamm holt aa ihra Neemwirkunga... GERCH
29.06.2002
Dess Derfla direkt an der Grenz zu Sachsn iss zwor klaa, obber die Feierwehr iss schwer auf zagg. Und am libbstn leschn die Feierwehrmänner na Brand im einga Hols - do braung'sa net amoll die Uniform o'ziehng. Und der Kamerod Rudolf gett immer mit gudn Beischbill voran. An seina Woodn driggts'na zwor scha die Krampfadern wie die C-Schlaich raus, obber er iss jedn Ernstfoll gewachsn - ban Brandeinsatz genauso wie ols Hausmaster. Letztn Samsdooch frieh iss'er im Aufenthaltsraum vom Feierwehrhaus auf die Laddern nauf gschtieng, um zwa kabudda Gliehbern auszerwechsln. Vorher hot'er vorsichtich die zwa holbrundn Glosfassunga abgschraubt und afera Dischla nebersch Dellefon geleecht. Die zwa Gliehbern hot'er dann rausgedreht und gleich mit hamm genumma - am nächstn Dooch wollt'er zwa neia Bernla ei'setzn.
Obber kaum wor der Rudolf ausn Feierwehrhaisla draußn, sänn 25 Männer und Weiwer vom Gsangverein aufgedaucht, die wossn mit Genehmichung vom Kommandantn am Feierwehrhaus a scheens Grillfest machn wolltn. Jeder Sänger hot aweng woss mitgebracht: Broodwärscht und Geddinger, Ribbla und Schteeks, Sempft, Breedla, Erpflsalood - und nadirlich zwa Fässla Bier, damit der Hols net ausderrt. Wie sa ihr Zeich im Aufenthaltsraum schee ausgebaggt hamm, hot der Bariton Max gleich die zwa Glosschissln entdeggt, die woss unner Rudolf a Schtund vorher nebersch Dellefon geleecht hot. ,,Mir hamm holt freindlicha Feierwehrleit im Dorf'', hot'er gsocht, ,,sogor Schissln leiha'sa uns aus''. Die zwa Glosschissln worn na Max neemlich grod recht - do hot'er gleich moll na Erpflsalood nei. Obber Dunnerwedder! Die vulln Schissln sänn wie zwa Kraasl aufn Disch rumgeeiert, wall'sa kan festn Schtand hattn. ,,Do hamm'sa dess billigsta Glump kaaft - wohrscheinlich hot der Kassnwart widder ka Geld raus geruggt, und es hot bei die Glosschissln grod nuch fir die verta Wohl gelangt'', hot der Max geknurrt. Na ganzn Amd hattn die Sänger Ärcher mit ihrn Erpflsalood, wall die Schissln ums Verreggn net grod gschtandn worn, sondern dauernd hie- und hergedanzt sänn. Dass dess Grillfest trotzdem schee wor, lag am gudn Essn, an die gsungna Lieder und am frischn Fassbier - am End wor der ganza Gsangverein ziemlich zammgewaacht.
Am annern Dooch iss der Rudolf gleich in oller Frieh ins Feierwehrhaus kumma und hot seina zwa neia Gliehbern neigedreht. Die Glosfassunga musst'er nooch ana genaua Inschpekzion ollerdings erscht nuch auswaschn, wall do ieberolln Restla von Erpflsalood dro k'hängt worn. Er hot sich ziemlich gewunnert - genauso wie die Butzkolonna vom Gsangverein, die woss sich zwa Schtund schpeeter zern Saubermachn im Feierwehrhaus gedroffn hot. ,,Die Feierwehr hot ihra zwa Schissln fei scha abk'hullt'', hot der Bariton Max festgschtellt, ,,dess sänn holt orntlicha Leit''.
Dass die vermeintlinga Erpflschissln inzwischn im Aufenthaltsraum widder an ihrn richtinga Blatz droom an der Deggn iber die Bern festgschraubt worn, konntn'sa ja net wissn - sie hattn genuch Broblemer mit ihra einga Bern, die wossn vom villn Bier gestern amd nuch dichdich geglieht hamm... GERCH
Dies ist eine mit page4 erstellte kostenlose Webseite. Gestalte deine Eigene auf www.page4.com