Dies ist eine mit page4 erstellte kostenlose Webseite. Gestalte deine Eigene auf www.page4.com07.09.2013
Obber so schee wie die Alpn aa sänn - die Sehnsuchd nooch Hof iss bei der Hanna immer nuch vorhandn: emozional nooch ihra Briider und oldn Freindinna - und grobschdofflich nooch Rindfleischwarschd, Wienerla, Brodwärschd, Bressagg und Sulzn. Dessweecher fährd die Hanna olla boa Wochn auf Bsuch in ihr olda Haamed und deggd sich auf der Riggfohrd orndlich mit Wärschd ei, damit'sa in Oberbayern woss Gscheids zern Beißn hot.
Voricha Wochn hot die Hanna widder moll drei scheena Dooch in Hof verbrachd. Fir die Riggfohrd hot'sa dann gleich 40 Boor Brodwärschd kaafd, wall neemlich ihr Kanzlei ols glana "Betriebsfeier" im Berchtesgadener Land a "Grillfest" gebloond hot - und do wolld die Hanna ihrn Ärberdskolleeng amoll a bsondera Freid machn: aufm Grill Hofer Brodwärschd und ganz weid hintn im gleißendn Sonna-Lichd der Watzmann! Damit die Oberbayern die gud gewerzdn Hofer Schbeziolideedn net mit ihrn siißn Weißwurschd-Sembfd versaua, hot die Hanna sogoa a Aamerla "Jackstädt-Senf" mitgebrachd. Und werglich iss olles genauso kumma, wie sich's die Hanna gewinschd hot. Die Kolleeng in ihra Ledderhusn und die Weiwer in die Dirndl woan begeisderd - von die Brodwärschd sogoa nuch merra wie vom majesdädischn Watzmann. "Die Hofer Bratwürste sind einmalig", hot der Hanna ihr Scheff gsochd - und hot innerlich beschlossn, dass'er sedda Leggerbissn kimbfdich aa selber kaafd, wenn'er am Wochnend dahamm grilld. Obber sei Idee hot sich schnell ols Missverschdändnis erwiesn. Der guda Mo hot gedachd, dass'mer die Hofer Brodwärschd driim in Salzburg ban "Hofer" kaafn ko, so haaßt neemlich der "Aldi" in Österreich. Also iss'er iiber die Grenz niiber zur näggsdn "Hofer"-Filiale gfohrn und hot daadsächlich Brodwärschd endeggd, die wossn so ehnlich ausgschaud hamm wie der Hanna ihra.
Obber dess Grill-Fessd iss leider a Flobb worrn! "Ich habe daheim meinen Gästen den Mund wässrig gemacht", hot der Scheff schbeeder zur Hanna gsochd, "aber die waren von der Qualität sehr enttäuscht". Die Hanna hot aweng gschmunzld und hot die Verwechslung aufgegläärd. Sie mussd obber ihrn Scheff hoch und haalich verschbrechn, dass'sa ban näggstn Moll exdra fir ihn originol Hofer Brodwärschd mitbrängd, damit'er dahamm bei seina Grill-Gässd nimmer ols Liing-Beidl do schdedd, bloß wall'er Hofer Brodwärschd aus Versehng mit "Bratwürsten" vom "Hofer" in Salzburg verwechsld hot... Gerch
14.09.2013
Iiber die Derrassn-Diir sänn die Bandiddn in die Wohnung nei und hamm na ganzn Schmugg geglaud.
Seitdem hot der Wolfgang sei Haus geecher Einbruch gsicherd: Iiber a Zeiduhr rassln um bunngd holbzehna amds draußn an olla Fennsder und Diirn audomadisch eiserna Rollladn ro - und wemmer von außn no langd, grichd'mer exdra nuch an eleggdrischn Schlooch, dass ann Heern und Sehng vergedd. Obber dess Sicherungs-Sysdeem iss fei net bloß fir die Einbrecher gefährlich, sondern aa fir na Hausherrn selber - wie der Wolfgang am einga Leib verschbiirn mussd.
Kerzlich hot sich der Wolfgang amds nooch der Ärberd mit drei Schborrdsfreind aufm Dennis-Blaz gedroffn und mit ihna a Dobbl gschbilld. Hinderher ban Duschn hot der Wolfgang a guuda Idee k'habd. "Männer", hot'er zu seina Kumbl gsochd, "mir gänga ezerd hamm zu mir: Ich hob nuch a Fässla Bier im Keller und mir schiirn im Gaddn aweng na Grill oo." Also sänn'sa olla Viera mit zern Wolfgang ganga - sei Fraa woa außer Haus bei ana Freindin.
Während sich die drei Männer draußn im Gaddn um na Grill und die Holzkulln gekimmerd hamm, hot der Wolfgang drinna in der Kichn die Broodwärschd und die Schdeegs ausn Kiehlschrank raus und aufn Disch geleecht. Dann iss'er nunder in san Keller ganga, hot dess Fässla Bier rauf gschlaafd und draußn nebern Grill auferan Schduhl nauf gschdelld. Middn ban Ozapfn hot's auf der Kerng-Uhr holbzehna gschloong - und am ganzn Haus woa a Rassln zer heern, wall ezerd am ganzn Haus die Schallusien wie von Geissder-Hand ro ganga sänn.
"Himml, Oasch und Zwern", hot am Grill der Wolfgang an Blääger gemachd, "meina Schlissl lieng nuch aufm Kichndisch". Er iss sofodd zur Derrassn gewerchd und wolld an der Diir schnell nuch under der Schallusie durch schlubfn, obber do woa scho olles zer schbeed. Wie neemlich der Wolfgang aufm Bauch holb im Wohnzimmer drinna woa und holb mit die Baa nuch hausn auf der Derrassn, hot'na die schwera Schallusie eigeklemmd. Der arma Kerl konnd ezerd nimmer vorwärrds und nimmer zerrigg - und mit Gewalld hot'er sich net befreia wolln, wall sinsd der deira Rolllaadn kabudd ganga wär. Zern Gligg hot sich die eleggdrischa Außnsicherung nuch net eigscholdn, sinsd hätt's na Wolfgang aa nuch die Hoor ganz schee aufgschdelld. "Mir missn mei Fraa oorufn, damit'sa gleich kimmd und von inna die Schallusie widder aufmachd", hot der Wolfgang in seiner misslichn Looch ausn Wohnzimmer raus gebrilld - und seina Freind hamm iibersch Händy die Fraa vom Wolfgang seiner Nood verschdändichd.
Draußn im Gaddn woa inzwischn dess Fässla ogezapfd - und die Kolleeng hamm dess erschda Seidla gleich ihrn eigeglubbdn Kumbl undn durch die Schallusie ins Wohnzimmer nei gschoom. Woss obber unnern Wolfgang goa ganz närrisch gemacht hod: Er konnd durch die offna Kichndiir beobachdn, dass sich sei Daggl iber die roha Broodwärschd und die Schdeegs hergemachd hot, die wossn aufn Disch geleeng woan. "Pfui, Bello", hot der eigeglemmda Wolfgang mehrfach zer san Daggl gebläägd, der woss zwischndarch immer widder moll mit ana Warschd quer im Maul aus der Kichn raus gschbizd hot, "nix Wurschdi fressi!" Obber wie's hold miteran Daggl so iss: Er heerd zwoa, horchd obber net!
Nooch ana verrdl Schdund iss dann die Fraa aufgedauchd und hot ihrn ei'geglubbdn Mo befreid. Ausn Grill-Amd iss mangls Wärschd und Schdeegs leider nix mehr worrn - die woan längsd im Daggl san Moong drinna. "Eich wemmer amoll allaans lässd", hot na Wolfgang sei Olda gegrinsd - und hot denner vier Grill-Schbeziolissdn schnell nuch an Dobf Schbageddi gekochd, damit'sa wengsdns aweng a Underlooch fir dess Fässla Bier hattn...
21.09.2013
Wohln sänn in ana Demogradie wichdich, wall der Birger san Willn ausdriggn ko - und somit auf die Zukumbfd von der ganzn Welld endscheidend Einfluss nimmd. Du allaans beschdimmsd neemlich, ob die Ami demnäggsd in Syrien eimarschiern oder ob endlich die Umgehung nooch Leimitz gebaud werrd. Der Boliddigger, den wossd du dei Schdimm
geem hossd, hälld sich immer hunnerdbrozendich an seina Verschbrechunga - wassd scho: merra Rentn, ka Schdeier-Erhehung, billicha Mietn, kana Ärbertslosn und ka neia Kamera auf Schdaadskossdn! Auf jedn Foll werrd olles schenner und besser - und du konnsd ruich schloofn, wall so a Abgeordnedder na ganzn Dooch von frieh bis schbeed rum werchd, bloß um dir berseenlich a scheens Leem zer garandiern. Dawaal konnsd du dich dahamm in Fernseh-Sessl nei fleezn und mussd dir net dauernd Sorng machn, ob's Geld langd und wie'sd iiber die Rundn kimmsd. Zum Dank fir sedda absolud selbstlosa Volksverdreeder hot jeder Birger die Bflichd, dass'er fleißich zur Wohl gedd und seina Greizla machd. Es iss auf jedn Foll a grußa Frechheid, wemmer auf unnera schwer beschäfdigdn Bolidigger schimbfd oder dass'mer sa goa am Schdammdisch die Schnerbfl nauf und nunder haaßd. Folls sich, woss obber goddseidank ganz selldn vorkimmd, werglich amoll jemand iber so schwarza, roda oder griina Lichtgeschdold ärgerd, ko'er ja san Liebling bei der näggsdn Wohl aweng an Denkzeddl verbassn, indem dass'er sei Greizla beieran annern Kandidadn machd. Heggsdns wenn dich der gfährlicha Virus "Politikerverdrossenheit" derwischd hot, derfsd amoll ausnohmsweis bei ana Wohl dahamm bleim. Oder du reagiersd dann so, wie's lezdn Sonndooch bei der Landtagswohl a Hofer ausn Verrdl gemachd hot. Der Mo hot san Zeddl fir die "Erststimme" leer in die Urne nei gschdeggd - und ban Auszähln hamm die Wohlhelfer ziemlich bleed aus der Wäsch gschaud. Nerchez woa a Greizla gemachd, obber ganz oom aufm Zeddl woa von Hand draaf gschriem: "Jesaja 41, 24". Der Wohlvorschdand hot ols biblfessder Mo gleich aus san Auto "Das Neue Testament" k'hulld. Neigierich hot'er "Jesaja 41,24" aufgschloong - und dann die Bodschafd an die Boliddigger laud vorgelesn: "Siehe, ihr seid nichts, und euer Tun ist auch nichts, und euch zu wählen, ist ein Gräuel." Nichtwähler sänn fei manchsmoll elenda Gribberla...
28.09.2013
Endlich woa in der Schdadt widder moll Schberrmill-Dooch, wo die Leit ihrn iberflissinga Grembl aufm Gehschdeich naus schdelln und abhulln lossn. Im ganzn Verrdl woa dess Graffl hausn vor die Haiser rum geleeng: ausgedienda Gardina-Schdanga und zamm gsessna Soffa, kabudda Kiehlschränk und Nachdkässdla, aufgschlizda Madrazn und rossdicha Audo-Felng. Obber so a Entrimmbelung ko fei aa gfährlich saa - wie der Franz ols Vorschdand vom Gsangverein am einga Leib derleem mussd.
Der Franz hot neemlich am selm Dooch die schrifdlichn Einloodunga zur jährlichn Generolversammlung aanzln min Fohrreedla zer die Vereinsmitglieder gebrachd. Ols Rentner hot'er ja genuch Zeid - und die Bossd iss vill zer deier. Dass'mer sedda Einlodunga ols Brief verschiggd, gibd die Vereinskassa net her. Außerdem hot der Franz seina Zeddl net einfach anonym in die Briefkässdn nei gschmissn, sondern hot die Einlodung immer heggsdberseenlich an der Hausdiir abgeem, wall do konnd'er gleich mit jedn awengla waafn.
Auf seiner Rundfohrd darch die Schdadt iss der Franz aa inera Verrdl kumma, wo iberolln der Schberrmill aufn Gehschdeich rum geleeng iss. Direggd neber so an grußn Haufm mit den oldn Glump hot'er sei Fohrreedla an Zaun no gelahnd und iss mit san Brief darchn Gaddn ins Haus nei ganga, wo'er von san Vereinskamerodn Ludwig gleich zeran Schnäbbsla eigeloodn worrn iss. Während also drinna im Wohnzimmer die zwa Sangesbriider aweng mitnanner iber dess scheena Lied vom "Grünen Kaktus" fillosofierd hamm, iss draußn auf der Schdrassn a fremmer Mo mit seiner Fraa verbei ganga. Der Mo hot nebern Schberrmill-Haufm dess Fohrreedla am Zaun endeggd. "Der Saddl und der vordera Raafn sänn fei nuch in Ordnung", hot'er fachmännisch zer seiner Fraa gsochd, "die mondier ich ab und nimm'sa mit hamm, bevor die Millmänner kumma." Er hot sofodd aus san Audo, dess woss zwa Schdrassn weider gebargd woa, an 7er-Schlissl k'hulld und anschließnd vom Franz san Fohrreedla den schenn Leddersaddl und na vordern Raafn ab-gschraubd.
Wie dann der Franz noochn driddn Schnabbs widder ausn Ludwig san Haus raus kumma iss, hot'er erschd sei ausgschlachds Reedela gsehng - und ganz hindn an der Schdrassn an Mo, der woss samsd Saddl und Vorderrood um die Eggn geboong iss. Der Franz also nix wie hinderher! Am Audo hot'er den unbekanndn Dieb im lezdn Moment nuch derwischd - und dann hot sich dess Missverschdändnis aufgeglärd.
Ganz gligglich iss der Franz mit Saddl und Vorderrood widder zer san Fohreedla zerrigg ganga - obber Dunnerkaal! Inzwischn woan neemlich die Männer von der Schberrmill-Abfuhr do und hamm dess ausrangschierda Reedla ohne Saddl und ohne Vorderraafn gleich mit aufn Lkw aufgeloodn und abdransbordierd - do wärsch fei doch billicher kumma, wenn der Franz die Einloodunga zur Generolversammlung mit der Bossd verschiggd hätt... Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com