06.07.2013

Zwa Gloos mit Sooß

Der Heiner ist vor 32 Johr aus Berlin nooch Hof gezoong - und hot inzwischn na Hofer Dialeggd längsd ogenumma.

Ollerdings machd'er ban Redn manchsmoll nuch aweng an Fehler, und dann gibd's a Verwechslung - wie neilich ineran Werrdshaus, wo der Heiner an der wichdinga Frooch gscheiderd iss, ob die Mehrzohl von Glees werglich "Glees" haaßd oder vielleichd "Gloos".

Der Heiner iss mit seiner Fraa am Sonndooch zern Middoch-Essn inera Dorfwerrdshaus aufs Land naus gfohrn. Der Schweinsbroodn mit Glees und Sauergraud woa a Gedichd. Olln Leitna hot's gschmeggd - und die Aushilfsbedienung, a jungs Maadla, iss mit die Beschdellunga kaum nuch noochkumma. Aus jeder Eggn hamm die Gässd ihra Winsch ogemeld: "Frailein, zwa Bier", "nuch a Schisserla Graud bidde" - oder "...zohln!"

Der Heiner hot sich seina feddn Libbn abgewischd und am Bier gedrungn. "Fraa", hot'er dann zer seiner Gunda gsochd, "ich iss ezerd nuch a Glees, wall's goa so guud schmeggd." Und sei Gunda hot geniggd. "Dess iss a briima Idee", hot'sa ihrn Oldn zugschdimmd, "be-
schdellsd fir mich aa nuch aans mit."

Der Ex-Berliner hot die Bedienung her gewungn. "Bidde zwa Gloos mit Sooß", hot'er gsochd. Die Bedienung hot erschd aweng bleed gschaud, wie wenn sa's net gleich verschdandn hätt.

"Zwa Gloos mit Sooß - olles klor?", hot dessweecher der Heiner wiederhoold.

Die Bedienung iss in die Kichn nei und hot gsochd, dass draußn am Disch vier a Bäärla hoggd, die wolln nuch aweng Sooß, obber in zwa Gleeser. Sie hot dabei aweng unglaibich na Kopf gschiddld - genauso wie die olda Fraa am Herd. "Winsch hamm die Leit", hot sich die Kecha gewunnerd - und hot zwa grußa Schebfleffl vuller Sooß in zwa Biergleeser nei gschidd.

Die Bedienung hot dann die Gleeser mit derra feddn, brauna Sooß na Heiner und seiner Gunda aufn Disch hie gschdelld. "Biddeschön, die Herrschafdn - Ihre zwa Gloos mit Sooß!"

Der Heiner hot gschaud wie a Aachhernla, wall'er die Sooß nuch nie ineran Bierglos servierd grichd hot - und wo woan die zwa Glees? Es iss aweng hie und her ganga, dann hot sich dess Missverschdändnis aufgegläärd. Nadirlich hamm der Heiner und sei Fraa ihra zwa Glees nuch grichd - und zwa Verdauungs-Schnäbbsla exdra, schpendierd vom Werrd, der woss am Zabfhohna aweng vor sich hii gegrinsd hot...

13.07.2012

A edls Drebfla - selber zamm gemischd!

Aufm Dorf sänn die Leit scho immer bsondersch schborsam - net amoll bei ana Weinbroob lossn'sa sich zur Verschwendung hii reißn, obwohl ja der Algohol bekanndlich a deiflischa Versuchung iss.

Under die 34 Männer und Weiwer, die wossn kerzlich zur kossdnlosn Weinbroob vom Gsangverein kumma sänn, woa aa die Alma. Mit ihra 75 Johr iss'sa nuch guud auf die Baa - und wenn's aweng woss zern düüdln gibd, schrohld'sa sowieso ibersch ganza Gsichd.

In der Einlodung zu derra Wein-Verkossdung woa drinna gschdandn: "Unser Vergnügungsvorstand Hermann wird als erfahrener Weinkenner sieben edle Tropfen vorstellen: aus Franken je einen Silvaner und Riesling, dann einen Pfälzer Landwein, ein halbtrockenes Moseltröpfchen - und anschließend dürfen wir uns an drei deutschen Rotweinen laben, die unser Hermann präsentieren wird, nämlich einem Württemberger Trollinger, einem süffigen Portugieser vom Rheingau und zum Schluss als Höhepunkt eine rubinrote Domina aus Volkach."

Ezer muss'mer wissn, dass bei der Weinbroob im lezdn Johr olles aweng ausn Ruder geloffn iss, wall die Deilnehmer die edlen weißn und roodn Rarideedn dermooßn schnell nei gsuffn hamm, dass der Hermann mit seina lehrreichn Erglärunga goa nimmer hinderher kumma iss - und am näggsdn Dooch hamm'sa olla an mordsdrumm Bulmes draaf k'habt, dass dahamm die Kobfweh-Dableddn kaum nuch gelangd hamm. Dessweecher hot die Alma dessmoll a guda Idee k'habt: Sie hot neemlich in ihr Handdäschla a Eiwegg-Glos nei gschdelld. Und wenn ihr Gleesla vor der näggsdn Broob nuch net leer woa, hot'sa na Ressd vom Wein net einfach abserviern lossn, sondern sie hot - schborsam, wie'sa iss - under der Dischdeggn ihr Handdäschla aufglabbd und na Wein ins offna Eiwegg-Glos nei gekibbd. "Den dring ich morng Amd dahamm", hot die Alma ihr Nachbera iber die weidera Verwendung vom Wein informierd. So hot also die frisch gebaggna Hobby-Winzerin im Lauf von den langa Amd in ihrn Handdäschla heimlich - und gewissermooßn im Eigenbau - an ganz neia "Cuvee" aus siem verschiedna Weinsorrdn zamm gemischd. Dess Ergebnis woa a blass-rooda Schbeziolideed, wo sogoa a erfohrna Sommelier dess Bukedd und na Gschmagg von den einmoolichn Drobfn net genau definiern kenna hätt. Aa der Abgang hindn am Zäbfla woa a Geheimnis - jednfolls hot die Alma do driiber nie woss derzelld. Ollerdings iss'sa beobachd worrn, wie sa nooch na Genuss von ihrn brivaadn "Chateau migrän" in der Abbodeegn zwa Bäggla Aspirin kaafd hot... Gerch

20.07.2013

Dess hot die Anna folsch verschdandn

Der Rudi und sei Anna hamm ihr Leem lang ollawaal schwer ärbern missn, hamm ihra zwa Gunga groß gezoong und a glans Haisla gebaud - fir an schenn Urlaub hot's hindn und vorn nie gelangd. Obber inzwischn sänn die Kinner ausn Haus - und aufm Schborkonto iss endlich aweng woss draaf.

"Anna", hot der Old neilich gsochd, "mir machn amoll richdich Urlaub - und zwoa flieng'mer nooch Mallorga nunder."

Lezda Wochn woasch soweid! Min Fliecher sänn die zwa Hofer vo Nermberch nooch Mallorga gfloong - und wie sa in ihrn Hodell okumma sänn, wärn ihna boll die Aang raus gfolln! Ringsrum 1000 Holbnaggerda zer frieh, zer middooch und amds - und a Hodell ... dreimoll so groß wie die neia Freiheitsholln.

Dess Zimmer woa werglich mit Balkong und Meeresbligg, so wie's im Broschbeggd gschdandn iss - und middn drinna a Mordsdrumm Bedd, angeblich a franzeesischs, obwohl sa doch in Schpanien gewesn sänn. Und erschd dess Bood - mein lieber Herr Gesangverein! Die Anna woa außer sich. "Dess iss fei so groß wie dahamm unner ganz Wohnzimmer", hot'sa zer ihrn Oldn gsochd, "und dann nuch die grußn Schbiegl!"

Ziemlich miid, obber zerfriedn sänn die Anna und der Rudi am erschdn Amd eigschloofn.

Am näggsdn Morng sänn'sa olla zwa scho um siema nunder in den riesichn Sool, wo's dess Friehschdigg geem hot. Obber kaum hot die Anna ihr dridds Dässla Kaffee drinna k'habt, hot's in ihrn Bauch rumoord - und sie iss schnell nauf aufs Zimmer gewerchd und ins Klo nei. Wie sa nooch ihrn Gschäfdla widder von der Zimmerdiir naus wolld, sichd'sa inna an der Diir a griins Schildla hänga: "Bitte aufräumen".

Unner Anna iss a orndlicha Fraa - und dess lässd sa sich net zwamoll soong! Dass "Bitte aufräumen" bloß a Aufforderung an die Buzkolonna vom Hodell woa, wemmer dess Schild außn an die Diir-Glinkn no hängd - dess hot unner Anna net gewussd. Sie hot sofodd dess kombledda Zimmer aufgeraamd: Erschd hot'sa die Beddn gemachd, dann wolld'sa na Fußbodn awengla kehrn, hot obber leider kan Besn gfunna - dessweecher iss'sa gleich ins Bood nei und hot die Wanna und dess Waschbeggn miteran nassen Handduch sauber gewischd. Und wall'sa nerchez wo an Labbn und annersch Buz-Zeich endeggd hot, mussd'sa fei olles mit ihra Tempo-Daschndiichla und ihra Duubn "Rei", die woss'sa exdra fir na Rudi seina Hemmer mit in Urlaub genumma hot, erledinga.

Wie die Anna nooch ana holbn Schtund endlich mit derra Aufraamerei ferrdich woa, iss'sa widder nunter zer ihrn Oldn ganga, der woss immer nuch im Salon k'hoggd woa - und ziemlich rum gequengld hot, wall doch die Anna ewich net kumma iss. Obber wie na die Fraa dann derzelld hot, woss'sa droom im Zimmer olles machn mussd, iss der Rudi zornich worrn. Er iss an die Rezebzion gewerchd und hot sich laud beschweerd. Fir dess Haufm Geld - hot'er gebläägd - ko'mer scho verlanga, dass'mer die Zimmer net selber aufraama und buzn muss.

Nadirlich hot sich dann olles schnell aufgegläärd, und die zwa Hofer hamm vom Hodell a Fläschla Rotwein gratis grichd - ols Lohn fir der Anna ihrer Ärberd ols Zimmermaadla... gerch

27.07.2013

Der doddaal versaude Urlaub in Jesolo

Der Walter und sei Fraa, die Helga, fohrn seid 23 Johr nooch Jesolo nunter, und zwoa immer ins selba Quaddier. Ihr Bension "Villa Rosa" liechd direggd am Sandschdrand. Auf der Derrassn hamm die zwa Hofer immer na selm Blaz vorn in der erschdn Reiha, wo'mer na bessdn Bligg aufs Meer hot. Do sizn'sa ban Friehschdigg und ban Amdessn - und zer Middooch gänga'sa gern nunder zu ana glan Budn am Schdrand, wo a gewisser Mario "Pizza Margherita" verkaafd.

Obber heier iss ihna der Urlaub fei dichdich versaud worrn. Schuld woa a Fliesnleecher aus Wanne-Eickl, der woss zern erschdn Moll in der "Villa Rosa" san Urlaub verbrachd hot.

Los ging dess Drama gleich ban Friehschdigg. Der Walter iss wie immer um holbachda nunder an Schdrand marschierd und hot auf zwa freia Sonna-Lieng fir sich und sei Helga die blaua Handdiicher nauf geleechd. Dann iss'er zerrigg auf die Derrassn ganga - und do hot sich scho aweng woss zamm gebraud. Genau vorn am middlern Disch, wo der Walter mit seiner Fraa seit 23 Johrna immer gsessn woa, schdand a Schildla: "Reserviert für Signore und Signora Jansen aus Wanne-Eickel".

"Dess gibd's doch net", hot der Walter zer seiner Fraa gsochd, "do hoggn fei fremma Leit an unnern Schdammblaz." In den Moment iss dess Eheboor Jansen aufgedauchd. "Sie hoggn versehendlich an unnern Disch", hot der Walter aweng harmlos, obber miteran bedrohlichn Underdoon gsochd, "do missn'Sa sich ezerd leider wo annerschd hii sezn".

Obber der Herr Jansen hot die Aufforderung abgelehnd: "Wir sitzen hier seit einer Woche und denken nicht daran, den Tisch zu wechseln - basta." Fir na Walter woa dess a Kambf-Ansooch!

"Dess werrn'Sa nuch bereia", hot der Walter gewarnd - und zu seiner Fraa hot'er ganz laud gsochd, woss'er von den Mo häld: "So a Schnerbfl!"

Auf jedn Foll woa die Schdimmung in der "Villa Rosa" ezerd ziemlich schlechd - und der Walter hot bei jeder Geleengheit aus san Eggblaz rum gebelferd. Am Dooch vor der Abreis vom Herrn Jansen hot der Walter san Doodfeind sogoa derwischd, wie der Kerl in oller Herrgoddsfrieh na Walter seina zwa Handdiicher von die Sonna-Lieng schnell weg genumma hot - und schdadds dessn seina einga nauf geleechd hot. Do woa nadirlich Maddäus am Lezdn! Der Walter hot na Jansen na Gauner nauf und nunder k'haaßn - und ums Hoor hätt'er'na links und rechds a boor Maulschelln geem.

Obber dann hot sich der Walter widder in Griff grichd. "Der werrd die 'Villa Rosa' so schnell net vergessn", hot'er zer seiner Helga gsochd, "den gib ich zern Abschied nuch ann mit - Rache iss siiß!"

Am näggsdn Frieh bei der Abreis vom Eheboor Jansen woa der Walter mit seiner Fraa widder auf san oldn Schdammblaz auf der Derrassn gsessn und hot mit zerfriedna Lächln aweng zum Barkblaz niiber gschaud, wo der Herr Jansen an san vull gebaggdn Audo hindn links grood na Raafn wechsln mussd. "Dem hat bestimmt jemand die Luft heraus gelassen", hot sich am Neemdisch a Berliner gewunnerd - und der Walter hot aweng vor sich hie gelächld . . . Gerch