Dies ist eine mit page4 erstellte kostenlose Webseite. Gestalte deine Eigene auf www.page4.com05.10.2013
Mit den buzichn glann Kerl gedd'er jedn Dooch zwamoll schbaziern - dess dudd na Daggl guud und na Herrla erschd rechd. Do hot der Werner wengsdns widder aweng Beweechung - und seina Gnie und die Hiffdn bleim schee gelenkich.
Amds hoggd dann der Werner am libbsdn vor na Fernseher und zäbbd aweng rum, ob'sa erchetzwo na Jauch, an Griegsfilm oder naggerda Weiwer zeing. Und damit'ersch ban Fernsehng aa schee bequem hot und in seiner Guschn nix driggd, nimmd'er immer seina driddn Zeh raus und leechd die Broddeesn neemdro aufn Wohnzimmerdisch - dann konn'er neemlich seina Gummibärla besser luddschn. Der Daggl liechd nebern Werner seina Fiiß, schleefd friedlich und zuggd manchsmoll aweng mit die Bfoodn, wall'er wohrscheins im Draam hinder an Hoosn her rennd.
Vorgestern woa ollerdings der Friedn aferan Schlooch verbei.
Der Werner woa wie immer bequem im Sessl drinna gfleezd und hot a See-Schlachd ausn zweidn Welldgriech ogschaud. Obber middn zwischn na Kanona-Lärm und die Exblosiona hot'er aferamoll seina Ohrn gschbizd: Woa do net nuch a annersch Geraisch?! Do hot's doch erchez woss gegnerschld und gegnaggd - obber fei net auf denner Griegsschiffe im Fernsehng!
Der Werner hot zum Daggl undern Disch nunder gschaud - und hot gedachd, er hot a Fadda Morgana. "Du Hundsgribbl, du elendicher", hot'er gebläägd, "gibsd du sofodd mei Broddeesn widder her!!!" Hot doch sei "Bello" am Gebiss dro rum gegnabberd wie aneran Gnecherla vom Mezger. Der Werner wolld na Hund die deira Broddeesn widder abnehma, obber dess woa fei goa net so leichd. Der frecha Daggl hot neemlich sei Beute verdeidichd und wolld'sa ums Verreggn net raus ruggn. Es hot fei a richdichs glans Kämbfla geem, bis der Werner seina Driddn vorsichdich ausn Daggl san Maul raus gebobbld hot - obber goddseidank wor nix kabudd. Nooch ana grindlichn Reinichung konnt der Werner sei Broddeesn widder in Bedrieb nehma. Und san Daggl hot'er min Zeichefinger gedrohd: "Wehe, wenn'st du dir nuch amoll na Herrla seina Zeh schnabbsd!!"
Der Hund hot san Kopf aweng auf die Seitn geleechd. "Dann gibds'era fei!", hot der Heiner nuch amoll eindringlich gewarnd - obber der Daggl hot bloß aweng dreiherzich gschaud und min Schwänzla gewaggld... Gerch
12.10.2013
Und wall'er immer gleich exblodierd, wenn woss net nooch san Willn leffd, gibd's im Audo ofd Zoff - vor alln dann, wenn'er auf der Hammfohrd vom Werrdshaus neber seiner Fraa aufm Beifohrer-Siz hoggd, wall'er selber a Gleesla zer vill derwischd hot. Der Ärcher fängd jedsmoll scho o, wenn die Erika im erschdn Gang los fährd und dess Audo a boor Hubfer macht. "Du mussd doch die Kubblung schee langsam loslossn, dann rumbld's net so", hot der Reiner erschd lezda Wochn sei Olda widder griddisierd, wie'sa mitnanner zern Eikaafn gfohrn sänn. "Hogg dich neem no", hot'er sofodd zer seina Fraa gsochd, "ich sez mich selber ans Schdeier und zeich dir, wie'mer gscheid fährd". Obber dann hot fei dess Audo die gleichn Hubfer gemachd wie bei der Fraa - der Moddoor hot neemlich gschdodderd, wall in der Nachd a Marder zwa Zindkabl durchgebissn hot.
Obber a echta Krisn hamm die Eheleit am vergangena Samsdooch grichd, wie'sa olla zwa um Middernachd vonera Gebardsdoochs-Feier hamm gfohrn sänn. Die Erika woa am Schdeier gsessn, wall ihr Mo neemdro widder aweng ann in der Krona hänga k'habt hot. Mit 30 iss die Erika zwoa vorsichdich iber die Haufm Schloochlecher gfohrn, obber drozdem hot's neemdro na Reiner schwer durchgschiddld - und ban ollergressdn Buscher hot der Reiner gemeggerd: "Musst du dä unbedingd iiber jeds Schloochloch und jedn Kanol-Deggl driiber rumbln - do werrn fei die Achsn net besser!"
Obber woss solld die Fraa dä machn, wenn die Schdrassn vuller Schloochlecher iss und die Kanol-Deggl so hoch raus schdänga!?
"Fohr hold aweng im Ziggzagg außn rum", hot der Reiner gforderd - und dann iss die Erika nimmer groodaus gfohrn, sondern in Schlanga-Linien um die Kanol-Deggl und Schloochlecher rum gekurvd.
Aferamoll werrn'sa voneran Bollizei-Audo iberhulld - und scho woa die rooda Kelln draußn.
"Woss hammer denn gedrunkn, guda Fraa?", hot der Bollizist ganz freindlich gfrochd.
"Nix", hot die Erika wohrheitsgemäß gsochd, "nullkommanull".
Der Bollizist hot sich zer san Kolleeng umgedrehd. "Hossd du dess k'heerd", hot'er aweng gegrinsd, "die Schlanga-Fohrera will nix gedrunkn hamm - dass ich fei net lach!" Obber wie die Erika in dess beriehmda Rehrla nei geblosn hot und nix woa verfärbd, hot sich der Verdachd aufgegläärd. Die Erika durfd weider fohrn - und der schlaua Reiner mit san subber Vorschlooch zum Schlanga-Fohrn woa aferamoll ganz ruich und friedlich neber seiner Fraa k'hoggd und hot sich nimmer geriehrd und gemuggsd... Gerch
19.10.2013
"Törggelen?", hot die Fraa ihra Ohrn gschbizd und iss ganz rood im Gsichd worrn, wall'sa gedachd hot, dass dess aweng woss Erodischs saa ko - und wer wass, woss ihr Mo auf seina oldn Dooch aferamoll fir sexuella Anwandlunga grichd. Obber der Max hot dess Rädsl gleich aufgegläärd. "Hao", hot'er gsochd, "hold den guudn Roodwein saufm und dazu Kastanien essn - dess Törggelen iss doch im Herbsd denner ihr Schbeziolideed."
Die Marga iss zwoa a bissla endaischd gewesn, wall'sa sich ols "Törggelen" aweng woss annersch erwadd hot, obber die drei Urlaubsdooch in Meran woan werglich schee. Bloß am lezdn Amd hot's a ziemlichs Deooder geem. Do woan die zwa Hofer ineran glann Weinlokal k'hoggd, hamm dichdich Rotwein nei und neemher immer die warma Kastanien verdriggd. Karz vor Middernachd hot der Max an gniddl Rausch k'habt, wall'na der Sidtiroler Vernatsch goa so gschmeggd hot - und sei Olta woa neemdro gsessn und hot fortner vor sich hie gekicherd. Dann hamm'sa gezohld und sänn naus an die frischa Lufd - und do hot's na Max dermooßn gedrehd, dass'er fei froh woa, wie'er in derra Finsdernis sei Auto iberhabsd nuch gfunna hot.
Der Max und sei Marga sänn wagglerd eigschdieng - und los ging die Fohrd zum Hodell. Obber scho nooch 100 Meder hot rechds an der Schdrassn a rooda Kelln aufgeleichd: Bollizei-Kondrolln! "Legg mich fedd", hot der Max droz san Blädderer glosklor die Gfohr erkannd, "ezerd iss mei Babberdeggl weg!" Na Max iss der Angsdschwaaß ausgebrochn, und die Old woa wie gelähmd neemdro gsessn, hot nimmer gekicherd und kaum nuch gschnaufd.
Draußn woan zwa Karabinieri gschdandn und hamm na Max ins Visier genumma. Er mussd san Fieherschein naus langa - dabei hot'er dess Fensder vorsichdsholber bloß an glann Schbolld aufgemacht, damit die Bollizisdn na Alkohol net rieng.
Dann hot der Sidtiroler Uniformierda gsochd: "Sie müssen eine Strafe bezahlen, weil Ihr rechter Scheinwerfer nicht brennt". Der Max hot in seiner Aufreechung und in san Suff kaum woss mitgrichd. Dann hot der Bollizist auf san diggn Blogg schee langsam na Schdroof-Zeddl ausgschriem - und damit der Max olles quiddiern konnd, hot der Karabinieri na Zaddl samst san Kuglschreiber durchs Fensder zern Max nei gelangd. Und der Ungliggswurm, der woss immerzu an a Alkohol-Kondrolln denkn mussd, hot in san Zinder den Kuglschreiber genumma, hot'na in die Guschn gschdeggd und nei geblosn - do woar'er dann nadirlich fällich... Gerch
26.10.2013
Schuld dro woa der Kooder "Maunz": Der Fregger schbringd an jeder gschlossna Diir nauf, driggd mit seina Bfoodn auf die Glinkn nauf, damit die Diir aufgedd - und dann schleichd'er darch olla Zimmer, suchd woss zern Naschn oder leechd sich im Schloofzimmer in die Beddn nei.
Obber seid lezda Wochn schimbfd fei der Hans nimmer auf die Kaz, wall ihn dess Viech an Haufm Geld gschboord hot!
Der Hans woa mit seiner Fraa draußn im Gaddn - und aferamoll schmeißd der Wind die offna Hausdiir zu. Do woan die zwa Leidla do gschdandn und hamm bleed gschaud, wall neemlich der Schlissl inna im Schloss gschdeggd iss. "Do miss'mer ezerd na Schlissldiensd hulln, damit'sa widder aufschberrn", hot die Fraa gsochd. "...und 50 Euro sänn zern Kamin naus gebfiffn!", hot der Hans dess Ungligg kommendierd.
In den Moment kimmt der Kooder "Maunz" daher schdolzierd. "Mensch", hot der Hans gsochd, "ich hob a Idee." Dann hot'er ausn Schubfn a langa Ladder k'hulld und hot'sa hindern Haus so an die Wänd no gelaand, bis dass'sa droom im erschdn Schdogg direggd nebern Schloofzimmerfenster blazierd woa. Dann hot'er na "Maunz" undern Arm geglemmd, iss samst Kaz die Ladder nauf gschdieng und hot den Kooder darch des gekibbda Fenster ins Schloofzimmer nei gschoom. Dess woa fei goa net so einfach, wall die Kaz wie verriggd gebeegd und gegrazd hot, bis sa endlich im Schloofzimmer drinna woa. Wie dann der Hans von der Ladder widder hundn woa und zur Hausdiir vor ganga iss, hot'er dess Ergebnis vuller Freid scho gsehng: Die zugfollna Diir woa schberranglweid offn! Der "Maunz" hot a subber Ärberd gemacht - und iss mit aufgschdelldn Schwanz majesdeedisch ausn Haus raus schdolzierd. Drinna hot'er neemlich genau dess gemachd, woss sich der Hans erhoffd hot: Er iss wie immer darch olla Zimmer gewerchd, iss an jeder Diir nauf k'hubfd und hot die Glinkn ro gedriggd - einschließlich der Hausdiir.
Ezerd iberleechd der Hans sogoa, ob'er mit san "Maunz" net a "Schlüsseldienst GmbH" grindn soll - und mit der schlaua Kaz orndlich Geld verdiend...
Dies ist eine mit page4 erstellte kostenlose Webseite. Gestalte deine Eigene auf www.page4.com