Dies ist eine mit page4 erstellte kostenlose Webseite. Gestalte deine Eigene auf www.page4.com05.01.2013
In der Silvesternacht woan'sa zer acht um na Disch rum k'hoggt: der Vadder und die Mudder mit die zwa erwachsna Kinner und olla vier Schwiecherleit. Bunkt zwelfa iss auf dess neia Johr mit Broseggo ogschtoßn worrn, und olla sänn sich um na Hols gfolln. Nooch den gemeinsoma Gfiehlsausbruch hamm'sa sich widder hie k'hoggt - und dann hot die Mudder rund rum olla gfrocht, wie's mit die gudn Vorsätz firsch neia Johr ausschaut.
Olla hamm erschtmoll na Vadder ins Visier genumma, und der hot gleich awengla verscheemt in sei Gleesla nei gschaut. "Ich woa heit frieh auf der Wooch", hot'er dann gsocht, ,,und bi fei selber derschroggn: 107 Kilo, mei Leems-Heggstgewicht - ich muss dringend abschbeggn, sinst zerreißts mich nuch." "Dess kimmt vom villn Bier", hot sich sofodd die Mudder nei gemischt. "...und vom Bressagg", hot der Opa fachkundich ergänzt. "...und von die Erdnissla ban Fernsehng", hot der Gunga die Listn vollschtändich gemacht.
Der Vadder hot dief durchgschnauft. "Ich glaab, dess kimmt von olln dreia", hot'er in seiner ganzheidlichn Bedrachdung vor sich hie fillosofiert - und dann hot'er san heroischn Beschluss für 2013 gleich bekannt geem: "Im neia Johr iss auf jedn Foll Schluss mit die zwa Seidla Bier zern Amdessn", hot'er feierlich erglärt. "...und min Bressagg!", hot der Opa san Sempft dazu geem. "...und mit die Nissla", hot der Gunga die Abmoocherungskur vom Vadder kombledd gemacht.
Der Vadder woa mit olln eiver-
schtandn. Er hot sich an den Silvesteramd sowieso mit Brodwärscht, Sauergraut und hinterher mit die gudn Blätzla ziemlich iberfressn und woa in san Sessl drinna k'hängt wie gebrellt. Ineran seddn Moment iss nadirlich jeder anfällich fir guda Vorsätz - und der Vadder hot sich mit san Ranzn, der woss hadd wie Bedong woa, ganz sicher gfiehlt, dass'er die Hungerkur aa werglich durchhält. "Hunnertbrozendich", hot'er verschbrochn und hot ols Beschdädichung die rechta Händ zum Schwur nauf.
An Neijohr hamm'sa bis Middooch gschloofn. Dann iss der Vadder ols Erschter aufgewacht, wall'na der Moong so gegnurrt hot, außerdem iss in san Kopf a Kreisseech geloffn. Und wie die Mudder aweng schbeeder in der Kichn aufgedaucht iss, schtand der Vadder vor na offna Kiehlschrank und hot mit madda Aang nei gschbecht. Drei Minuddn lang hot'er san Schwur von gestern amd nuch eiholtn kenna, dann iss sei Widerschdand zammgebrochn - zwa Rollmebbs und a Seidla Bier woan einfach schdärker. Etzert mussa holt seina gudn Vorsätz widder moll aufs näggsta Silvester verschiem...
12.01.2013
Die Judda lebbt ols Rentnera allaans in ana glann Wohnung in Neihof. Ihr Enkl Kevin, der woss a Ausbildung ols Schlosserlehrling macht, hot seiner Oma auf Weihnachtn a scheena neia Noogl-Scheer gschenkt, damit'sa sich mit ihrn oldn Knipser nimmer so bloong muss, wenn sa sich die Fußneegl schnadd. "Du musst holt bei derra neia Scheer schee aufbassn", hot'er die Oma gewarnt, "die iss neemlich scharf wie a Rasiermesser".
An Hochneijohr amds hot die Judda, bevor sa ins Bedd ganga iss, na Kevin sei Gschenk zern erschtn Moll ausbrowiert. Im Bood hot'sa ihr Brilln aufgsetzt und na linkn Fuß aufn Hogger nauf gschdellt. Dann hot die Judda dess Scheerla in die rechta Händ genumma, hot na Dauma und na Zeichefinger in die zwa Griff nei gschoom und ganz vorsichdich ihra Zehaneegl gschniddn - schee langsam ann nooch na annern, erscht am linkn Fuß und dann rechts. Sie woa von den neia Scheerla begeistert.
Obber Dunnerkaal! Wie sa ferrdich woa und die Scheer widder weg leeng wollt, hot'sa ihrn Dauma nimmer aus den Griff raus gebracht. Wie sa aa gedreht und gezoong hot - do woa nix zer machn. Sogoa mit Saafn hot die Judda ihrn Dauma eigeriem, damit's aweng besser rutscht, obber es woa olles ummasunst: Der Judda ihr Dauma woa in den Griff drinna gschdeggt wie nei bedonniert! Und je mehr dass sa dro rum gezerrt hot, desto merra iss der Dauma ogschwolln. Af zerletzt hot die old Fraa aufgeem. "Morng frieh muss gleich der Kevin kumma und den Griff am Dauma mit der Zanga aufschneidn", hot'sa sich ihrn Bloon zerrecht geleecht. Und dann hot'sa na Dauma samst derra Scheer mit ana Rolln Klo-Babbier eigewigglt - und iber die ganza Erschta-Hilfe-Konschdruggzion an wollna Fausthändschich drieber gezoong, damit ihr dess offna Scheerla im Schloof kana Verletzunga beibrängt, wall'sa sich doch immer so unruich im Bedd rum wälzt.
Goddseidank iss nachts nix bassiert - und zer Frieh hot die Judda sofodd ihrn Kevin ogerufn, dass'er gleich mit ana Beißzanga kumma soll. A holba Schtund schbeeder hot der Schlosser-Azubi sei Oma fachmännisch aus ihrer Nood befreit. Es woa fei a echta Bräzisions-Ärbert, wie der Gunga den eiserna Ring am Dauma von der Oma mit der Zanga aufgezwiggt hot. "Du werrscht amoll a guder Schlosser", hot die Judda ihn Kevin gelobbt, obber der woa iber sei Gsellnschdigg net sehr begeistert, wall'er neemlich der Oma etzert nuch amoll a neia Noglscheer kaafn muss . . . Gerch
19.01.2013
Der Hans hot auf der rechtn Seitn an gschwollna Baggn k'habt: a Schdoggzohn woa auf Eiter gsessn. Drei Dooch hot der arma Kerl dahamm rumgejammert und bloß ner lauwarma Grießbrei gessn, damit auf den grankn Zohn nix Haaß, nix Kolds und ka Drugg no kimmt. Obber am vertn Dooch hot's der Hans nimmer ausk'holtn - und er iss endlich zern Zohnorzt ganga.
"Fei schee vorsichtich saa, Herr Dokter", hot der Hans gewinslt, "wall wenn'Sa an den Zohn aweng folsch no kumma, mach ich kerzagrod nauf an die Deggn!"
Dess hot den Lamentierer nadirlich nix genitzt. Er hot a Schbritzn gricht und zeh Minuddn schbeder woa der Baggnzohn hausn. "Wenn die Wunde verheilt ist, bekommen Sie eine Brücke, damit Sie wieder fest zubeißen können", hot'na der Dokter gedreest.
Also iss der Hans nooch ana Wochn widder in der Braxis erschiena, wall ja fir die Briggn links und rechts neber derra Luggn die zwa annern Zeh abgschliffn werrn musstn. Na Hans hot sich scho vorher aus Angst dauernd die Gänshaut aufgschdellt, wenn'er an die Schbritzn und an dess Geraisch ban Schleifn gedacht hot. Obber dann woa fei olles holb so schlimm - und sogoa na Abdrugg mit derra zeha Massn hot'er ohne Schmerzn hinter sich gebracht.
Vorgestern woa der Hans widder bei san Zohnorzt. Dessmoll sollt ja die neia Briggn browiert und dann fest neizemendiert werrd. Doderzu woa der Hans schdreggs-der-Läng auf den Schduhl geleeng. Der Dokter hot erscht dess Browisorium ro gezerrt und dann die neia Briggn aus Keramigg nauf gedriggt und widder runter, dann aweng dro rum gschliffn - und widder nauf und widder nunter, wall doch die Briggn hunnertbrozendich genau bassn muss. Der Hans hot bei derra Brozedur mit offna Guschn ziemlich gejammert, wenn der Weißkiddl mit der Briggn hintn an die Baggnzeh rum gfingert hot. Aferamoll hot der Hans dess Gfiehl k'habt, dass die klana Briggn ganz hintn am Zäpfla liecht - und dann woa sa weg. Der Dokter hot in Hans sei leera Guschn nei gschaut - und der Walter hot sofodd sei Beferchtung mitgedaalt: "Ich glaab, ich hob'sa verschluggt". Und werglich: Die scheena neia Briggn woa verschwundn.
"Und etzert?!", hot der Hans vuller Angst gfrocht, "dess iss doch a deirsch Ding!"
Der Dokter hot aweng gelächlt. "Essen Sie tüchtig Sauerkraut, dann löst sich das Problem auf ganz natürliche Weise", hot'er gsocht, "Sie müssen halt aufpassen, wenn Sie aufs Klo gehen - Sie wissen schon, was ich meine. Und wenn die Brücke wieder auftaucht, kommen Sie zu mir in die Praxis, dann machen wir weiter".
Der Hans isst seit gestern nix wie Sauerkraut, obber bis etzert noch ohne Erfolch. Moll schaua, woss werrd... Gerch
26.01.2013
Am "Heiligdreikönig"-Dooch hot a Mo aufm Hofer Bohnhof a Erlebnis k'habt, woss unter die Psychologn ols "Déjà-vu" bekannt iss. "Es äußert sich in dem Gefühl, eine Situation schon einmal erlebt, gesehen oder geträumt zu haben. Laut Umfragen hatten 50 bis 90 Prozent aller Menschen schon einmal ein solches Erlebnis", haaßt's ineran Fachbuch.
Schuld an derra Erscheinung in Hof woa der Roland aus Marktredwitz. Der iss an Hochneijohr am Vormiddooch min Zuch nooch Hof rauf gfohrn und hot sich mit san oldn Freind Max ineran Wertshaus aweng die Schtärk ogedrunkn. Nooch na fimftn Seidla Boggbier hot's na Roland scho ziemlich gedreht und er iss mit seiner rod-kariertn Zipflmitzn zern Bohnhof zerrig gschwankt. Am Audomadn hot er sich die Fohrkaddn hamm nooch Rawetz raus gelossn - und wall'er dabei goa so umschdändlich rum gegrabscht hot, hot na neemdro a fremmer Mo genau beobacht. "Schau net so bleed", hot der Roland zer den Unbekanntn gsocht, iss abgedampft und in den Zuuch nooch Rawetz eigschtieng, wo er weecher seina fimf Boggbier sofodd eigeratzt iss. Aufgewacht iss'er, wie auseran Lautschbrecher a Schdimm gsocht hot: "Willkommen in Weiden Hauptbahnhof!" Der Roland iss erschroggn ausn Waggon raus gewercht, hot sich in der Schalterhalln gleich a Riggfohrkaddn nooch Marktredwitz kaaft und iss um 17.14 Uhr in Weiden in den schenn "Alex" eigschtieng - hamm nooch Rawetz. Obber wie der Deifl sei Schbill hot: leider, leider iss unner Boggbier-Freind mit san Zinder gleich widder eigschloofn, hot Rawetz versaamt und iss um 18.23 zern zweidn Moll an den Dooch im Hofer Hauptbohnhof eigedroffn. Von derra Hie- und Herfohrerei hot etzert der Roland an ganz droggna Hols k'habt, dass hintn in der Gargl sei Zäpfla scho ganz schlaff drinna k'hängt woa. Dessweecher hot'er san schdechendn Darscht im näggstn Wertshaus im Bohnhofsvertl mit zwa weidera Seidla Boggbier gelescht. Dann iss'er mit seiner auffällichn rodn Mitzn zum Bohnhof gewagglt und hot sich zern zweidn Moll am Audomadn a Fohrkärrdla nooch Marktredwitz raus gelossn. "Schau net so bleed", hot'er widder zu den Mo neemdro gsocht, der woss scho vor vier Schtundn do gschtandn woa - und der hot etzert mit offna Guschn gedacht, dass'er a Fadda Morgana hot, wall'er doch dess olles scho moll derlebbt hot. Der Roland iss schließlich in Rawetz okumma - und der fremma Beobachter hot sich weecher san "Déjà-vu"-Erlebnis vorsichtsholber moll in der Rehauer Bezirksklinigg ogemeld - aus Angst, dass'er in der Bern nimmer ganz dicht iss . . Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com