Dies ist eine mit page4 erstellte kostenlose Webseite. Gestalte deine Eigene auf www.page4.com07.04.2001
Der Fritz und sei Gisela hamm an Buum, der woss letztn Diensdooch elf Johr olt worn iss. Und zer san Gebartsdooch hot'er sich scho die ganza Zeid gewinscht, dass'er mit seine Eltern in so a amerikanisch Schnellrestarang gett. ,,Do ess'mer dann olla dreia an Dobbl-Wobber!'', hot'er gschtrohlt.
Fritz wor zwor net so begeistert, obber schließlich iss'er na Buum zerlieb mitganga - fir ihn worsch dess erschta Moll, dass'er in so an Hamburger-Lokal wor, wall'er sunst lieber ineran Dorfwertshaus an Bressack nei'schpachtlt. Der Fritz, sei Gisela und der elfjähricha Kevin hamm an ihre riesinga Dobbl- Wobber rumgeknorblt, do hot aferamoll der Fritz an lautn Schraa gedoo - und dann hot'er bloß nuch mit die Arm in der Luft rumgfuchtlt und mit die Händ auf sei aufgrissns Maul gezeicht. Während der Gunga net wusst, woss los wor und aweng bleed auf san Vadder gschaut hot, wor der Gisela gleich olles klor: ihr Mo hot sich an den Dobbl-Wobber na Kiefer ausgerenkt. Do wor dess scheena Essn nadirlich aferan Schlooch zer End - und die Gisela iss mit ihrn Oltn und na Gunga sofort zern näggstn Dokter gfohrn, damit der na Fritz san Kiefer widder ei'renkt.
Der Fritz hot ja selber ka Wertla mehr rausgebracht, obber sei Fraa hot der Schprechschtundnhilf schnell erglärt, woss mit's Fritz bassiert wor. Dann musstn sich die dreia ins Waddezimmer nei'setzn - der Fritz hot mit seiner Kieferschperrn immer nuch ziemlich bleed ausgschaut. Kana zwei Minuddn worn verganga, do gett die Waddezimmertir auf und a Fraa erscheint mit ihrn vierjähringa Gunga an der Händ. Dess Biebla wor aa a Notfall, und woss fir aner: sei Kopf wor neemlich ineran umgedrehtn Garknglos drinna gschteggt - mit zwa Trimmer Aang, die wie unter ana Lupm rausgschaut hamm, fast so groß wie vorhin die Dobbl-Wobber.
Wie jedenfolls der Fritz den arma Gunga mit den Garknglos aufm Kopf gsehng hot, hot'er einen dermooßn Lachanfall gricht, dass sich fei sei Kiefer sofort vo selber widder ei'gerenkt hot. So hot der ana Batzient na annern k'holfn, ohne dass der Dokter ei'greifn musst und ohne dass die Krankenkassa firn Fritz san ausgerenktn Kiefer woss zohln musst. Und es hot sich widder moll die Volksweisheit ols richtich raus'gschtellt: Lachn iss gsund...
14.04.2001
An ana Bushalteschtell in der Hofer Innaschtadt worn an Haufm Leit gschtandn und hamm gewadd. So hattn'sa Zeid, dass'sa an oltn Mo beobachtn konntn, der woss neemdro na Gehschteich vor san Haus schee sauber gemacht hot.
Miteran Besn und ana Schaufl iss der Mo zer Werk ganga und hot vor alln die klan Schtaala zamm'gekehrt, die woss'er na ganzn Winter immer gschtreit hot, damit die Leit aufn gladdn Schnee net ausrutschn.
Aferamoll kimmt a Auto o'gebraust, bremst, fährt aweng mit die Reeder aufn Gehschteich nauf und hält direkt neber den oltn Männla. Am Schteier saß a junga Kerl - und ausn Auto hot a Musigg raus'gewummert, dass sogor denner Leit, die wo'n aufn Bus gewadd hamm, der Moong gebrummt hot. Der Fohrer iss obber net ausgschtieng - wohrscheins hot'er bloß auf jemand gewadd.
Aferamoll gett obber dann die rechta Autotir auf, die Mu sigg hot gedrehnt, dass denner im Bishaisla boll die Ohrn weg'gfloong wärn, dann hot der Fohrer san vulln Aschnbecher aufn Gehschteich gekibbt - und nochert iss die Tir widder zugschloong worrn.
Die Leit im Bushaisla und der olt Mo hamm gschaut wie die Aachhernla. Dess olta Männla iss mit san Besn und der Schaufl seelnruich an den frischn Dregghaufm mit die Zigereddnkibbn hie'ganga und hot olles schee auf sei Schaufl nauf'gekehrt. Dann hot'er die rechta Autotir aufgemacht, mit der Schaufl olles widder ins Auto nei'gschmissn und die Tir widder zuk'haut.
Die Leit am Bushaisla hamm Beifoll geklatscht - und der junga Mo im Auto hot sei Osteriberraschung scha a Wochn vorher gricht...
28.04.2001
Ich hob meiner Oltn af Weihnachtn fei extra scheena Gaddngerääde kaaft, damit'sa orntlich ausgerist iss, wenn's los gett: an schenn Leddergurt zern Umhänga, wo'mer dess wichtigsta Handwerkszeich nei dutt, die goldna Gaddngoobl, damit'sa sich ban Umschtechn net so arch bloong muß - und an braatgrempinga Schtrohut, dass'sa in der Hitz kan Sonnaschtich gricht.
Ollerdings miß ich selber awengla aufbassn, sunst blabbt die Gaddnärbert an mir hänga. Die Martha hot neemlich letzta Wochn am Zaun zu unnera Nachbera a boor Bemerkunga gemacht - Freindla, do klingln bei mir die Alarmgloggn! ,,Ols erschtes miss der Gerch amoll do hintn im Egg die ganza Erdn frisch umschtechn '', hot'sa der Nachbera erglärt und dabei min Finger aufs Gemiesbeet gezeicht, ,,und zwor mit derra neia Gaddngoobl. Do iss die Ärbert nimmer so schwer wie frieher mit den klan Schpootn, wo'ner hinterher ollawaal dess Greiz so weh gedoo hot, dass'er sich zwa Dooch ins Schtufnbedd nei'leeng mußt weecher seina Bandscheim...''
Aha - die Martha will mich widder im Gaddn ei'schbanna!
Vorsichtsholber hob'ich mir gestern gleich'moll dess rechta Handgelenk awengla ei'bandaschiern lossn. ,,Ich wass net, woss dess iss'', hob'ich zer Martha gsocht, ,,obber ich ko fei kaum nuch a Seidla Bier hoch heem. Am Schtammdisch maana'sa, dess kennt a Sehnascheidnentzindung saa, wo'mer aufbassn miß, sunst werrds chronisch...'' - Mer misss fei immer aufbassn wie a Hefltlamacher, dass'mer net gleich mit Ärbert ei'gedeggt werrd, wenn's etzert draußn endlich aweng schenner iss. Dess ewicha Gebobbl im Gaddn iss nix fir mich. Ich setz mich lieber aweng aufs Bänkla und schau freindlich. Und in Griffweitn neber mir schtett mei Seidla Bier - af der linkn Seitn nadirlich, wall ich aus gewissn Grindn mit rechts doch nix heem derf...
Dies ist eine mit page4 erstellte kostenlose Webseite. Gestalte deine Eigene auf www.page4.com