Dies ist eine mit page4 erstellte kostenlose Webseite. Gestalte deine Eigene auf www.page4.com01.11.2013
- und kerzlich iss a ICE sogoa mit 130 Sachn durch an Bahnhof gebredderd, wall der Lok-Fiehrer vergessn hot, dass'er dadd eingdlich ohaltn miss. Dass'mer der Bahn a Lob ausschbrichd, iss erra seldn - dobei sänn die Bahner fei freindlicha Menschn, wie lezda Wochn die 70-jähricha Anna aus Neihof erfohrn hot. Sie woa in oller Frieh min Zuuch von Hof nooch Bareith underwegs, wall'sa dadd in ana Klinigg an Undersuchungs-Termin k'habd hot. Leider gibd's ka direggda Verbindung, also mussd die Anna in Kirchenlaibach umschdeing. Obber kaum woa sa im Anschluss-Zuuch drinna k'hoggd, hot die Anna dess Gfiehl k'habt, dass woss net schdimmd. A Gligg, dass ihr geengiiber a Bahner gsessn woar. "Entschuldichung", hot die Anna gfrochd, "wo fährd dä unner Zuuch hie?"
"Nach Hof", hot der Bahner gsochd.
Die Anna wär fassd in Ohnmachd gfolln - und hot den Mo derzelld, dass'sa in Bareith an wichdinga Termin in der Klinigg hot. Und ezerd hold dich fessd: Der Bahner hot sei Händy raus und sofodd an haufm Gschbräächer gfiehrd - und dann hot'er der Anna dess Ergebnis von seiner Rum-Dellefoniererei mitgedaald: "Dieser Zug nach Hof fährt über Stammbach, aber dort hält er normalerweise nicht. Heute bleibt er wegen Ihnen stehen - und Sie können schnell aussteigen. Ein paar Minuten später kommt ein Zug aus Würzburg, der nach Bayreuth unterwegs ist, allerdings in Stammbach auch nicht hält - aber ausnahmsweise bleibt er heute kurz stehen und lässt Sie einsteigen, damit sie nach Bayreuth mitfahren können. Ich habe alles am Handy für Sie organisiert."
Die Anna hot gschaud wie a Aachhernla, wenn's blizd - und olles iss werglich so geloffn, wie's der Bahner gsochd hot. Mit aweng Verschbeedung iss die Anna in Bareith eigedroffn und hot ihrn Arzd-Termin nuch derwischd. Seldn hot sich wohrscheins a Fohrgassd iber a glana Verschbeedung bei der Eisnbohn so gfreid wie die Anna auf ihra wundersoma Fohrd von Hof nooch Bareith...
09.11.2013
Na Sepp sei Audo woa direggd vor na Haus gschdandn. Die Marri, sei Fraa, wolld grod los fohrn, obber der Karrn iss ums Verreggn net ogschbrunga. Immer widder hot die Marri am Anlosser rum georgld - ohne Erfolch. Ausn Modoor iss immer bloß a bedrohlichs Geraisch: "Chchrrr ... chchrr ... chr ... chchch" kumma.
Die Badderie iss scho schwächer worrn - do iss der Sepp ausn Gaddn raus kumma.
"Woss issn do los?", hot'er sei Olda gfrochd - und hot selber gleich die Antworrd geem: "Heer auf mit derra dauerndn Orgelei! Der Modoor iss doch dersoffn, olles schdinkd scho nooch Benzin - die Weiwer, die Weiwer!"
Dann iss der Sepp selber ins Auto nei und hot's browierd, obber dess hot aa nix gebrachd.
"Do muss ich amoll vo undn nei schaua", hot der Sepp gsochd und iss riggwärds undersch Audo gegrochn, bis bloß nuch seina Fiiß raus gschaud hamm. Dann hot der Sepp mit seiner langjährichn Erfohrung ols Hobby-Heimwerker miteran langa Schraumzieher vo undn aweng am Modoor rum gschdierld - und aferamoll iss dess Audo, wo nuch der erschda Gang drinna woa, werglich ogschbrunga und hot gleich an Hubfer nooch vorn gemachd - min rechdn Vorderrod genau iber Bauch und Ribbn vom Sepp driiber. Der arma Mo hot vor Schmerz gebläägd wie am Schbieß - zern Gligg iss der Karrn gleich widder schdeh gebliem, wall ja der Modoor nuch net richdich geloffn iss.
Der Sepp wolld in san Schreggn sofodd undern Auto widder raus grabbln, obber dess iss net ganga: Dess linka Vorderrod woa neemlich genau auf san Hemmzibfl draaf gschdandn - der Sepp woa wie fessd gebichd aufm Bodn geleeng und konnd sich net riehrn.
"Marri", hot'er undern Auto raus gschriea, "fohr'moll die Kissdn nuch an Meder vorwärrds, damit ich widder raus kumm."
Die Fraa hot sich ins Auto k'hoggd und na Modoor ogelossn - ezerd ging's einwandfrei, wall der Sepp anscheinend a guda Ärberd gemachd hot. Obber in ihrer Aufreechung hot die Marri versehendlich na folschn Gang eigeleechd: schdadds aweng vorwärrds zer fohrn, um na Sepp zu befreia, iss die Marri widder an Meder zerrigg gfohrn. Es hot karz gerumbld - und die Marri hot ihrn Sepp a zweids Moll bläägn heern, wall dess Audo nuch amoll iber ihn driiber gerolld iss.
Gottseidank woasch bloß a glaans Audo, obber na Sepp hot's gelangd! Zwa Wochn lang konnd'er ban Raang kan Lungazuuch mehr machn, so hot's in die Rippn gschdochn. "Do siggsd widder moll", hot die Old scheinhaalich gsochd, "olles Schlechda hot immer aa woss Guuds - ezerd brauchsd kana deiern Zigerreddn kaafn."
Der Sepp hot bloß aweng woss in san Boad nei gebrummld - guud dass dess sei Fraa net verschdandn hot ...
16.11.2013
Der Heiner lebbd mit seiner Fraa, na Sohn Hans und na Obba ineran Reihahaisla am Schdadtrand. Dess scheena Wedder hot na Vadder auf a Idee gebrachd. "Mir baua draußn im Gaddn a glans Deichla nei, zwa moll zwa Meder - dess iss doch schee romanndisch, wemmer im Sommer amds aweng grilln", hot der Heiner gschwärmd. "Do groom'mer gleich am Wochnend neber der Derrassn a Loch und kaafn so a Fertig-Teichwanne aus Blasdigg, die setz'mer in die Gruum nei - dess sichd schee aus und iss wasserdichd." Olla woan'sa begeisderd. "Vadder", hot der Hans gelobbd, "dess iss die bessda Idee, wossd in dan Leem k'habt host.
Der Obba hot sofodd im Schubfn nooch-gschaud, ob der Biggl und die drei Schaufln in Ordnung sänn. Und wall die ganzn Geräädschafdn ziemlich zammgerossd woan, hot'sa der Obba gleich mit nauf in sei Zimmer gschlaafd: Die Eisndaaler hot'er mit Aggubaz und Schmirglbabbier vom Rossd befreid - und die dreggerdn Holzgriff hot'er mit ana Lasur eigelossn. "Do werrn'sa sich freia, wenn'sa zum Ärbern so saubersch Handwerkszeich grieng", hot der Obba gschdrohld.
Inzwischn iss aa der Vadder in san Schubfn nei ganga und hot sich gewunnerd, dass kana Schaufln mehr do woan. "Dess olda Glump hot wohrscheins die Fraa weg gschmissn", hot'er sich gedachd, "do kaaf ich heit gleich nooch Feier-amd im Baumarkd drei neia Schaufln und an Biggl." Dieselba Idee hot a Schdund schbeeder aa der Sohn k'habt, wie'er im Schubfn kana Schaufln endeggd hot - und dann hot sich die Mudder am Noochmiddooch aa nuch endschlossn, dass sa drei neia Schaufln und an neia Biggl kaafn muss, wall nix mehr do woa. Ohne dass also aaner vom annern woss gewussd hot, hamm der Vadder, der Hans und die Mudder amds jeder drei neia Schaufln und an nooglneia Biggl in den finsdern Schubfn nei geleechd. Auf zerlezd hot dann aa nuch der Obba in der Finsternis na Biggl und die drei Schaufln, olla schee gereinichd, in den oldn Schubfn gschlebbd und olles neber die Diir hii gelahnd. Im Kegl von seiner Daschnlambn hot'er zer seiner Iberraschung neun weidera Schaufln und drei Biggl gsehng - und es iss ihn darch san Kobf gschossn: "Do hot der Hans beschdimmd sei Fußbollmannschaft organisierd, damit'sa morng ban Erdaushuub helfn." Obber ganz geheier iss na sei Idee doch net vorkumma, dessweecher iss'er gleich in die Kichn ganga und hot die annern gfrochd, ob dess net aweng zer vill Aufwand fir so a glans Erdloch iss. "Etzert lieng zwelf Schaufln und vier Biggl im Schubfn drinna", hot der Obba zur ressdlichn Familie gsochd, "do loodschn sich doch die Helfer geengseidich auf die Fiiß nauf, wemmer morng die Erdn fir dess Deichla ausheem - wer iss denn auf a sedda Schnabbs-Idee kumma?!"
23.11.2013
Und middn nei hot dann der Werner die Bombn blazn lossn. "Mir hot der Fuchs gessdern Nachd vier Hiehner und zwa Goggl k'hulld", hot'er gsochd, "der ganza Hiehner-Schdoll woa vuller Federn und vull Bluud."
Und während am Schdammdisch iber den elendn Fuchs nuch heffdich debaddierd worrn iss, gedd die Diir auf und der Hans kimmd rei - er woa im Dorf immer bekannd fir sei langa Leitung.
"Ihr lachd rechd", hot'er zer seina Kumbl gsochd und hot sich mit an Schdammdisch no k'hoggd, "gibd's woll woss Neis?"
"Hao", hot der Werner gegrinsd, "mir hot der Herr Reineke sechs Henna und zwa Goggl gschdulln." Der Hans woa ganz durchnanner, wall'er sich hunnerdbrozendich sicher woa, dass im Dorf kana Verbrecher leem. "Der Herr Reineke?", hot'er in die Rundn nei gfrochd, "den kenn ich fei goa net - wo wohndn der?"
Scheinhaalich hot der Werner sofodd die Andworrd geem: "Der lebbd seid a boa Wochn am Wold-rand, gleich hindern Feierwehrdeich."
Der Hans hot immer nuch net gschnolld, dass'na die Schdammdisch-Briider auf der Rolln k'habt hamm. Dess ko'er goa net glaam, hot der Hans san Kobf gschiddld, dass neierdings im Dorf sedda Schlawiner leem, die wossn na Nachber die Hiehner glaua.
Schließlich wolld der Werner na Hans iber den ganzn Schbooß aufgläärn. "Der Hiehner-Dieb woa fei net der Herr Reineke, sondern der Fuchs", hot der Werner zugeem. Obber der Hans woa immer nuch auf der Leitung gschdandn. "Weller Fuchs?", hot'er zerrigg gfrochd, "im Dorf wohna doch zwa Familien mit Noma Fuchs, obber dess woan immer orndlicha Leit." Der Hans hot sich verwunnerd am Kinn gegrazd. "Dass die aferamoll Hiehner glaua, hätt ich nie gedachd", hot'er undern Gelächder vom ganzn Werrdshaus vor sich hie gebrammld, "obber mer ko hold an Menschn net ins Herz nei schaua ..."
30.11.2013
Die Gisela hot na Advendsgranz jeds Johr selber gebundn - mit scheena, frischa Dannazweigla, die woss'sa heggsdberseenlich im Wold eigsammld hot. "Dess sichd schee und riechd so guud", hot'sa immer gsochd. Obber jedsmoll hot'sa sich schwarz geärcherd, wenn der Advendsgranz im warma Wohnzimmer vo Dooch zer Dooch derrer worrn iss und zern Noodln ogfangd hot - aus den gschdiggdn Deggla, wo der Granz draaf gschdandn woa, musst'sa fei die Noodln immer aanzln mit der Binzeddn raus fiesln. Dessweecher hot'sa lezds Johr beschlossn: "Dess Gebobbl mach ich nimmer mit! Ezerd werrd a Advendsgranz aus Blassdigg kaafd, dann blabbd olles auf ewich und drei Dooch schee sauber!"
Die Gisela iss also sellmoll ineran Meeblmargd ganga und hot fir 9 Euro 99 an Kunsdschdoff-Advendsgranz samsd vier Kerzn und roda Schmugg-Bändla kaafd - olles scho fix und ferrdich mondierd. Dahamm hot'sa auf ihrn neia Granz bloß nuch aweng "Fichtennadel-Duft" aus der Dosn nauf gschbriid, damit's aweng weihnachdlich riechd - so woa dess Broblem wunderboa geleesd. Nooch Weihnachdn hot dann die Gisela ihrn Granz vorsichdich ineran Kaddong nei geleechd und fir a Johr drundn im Keller abgschdelld.
Am lezdn Middwoch hot'sa den Kaddong widder ausn Keller rauf k'hulld und wolld den schenn Granz ausbaggn, damit am erschdn Advend a Kerzn ogezundn werrn ko. Obber do hot's ihr fei die Aaang raus gedrehd! Im Kaddong woa neemlich ka Blassdigg-Advendsgranz drinna, sondern bloß ner a Geribbe aus derra Ässdla - und drunder die abgfollna Noodln. Erschd hot die Gisela gedachd, dass a Wunner gschehng woa, obber dann iss ihr gedämmerd: Der vermeindlicha Dauer-Advendsgranz woa gor net aus Blassdigg gewesn, sondern aus echda Dannazweich!
Es iss ihr also nix annersch ibrich gebliem, wie dass'sa widder inera Meeblgschäfd ganga iss und an zweidn Versuch gemachd hot. Ezerd mussd'sa ollerdings schdolza 14 Euro 99 hii bläddern, obber dessmoll woa der Advendsgranz werglich aus echdn, unverwiisdlichn griina Kunsdschdoff - hold genau dess richdicha fir die Weihnachdszeid bis ins Johr 3000 ...
Dies ist eine mit page4 erstellte kostenlose Webseite. Gestalte deine Eigene auf www.page4.com