Dies ist eine mit page4 erstellte kostenlose Webseite. Gestalte deine Eigene auf www.page4.com06.04.2013
Der Hans lebbt mit seiner Hermine aferan Derfla im Hofer Landgreis. In der Nachberschaft hamm heier an Ostern gleich siem Gunga und Maadla Konfermazion k'habt - und jedn hot der Hans heggsdberseenlich a Kuveer ibergeem, wo a scheena Gliggwunsch-Kaddn und a nooglneier 20-Euro-Schein drinna woa. Die Gschenker hamm dann ab Griindonnerschdooch zu ana grußn Dank-Aggzion gfiehrt: Noocherernanner hamm die siem Konfirmandn an der Hausdiir geglinglt und siem Bäggla abgeem - in jedn woa drinna: a Egg Schdreisla-Kuung, a Koggos-Kuung, a Quarg-Kuung mit Schoggo-Glasur und a Oster-Zobf. "Ach Gooodla", hot die Hermine die Gfohr sofodd geahnt, "wer soll dä so an Haufm Zeich essn?"
Vorsichtsholber hat'sa scho'moll na Obba gewarnt, der woss droom im erschdn Schdogg wohnt - und sich immer obfert, wenn zer vill Essn gekocht worrn iss. So hamm sich der Hans, sei Olda und der Obba iber Ostern gemeinsom darch die Kuung-Massn geärbert. Am erschdn Feierdooch iss dann der Obba ausgschdieng - er konnt nimmer! Er hot a dermooßn hadda Dromml dro k'habt, dass der Hans scho gedacht hot, er muss na Obba ols Noodfoll ins Grangnhaus nooch Hof nei fohrn. Obber mit ana dreifachn Dosis Abfiehrmiddl hamm'sa na den Großvadder innerlich widder ausgeraamt.
Nooch derra Reddung hamm sich ollerdings die Kuung-Massn aa im Bauch vom Hans und der Hermine langsam in Fichtlgebirgs-Granidd verwandlt - und dann sänn die Minchbercher Verwandtn mit ihra vier Gunger aufgedaucht. Ezerd woa Eier-Beggn ogsocht - und die Verlierer hamm ihra zammgebeggdn Eier jedsmoll na Hans zum Essn geem. Ohne Bohnakaffe und Graiterlikeer hätt der Hans die Eier und den Kuung goa net nunder gebracht - und am Ostermondooch hot'er amds Bilanz gezoong: 37 Schdiggla Kuung hot'er iber Ostern neigschlicht, dazu 18 hadda Eier, vier Kanna Bohnakaffee, a holba Flaschn Ribidu zern Nunderdriggn - und außerdem reichlicha Middooch- und Amdessn mit Lammbroodn und Glees, mit Brodwärscht und Graut, mit Schnitzl und Bommes.
Am Diensdooch frieh woa der Hans wie gfreggt im Bedd geleeng - miteran Beddong-Bauch, mit Schwaaß auf der Schdern und Fleggn im Gsicht. Zwa Schdund schbeeder iss der Doggder kumma und hot na Hans dess Ergebnis von seiner Undersuchung mitgedaalt: "Blutdrugg 231, Cholesterin 528, Zucker 340, Eiweißschock und schwerste Blähungen!" Der Hans hot a Schbrizn und a boor Dableddn gricht - und die Hermine musst im Beisein vom Doggder na iibrich bliema Kuung in der Diefkiehl-Druha eifriern, die ressdlichn Ostereier in Mill-Aamer nei schmeißn und na Graiterlikeer und die Kaffeekanna weg schberrn. Zwa Dooch hot der Hans nuch gebraucht, bis'er widder auf die Baa gschdandn iss. So hot fir ihn die "Auferstehung an Ostern" heier leider bloß a grobschdofflicha Bedeitung k'habt... Gerch
13.04.2013
Am Schdammdisch sänn'sa zer Dood derschroggen, wie der Hermann die Noochrichd aus der Zeidung vorgelesn hot: "Das seit 1516 unveränderte Reinheitsgebot sieht vor, dass deutsches Bier nur Wasser, Malz, Hopfen und Hefe enthalten darf - und sonst nichts. Jetzt fanden die Wissenschaftler des Weihenstephaner Forschungszentrums heraus, dass im Bier auch Arsen enthalten ist." Arsen kenna die Schdammdisch-Briider doch bloß aus die Grimmis im Fernsehng, wenn Weiwer ihra Männer vergiffd hamm - und ezerd soll die deedlicha Gfohr aa ausn Werrd san Zabfhahn fließn!?
"Miich leggsd am Oasch", hot der Hermann selber die gfährlicha Meldung kommendierd. Ols Vorschdand vom Schdammdisch "Immer heiter" hot'er in der Vergangaheid zwoa scho eddlicha Bier-Skandale iberschdandn - sellmoll sogoa die leemsgfährlichn "Nitrosamine", die wossn angeblich im Bilsner drinna woan und jedn Bierdringer um die Eggn bränga -, obber bei "Arsen" iss'er werglich keesweiß im Gsichd worrn. Gligglicherweis hot die Zeidung obber gschriem, dass'mer erschd dann na Leffl abgibd, wemmer hinderernanner 5000 Seidla gsuffn hot - und dess schaffd net amoll der Hermann, der woss weecher san enorma Darschd na Schbiznoma "Japanischer Wunderschwamm" hot.
Jednfolls iss die Schdimmung im Werrdshaus gleich widder gschdieng, und die Männer hamm sich angesichds derra Entwarnung sofodd freidich zugebrossd. "Ich bin fei froh, dass'mer vor den Arsen ka Angsd hamm missn", hot der Werrd gsochd, "sinstd hädd'ich ja man Loodn zuschberrn kenna!"
Am End hot sich die Schreggns-Meldung goa ganz in Wohlgefalln aufgeleesd. "Um Mangelerscheinungen zu verhindern, braucht der Körper für einen ausgeglichenen Haushalt täglich 5 bis 50 Mikrogramm Arsen", hot der Hermann widder aus der Zeidung ziddierd - und die ganza Drubbn am Schdammdisch woa begeisderd, dass der menschlicha Arsen-Haushold dank na Bier in Harmonie iss. Mir missn uns also net ferchdn, dass'mer nooch na driddn Seidla scho na Dood ins Aach schaua - sondern mir helfn bloß unnerer Gsundheid, wemmer uns im Werrdshaus min Bier aweng Arsen zufiehrn... Gerch
20.04.2013
Der Gaddnhelfer woa a echder Schdinger!
Ezerd gibd's im Gaddn widder vill Ärberd: olds Laab liechd rum, der Roosn muss verrdikuddierd werrn, aufm Gmies-Beed wucherd dess Ungraud - und ban Umschdechn derf'mer net vergessn, na Pfeermissd mit in die Erdn nei zer mischn.
Ausgerechnd in derra wichdinga Zeid hot sich mei Martha lezda Wochn ban Debbich-Globfn die rechda Händ verschdauchd - sochd'sa jednfolls! Ich selber ko leider net helfn, wall mir mei Doggder amoll vor fimf Johrna ban Schoofkobfn im "Schwarzen Ross" embfohln hot, dass ich mich im Friehjohr net draußn in der Nadduur rum dreim soll - weecher denner Bolln, wall ich in der Noosn und in die Aang scheinds aweng allergisch bin. Wenn jednfolls im Gaddn olles zern Blieha ofängd, zieh ich mich immer ins sichera Werrdshaus zerrigg, dess iss geecher Bolln-Fluuch herrmeedisch abgeriegld - a sedda Vorsorch bi'ich meiner Gsundheid schuldich.
Obber die Ärberd im Gaddn machd sich ja net von selber! Dessweecher hammer an Mo kumma lossn, der woss in der Zeidung fir 16 Euro bro Schdund aweng a Beschäfdigung gsuchd hot. "Jawoll, Massder", hot der Mo am Dellefon gsochd, "am Mondooch frieh bungd achda bi'ich do - und dann werrd los geleechd, dass die Fezn flieng."
Am Mondooch um achda woa leider kaner do. Erschd geecher elfa hot's draußn geglingld. A derrs Männla schdand in der Diir. "Es sänn a boor Minuddn schbeeder worrn", hot'er sich endschuldichd - und a Bierfähnla iss'mer an die Noosn gezoong, "obber ich bin gesdern Amd nuch aweng aufm Werrdshaus-Schduhl bichn gebliem."
Guud, hob'ich mir gedachd, sowoss ko jedn amoll bassiern!
Also bi'ich mit den Mo ninder in unnern Gaddn ganga und wolld'na in die Ärberd eiweisn. Obber do hot'er gleich seina Händ k'hoom. "Schdobb, Massder", hot'er gebremsd, "erschd miss'mer dess Grundsäzlicha beschbrechn: Ich brauch auf jedn Foll aweng an Schduhl zern Ausruha, wall ich's neemlich arch im Greiz hob - und a Kässdla Bier kenna'Sa am bessdn do driim nebern Schubfn hie schdelln, do iss schee Schaddn, dann werrd dess Bier net zer schnell warm."
Ich hob ja inzwischn dess Gfiehl k'habt, daß bei den Mo dess Bier sowieso net lang rum schdedd. Und wie dann mei neier Gaddnhelfer gsochd hot, daß'er weecher san Greiz auf goa kan Foll a Schaufl olanga derf, sondern die hadda Erdn bloß im Sizn mit ana "Drehgabel" aweng aufloggern ko, woa endgildich gloa, dass mir do an richdinga Schdinger derwischd hamm.
"Und zur Brodzeid", hot'er dann nuch gforderd, "meecherd ich vier Laabla, wenn's gedd Schdella - zwaa mit gekochdn Schingn, aans mit Salami und aans mit Leberkees. Und bidde zwa siiß-saura Gargn."
Nooch derra Aufglärung hot'er sich a Zigereddn ogezundn. "So, Massder", hot'er gsochd, "dann hädd'mer olles beschbrochn, woss wichdich iss - ezerd muss ich erschd moll aufn Abbord, wo issn der bei eich?"
A holba Schdund hot's gedauerd, bis dass der Mo nooch san Gschäfdla widder ausn Klo raus kumma iss - und dann hob'ich zer ihn gsochd, dass sich aa mei gebloonds Gschäfdla mit ihn endgildich erledichd hot... Gerch
27.04.2013
"Gehirn-Optimierung" mit rumänischn Rodwein
Dess Gehirn voneran normoln Menschn wiechd gnabb drei Bfund, obber na Rentner Franz seins schäzn die Werrdshaus-Briider auf heggsdns 800 Gramm. "Der Schrumpfungsprozess beim Franz", hot a zugewanderder Berliner Lehrer neilich am Schdammdisch erglärd, "liegt an seinem jahrelang starken Bier- und Schnapskonsum". Ban Schoofkobfn fälld dess Zammschnarrn im Kopf fei goa net auf, obber wenn der Franz an Wiz derzelld, nocherd mergd a jeder, dass zwischn na Franz seina zwa Ohrn aweng zer vill Luffd drinna iss - er muss neemlich ban Derzelln middn drinna aufheern, wall'er nimmer wass, wie der Wiz weider gedd. Und dahamm iss na Franz sei Hirnschwächn aufgfolln, wie sei Enkerla bei die Hausaufgoom gfrochd hot: "Opa, wie vill issn 3 moll 4?" - und der Franz hot nooch ana langa Denk-Bausn ols Ergebnis gsocht: "14".
Seitdem macht sich der Schwiechersohn, der woss ols "Marketingstrategie-Berater" in ana grußn Bank ärberd, ernsda Sorng um na Franz. "Du musst unbedingt eine Optimierung deines Hirns durch Neuro-Enhancement beginnen", hot'er na Franz embfohln, "da gibt es neuerdings sogar Pillen, die wirken wie Doping auf die Hirnzellen."
Obber im Werrdshaus hamm'sa gsochd, dass a Gleesla Rodwein aa sehr guud firsch Hirn saa soll - a Erkenndnis, die woss na Franz vill lieber iss wie na Schwiechersohn seina moderna Dableddn. Jednfolls iss der Franz sofodd ineran Subbermargd ganga und hot sich ols Aufgallobb fir sei "Gehirn-Optimierung" vier Deddra-Bagg rumänischn Rodwein kaafd, neemlich die legendära "Schwarze Mädchentraube", wo der Lidder im Sonderangebood 1 Euro 95 kossd. "Der iss schee siiß und briggld aweng auf der Zunga", woa na Franz sei fachmännisch Urdaal - und ezerd kurierd'er san Gehirnschwund jedn Amd ausgiebich mit den geheimnisvulln Dropfn vom Schwarzn Meer. Der Franz iss begeisderd, dass'er sei "Gehirn-Optimierung" ganz ohne Schborrd, ohne Viddamine und ohne dauernda Greizworrd-Räädsl schaffd. Do nimmd'er sogoa in Kauf, dass'er jedn Frieh nooch na Aufschdeh immer dess Gfiehl hot, dass'na jedn Moment der Kopf exblodierd... Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com