Dies ist eine mit page4 erstellte kostenlose Webseite. Gestalte deine Eigene auf www.page4.com02.02.2013
Wall dess Heizeel so deier iss, hot sich der Ludwich entschlossn, dass dahamm firsch Wohnzimmer extra nuch a Kanona-Eeferla kaaft werrd. "Dess schiern'mer mit Holz, dann schboan mer an Haufm Geld", hot'er zer seina Fraa gsocht - und gleich ergänzt: "Außerdem iss so a Holzfeier a biologisch einwandfreia Wärm, dess iss guud firsch Gliima!"
Also iss der Ludwich auf sämtlicha Floh-Märkt rum gschlichn - und werglich: Er hot so a olds Kanona-Eeferla gfunna und fir 65 Euro samst Ofnrohr mitgenumma. Obber do iss dess Deooder scho los ganga. Gemeinsom min Händler wollt neemlich der Ludwich den glann eiserna Ofn in san Kofferraum nei wuchtn, do iss'na dermooßn ins Greiz gfohrn, dass'mer san Schmerznsschraa nuch drei Schtraßn weider k'heert hot. Und dahamm nuch amoll desselba ban Ausloodn und Neidroong ins Wohnzimmer. Zwa Nachbern musstn fei mit zulanga, sinst hätt der Ludwich dess schwera Ding goa net ins Haus nei gebracht. Und ban hie und her Ruggn am Kamin hot der Ludwich olla boor Sekundn vor Schmerzn gebläkt wie a Gschdochner, bis dess Eeferla endlich an der richtinga Schdell gschdandn woa.
Obber dodermit woa dess Drama fei nuch lang net zer End. Etzert hot neemlich der Ludwich festgschdellt, dass seine Holzscheidla vill zer gruß fir dess schmola Ofndiirla woan - und er musst draußn im Schupfn erscht moll sei ganz Holz in glennera Scheidla haggn. Nooch derra Ärbert hot der Ludwich dess Gfiehl k'habt, dass a Dampfwalzn iber ihn drieber gfohrn iss - und sei aanzicher Droosd woa dess olda Hofer Schbrichworrd: "Schnupfn und Holzhaggn schdärkt die Oaschbaggn."
Amds hamm'sa dann dess Kanona-Eeferla zern erschtn Moll ogschiert, obber etzert iss der Ärcher gleich weider ganga. Aus jeder Ritzn von den oldn Eeferla iss der Raach raus gezoong, dass na Ludwich und seiner Oldn dess Wasser aus die Aang geloffn iss. "Unner Kamin zicht net gscheid", hot der Ludwich gejammert - und ols Schutz vor den Dräänagas-Angriff hamm'sa olla zwa ihra Mobedd-Brilln aufgsetzt, die woss sei Olda aa immer firsch Zwiebl-schndeidn nimmt. Na ganzn Amd iss fei der beißnda Raach darchs Zimmer gezoong. Der Ludwich und sei Olda woan aufm Kannabee k'hoggt und hamm ban "Tatort" ihra Schutzbrilln draaf k'habt, sinst hättn'sa goa net sehng kenna, wer der Merrder woa. . . Gerch
09.02.2013
In Europa werrd seit ana Wochn der gressta Fußboll-Skandal oller Zeidn aufgedeggt. "Alleine in Deutschland", hot die Zeidung gschriem, "stehen 70 Partien unter Verdacht. An den Manipulationen und dem Wettbetrug sollen 151 Vereinsfunktionäre, Spieler und Schiedsrichter beteiligt gewesen sein."
Die Meldung hot aa ineran Dorf im Hofer Landkreis Alarm ausgeleest. Na Noma von den Derfla und vom Fußbollverein derf'mer ollerdings net verroodn, wall angeblich nuch ermiddlt werrd. Obber in die beriehmtn "eingeweihten Kreisen" werrd gemunklt, dass unter denner verdächtinga 70 Schbiele in Deitschland aa in unnerer Region aans dabei iss, neemlich ausn Johr 2009 dess Mäddsch "Spielgemeinschaft G. gegen Sportclub S." Dess woa sellmoll zwoa bloß a Schbill in der unterstn Liga vor 32 Zuschauer, obber der Ehrgeiz iss fei do genauso gruß wie in Barcelona oder ban Nermbercher Club. Jednfolls soll zwa Dooch vorher der Vorschtand vom "Sportclub S." san Kolleeng im Nachberdorf G. aufm Händy dess Angebood gemacht hamm: "Wenn ihr uns am Sonndooch gewinna lossd, nochert schbendiern'mer eich a 50er-Fässla Bier, wall dann sämmer in unera Glassn Master - und schteing auf."
Woss die zwa Schlawiner am Dellefon olles beschlossn hamm, do drieber iss effntlich nie woss bekannt worrn. Jednfolls hot sellmoll der Sportclub S. mit 13:1 gwunna - und nooch derra vernichtendn Niederlooch hamm die Verlierer im Vereinsheim dermooßn vill Freibier gsuffn, dass'sa erscht weid nooch Middernacht hamm gschwankt sänn.
Etzert gedd ollerdings den zwa Verhandlungsfiehrern und der kombleddn Mannschaft von der "Spielgemeinschaft G." der Oasch auf Grundeis - aus Angst, dass die Bollizei aweng noochforscht und in den oldn Zeich rum schdiert. "Dess sänn doch kana Verbrecher", hot vorgestern der Vereinswert am Schdammdisch abgewieglt, "die sänn holt sellmoll aufm Fußbollblatz bloß aweng langsamer geloffn - und der Kibber, der Libero und der Linksaußn musstn weecher Bänderzerrunga scho in der erschtn Holbzeid verletzt ausscheidn." Obber gegrinst hot'er doch aweng, der Wert... Gerch
23.02.2013
Vor drei Wochn iss die Oma gschdorm - und letzta Wochn hot der Max a Firma be-
schdellt, dass'sa der Großmudder ihrn Hausholt aufleesn. "Vor alln der Dachbodn und der Keller sänn vull mit lauter oldn Grembl", hot der Max die Firma gleich gewarnt.
Vorgestern zer frieh um siema sänn dann zwa Männer miteran grußn LKW kumma. Bloß der Max woa nuch im Haus, olla annern sänn scho vor ana Schtund in die Ärbert gfohrn.
"Raamt olles schee aus", hot der Max zer die zwa Männer gsocht, "der Oma ihr Wohnung iss in Baderr, ihr Dachkammer iss droom aufm Boodn hintn links und ihr Keller druntn gleich rechts, wemmer nei kimmt. Wenn'der min Ausraama ferrdich sädd, schberrder bidde die Hausdiir zu und schmeisst na Schlissl nei na Briefkastn."
Nooch derra Anweisung iss aa der Max in die Ärbert ganga.
Woss anschließnd ban Ausraama bassierd iss, hot sich hinterher nimmer genau aufglärn lossn - auf jedn Foll hamm die zwa Männer scheinboa "droom hintn links" und "druntn gleich rechts" aweng verwechslt. Ordnungsgemeeß hamm die Mannsbilder jednfolls erscht aus der Oma ihrer Wohnung im Erdgschoss die Meebl raus gschlaaft - und dann hamm'sa droom im driddn Schtogg die folscha Dachkammer ausgeraamt. Gschwitzt hamm'sa wie die Sai, wall'sa jeds Schtigg aanzln iber die schtaala Bodn-Drebbm nunder bugsiern musstn: 14 Kaddong mit verblichna Zeidunga, zwa Schränk mit Sommerglamoddn, sechs Koffer vuller Gscherr, eiserna Schtehlampm, Biecher, Gardinaschtanga und an Haufm Zeich, wo scho die Schbinnaweem dro woan.
Karz vor na Zwelfer-Laitn hamm sich die zwa schwitzndn Männer dann na Keller vorgenumma. "Ach Gooooodla!", hot der ana Mo gleich gejammert. Vor alln die schwera Diefkiil-Druha hot na an Schreggn eigejoochd, dass'er im Gsicht keesweiß worrn iss. "Wemmer die droom hamm", hot'er zer san Kumbl gsocht, "dann mach ich drei Greizla!"
Nochmiddooch um viera sänn die zwa erschepftn Männer endlich mit ihrer schwern Ärbert ferrdich gewesn - und min vull beloodna Laster verschwundn. Obber kaum dass'sa in ihrer Firma eigedroffn sänn, hot scho dess Dellefon geglinglt. Der Max wor dro und hot in Heerer nei gebläkt: "Ihr Schnarchzapfm sädd doch verriggt!! Ihr habt die folscha Bodnkammer und na folschn Keller ausgeraamt! Sofodd zerrigg marsch-marsch und olles widder ausloodn und schee sordiert nauf aufm Bodn und nunter in Keller bränga! Anschließnd werrd dess richticha Zeich abdransboddiert!"
Die zwa Meeblbagger hamm geglotzt wie die Aachhernla. Der Rigg-Dransborrd von den ganzn Geraffl werrd ollerdings nuch aweng dauern - die zwa Exberrdn hamm neemlich sofodd die fristlosa Kindichung eigereicht...
Dies ist eine mit page4 erstellte kostenlose Webseite. Gestalte deine Eigene auf www.page4.com