In die letztn Faschingsdooch getts ja nuch amoll rund! Mei Martha und ich iberleeng uns scha die ganza Wochn, woss'mer am Rosnmondooch aufn Gaddnverein-Fasching o'ziehng. Mer miss ja aweng vorsichtich saa, sinst bist fei middndrinna im Feddnäpfla. Frieher sänn die Martha und ich gern ols Neecher-Bäärla aufgetretn: mit Schuhcreem hammer uns die Gsichter gschwärzt, die Martha hot sich a Reggla aus Schtroh und Banana o'gezoong - und ich bin mit ana olta Drommbeedn in der Händ ols Louis Armstrong ganga.

Sowoss ko'mer sich heit gor nimmer traua, wall dich gleich der Ausländerbeauftroochta o'zeigt - weecher Disgrimminierung!

Mei Freind Ludwich wor letzta Wochn ols Chinees aufm Fasching vom Schportverein - Kerl, wor dess beinlich: do sänn neemlich zwa echta Chinesn aufgedaucht, denner woss a China-Restarang k'heert.

Zern Gligg hattn sich die Zwa mit Ledderhusn ols oberbayerischa Trachtler maschkeriert, sodass wengstns a rassistischer Dummult vermiedn werrn konnt. Obber der Ludwich mit san gelbn Seidnmänterla und san schwarzn Zopf hot fei
dauernd aweng a schlechts Gewissn k'habt, wenn'er an die Chinesn verbei gedanzt iss oder wenn'er'sa in der Bor gedroffn hot.

Gern sämmer frieher aa ols Indianer aufn Fasching ganga, obber dess konnst vergessn: die Indianer k'heern ja aa zer die bedrohtn Velker!

Do derf'st fei net ols bsuffner Winneduu rum schterzn, sinst griggst Schwierichkeitn, wall'st die schtolzn Ureinwohner von Ameriga effntlich verunglimpfst.

Dessweecher geh ich aufn Rosnmondoochsball wohrscheins ols Gärtner - do bi'ich aus den ganzn Rassismus draußn! Bloß die Olt nerglt aweng rum: ,,Die grina Scherzn, die Gaddnhändschich und der Rechn sänn sowieso wie nei, wall'st dich immer vor der Ärbert gedriggt host''.

Obber lieber die klana Bläfferei von der Fraa wie hinterher vor Gericht a Brozess, wenn'st ols Scheich, ols Sidding Bull oder ols Neecher-Haiptling gesst - und o'gezeigt werrscht.

Freindla, der Fasching iss fei gfährlich worrn! GERCH

Der Heiner hot's mit seiner Fraa fei net leicht! Die iss neemlich in die Wechsljohr: dauernd werrd ihr haaß und kolt - und seit zwa Johr iss'sa auf der Such nooch na Sinn des Leems. Fortner wercht'sa in ihr Frauengrubbn, wo'sa Feng Shui machn und iber ihra Männer herziehng. Obber der Heiner sicht die Krisn von seiner Oltn realistisch: ,,Die schpinnt holt aweng - dess vergett scha widder!''

Ollerdings muss'er immer schee aufbassn, sunst werrd'er von seiner Gunda in dess esoterischa Zeich mit nei'gezoong. In der Fastnzeid werrd's firn Heiner jeds Johr bsondersch gfährlich, wall do sei Gunda dauernd neia Ideen hot. ,,Heier flieng'mer a Wochn nooch Kreta und machn a Fastnwanderung'', hot'sa kerzlich gsocht.

,,Der Heiner hot gleich seina Ohrn schpitzt: ,,A Fastnwochn? Woss iss'n dess?''

,,Do wandern'mer mitera ganzn Grubbn af derra Insl rum - und drinkn a Wochn lang bloß Pfefferminzdee'', hot sei Fraa gsocht. Der Heiner hot gedoo wie a Sau! Af gor kan Foll macht'er do mit, hot'er gsocht, dess iss doch naus'gschmissns Geld - erscht dess deiera Flugzeich, dann zohlst fir den lächerlinga Dee und die hartn Beddn nuch achthunnert Mark die Wochn, nix do!!

Es wor a ziemlicher Schtreit. Obber af zerletzt hamm'sa sich geeinicht: mit vier Weiwer aus der Frauengrubbn und denner ihra Männer iss a Fastnwanderung im Franknwold beschlossn worrn - wasst scha: na ganzn Dooch nix essn - und im Ruggsagg bloß Pfefferminzdee, net'amoll an Schoggo-Riegl oder a Schpeggbrod. ,,Obber bloß an aanzichn Dooch lang - und die Ruutn schtell ich zamm'', hot der Heiner gfordert.

So sänn die fimf Päärla am Aschermiddwoch zer frieh vom Hofer Bahnhof nooch Naala ninter gfohrn. Darch die schenn Wälder sänn'sa Richtung Froschbachtol ganga - und die Weiwer worn von derra Naduur ganz begeistert. Aferamoll worn'sa direkt vor der ,,Fränza'' gschtandn. ,,So a Gligg'', hot der Heiner gezwinkert - und dess Wertshaus wor sogor offn. Die Weiwer hamm ihrn Dee nei'gschlabbert, die Männer ihr Fastnbier und a scheena Brodzeid, dann ging's aufn Heiner san Weech weider ibern Schpitzberch nooch Bobngriin, wo'sa rein zufällich scha widder vor an Wertshaisla schtandn. Die Weiwer widder Dee, die Männer an Bauernkees und a Fastnbier - und zwa Schtund schpeter worn'sa af ihrer Wanderung in Bad Schteem. Do hamm die Frauen in der Drinkhalln jeda so an gsundn Säuerling aus der Schnobldassn nei'gschlirft - und die Männer hausn widder a Fastnbier. Letzta Schtazion wor dann die ,,Adelskammer'' in Carlsgriin - dart hamm die Männer die Fastnwanderung mit Bressagg und Bier abgschlossn, die Weiwer mit Hagebuddndee - und dann hamm'sa sich olla von ihra Kinner min Auto abhulln lossn.

,,Dess wor a scheena Fastnwanderung'', hamm die Männer gsocht - und der Heiner hot aweng hinterlistich gegrinst: ,,Do brauchst fei net nooch Kreta nunter...'' GERCH

Etzert werrds fei heggsta Zeid, dass die Olympiadn widder aufheert! Bei man Freind Hans hängt dahamm scha der Hausseeng schief. Do hot's neemlich mit seiner Oltn erscht dess Deoder geem, wall'er am Rosnmondooch aufm Schitznfasching nachts an der Bor na Vorschtand seiner Fraa dauernd in ihrn Ausschnidd nei'geluurt hot - und etzert hoggt'er jeda Nacht am Fernseher und schaut zu, woss driem in Salt Leek Siddy los iss. Sei Fraa hot scha zwamoll mit der Scheidung gedroht, obber dess macht aufn Hans kann großn Eindrugg. Fir ihn sänn die Siege driem in Ameriga wichtich - und der schennsta Moment iss immer fir ihn, wenn'sa die Nationalhymne schpilln. Dann greint'er middn in der Nacht vor lauter Ergriffnheit in san Fernsehsessl.

Sei Angelika sicht dess ollerdings aweng nichterner. ,,Die Deitschn sänn zwor guud, obber dess iss doch ka Entschuldichung, dass der Mo jedsmoll zer frieh doodmied in die Ärbert gett'', hot'sa letzta Wochn zu ihra Nachbera gsocht. - So iss holt dess Leem: Der Hans iss a Olympia-Fän, und sei Olta verschtett iberhabst nix vom Schport. Vorgestern amd hot'sa amoll fir a boor Minuddn gemeinsom mit ihrn Hans am Fernseher ban Cörling zugschaut. Do hamm a boor Weiwer in der Eisholln mit denner Besn wie die Närrischn immer vor so an Schtaa gewischt, damit'er am End richtich im Zentrum liecht. Na Hans sei Olta hot gedacht, dess iss a Butzkolonna. ,,Die kehrn woll nachts die Eisflächn, damit am näggstn Dooch olles widder schee sauber iss?'', hot'sa ihrn fachkundinga Hans gfrocht, obber der wor leicht genervt. ,,Do schbilln die deitschn Damen geecher England'', hot'er geknurrd, ,,hammer dä nuch Erdnissla?!''

Gestern hot der Hans in der Ärbert a Abmahnung gricht. Der Scheff hot'na derwischt, wie'er am hellichtn Vormiddooch hintn im Loocher zwischn die oltn Autoraafn gschloofn hot. Etzert fiehlt sich der Hans ols olympischs Opfer - wie unner Hannawold, der woss ban Schprung um die Goldmedallje in der letztn Sekundn nuch gschterzt iss.

Fir so a Olympiadn brauchst fei Nervn wie Drohtsaaler - driem in Ameriga und genauso hiem bei uns... GERCH