Dies ist eine mit page4 erstellte kostenlose Webseite. Gestalte deine Eigene auf www.page4.com03.02.2001
Letzta Wochn hot der Walter von san Freind Hans an Dibb gricht. Der Hans hot neemlich aus der Zeidung a klana Annongsn raus gerissn und na Walter aufn Kichndisch hie'geleecht. ,,Do - lees'amoll'', hot'er gsocht, ,,du kennst dich doch mit denner exotischn Weiwer aus - wär die net woss fir dich?!''
Der Walter hot sei Brilln aufgsetzt und hot sich dess Inserat o'gschaut: ,,Handzahme Venezuela-Amazone - mit Käfig und Blätterbaum'', schtand do - und daneem a Händy-Dellefonnummer.
,,Dess miß a Neia aus Sidameriga saa'', hot der Walter fachkundich festgschtellt - obber miteran Keefich und an Bläd derbaam konnt unner Frauen- Exberte nix o'fanga. ,,Wer wass, woss dess scha widder fir'a Dechnigg iss'', hot'er zer san Freind Hans gsocht, ,,in derra Szene erfinna'sa doch dauernd woss Neis.''
Die zwa Männer hamm hie und her sinniert. ,,In der ,63' in Hof wor amoll a Brasilianera - die hot aa gsocht, dass'sa vom Amazonas her'schtammt'', hot der Walter vor sich hie'gebrammlt, ,,die hot fei schtramm ausgschaut! - So a ehnlicha Fraa werrd wohrscheins aa die Venezuela-Amazona in den Inserat saa. Obber woss werrd'sa dä bloß mit ,handzahm' maana?''
Der Walter wor so neigierich, daß'er etzert doch amoll die Nummer o'gerufn hot - und do iss'er gleich ins Lachn kumma.
,,Die Venezuela-Amazone iss fei ka flodda Biena'', hot'er zer san Freind gsocht, ,,sondern a klana Babbagei ausn sidameriganischn Urwold - und der iss scha verkaaft. Dess Inserat schtand neemlich net bei ,Kontakte', sondern unter ,Tiermarkt', host mich verschtandn!?''
Obber dess hättn die zwa Schlaumeier fei selber aa raus'finna kenna, wenn'sa dess Inserat drunter nuch gelesn hättn: ,,Suche tragende Sau...''
10.02.2001
Sowoss ko na Robert net bassiern!
Der hot sich in sei Händy an ganz bsondern Klingldoon ei'brogrammiert, neemlich an Lärng-Gsang. Wenns ban Robert elekdronisch lait, maanst du schtesst im Wold und heerst a Lärng drilliliern.
Leider hot obber der scheena Gsang net verhindert, dass der Robert letzta Wochn mittn im Schneegschteeber auf der Nentschauer Heh beieran Schpaziergang mit san Hund dess Händy verlorn hot: Er mußt sich miteran Schprung nei na Groom vor an Auto reddn, sinst wär'er gladd iberfohrn worrn - und bei derra Reddungsakzion iss na Robert dess Händy aus der Jaggndaschn raus gfolln und ineran Schneehaufm verschwundn.
Der Robert hot den Verlust gor net bemerkt. Erscht zer Amd hot'er dahamm festgschtellt, dass dess scheena Händy weg wor. Und wall'ersch holt scha eftersch moll verleecht k'habt hot, iss'na sei older Drigg widder ei'gfolln: Er hot von san normoln Dellefon im Wohnzimmer sei Händy- Nummer o'gerufn - und dann hot'er gelauscht, wo's im Haus klinglt reschbektive wo die Lärng zwitschert.
Af die Weis hot'er sei Händy immer widder gfunna, obber dessmoll wor nix zern heern, wall dess Veecherla ja immer nuch vergeblich in den Schneehaufm bei Nentschau auf sich aufmerksam machn wollt.
Mißmuudich weecher san Verlust iss der Robert amds ins Oberbrexer Dorfwertshaus ganga. Und do hot'er zer seina grußn Iberraschung am Neemdisch a fremmer Gast derzellt, dass heier weecher den verriggtn Wedder die Veegl scha ausn Siedn zerrig sänn.
,,Sogar die Lärchen singen schon'', hot'er behaupt, obber am Schtammdisch hamm'sa sich vor Lachn auf die Schenkl k'haut iber dess Märla, woss der Berliner derzellt hot. Bloß der Robert hot die Ohrn dichtich gschpitzt.
,,Wo hamm dä die Lärng gsunga?'', wollt'er gleich wissn.
,,Da oben auf der Nentschauer Höhe'', hot'er gsocht, ,,ick hab'se janz jenau jehört''.
Fimf Minuddn schpeeter wor der Robert mit san Auto scha an derra beschriema Schtell und hot ineran Rest von Schneehaufm sei Händy widder gfunna.
Hinterher, widder am Schtammdisch, hot der Robert fir den Berliner an Schnabbs schbendiert - und dann hot'er amoll karz sei Lärng singa lossn...
17.02.2001
Kerzlich hot'sa voneran norddeitschn Versandhaus a iberraschnda Rechnung iber ,,0,00 DM'' gricht - und wall'sa in derra Zeid werglich nix beschtellt hot, wor fir sie trotz den komischn Betrooch die Welt scha in Ordnung.
,,Dess bassiert holt mit denner Combjuder'', hot'sa zer ihrn Mo gsocht - und hot die Rechnung weggschmissn.
Obber Dunnerwedder! Nooch vier Wochn kam a Mahnung, wo drinna schtand: ,,...und gehen wir davon aus, dass Sie unsere Rechnung übersehen haben. Wir bitten Sie, den offenen Betrag umgehend zu überweisen''.
Die Hermine hot iber den Brief bloß ner awengla gelacht und hot'na zerrissn. Wie dann nooch drei Wochn die zweita Mahnung ins Haus gfladdert iss, hot die Hermine nimmer gelacht.
,,Die sänn woll verriggt'', hot'sa gschimpft und hot an dess Versandhaus an gepfeffertn Brief gschriem. Do draaf iss nadirlich ka Antwort kum ma, wall, wie die Hermine vermuudet hot, der ganza Briefverkehr sowieso bloß nuch elektronisch abgewigglt werrd.
Vier Wochn schpeter kam obber doch widder Bossd vom Versandhaus - und etzert hamm'sa min'n Gerichtsvollzieher gedroht, folls der ,,immer noch offene Betrag in Höhe von 0,00 DM'' net sofort iberwiesn werrd.
Die Hermine hot lang hie und her iberleecht, woss'sa etzert machn soll - und dann iss ihr a ganz einfacha Idee ei'gfolln: Sie hot an Schegg mit den gfordertn Bedrooch von ,,0,00 DM'' ausgfillt und hot'na an den Versandhandl gschiggt.
Vier Dooch schpeter hot die Hermine vom Combjuder an ganz freindlinga Brief zerrigg gricht - mit herzlinga Dank und mit der Beschdädichung, dass der offna Bedrooch etzert ordnungsgemeeß ei'ganga iss...
Olter Freind, mir hamm fei a Welt beinanner!
24.02.2001
Etzert gett der Fasching nei'na Endschpurt - und es schtellt sich nuch'amoll die ewich wiederkehrenda Frooch: Ols woss maskier ich mich?
Die Männer hamms ja ollawaal awengla leichter, wall'sa miteran gschtraaftn Unterhemm und ana Matrosnmitzn auf der Bern nix verkehrt machn kenna - und mei Freind Rudi gett sowieso jeds Johr ols Bodwanna: der lahnt sich an die Bor no und lässt sich vollaafn.
Letzta Wochn hätts aferan Dorffasching im Landkreis fast an Dummult geem. Do leem im Ort zwa Nachbern seit Johrna verfeindet Zaun an Zaun - und jeder will na annern fortner aans auswischn. Letztes Johr hot der ana, der Ginther, der woss aweng a kinstlerischa Ader hot, san Gunga an Drachn gebastlt. Und vorn draaf aufs Babbier hot doch der Krippl na Nachbern sei Gsicht nauf gemolt - Kerl, wor dess a Halloo, wie im Herbst der Drachn am Himml droom wor und na Nachber Bertl sei bleeds Gsicht hot ro'gegrinst.
Etzert hot der Bertl ban Schportlerfasching zerrigg gschloong. Er hot sich neemlich genauso maskiert, wie sei Nachber Ginther dess ganza Johr im Gaddn und im Dorf rum lefft: mit Blau mann, Gummischtiefl und aufm Kopf a Bomblmitzn im Schoddnkaro. Vorn auf die blaua Latzhosn hot sei Fraa nuch a Schtiggla weißn Schtoff nauf geneht, wo miteran Filzer na Nachber sei Vornoma draaf schtand: 'Günther'.
,,Hoffntlich gibt dess kann Ärcher'', hot na Bertl sei Fraa nuch gsocht, ,,du wasst doch: der Ginther wenn a boor in der Krona hot, nochert werrd'er unberechnbor...''. Obber der Bertl hot abgewunkn - und am Samsdooch amd iss'er ols 'Günther' in den rammlvulln Sool nei'marschiert. Olla hamm'sa sich geboong vor Lachn, bloß der Ginther net, der woss mit seiner Oltn grod gedanzt hot.
Wie der Dango zer End wor, iss der Ginther an die Bor ganga und hot hinterernanner drei Konjak nei'schterzt, dann iss'er zern Bertl hie'gewercht und hot'na am Groong gebaggt. ,,Wennst etzert net sofort hamm gesst und dich umziggst, dann gibtsera``, hot'er zern Bertl gsocht, ,,dann bloos ich dich raus aus dann Blaumann, du Strigghupfer.`` - Na Bertl sei Fraa hot ihrn Mo gebeddlt, dass'er nix riskiern soll. ,,Der Ginther neicht fei zer Gewolt``, hot'sa gsocht, ,,erscht recht, wenn'er a boor gsuffn hot.``
Um a Drama zer vermeidn, hot sich der Bertl braat schloong lossn, iss hamm und hot sei originella Maskn ro - und iss a Schtund schpeeter ols friedlicher Gärtner widder aufm Ball aufgedaucht. Wie'er dessmoll in Sooll nei iss, hamm's a widder olla gelacht - sogor der Ginther...
Dies ist eine mit page4 erstellte kostenlose Webseite. Gestalte deine Eigene auf www.page4.com