07.06.2013

Ols Frisör im Kuhschdoll

Der Manfred iss Frisör und ärberd die ganza Wochn fleißich in san Salon. Obber aa Moll im Monad baggd'er seina Scheern und Kämm, die Hoorschneid-Maschina und na Feen, dess Rasiermesser, zwa Handdiicher und an graua Nylon-Umhang inera Kefferla nei und fährd naus in Landgreis zer san Bruder Alfons, der woss an glan Bauernhof hot. In der Kichn hängd der Manfred san Bruder na Nylon-Umhang rum und schnadd na dann die Hoor.

Lezdn Middwoch woasch widder soweid. Der Manfred iss min Kefferla los gfohrn und hot im Bauernhaus san Bruder na Umhang um die Schuldern geleechd. Dann hot'er min Hoorschnidd ogfangd. Zur selm Zeid hot draußn im Schdoll der Viech-Doggder a Kuh versorchd, die woss jeda Minuddn a Kälbla zur Welld bränga solld.

Middn ban Hoorschneidn kimmd aferamoll der Doggder in die Kichn rei gewerchd. "Bauer", hot'er zern Alfons gsochd, "mit der Kuh gibt es ein Problem - das Kalb liegt quer drin. Wir müssen sofort einen Kaiserschnitt machen." Dann hot'er min Finger aufn Frisör gezeichd. "Und Sie können gleich mithelfen. Haben Sie Rasierzeug dabei?"

Der Manfred hot geniggd.

"Dann gehen Sie bitte mit hinaus in den Stall und rasieren Sie der Kuh vor dem Kaiserschnitt rundherum die Haare weg, damit bei der Operation kein Schmutz in die Wunde gelangt."

Der Manfred hot in san Leem scho vill Männer eigschaumd und rasierd, obber a Kuh nuch net. Zern Noochdengn woa ezerd ollerdings ka Zeid.

"Kumm, Booder, auf gedd's", hot der Alfons san Bruder gedrängd. Im Schdoll hot dann der Manfred die hochschwangera Kuh mit Bensl und Saafm am Bauch gräffdich eigschaumd und anschließnd fachmännisch min Messer gladd rasierd, damit der Doggder san Kaiserschnidd machn konnd. Die Kuh hot a sedda Frisör-Behandlung aa zern erschdn Moll derlebbd und hot ziemlich bleed zugschaud - wie hold die Kieh so glozn.

Ganz ehnlich iss aa na Manfred ganga, der woss nuch nie in san Leem an Kaiserschnidd gsehng hot. Er woa ols frisch gebaggner Rod-Greiz-Helfer min Rasiermesser und Schaumbensl in der Händ keesweiß an der Wänd gelahnd. Sovill Bluud iss bei seiner Ärberd im Salon nuch nie geloffn - do hot's doch heggsdns amoll a glans Schniddla geem, wenn'er beieran Kundn am Baggn aweng min Messer ausgerudschd iss. Dess bissla Bluud hot der Manfred immer miteran Alaun-Schdiffd schnell widder schdilln kenna. Dass'er auf seina oldn Dooch ols Frisör nuch amoll zum schirurgischn Assisdenndn beieran Bluudbod werrd, hädd'er doch im Draam net gedachd . . . Gerch

14.06.2013

Aggubungdur-Drama im Gewidder

Der "Nero" iss a grußer Hund miteran kullschwarzn, glänzerdn Fell. Wenn der vor dir schdedd und dich oschaud, nocherd schlaggern'der fei die Gnie, und du griggsd Angsdschwaaß auf die Schdern! Obber eingdlich brauchsd dich vor na "Nero" net ferchdn, wall der kan Menschn woss zer Leid dudd.

Er sichd zwoa gfährlich aus, iss obber a ganz friedlicher Hund. San Fraala horchd'er sogoa aufs Worrd. Wenn die Marga sochd "Sizz!!", nocherd hoggd sich der "Nero" sofodd auf seina Hinderbaa und ruggd und muggd sich nimmer - wie wenn'er aufn Bodn nauf gebichd wäa. Bei Gewidder brichd der "Nero" ollerdings in Baanigg aus. Wenn's blizd und dunnerd, zichd'er na Schwanz ei, hubfd san Fraala aufn Schoß und winsld goddserbärmlich.

Lezda Wochn woa die Marga weecher ihra Erdnuss-Allergie ban Doggder. Sie brauchd neemlich amds ban Fernsehng immer aweng woss zern gnabbern, sinsd iss der Film bloß holb so schee. Obber wenn'sa ihra gelibbdn Erdnissla nei gnorbld, nocherd schwilld ihr neierdings der Kobf o und der ganza Kerber juggd wie Sau - a Allergie, die woss sich gewaschn hot! Dessweecher iss'sa auf Embfehlung von ihrer Freindin zeran Doggder ganga, der woss angeblich mit chinesischer Aggubungdur jeda Allergie widder weg brängd.

Also woa die Marga samsd Hund im Waddezimmer von derra Braxis gsessn. Wie sa dann zern Doggder nei mussd, hot'sa ihrn rechdn Zeichefinger k'hoom und zu ihrn "Nero" gsochd: "...und du blabbsd do schee brav sizn, gell!? - Sizz!!" Der Hund hot sich sofodd hie k'hoggd, woa unbeweechlich gsessn wie aus Marmor - und die Marga iss zern Doggder nei ganga.

Im Behandlungsraum mussd sa sich naggerd min Bauch auf a Briddschn leeng - und der Doggder hot ihr geecher die Erdnuss-Allergie vom Hols iibern Buggl bis zern Hindern 41 sedda dinna chinesischa Noodln nei gschdeggd. Am Schluss hot die Marga boll aweng ausgschaud wie a Mordsdrumm Igl. Und während die Fraa a zeidlang ganz ruich dogeleeng iss, damit die Aggubungdur wirrgn ko, hot der Doggder dawaal an san Schreibdisch aweng in seina Underloong rum geblädderd.

Aferamoll blizds und es dudd an Dunnerschlooch - an den schwiiln Dooch woa dess Gewidder sowieso scho dauernd in der Lufd k'hängd. Draußn im Waddezimmer hot der "Nero" vor Angsd aufgejauld, wall'er gedachd hot, dass ezerd sei lezds Schdindla gschloong hot - und in seiner Nood hot'er dringend Schuz ban Fraala gsuchd. Er iss an die Diir gewerchd, wo vorhin sei Fraala dahinder verschwundn iss und hot mit die Bfoodn so lang an der Glinkn dro rum gfuhrwergd, bis die Diir aufganga iss. Dann iss'er mit Gebell ins Zimmer nei gschdirmd, wo sei Fraala schblidder-fooser-naggerd und vuller Schdeggnoodln auf derra Briddschn geleeng iss. Der Hund wäa nadirlich in seiner Doodesangsd am libbsdn aa mit zu san Fraala nauf gschbrunga, obber die hot ihrn "Nero" miteran scharfn Befehl abgewehrd: "Nein!!!" So hot der folgsoma Hund Kehrd gemachd, iss zern Schreibdisch gewerchd - und ols Ersaz blizschnell na Doggder aufn Schoß nauf k'hubfd. Kerl, woa dess aferamoll a Deooder: draußn Blizz und Dunner, drinna die naggerda Marga mit ihra 41 Noddln - und neemdro der Doggder min riesinga Hund aufn Schoß.

Am End mussd fei die Marga naggerd von ihra Briddschn ro und ihrn "Nero" schdreichln, sinsd hätt der Hund ka Ruh mehr geem - heggsdns, dass der Doggder na "Nero" geecher die Baanigg-Addaggn aa a boor von denna chinesischn Aggubungdur-Noodln gsezd hätt...

22.06.2013

Dommaadn wachsn mit Roggmusigg                  

Esoderischa Hobby-Gärrdner behaubdn, dass die Dommaadn besser wachsn, wemmer'sa mit Roggmusigg beschalld. Je lauder dess Schloochzeich und die Bäss wummern, dessdo besser endwiggln sich die Dommaadn! Hinder derra Erkenntnis schdedd angeblich sogoa a wissnschafdlicha Endeggung, die woss lezda Wochn in der Zeidung beschriem worrn iss: "Wenn durch die Rockmusik im Garten alles vibriert, lösen sich die Blütenpollen, fliegen in der Luft frei umher und befruchten die anderen Pflanzen. Bei den Tomaten bedeutet das: Man braucht nicht mehr jeden Tag selber an den Tomatenstauden zu schütteln, um die Befruchtung in Gang bringen".

Ich woa begeisderd und hob sofodd man oldn Kofferradio ins Gewächshaus nei-gschdelld, an sächsischn Sender gewähld und aufgedrehd, dass olles bloß so gschebberd hot. Leider hob'ich obber nooch ana Wochn an die Dommaadn immer nuch ka Wachsduum gemergd - wohrscheins hamm'sa im Radio schdadds Rogg zu vill Vollxmusigg gschbilld, und dess woa nix fir meina Dommaadn.

Obber seitdem dass ich rund um die Uhr "Bayern 3" im Dreibhaisla duudln loss, iss der Erfolch fei deidlich zern sehng. Bloß bei die idalienischn Flaschndommaadn riehrd sich nix - die schbrechn scheind's auf die Roggmusigg net o. Mei Martha hot desweecha a Casseddn vom Pavaroddi besorchd - der schmedderd ezerd exdra fir meina idalienischn Flaschndommaadn jedn Dooch zwa Schdund lang na Verdi seina Opern-Arien, dass dess ganza Dreibhaus zidderd - hoffndlich reagiern die Dommaadn-Gene und sezn dess Wachsduum in Gang, wenn a Landsmann verdrauda Lieder singd!

Ich selber schdobf'mer jedn Frieh zwa Schdebbsl in die Ohrn und geh min Medermooß ins Gewächshaus - jeder Schdrauch werrd aufn Millimeter genau vermessn und in man Kondroll-Biichla doggumendierd. Bei die idalienischn Dommaadn scheind's ezerd fei werglich aweng vorwärrds zer geh, obber die glann Coggdäll-Dommaadn miggern vor sich hie - wohrscheinlich muss ich denner amoll a boa Wiener Wolzer vorschbilln, damit'sa sich aa wohl fiehln.

Ollerdings kimmd a ganz annera Gfohr auf mich zu: Mei Nachber machd'mer Schwierichkeidn! Sei Rechdsanwolt hot'mer gessdern an frechn Brief gschriem, wo drinna schdedd: "Mein Mandant kann nicht mehr schlafen, weil in Ihrem Gewächshaus jede Nacht eine dröhnende Rock-Party stattfindet."

Wohrscheins werr'ich mit meiner biologisch-dynamischn Wachsduums-Meddoodn widder aufheern, sinsd zeichd mich der Nachber oo. Um dess zu verhindern, muss ich hold meine Dommaadn widder mit Kunstdinger aufbäbbln und selber aweng an die Schdaudn schiddln, damit die Bolln flieng...

29.06.2013

Die dreifacha Bedeidung voneran "Schnerbfl"

Unner Dialeggd hot an Haufm Werrder, die gibd's werglich bloß bei uns - oder wo sinsd sochd'mer "grizzln" schdadds "kitzeln", "gnaundschn" schdadds "lamentieren" oder "Fangerlus zeran belibbdn Kinnerschbill.

Die Lissdn mit sedda Begriff iss ewich lang, und bei die Schimbf-Werrder hot die frängischa Fandasie bsonders orginella Noma gfunna: Es gibd an "Werchdeifl" und a "Schnabbs-Waafn", an "Rollerboggl" und an "Daaml", an "Seffdl", na "Gleeskobf"und na "Schnarchzabfn". Under die Männer kennd'mer sogoa nuch a Rarideed, die woss annerschdwo nerchez mehr aufdauchd, neemlich na "Schnerbfl". Wemmer dess Worrd im "Duden" suchd, also im wichdigsdn Lexikon fir die deidscha Schbrooch, dann finnsd under "Schnerpfel" ...nix! Und im Internet werrd von der Suchmaschina bloß ner a aanzlns Werrdshaus in der frängischn Schweiz ausgewiesn, dess woss den schenn Noma "Zum Schnerpfl" hot. Draußn in der weidn Welld scheind der "Schnerbfl" a unbekannds Wesn zer saa - bloß in unnera Geengd gibd's na wie Sand am Meer. Die Schnerbfl hoggn an die Schdammdisch, obwohl'sa net eigeloodn sänn, sie bränga im Männerchor mit ihrer folschn Singerei olla Liedla durchnanner, und in der Ausschuss-Sizung im Fußbollverein gedd der Schnerbfl olln annern aufn Wegger, wall'er mit san ewinga Gewaaf dess anschließnda Schofkobfn vill zer lang naus zeecherd. Wann und wo immer so aner aufdauchd: Er iss und blabbd hold a Schnerbfl!

Obber mit derra Einschdufung ols Nervnseech iss der "Schnerbfl" fei nuch lang net kompledd beschriem. Wemmer sich frochd, wo dess geheimnisvulla Worrd herkimmd, nocherd muss'mer gewissermooßn zum archaischn Urschbrung vom "Schnerbfl" geh - neemlich in die Mezgerei. Der Bligg afera Bluud- oder Leberwarscht, auf a Bressagg-Blunzn, auf Gnagger und Wienerla brängd sofodd die Erleichdung: Dess glana abgschniddna Schdiggla am End von jeder Warschd - dess iss der Schnerbfl, also a Anhängsl, woss ka Mensch mehr braucht. Drozdem iss so a Schnerbfl net ganz iberflissich, wie'mer von derra Kundin wass, die woss angeblich ban Eikaafn am Schluss na Mezger gebeddld hot: "...und baggn'Sa mir fir unnern Hund widder a a boor Warschdschnerbfl ei, obber bidde kana so feddn wie lezds Moll - do hot der Vadder gschbeid!"

A ganz annera Bedeidung grichd nadirlich a "Schnerbfl", wemmer dess maand, woss bei die Mannsbilder im Zwiggl hängd. Im frieha Schdadium, wenn dess Biibla nuch naggerdn aufn Wiggldisch liechd, kennd die Begeisderung bei der Oma, bei Dandn und den Freindinna von der Mudder kana Grenzn. "Ach Goodla, iss dess a buzichs Schnerbferla", schwärma'sa ban Anbligg von den glann Ding - obber 30 Johr schbeeder schleechd die Bewunderung um. "Mit den Schnerbfl iss nimmer vill los", griddisiern die Ehefrauen gern ban Kaffeegränzla - und verroodn net, ob'sa na ganzn Kerl maana oder bloß sei Anhängsl ...