Dies ist eine mit page4 erstellte kostenlose Webseite. Gestalte deine Eigene auf www.page4.com04.02.2012
Am Donnerschdooch worn in Neihof minus 16 Grod. "Hoffntlich schpringt unner Auto o", hot der Rentner Alfred aweng besorcht zer seina Hedwich gsocht, "wall doch die Badderie scho aweng schwach iss - und mir missn binktlich um zehna driem im Selber Grangnhaus saa." Dart wolltn die zwa Hofer an Ärbertskolleeng vom Alfred besuung, den wos'sa am Moong obberiert hamm.
Im Auto iss dann genau dess bassiert, woss der Alfred befercht hot. Der Anlosser hot a boormoll "chchch...chch...ch" gemacht - und dann nix mehr. "Scheißkarrn", hot der Alfred gflucht, obber seiner Fraa iss gleich woss ei'gfolln. "Unner Sohn", hot'sa vorgschloong, "iss doch heit frieh zer Fuß in die Ärbert ganga, dessweecher schdedd sei Cabrio nuch in der Garaaschn drinna - mit den fohr'mer etzert nieber nooch Selb, und middooch sämmer widder dahamm."
"A Subberidee", hot der Alfred sei Olda gelobbt und hot sofodd ausn Vorsool na Zindschlissl k'hullt - und dann sänn'sa in den schenn gschlossna Cabrio von ihrn Gunga los gfohrn. Obber bei 130 auf der Autobohn hot der Alfred karz hinter Rehau zer seina Oldn gsocht: "Dreh amoll die Heizung nuch aweng auf. Dess Verdegg iss zwor zu, obber drotzdem zicht's do hinna wie Hechtsubbm!"
Die Hedwich, die woss selber kan Fiehrerschein hot und von Dechnigg nix verschdedd, hot dess Ammadurn-Bredd mit die Haufm Gnepf bedracht. "Dess sicht fei aus wie sellmoll im Flugzeich, wo'mer aufn Riggfluch von Mallorca vorn zer die Pilotn nei'schaua durftn", hot'sa zer ihrn Mo gsocht - und dann hot'sa vorsichtich auf die weißn und rodn Gnepfla rum gedriggt in der Hoffnung, dass's im Auto gleich aweng wärmer werrd. Obber aferamoll iss ban Alfred die linka Fensterscheim ro'ganga, und wie die Hedwich ihrn verkehrtn Gnopfdrugg widder korrigiern wollt, wor scho der Subbergau do: Dess Cabrio-Verdegg iss vollaudomadisch und geraischlos aufganga und miteran klan Schnabber hintn ei'gerasst.
Obwohl der Alfred vor Aufreechung sofodd scharf gebremst hot und ganz langsam gfohrn iss, hamm die zwa Leitla dess Gfiehl k'habt, sie sänn auf ana Antarktis-Exbedizion - der Eiswind iss ihna bloß ner so um die Ohrn gepfiffn! Und wall'sa ums Verreggn na richtinga Gnopf net gfunna hamm, damit sich dess Dach widder schließt, musstn'sa fei im luftinga Cabrio bis zern Barkblatz am Selber Grangnhaus fohrn. Der Alfred und sei Olda worn wie zwa Eiszapfn im offna Zwasitzer gsessn und konntn sich vor Kält kaum nuch riehrn. Obber "Wer den Schaden hat, braucht für den Spott nicht zu sorgen" haaßt a olda Volksweisheid. Jednfolls iss nebern Auto a fremmer Mo aufgedaucht und hot entgeistert auf die zwa Insassn gschaut, die wossn bei minus 16 Grod im offna Cabrio darch die Geengd fohrn. "Hier ist fei das Selber Krankenhaus", hot'er gegrinst, "zur Bezirksklinik hätten Sie schon in Rehau von der Autobahn herunter fahren müssen..." Gerch
11.02.2012
Der Fritz iss seit fimf Johr Widdwer und lebbt ols Rentner ineran schenn glann Haisla in Keditz - net allaans, sondern mit san Daggl "Bello". Der Hund iss a echter Kamerod und libbt na Fritz iber olles! Und wenn der Fritz amoll net dahamm iss, nochert iberkimmt na "Bello" immer a großa Sehnsucht nooch san Herrla. Dann hullt sich der einsoma Daggl in san Schmerz ausn Vorsool na Fritz seina Schlabbn und beißt sa in glana Schdiggla zamm oder er zerleecht im Wohnzimmer widder na marogganischn Debbich oder iberbrieft am deiern Leddersoffa, ob dess Gebiss voneran achtjähringa Daggl nuch in Ordnung iss. Wenn dann der Fritz widder hamm kimmt, wedlt der "Bello" sofodd min Schwänzla und schaut sei Herrla mit den beriehmtn Dagglbligg o, dass na Fritz sei Schdroof-Bredicht ziemlich mild ausfällt. "Du derfst doch net jedsmoll beißi-beißi machn, wenn ich net dahamm bin", socht der Fritz mit erhoobna Zeichefinger zer san Fregger - und miteran "Leggerla" kehrt dann in der Beziehung zwischn Mensch und Hund widder Friedn und Versehnung ei.
Damit der "Bello" gsund blabbt und weiderhin sei Liebeswerk an Bandoffln, am Debbich und am Kannabee fortsetzn ko, lässt der Fritz na Daggl jeds Johr impfn - geecher Leberentzindung und Darmvirus, geecher Schtaupn und Dollwuud.
Letzta Wochn woasch widder so weid: Der Fritz hot na "Bello" im Auto hintn aufm Riggsitz auf a Deggn geleecht und iss zern Tierorzt nooch Hof gfohrn. Obber wie er vor der Braxis gschtandn woa, hot der Fritz gemerkt, dass'er na Impf-Bass dahamm vergessn hot. Also iss'er samst Daggl widder nooch Keditz zerrigg gfohrn - und werglich: der gelba Impf-Ausweis woa in der Kichn middn aufm Disch geleeng. Der Fritz hot na eigschteggt und iss nuch amoll zur Braxis nooch Hof nei gfohrn. Obber Dunnerkaal - etzert woa die Iberraschung fei groß: Der Fritz hot zwor na Impf-Ausweis dabei k'habt, obber der Daggl woa net do! In san Gewerch weecher den Impf-Ausweis hot neemlich der Fritz na Hund dahamm in der Kichn vergessn, wo der arma Daggl vor lauter Liebeshunger inzwischn aferan Schtuhl k'hoggt woa - und am Sitzbolster "beißi-beißi" gemacht hot...
18.02.2012
Na Armin sei Bersonalausweis woa abgeloffn, dessweecher hot'er sich von seiner Fraa dahamm mit der neia "Digitalkamera" foddografiern lossn. Dess Ergebnis woan zwa scheena Bassbildla, wo der Armin iber olla Baggn gschtrohlt hot - und mit denner Foddo iss'er ins Hofer Birgeramt nei ganga. Obber dart hot die Beamtin min Kopf gschiddlt. "Leider erfüllen die Passbilder nicht unsere qualitativen Anforderungen", hot die freindlicha Fraa gsocht. "Wir brauchen für den neuen Ausweis biometrische Fotos."
"Woss haaßtn dess?", wollt der Armin wissn. Ols Antwodd hot die Fraa na Armin die gsetzlichn Vorschriften vorgeleecht, wo er scho ban Lesn im Kopf ganz daab worrn iss. "Das Foto", hot's im schennstn Amtsdeitsch k'haaßn, "muss die Gesichtszüge der Person von der Kinnspitze bis zum oberen Kopfende sowie die linke und rechte Gesichtshälfte deutlich zeigen. Die Gesichtshöhe muss 70-80 % des Fotos einnehmen. Dies entspricht einer Höhe von 32-36 mm von der Kinnspitze bis zum oberen Kopfende. Dabei ist das obere Kopfende unter Vernachlässigung der Frisur anzunehmen. Wegen des häufig nicht eindeutig zu bestimmenden oberen Kopfendes sind Passfotos abzulehnen, wenn die Gesichtshöhe 27 mm unterschreitet oder 40 mm überschreitet."
Na näggstn Absatz in derra Vorschrift konnt der Armin ollerdings gleich iberbläddern, wall'er a Glatzn hot. Do wor neemlich gschtandn: "Bei volumenreichem Haar sollte darauf geachtet werden, dass der Kopf (einschl. Frisur) möglichst vollständig abgebildet ist, ohne aber die Gesichtsgröße zu verkleinern." Und zern Schluss woa nuch ganz genau beschriem, woss der Armin bsondersch beachtn soll: "Das Gesicht muss gleichmäßig ausgerichtet werden, Schatten im Gesicht sowie rote Augen sind zu vermeiden. Eine Darstellung der Person mit geneigtem oder gedrehtem Kopf (z.B. Halbprofil) ist nicht zulässig. Die Person muss mit neutralem Gesichtsausdruck und geschlossenem Mund direkt in die Kamera blicken."
Der Armin hot die Welt nimmer verschtandn. "Mei Großmudder hot immer gsocht, dass'mer freindlich lachn soll, wemmer foddografiert werrd", hot'er derra Beamtin erglärt, obber die iss hadd gebliem.
Also iss der Armin zu an richtinga Foddografn ganga und hot "biometrische Passbilder" machn lossn - ernst, kerzagrod und ziemlich grimmich hot'er etzert in die Kamera nei geglotzt, wall freindlicha Gsichter in unnerer Welt offnbor nimmer erwinscht sänn. Sowoss ko eingtlich bloß denner EU-Bleischtiftschbitzer in Brissl eifolln, wenn sa widder moll zu lang iber na "Neigungswinkel von Gurken" noochgedacht hamm...
25.02.2012
Ols Hobby-Handwerker macht der Alfred dahamm im Haus olles selber: Wänd versetzn, Fliesn leeng, Fenster schtreing, Tiern ausbessern - wo'mer sinst a deira Firma braucht, iss der Alfred immer selber im Einsatz. Kerzlich hot'er im Keller sogor die fimf oldn Funzln geecher moderna Leichtschtoff-Rehrn ausgewechslt. A ganz Wochnend lang hot der Alfred im Keller gewerglt, dann wor'er endlich ferrdich. "Etzert hammer druntn endlich a gscheids Licht", hot'er zer seiner Hannelore g'socht, und hot iber sei erfolgreicha Rebbaradur genauso gschtrohlt wie im Keller die frisch inschdalliertn Leichtschtoff-Rehrn.
Nooch derra Ärbert iss der Alfred vuller Schtolz nauf ins Wohnzimmer ganga und hot na Fernseher eigscholtn. "Moll schaua, wie heit dess Schi-Schpringa in Oberstdorf ausgedd", hot'er zer seiner Oldn gsocht, "unner Severin Freund und der Richard Freitag flieng ja wie die Adler darch die Luft."
Obber Dunnerkaal! Am Fernseher hot'mer schdadds der Schprungschanzn bloß ner Schneefloggn gsehng - und der Doon woa aa net zern heern! "In Oberstdorf herrscht scheints a schwers Schneetreim", hot der Alfred san Gunga erglärt, obber der hot abgwunkn. "Ach Vadder, dess iss doch ka Schneetreim - dess flimmert, wall erchetz woss an unnern Fernseher kabudd iss."
Vadder und Sohn hamm dann wechslweis an olla Gnepf und an der Fernbedienung rum gedriggt, obber es iss nix besser worrn. "Mist", hot der Old gschimpft, "ausgerechnt bei so an indressantn Schi-Schbringa macht der Fernseher die Grätschn. Ich geh etzert nunter in Keller und hull'mer a Bier".
Druntn im Keller hot der Alfred dess neia Licht eigscholtn - und im selm Moment hot der Gunga droom im Wohnzimmer laut gebläkt: "Vadder, dess Schi-Schpringa iss do! Der Fernseher lefft widder."
Obber wie der Olt mit san Fläschla Bier im Wohnzimmer aufgedaucht iss, woan am Fernseher scho widder bloß die Schneefloggn zern sehng. Dann iss die Mudder karz moll nunter in Keller ganga und hot a Bichsn Sauerkraut k'hullt - und sofodd iss droom im Wohnzimmer 20 Sekundn lang dess Schi-Schbringa widder aufm Bildschirm gewesn - ohne Schneefloggn und ohne Nebl. Wie obber die Mudder die Kellerdrebbn rauf kumma iss, hot am Fernseher dess Bild widder gflimmert.
Do iss na Alfred schee langsam die dechnischa Erleichtung kumma: Wenn druntn dess Kellerlicht gebrennt hot, iss droom der Fernseher geloffn - und wemmer druntn dess neia Licht ausgnibbst, woa droom dess Bild weg. "Do muss ich ban Inschdalliern aweng woss verwechslt hamm", hot der Hobby-Handwerker Alfred zugeem - und sei Fraa hot gelacht. "Morng frieh ruf ich gleich a Eleggdrigger-Firma o, die solln dein Murgs widder richtn", hot'sa erglärt - und hot ols Volksmusigg-Fän gleich mit scharfer Schtimm ogekindicht: "Heit amd kimmt aufm driddn Brogramm Blosmusigg ausn Erzgebirch dro - do blabbt auf jedn Foll dess Kellerlicht eigschaltn . ." Gerch
Dies ist eine mit page4 erstellte kostenlose Webseite. Gestalte deine Eigene auf www.page4.com