Dies ist eine mit page4 erstellte kostenlose Webseite. Gestalte deine Eigene auf www.page4.com04.08.2012
Endlich Ferien! Ollerdings iss der letzta Schuldooch fir mancha Gunger und Maadla nuch amoll a ziemlicher Schdress gewesn - weecher na Zeignis. Ban Bligg in die Giftbläddla schdellt sich neemlich immer widder die entscheidenda Frooch: Wer iss schuld an denner schlechtn Noodn: der Schieler, der Lehrer - oder sogor der Vadder, wall'er sich zer weng gekimmert hot?
Der klaa Willi aus Neihof hot in weiser Voraussicht, woss heier dahamm auf ihn zukimmt, scho zwa Dooch vorher zer seiner Mudder gsocht: "Schdell fei firn Vadder widder dess Kreislauf-Middl bereit, wenn ich min Zeignis hamm kimm - es schaut neemlich net
guud aus ..."
Und wie dann der Bu seina grausoma Noodn dahamm aufn Kichndisch geleecht hot, iss der Vadder wie dess beriehmta HB-Männla rum gschbrunga. Mit hochrodn Kopf hot der Old rumgebläkt, dass die Mudder sofodd olla Fenster zugemacht hot, damit die Nachbern dess Gschraa net heern. Der Gunga iss in derra Aufreechung ols aanzicher ziemlich ruich gebliem und hot ols Entschuldichung immer widder auf die Niederträchtichkeit von seina Lehrer hiegewiesn. "Die rächn sich an mir, wall ich an der rechtn Aangbraua, an der Nosn und am linkn Ohrläbbla gebierst bin", hot er na Vadder seina mehrfachn Vierer und Fimfer schlissich erglärt.
Obber na Vadder hot's in san Zorn die Adern an der Schleefn rausgedriggt wie die C-Schlaich von der Gaddndorfer Feierwehr. Er hot nooch Luft gschnabbt und musst geecher sei Aufreechung gleich moll zwa Konjagg nei schterzn. Sogor der Willi hot etzert Mitleid min Vadder k'habt. "Babba, ruf doch einfach amoll dess Not-Dellefon o", hot'er gsocht, "die hamm doch extra an Hilfsdienst eigericht, wenn's die Zeignisser gibt - do grieng die Eltern kostnlos an gudn Rood."
Obber der Vadder woa inzwischn dermooßn außer Rand und Band, dass die Mudder miteran Drigg eigegriffn hot, wo der Sohn gleich seina Ohrn gschbitzt hot. "Beruich dich ner widder", hot sa zer ihrn Oldn gsocht, "du host doch frieher in der Schul selber zwamoll a Ehrnrundn gedreht." A sedda Enthillung woa firn Vadder endgildich zer vill. Ihn iss schwarz vor die Aang worrn und er hot an Schwächeanfoll gricht. Die Mudder und ihr Bu hamm etzert na Vadder vorsichdich aufs Kannabee geleecht, die Fraa hot na Oldn an koldn Wiggl auf die Schtern nauf - und dann iss der Vadder nooch derra Zerreißprob samft aweng weggedämmert.
Der Gunga hot sich dawaal in san Zimmer bei Häffi-Meddl-Musigg aweng entschbannt... Gerch
11.08.2012
Am Kerchdurm hot die Gloggn um Middernacht zwelf Moll gschloong - und driem im Dorfwertshaus hamm die letztn vier Gäst immer nuch ka Lust k'habt, dass sa endlich hamm gänga. Scho seit vier Schtund hamm'sa Schofkopf gekadd und woan gligglich, wall dess Bier so gud schmeggt und dass ihna drotz der warma Wertshausluft der Hols net ausgedroggnt iss.
A holba Schtund nooch Middernacht hot dann die Werta die vier zammgewaachtn Kaddbrieder zern driddn Moll zum Hammgeh aufgfordert. "Schluss, Epfl, Amen: etzert iss Feieramd! Schaut, dass'der eich schleicht!", hot die Werta in ihrer feinsinnichn Schbrooch zu die Nachtschwärmer gsocht. Obber so einfach brängt'mer a bsuffna Schofkopfrundn nadirlich net naus. "Loss aus unnera leern Biergleeser nuch amoll die Luft raus", hamm'sa gebeddlt - und die Werta hot noochgeem und jedn nuch a Bier eigschenkt. Wall obber die Banda nooch ana Vertlschtund scho widder schdechendn Darscht k'habt hot, iss sa energisch worrn. "Bolizeischtund", hot'sa zer ihra vier Schdammgäst gsocht, etzert iss endgildich Schluss!" Obber die Mannsbilder wolltn ums Verreggn net hamm. "Draußn rengt's Kuhpflatschn", hot der Alois genuschlt, "bei den Wolknbruch kenna'mer auf gor kan Foll naus ins Freia geh!"
Die verzweiflta Werta hot a Angebood gemacht: "Ich fohr eich olla viera mit man Auto hamm". Obwohl fir die Saufbrieder der Hammweech im Dorf kaum länger wie 300 Meder woa, hamm'sa sich iberredn lossn und sänn sa friedlich in der Werta ihr Auto eigschdieng. Ollerdings woa die Fohrt gleich widder zer End: Hinter der zweitn Kurvn gab's neemlich scho widder a "Bollizei-Schtund" - und dessmoll sogoa echt! A Bollizist hot neemlich mit seiner rodn Kelln dess Auto gschdobbt: a Kondrolln middn in der Nacht!
"Ich ko fei gern blosn", hot die Werta sofodd zu die Uniformiertn gsocht, "ich hob neemlich nix gedrunkn und fohr bloß schnell meine vier Schdammgäst hamm".
"Alles in Ordnung", hot der Bollizist erglärt, "aber ihre vier Mitfahrer sind leider nicht angeschnallt - das kostet für jeden 30 Euro". Die vier Nachtschwärmer hamm bleed aus der Wäsch gschaut. "Dess sänn ja in der Bier-Währung 25 Seidla bro Mann!", hot der Alois aufn Beifohrersitz gejammert, "do hätt'mer fei im Wertshaus nuch lang kaddn und saufn kenna..." Gerch
18.08.2012
Der Hans und sei Sabine hamm vor vier Wochn schdandesamtlich k'heiert - und die kirchlicha Drauung woa fir letztn Samsdooch in der Dorfkerng vorgsehng. Na Hans seina Fußbollkamerodn aus der Oldherrn-Mannschaft wolltn am Ausgang von der Kerng Schballier schteh, und fir die anschließnda Feier im Wertshaus iss extra a Ein-Mann-Unterholter angaschiert worrn.
Olles woa subber gebloont, obber am Dooch vor der Hochzich hot der Blitz eigschloong. Der Hans hot neemlich am Freidooch amds um sechsa mit seina "oldn Herrn" nuch a Fußbollschbill gechersch Nachberdorf gemacht - und wie der Deifl sei Gschbill hot: Beieran Zweikampf miteran eisnhaddn Verdeidicher hot sich der Hans dess rechta Knie dermooßn verdreht, dass'er sofodd min Sanka ins Granknhaus gebracht werrn musst. "Genaueres wissen wir erst, wenn alle Untersuchungen ausgewertet sind", hot der Dokter gsocht. "Sie müssen auf jeden Fall über Nacht in der Klinik bleiben." Der Hans hot gleich gebidd und gebeddlt, dass'er gleich zer Frieh widder hamm derf, wall doch um elfa sei Trauung in der Kerng ofängt. "Vielleicht können wir Sie tatsächlich morgen nach der Visite entlassen", hot na der Dokter Hoffnung gemacht - und der Hans hot ibersch Händy gleich san Fußbollkamerodn Wolfgang ogerufn: "Hull mich morng frieh um neina min Auto ab, damit ich die Hochzich net versaam!"
Leider hot sich am näggstn Frieh die Visidde im Granknhaus ewich verzeechert. In der Dorfkerng woan sa olla scho versammlt, bloß der Breitigam hot nuch gfellt. Endlich, endlich iss der Hans direggt ausn Granknhaus vor der Kerng eigedroffn. Barfießich, in karza Husn und im weiß-blaua Dress - also genauso wie gestern bei der Einlieferung ins Granknhaus - iss'er ausn Auto raus kumma. "In den Aufzuch konnst auf gor kan Foll vor na Traualtar dreedn", hot die Schwiechermudder aufgereecht rum gschriea.
"Wassd woss", hot der Wolfgang dann die reddnda Idee k'habt, "mir zwa dauschn schnell unnera Klamoddn: Du gibst'mer dei Fußboll-Zeich - und zichst man Anzuch o." Dann hamm die zwa Schlawiner vor na Eingang schnell ihra Klamoddn gewechslt, woss weecher na Hans san gschwollna Knie fei gor net so einfach woa. Obber schließlich iss der Hans im Wolfgang san Anzuch in die Kerng nei k'humplt - ineran rod kariertn Hemm, im vier Nummern zer grußn Saggo, und die Husnbaa sänn iber die vill zer langa Schuh aufgschlaaft.
Der Organist hot "Ave Maria" gschbillt, die Sabine hot vor lauter Riehrung Rotz zer Wasser gegrinna und der Pfarrer woa ernst und besinnlich - bloß der Wolfgang hot hintn auf der letztn Bänk im Hans san weiß-blaua Fußboller-Dress aweng bleed gschaut... Gerch
25.08.2012
Der Edgor und sei Gerda hamm a boor Dooch Urlaub in Sidtirol gemacht. Oberholb von Brixn hamm sa sich in den molerischn Schdädtla Feldthurns eiquaddiert - und gleich am zweitn Dooch sänn die zwa Hofer in oller Herrgoddsfrieh zu ana Bergwanderung aufgebrochn. Ziel woa dess "Latzfonser Kreuz", a klana Wallfohrts-Kerng auf 2200 Meder Heh - und daneem a uricha Berghiddn, wo'mer an gudn Schbegg, an schenn Rodwein und a siffichs Bier gricht, dass jedn Wanderer scho von Weitn in der ausgedroggntn Gargl hintn dess Zäpfla vor Freid vibriert.
Bei herrlichn Wedder iss also der Edgor mit seiner Oldn zer Frieh im feierrodn Cabrio los gfohrn - in Richtung "Wanderparkplatz am Kühhof". Wie scho der Noma socht, gibts dort an Bauernhof mit an Haufm Viecher. Obber erscht moll gings auf an klan Schträßla schtaal bergauf - und wall's fortner enger und enger worrn iss, hot der Edgor am Schteier scho Blud und Wasser gschwitzt. "Hoffntlich kimmt uns ka Auto entgeeng", hot'er vuller Angst zer seiner Oldn gsocht, die woss ols Beifohrera neemdro selber scho ganz feichta Händ k'habt hot. Der Edgor durft fei gor net dro denkn, dass'er auf derra schmoln Serbentina bei Geengverkehr riggwärts widder nunter bis zu ana Ausweich-Schdell fohrn muss.
Obber dann iss olles nuch vill schlimmer kumma!
Hinter ana scharfn, unibersichtlichn Kurvn musst der Edgor bletzlich vull auf die Brems nauf loodschn, wall vor ihn a boor Kieh auf der Schtraßn geloffn sänn. Schee langsam sänn die Viecher vor na Auto bergauf ganga und hamm denner Hofern na Weech verschberrt. A Vertlschtund lang iss der Edgor in Zeidlupm hinter die Kieh her gezugglt, obber dann iss na olles zer bleed worrn: Er hot a boormoll auf die Hupn nauf gedriggt - und werglich: Die Kieh sänn vor Schregg sofodd schneller geloffn - bloß hintn dro der Schtier iss ausgerasst! Der hot sich rum gedreht, hot dess roda Cabrio wie a rods Duch voneran Dorrero ins Visier genumma und iss mit gsenkta Herner zern Angriff iberganga. Wie in der Schtierkampf-Arena von Madrid hot der zornicha Schtier den blecherna Feind mit Hofer Nummernschild ogschbrunga. Nooch na erschtn Angriff woa im rechtn Koodfliegl a Mordsdrumm Delln drinna, ban zweitn Moll iss der linka Außnschbiegl fimf Meder darch die Luft gfloong - und bei der driddn Addaggn hot dess Viech seina Herner kerzagrod vorn in die Modorhaum nei gebohrt. Dann iss der siegreicha Schtier abgedreht und widder hinter seina Kieh her gedrabbt.
Im Cabrio hot's a Schtigg gedauert, bis sich der keesweißa Edgor und sei Gerda langsam widder aus ihrer Verschteinerung geleest hamm. Dess kabudda Auto hamm'sa dann ban Bauern gemeld - und den sei Haftpflicht hot na Schodn werglich gezohlt. Die zwa Hofer Bergwanderer hamm gor net gewusst, dass ihr Auto sogor geecher Schtierkämpf versichert woa . . .
Dies ist eine mit page4 erstellte kostenlose Webseite. Gestalte deine Eigene auf www.page4.com