Dies ist eine mit page4 erstellte kostenlose Webseite. Gestalte deine Eigene auf www.page4.com03.08.2013
Der Urlaub hot gleich schee ogfanga
Der Edwin lebbd zwoa scho in Rendn, obber er iss a moderna Mensch.
Dahamm erledichd'er seina Iberweisunga bei der Schborkassa am PC mit e-Bänking, er hot a Seniorn-Händy mit exdra grußa Dassdn fir seina diggn Warschd-Finger und weecher seina schlechdn Aang - und lezda Wochn hot'er an mordsdrumm Koffer fir san Urlaub kaafd, obber gleich miteran eiserna Zohlnschloss, damit underwegs am Flughafn oder im Hodell bloß ka Dieb na Koffer aufmachd und na Edwin seina Nylon-Seggla, die Kern-Saafn oder seina drei Hawai-Hemmer raus glaud. "Sechs Ziffern hob'ich sofodd dahamm ols Cood eigeem", hot'er am Schdammdisch derzelld, "obber fei net so a brimmidifa Kombinazion wie mein einga Gebardsdooch, sondern scho aweng woss Komblizierds, wo ka Fremmer draaf kimmd!" Ollerdings kenna sedda bsonders schlau ausgediflda Geheimnummern manchsmoll zum Broblem werrn - wie der Edwin inzwischn selber wass.
Bei der Ankunfd am Flughafn in Antalya hot der Edwin san einbruchsichern Koffer vom Gebägg-Band ro gezerrd und wolld am Ausgang grood am Zoll verbei geh - do hot na a uniformierder Beamter aufk'holdn. "Bitte Koffer auf", hot der derkischa Zellner freindlich gsochd. Der Edwin hot sich in seiner gudn Urlaubslaune sofodd iber sei Zohlnschloss gebeigd, wall'er doch nix Verboodns dabei k'habd hot.Obber dann iss na fei des Lächln gleich verganga: Er hot neemlich na Cood vom neia Zohlnschloss vergessn k'habd! "Legg mich doch greizweis am Oasch", hot'er in Erkenndnis von derra Falln, wo'er ezerd drinna woa, gebrummld. Ihm iss bloß nuch eigfolln, dass die Geheimzohl a wichdigs Daddum woa, obber er wussd nimmer woss fir aans. Noocherernanner hot'er na Gebardsdooch von seina sechs Enklkinner eigeem, dann san Hochzich-Dooch und anschließnd na Scheidungs-Dooch, sogoa die Dellefonnummer vom Werrdshaus hot'er in seiner Verzweiflung browierd - obber dess Schloss iss ums Verreggn net aufganga.
Af zerlezd hot a Zellner a Beißzanga k'hulld und dess Schloss einfach aufgezwiggd. Dann hamm'sa na Edwin san Koffer nooch Heroin und wer-wass-woss durchsuchd - und nadirlich nix gfunna. "Alles in Ordnung", hot der Zellner zern Edwin gsochd, obber iber an seddn Befund konnd der Edwin bloß aweng mit die Zeh gnerschln. Er hot dann san kabuddn Koffer samsd Hemmer, Husn, Jaggn, Sandaln, Soggn, Schnorchl, Daucherbrilln und Flossn nuch a holba Schdund lang ban Zoll debbonierd, wall'er sich neemdro in der Halln ols Ersaz a riesicha Reisedaschn kaafn mussd - mit Reedla zum Rolln, obber ohne moderns Zohlnschloss... Gerch
10.08.2013
Die geheimnisvulln Duschkabina in Usedom
Der Harald aus Neihof iss heier im Urlaub in der gressdn Briiglhiz mit san Wohnmobil auf die Insl Usedom nauf gfohrn, wall an der Ostsee immer aweng a frischer Wind wehd.
Am Eingang voneran grußn Cämping-Blaz hot'er fir 16 Dooch im Voraus die Schdell-Gebiehr fir sei "WoMo" bezohld - und dann hot'er an der Kassa aa gleich 16 Duschmarkn firsch "Sanitärgebäude" grichd. "Da drinnen sind 10 moderne Duschkabinen", hot der freindlicha Aufseher gsochd, "wenn Sie die Marke in den Schlitz gesteckt haben, können Sie in der Dusche den roten Knopf drücken, dann läuft das Wasser".
Amds iss der verschwizda Harald in die "Kabine 1" nei, hot sich ausgezoong und wolld sei Markn in den Schliz schdeggn, obber Dunnerkaal: Außer den roodn Gnobf woa in derra Kabina nix zern finna! Also hot sich der Harald widder ogezoong, iss naus in den Vorraum ganga und hot nooch längern Rumluurn hindn an der Wänd an Audomaadn endeggd, wo a Hinweisschildla olles ergläärd hot: "Hier die Nummer der Duschkabine wählen, dann die Plastikmarke in den Schlitz einwerfen, anschließend die Kabine aufsuchen und den Duschvorgang durch einen kurzen Druck auf den roten Knopf starten. Durch eine Zeituhr wird das Wasser am Ende automatisch abgeschaltet."
Genauso hot der Harald olles gemachd, iss dann in die Kabina ganga, hot sich zern zweidn Moll ausgezoong und auf den roodn Gnobf gedriggd - obber ka aanzichs Drebfla iss ausn Duschkobf kumma. Und wall aa nooch fimfmoll Driggn nix geloffn iss, hot sich der Harald widder ogezoong und iss ziemlich genervd in den Vorraum naus, wo er an annern Urlauber gedroffn hot. "Die Dusche Nummer 1 ist seit ein paar Tagen kaputt", hot der fremma Mo zum Harald gsochd - und der iss verärcherd zu san Wohnmobil ganga und hot a zweida Duschmarkn k'hulld. Am Audomaadn im "Sani-
tärgebäude" dann a neia Versuch: Dessmoll hot der Harald die "Duschkabine 2" gewähld, hot die Markn in den Schliz nei gschmissn - und heerd im selm Momend, wie in der "Kabine 2" aa scho dess Wasser rauschd. Er iss sofodd in die Kabina nei gewerchd, hot sich Husn, Underhusn, Hemm und Soggn ro gerissn, damit'er schnell under den Wasserschdrohl kimmd - obber dann hot'er gebläägd wie a Sau, wall dess Wasser siedend haaß woa. A Gligg, dass sich die Dusch nooch zwa Sekunden scho widder audomadisch abgscholdn hot, sinsd hätt sich der Harald wer-wass-woss verbriehd. Zornich hot'er sich nooch den Inferno zern driddn Moll widder ogezoong, iss naus in den Vorraum - und do iss der Mo von vorhin grod aus der "Duschkabine 4" raus kumma. "Wenn Sie sich beeilen, können Sie sich in meiner Kabine schnell duschn, da läuft noch das restliche Warmwasser, das ich nicht verbraucht habe", hot'er na Harald ogeboodn. Der iss dankboa sofodd nei, hot sich widder naggerd ausgezoong, mit Duschgel ei-
gsaafd - obber wie'er sich grod unter die Dusch schdelln wolld, hot die Zeiduhr abgscholdn. Der Harald woa fix und ferrdich. Von Kobf bis Fuß vuller Duschgel iss'er schblidder-fooser-naggerd aus der Kabina in den Vorraum raus und hot sich neber den geheimnisvulln Audomaadn aneran Waschbeggn dess bichicha Zeich min Handduuch abgewischd. Der Harald iss ja a friedlicher Mensch, obber bei derra Reinigungs-Brozedur hätt'er fei ums Hoor an fremma Mo abgschelld, der woss neigierich von der Diir rei gschaud hot und vorwurfsvull zern naggerdn Harald, der woss sowieso karz vor der Exblosion gschdandn woa, gsochd hot: "Schämen Sie sich, Sie Entblößer! Hier laufen doch auch kleine Kinder herum - wir sind doch nicht auf einem FKK-Gelände..." Gerch
17.08.2013
Scho auf 100 Meeder hamm'sa k'heerd, dass aufm Wiesn-Fessd offnboa der Deifl los woa: Vorn auf der Biehna hot die Kabelln aufgewarzld, dass dess ganza Zelld gewagglt hot, die Leit hamm auf die Bänk und Disch gedanzd - und dess Bier iss durch die Gargln geloffn wie a Wasserfoll.
Karz vor na Eingang zum grußn Zelld iss na Hans und seiner Oldn a bsuffna Mo entgeeng gschwankd kumma. Geecher dess Schlingern auf hoher See hot'er sich mit der
rechdn Händ an san holb vulln Mooßgruuch fessd k'holdn. Mit schwern Zungaschlooch hot'er dess Lied vom "Leipolds Niggl" ge-
greeld. - Und aferamoll iss die Rauschkugl genau vor na Hans und der Erika wie vom Bliz gedroffn umgfolln. Der unbekannda Mo woa wie duud auf der Erdn geleeng
und hot kan Zugger mehr gemachd, bloß dess Bier ausn Mooßgruuch iss na ibersch Hemm und die Husn
geloffn.
Zern Gligg hot die Erika erschd vor ana Wochn ihrn "Erste-Hilfe-Kurs" aufgfrischd - so konnd'sa ezerd mit Hilfe von ihrn Hans den regungslosn Mo sofodd in die "stabile Seitenlage" dreha. Dann hot'sa fachkundich fessdgschdelld, dass am Handgelenk der Bulls nuch vorhandn woa und dass der Mo leichd vor sich hii gerechld hot. "Der schnauft noch, weitere Wiederbelungsmaßnahmen sind nicht notwendig", hot die Erika gsochd - und hot in Gedankn an die 2,8 Bromill von den Saufbruder erleichderd ergänzd: "... Gott sei Dank auch keine Mund-zu-Mund-Beatmung!"
Während dann der Hans zum Fessd-Blaz gewerchd iss, um die Sani zer hulln, hot die Erika den bewussdlosn Mo dauernd an die Baggn gedäddschld und auf ihn eigeredd - und aferamoll schdedd fei die Bierleich auf, schiddld sich aweng, nuschld erchez woss vor sich hie, greifd sich na leern Mooßgruuch und verschwind mit schwerer Schloochseitn in der Finsdernis. Wie die Sani eigedroffn sänn, iss der ganza Schbuuk scho widder verbei gewesn. Olla woan rum gschdandn wie beim Wunner in Lourdes - und es iss bis heid net bekannd, ob der auferschdandna Geissd auf san Hammweech aa nuch in Dorfdeich nei gfolln iss wie sellmoll der "Leipolds Niggl" ...
24.08.2013
Frieher hot'mer sich ja geecher sedda Quälgeissder immer mit chemischa Middl eigschmierd, obber wall's na Hermann seiner Fraa vorigs Johr amoll die rood laggierdn Fingerneegl aufgerolld hot, will'sa sich lieber mit biologischa Abwehrwaffn geecher die elendn Viecher schizn. Sie hot neemlich ineran Film iiber Afrika gsehng, dass dadd die Leit nachds unteran Moskiddo-Nez schloofn. "Older", hot'sa dessweecher zu ihrn Mo gsochd, "sedda Nezer sänn fei goa net deier"- und scho zwaa Doch schbeeder woan der Hermann und sei Fraa dahamm unter an Moskiddo-Nez geleeng wie ineran romandischn Himmlbedd: Afrika am Vogelheerd!
Zwa Nächd lang woa olles wunderboa. Die Fraa hot nimmer rum gejammerd, ka chemischer Geruch mehr in der Schloofschdumm - und ohne an aanzichn Muggn-Schdich sänn'sa zer frieh aus die Federn raus gegrabbld. Obber dann iss dess Wochnend kumma, wo der Gaddnverein immer sei Sommer-Fessd machd - und bei derra Feier hot der Hermann jedsmoll na gressdn Zinder vom ganzn Johr. So woasch aa heier! Wie na die Fraa geecher Middernachd nooch sechs Mooß Bier und drei dobblda Eierlikeer vom Vereinsheim hamm gschlaafd und am Bedd untersch Moskiddo-Nez gschoom hot, woa die Welld nuch einichermooßn in Ordnung: Der Hermann iss sofodd eigschloofn und hot gschnarchd, dass dess ganza Moskiddo-Nez gfladderd hot. Obber scho nooch ana Schdund hot der arma Mo weecher seiner Sauferei 5 Atü Drugg auf der Bloosn k'habd - und ezerd hot sich dess Moskiddo-Nez ols ziemlichs Hindernis erwiesn. Frieher hot sich der Hermann ineran seddn Foll im Finsdern erschd moll vorsichdich auf die Beddkantn gsezd, iss dann aufgschdandn - und im Dungln aufs Klo gedabbd. Obber ezerd woa olles annerschd!
Ban Aufrichdn im Bedd iss der Hermann vor Schregg gleich zamm gfohrn, wall'na des Moskiddo-Nez in der Finsdernis wie a Geisd ibersch Gsichd gschdraafd iss - in san Rausch hot'er doch goa nimmer an dess Nez gedachd. Und dann iss die Baanigg goa ganz ausgebrochn: Der Hermann hot in san Dilirium gedachd, dass na a Dämon umbränga will - und hot mit den Moskiddo-Nez gekämbfd wie sellmoll im Film der Tarzan im Nez von ana Vogl-Schbinna. Mit Händ und Fiiß hot'er gewerchd und um sich gschloong, dass sogoa neemdro sei Fraa ausn Schloof aufgewachd iss und hisdeerisch um Hilfe gschriea hot.
Erschd wie die Schwiechermudder in der Schloofzimmer-Diir erschiena iss und dess Lichd eigscholdn hot, woa der Schbuuk verbei. Der Hermann und sei Olda woan in dess weißa Nez eigewerrd - wie frieher im Fernsehng, wenn der Brofesser Grizimeck in der Serengeti an Leobardn gfangd hot. Der Hermann hot jednfolls des Moskiddo-Nez gleich abmondierd - und bekämbfd die Muggn wie frieher widder mit chemischa Bombn aus der Schbree-Dosn... Gerch
31.08.2013
Ka Wunner, dass inzwischn scho in jedn zweidn Gaddn a mordsdrumm Fass mit Brennnessl-Jauche schdedd - a biologischa Allzwegg-Waffn, damit dess Gmiis, dess Obsd und die Zierbflanzn wachsn wie der Deifl. Die Herschdellung von derra schwarz-brauna Zauberflissichkeid iss einfach und billich: Mer brauchd bloß ineran Fässla a boor Brennnessl nei doo, olles mit Wasser ibergießn, na Deggl zumachn und drei Wochn waddn, damit olles schee gäärd. Wemmer dann amoll in die Brieh nei riechd, driffd dich fassd der Schlooch - geecher den Geruch von derra Brennnessl-Jauchn iss fei echda Sori a angenehms Diffdla.
Ineran Gaddn in Neihof iss scho na ganzn Sommer a vulls Fass mit derra Brennnessl-Brieh rum gschdandn. Wenn die old Alma na Deggl bloß ner a boa Zendimeeder aufgemachd hot, sänn iber den Fässla gleich ganza Miggn-Schwärm bewussdlos abgschderzd, und die Veecherla auf die Baamer hamm sofodd zern Singa aufk'heerd - so hot's gschdunkn.
Lezda Wochn wolld die Alma vom Äbflbaam, der woss direggd neber den Jauche-Fass schdedd, a boa Ässdla abschneidn. Damit'sa obber mit ihra Baam-Scheer weid genuch nauf langa konnd, mussd'sa erschd auf an glann Hogger und dann vorsichdich auf den Holzdeggl vom Fass nauf schdeing - und kaum woa sa droom, fängd die Alma samsd Deggl zern waggln o, schderzd und fälld riggwärrds in die schdingerda Brieh nei. Miehsam iss die Alma widder aus den Boddich raus gegrochn und ins Haus nei gerennd. Drundn im Keller hot'sa ihr zamm gewaachds Glaad und die drobferda Underwäsch ausgezoong und hot dann schblidder-fooser-naggerd an der Diir gelauschd, ob droom dess Drebbnhaus aa werglich leer iss. Und wall'sa nix k'heerd hot, iss'sa im Eva-Kossdiim gschwind nauf in ihr Wohnung gewerchd - hinter sich a Aroma-Wolkn wie aus der Sori-Gruum.
Die Alma hot dreimoll geduschd, obber der Gschdank iss ums Verreggn net gewichn. Dann hot'sa haaß gebadd und ins Boodwasser jedsmoll sogoa a exdra Borzion Rosnduffd nei, obber nooch na Abdroggna hot die arma Fraa immer nuch aweng nooch derra Brennessl-Brieh gemuffld. Am näggsdn Frieh hot net amoll a Orangschn-Vanille-Schaumbood dess elenda Gerichla weg gebrachd. Erscht am driddn Dooch und nooch der sechstn Boodwanna woa der schdrenga Brennnessl-Odör einichermooßn verschwundn, und die Alma hot sich widder unter Leit gedraud - amds im Kino hot'sa sich dann den Film "Das Parfüm" ogschaud... Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com