Dies ist eine mit page4 erstellte kostenlose Webseite. Gestalte deine Eigene auf www.page4.com14.12.2013
Obber es werrd immer schwiericher, dass der Vadder iberhabsd nuch an Rubberich aufdrabbd, der woss vor die Gunga und Maadla dess ganza Sindn-Regissder ausn Goldna Buch vorliesd und sich dann jeds Kind aanzln vorgnebfd.
Ban Herbert, der woss mit seiner Fraa und drei Kinner driim im Verrdl wohnd, iss ols Rubberich jeds Johr der Schwoocher Hans kumma und hot die glan Raaber rund gemachd, dass'sa Roz zer Wasser gegrinna hamm. Anschließnd iss der Hans immer nuch zu die Kinner von zwa Ärberdskolleeng ganga - und hinderher hamm die Bangerdn wengsdns zwa Dooch lang aweng Ruh geem. Obber der Hans hot inzwischn sei Rubberich-Monduur an den beriehmdn Noogl k'hängd, wall'na der Freindschafdsdiensd ban Schwoocher und bei seina zwa Ärberdskolleeng im lezdn Johr na Fiehrerschein kossd hot.
Obwohl der Hans werglich a ganz ruicher Kund iss, hot'er sellmoll am Rubberich-Dooch scho dahamm zwa Schnäbbsla nei gekibbd, wall'er doch vorher immer aweng aufgereechd woa - wassd scho: die Haufm Noma von die Gunga und Maadla, die villn Versla im Goldna Buch, die verschiedna Gschenker im grußn Erbflsagg - und immer dess Broblem, wem muss'er mit Lob ibern Kobf schdreichln und wem soll'er die Ruu-dn driiber zindn?!
Bevor also der Hans ins erschda Haus zum Herbert seina drei Gunga nei ganga iss, hot'er in der Garaaschn mit san Schwoocher bei zwa Glos Gliehwein und an dobbldn Obsdler nuch amoll olles beschbrochn, damit'er anschließnd vor die Kinner nix verwechsld. Dann iss'er ins Haus nei - und hot ols Rubberich an saubern Aufdridd hie geleechd. A holba Schdund schbeeder woa der zweida Dermin driim in der Baugenossnschafd an der Reiha. Dadd hot sei Ärberdskolleech scho an der Hausdiir mit der Schnabbsflaschn in der Händ gewadd. Bei der Vorbe-schbrechung im Hobby-Raum hot der Hans widder zwa Obsdler gezwiddscherd - und do hot'er scho aweng ann in der Groona hänga k'habd. Auf jedn Foll hot'er anschließnd, wie er na Gunga und seiner Schwesder die Lefiddn gelesn hot, ziemlich vill durchnanner gebrachd. Ban driddn und lezdn Aufdridd draußn in Neihof hot dann der Rubberich die Kinner scho dobbld gsehng - und er woa froh, wie endlich olles verbei gewesn iss.
Erleichderd hot sich also der Rubberich alias der Hans ins Auto gsezd und iss hammwärds gfohrn. Obber weid iss'er fei net kumma - gleich hindern Kuhboong woa neemlich a Algohol-Kondrolln. Wie der Rubberich san Fiehrerschein ausn Fensder naus gelangd hot, iss der Bollizist mit san Kobf gleich aweng zerrigg gewichn, wall'na die Schnabbsfohna vom Hans um die Nosn gewehd iss. Und der Beamta wussd sofodd, dass der Rubberich net "von drauß vom Walde" her kumma iss, sondern dass'er offnboa nuch eddlicha Zwischn-schdaziona eigeleechd hot, um sei Aufreechung und die Käld algoholisch zer bekämbfn. Also mussd der Rubberich in dess beriehmda Rehrla nei blosn - und dann weecher erheblicha Blaufärbung san Schliddn schdeh lossn. Draußn im Grangnhaus konndn sich die Ärzd net erinnern, dass'sa jemols an Rubberich in vuller Monduur a Bluud-Broob abzabfn mussdn. Seitdem schdedd zern erschdn Moll a Rubberich selber ineran Goldna Buch drinna - und zwoa in Flensburch... Gerch
21.12.2013
Lezda Wochn iss der Franz amds im Dorf rum ganga und hot die Einloodunga fir die Weihnachdsfeier berseenlich verdaald. Es woa nimmer hell, wie der Franz anera Haus kumma iss, wo der Flur ziemlich schlechd beleichd woa. Holb im Finsdern iss'er iiber die zwa Fußabschdraafer driiber ganga und in die Kichn nei, wo'er san Kumbl Max die Einloodung in die Händ gedriggd hot. In den Momend hot der Franz dess Gfiehl k'habd, dass an seina Schuhsulln woss dro bichd - und wie'er genauer hie schaud und die mysderjeesn waachn Bazn mit die Finger undersuchd, hot'er gemergd: Woss do an seina Sulln dro gebabbd iss, woa Daag!
"Wo kimmd dä der Daag her?", hot'er sich gewunnerd - und wie na Max sei Olda aufgedauchd iss, hot sich dess Rädsl schnell aufgegläärd. "Ach Goodla", hot die Fraa gejammerd, "woss an deina Schuh bichd, sänn doch meina schenn Weihnachds-Bläzla." Die zwa Fußabschdraafer draußn im Flur woan neemlich goa kana Fußabschdraafer, sondern zwa Baggblecher vuller ausgschdochna Bläzla, die woss die Fraa vor na Baggn aweng kold gschdelld hot...
24.12.2013
Er kaafd'na jeds Johr aufm Weihnachds-Margd oder glaud'na heggsdberseenlich ineran Wold, schberrd sich am Haalinga Amd karz vor der Dämmerung dahamm ins Wohnzimmer ei und schmiggd dess Baamla mit weißa Wadda und Lamedda, mit bunnda Gloskugln und Kerzn aus echdn Bienawachs. Mit Silberfeedn hängd'er dann der Mudder ihra Bläzla an die Ässd no und sezd zern Schluss oom a silberna Schbizn nauf. Anschließnd leechd der Vadder sämdlicha Gschenker under na Baam, ladd miteran Gleggla - und schberrd die Wohnzimmerdir auf, damit die Bescherung ofanga ko.
Obber vorigs Johr iss leider olles daneem ganga!
Vor lauder Schdress hot der Werner san Chrissbaam erschd am Haalinga Vormiddooch kaafn kenna, wo's aufm Margd bloß nuch elenda Schdaudn gibd. Er hot werglich an jämmerlichn Schderzl derwischd - obber besser so a zerzausda Fichdn wie goa nix, hot sich der Werner gedachd. Er hot die grumma Ässd miteran Schnirla zamm gebundn und den Baam undern Arm geglemmd. Weecher seina Wuud, wall'er nix Schenners derwischd hot, iss der Werner aufm Hammweech in sei Schdamm-Werrdshaus eigekehrd - er hot geecher san Frussd dringend an Schnabbs gebrauchd.
Na Baam hot'er dawaal draußn im Gang nebern Klo an die Wänd gelahnd - und drinna wolld'er mit ziemlich finsdera Miena san Ärcher eingdlich bloß miteran aanzichn Obsdler nunder schwemma, obber es sänn am End vier dobblda "Willi" und fimf Seidla Bier worrn.
Karz nooch na Zwelfer-Laiddn iss dann der Werner miteran schwern Zinder und min grumma Chrissbaam dahamm ins Haus nei gschwangd. Die Old hot gedachd, sie sichd net richdich - und hot ihrn bsuffna Mo sofodd rund gemachd. Obber der Werner hot von derra Moralbreedichd nimmer vill mitgrichd, wall'er sich gleich aufs Kannabee nauf leeng mussd - so hot's na gedrehd. Und während der Werner im Wohnzimmer gschnarchd hot, iss der Mudder nix annersch iibrich gebliem, wie dass'sa die vergribblda Fichdn-Schdaudn selber gschmiggd hot. Erschd zur Bescherung iss der Werner widder aus seiner Narkosn aufgewachd - jednfolls woa am Haalinga Amd und an die Feierdooch der Hausseeng schief k'hängd.
"Wehe, dess gibd heier widder so a Deooder wie lezds Johr", hot vorgesdern die Hermine ihrn Werner gewarnd, "dann loss ich mich scheidn!" Der Werner nimmd die Drohung ernsd. Dessweecher will'er aufm Chrissbaam-Margd heid scho a herrlicha Blaudanna kaafn - und er hot seiner Hermine gschworn, dass'er aufn Hammweech um sei Werrdshaus an grußn Boong machd... Gerch
28.12.2013
Er konnd ja net ahna, dass sei Gisela san Baam a Schdund schbeeder vom Abschdell-Keller niiber ins gemeinschafdlicha Waschhaus gschlaafd hot. "Do iss der Raum nuch aweng källder", hot'sa sich gedachd, "dann dangld der Chrissbaam net so schnell ab".
Die Idee woa net schlechd, obber wie der Deifl sei Gschbill hot: Nuch amoll zwa Schdund schbeeder hot der Konrad, der woss mit seiner Familie im Erdgschoss wohnd, vom Chrissbaam-Margd aa so a Nordmann-Danna mit hamm gebrachd - und hot dess scheena Schdigg im Keller neber die Fohrreedla abgschdelld, wo vorhin nuch na Erich sei Baam gschdandn woa.
Am Haalinga Amd nooch na Middooch-Essn iss der Erich nunder in Keller ganga und hot miteran zerfriedna Lächln ausn Fohrrod-Keller na Chrissbaam k'hulld und nauf in die Wohnung gedroong - er konnd ja net wissn, dass sei Baam inzwischn im Waschhaus schdedd. Jednfolls hot der Erich den Dannabaam droom in der Wohnung heggsdberseenlich gebuzd - wassd scho: Lamedda, eleggdrischa Kerzn, Gloskugln, Bläzla an silberna Feedn und oom draaf a goldna Schbizn samsd an Engerla. Aferamoll erscheind na Erich sei Olda. "Du bissd doch verrigd", hot'sa gezeederd, "du hossd fei na folschn Baam gschmiggd - unner Nordmann-Danna schdedd doch im Waschhaus!"
Mit ana Flaschn Erdbeer-Seggd iss die Gisela sofodd zu der Familie im Erdgschoss nunder ganga, um die Verwechslung aufzu-
gläärn. Dawaal hot droom der Erich miehseelich na fremma Chrissbaam widder abgschmiggd und dann die naggerda Nordmann-Danna drundn im Erdgschoss bei die eingdlichn Besizer abgelieferd, die wossn inzwischn mit der Gisela in frehlicha Rundn na Seggd gsuffm hamm - und ganz versehnlich beschlossn hattn, dass der Erich den schee gschmiggdn Baam ruich beholdn derf. "Mir nehma eier Nordmann-Danna, die woss im Waschhaus schdedd", hamm'sa na Erich iber ihr Verhandlungsergebnis informierd. So iss der Erich mit derra verwechsldn Nordmann-Danna widder nauf in sei Wohnung ganga - und hot den Baam zern zweidn Moll aufwändich gschmiggd, obber ezerd fei miteran ziemlich grimmichn Gsichd... Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com